Tɛbubukasɛ 4 - ONUGBÙ NYƐNYÃ VUVƆ

Kegbu Nɛ Owũsise

¹ Kɛnɛ nɛe de idi, klɛ nɛ mɛ amɛ kedunu tieli kadanɛ li nɛ owũsise. Klɛ olim tutɔpu nɛ gɛ inu lɔ ɖɔ kaɖɔ otsrem ansɛ kaxũlɛ̃ nɛ ɔsɛ, “Wu ɔba ɔkɛ̃, klɛ ɛba kasɛ wɔ kɛgɛ alasɛ kɛ ba nɛ kɛɛ nɛ nɛe de.”

² Kɛbhɛtɛ tili mɛ ko ɛgbla tsoku ɔfufɔɛ mɛ, klɛ nɛ mɛ amɛ bukusiegbu nɛ owũsise kalɛ li gɛ anɔ teli ezhiedzi kalɛa bha.

³ Klɛ anɔ nɛ gɛ edzi ɔklɛ nɛ tɛwɛ̃wɛ̃ mɛ dzi ansɛ eniga. Eniga teli, gɛ edzi ansɛ kɛklãgbu gɛ tã, gɛ kɛ kpɛ buka kpɛ bukusiegbu.

⁴ Bukusigbu afɛtabha nɛ tɔlɛ̃ bhlatɔ kana tierikpoa lɛ nɛ atsya, klɛ nɛ bulɛa bha banɔ shishe afɛtabha nɛ tɛalɛ̃ be zhedzi. Ba kpasɛ bawi fufum klɛ sɛkadzɛdzã bukusiekutu etsri balɛ ada mɛ.

⁵ Denɔ kegbu nɛa bha nɛɛ owũsisefu ɛmuɛ tili de, ili mɛ anɛ subhalɛlɛ. Nɛ bukusiegbu nɛ otugba, kanɛgbɛ tiegene dzi aza tã. Balɛ nu Kpaya ɛfufɔɛ tigene.

⁶ Ɔyɛkɔ plɛnɔ nɛ bukusiegbu nɛ shu kɛdɔ tili li gɛ kɛ wɛ̃ ansɛ aƒu azhuzhɔɛ, yɛmɛ ebhui ansɛ butsyeitsyei. Nɛ kishitɛbha, nɛ bukusiegbu nɛ shu, kɛdɔbhɛbhɛtɛ lulu tɛlɛ̃ kana kalɛ atsya, klɛ ba yɛkɔ awɔ̃hũ ada kɔa lɛ, nɛ otugba anɛ kide.

⁷ Kɛdɔ bhɛbhɛtɛ lulu tutɔpu nɛ dzi ansɛ adzyata, kɛbhla nɛ dzi ansɛ nɛtsyɔɛnye, kɛtramɛ nɛ amɛ alɛ ansɛ anɔdzyrame, kɛlɛlɛ̃mɛ nɛ dzi ansɛ odi gɛ opruru.

⁸ Kɛdɔbhɛbhɛtɛ lulu tɛlɛ̃ kanyaka beglebe tiehlo alɛ kɛlɛ klɛ ba yɛkɔ anhũ ada akana kɛlɛ atsya petee, yɛ buglebe nɛesi tsyɛ la lɛ. Kemuze anɛ elishi la dɛ zukɔlɔ ɖɔ sɛ: “Ishubhubhui, ishubhubhui, ishubhubhui ɛlɛ nu Apalete Kpaya nɛ gɛ Adɛ, gɛ aza, klɛ aka lɛ, klɛ yɛ aba tɛ ba.”

⁹ Kibe lɛ gɛ kɛdɔbhɛbhɛtɛ lulu nɛɛ kɔ ishubhubhui, kabhakpɛkpɛ anɛ ahwɛhuhu kɔ agɛ yɛ ezhidzi bukusiegbu nɛa bha klɛ alɛ ɔyɛkɔ ɔvɛnɔ mabeke mabeke,

¹⁰ banɔ shishe afɛtabha anɛ tɛalɛ̃ nɛ awɔlɛ adɔ nɛ yɛamɛ gɛ edzi bukusiegbu nɛa bha, klɛ ba kpɛ kɛtɔkpuesi kɔ agɛ alɛ mabeke mabeke. Ba yɛkɔ balɛ bukusiekutu nɛ elu bukusiegbu nɛ amɛ klɛ la ɖɔ sɛ:

¹¹ “Wɔ kedziŋɛŋa kalɛ wɔ, bulɔ Apalete anɛ Kpaya, tɛ ɔyɛkɛ ishubhubhui anɛ kabhakpɛkpɛ anɛ kemi, alasɛ wɔ bhɛtɛ kɛdɔnyɛdɔ petee, klɛ ganɔ wɔ tɛdɛdɛmɛ mɛ la bhɛtɛ lɛ klɛ ba mɔ balɛ tɛzɛzam.”