Tɛbubukasɛ 3 - ONUGBÙ NYƐNYÃ VUVƆ

Kɔ Busɔlɛɔha nɛ Saɖisɛ

¹ Kɔ kpayaxwɛdɛ nɛ Saɖis busɔlɛɔha nɛ mɛ sɛ: Ebuia alɛ nu agɛ evunɔ Kpaya ɛfufɔɛ tigene anɛ awɛ̃wɛ̃ tegene nɛ ayɛ. Inyi wɔ ebui bhɛbhɛtɛ, kinyi dzyɔgo lɛ wɔ ahwɛ sɛ ɔlɛ nɛ ɛkpã, pɔ otsi.

² Nyɛmɛ! Kpɛ kɛgɛ gɔ nɛ kemi klɛ kɛsɛsɛ tsi, alasɛ ɛka mɔ wɔ ebui bhɛbhɛtɛ sɛ la na nɛ mɛ Kpaya nɛ amɛ.

³ Kɛlɛ so, baka, wɔ kɛ gɛ ɔtɛ yɛkɛ klɛ onu, ta kɛlɛ atɔ, tɛ otsyina kitem. Pɔ onu gɛ ɔdɛ nyɛmɛ, ɛba ba ansɛ ezi, klɛ ɔtɛ bo ti kibe nɛ gɛ ɛba ba wɔ bha.

⁴ Pɔ banɔ tɛashɛ aka lɛ wɔ ahwɛ nɛ Saɖisɛ gɛ be ke tutru balɛ kɛdɔnyunyumu. Balɛ ba ba ga plɛnɔ mɛ, aza kɛdɔ fufu mɛ, alasɛ balɛ kedziŋɛŋa lɛ alɛ.

⁵ Agɛ ya ŋɛabha, ansɛ balɛ, aba za kɛdɔ fufu mɛ. Ɛtɛ ba tsru yɛ kinyi nɛ bu nɛ ɛkpã keplukpa nɛ mɛ, pɔ ɛba kulu yɛ kinyi nɛ mɛ Aka anɛ yɛ baxwɛdɛ nɛ amɛ.

⁶ Agɛ batɔ alɛ yɛ, tɛ enu kɛ gɛ Ɔfufɔɛ nɛ ootsre busɔlɛha.

Kɔ Busɔlɛha Nɛ Filadelfia

⁷ “Kɔ kpayaxwɛdɛ nɛ Filadelfia busɔlɛɔha nɛ mɛ sɛ: Ebui ɖuɖɔa nɛ alɛ nu agɛ yɛ shu bhui kɛlɛ enu kɛgba nɛ ayɛ, gɛ evunɔ Daviti kedunuaɖɛ. Kɛdɔnɔ nɛ gɛ adanɛ anɔnyanɔ atɛ ba naa da, klɛ kɛdɔnɔ nɛ gɛ ada anɔnyanɔ atɛ ba naa danɛ.

⁸ Inyi wɔnɔ ebuibhɛbhɛtɛ. Di, ɛtɛ yɛkɔ kedunu dɛdanɛ lu wɔ amɛ gɛ anɔnyanɔ atɛ ba na da. Inyi sɛ bugɛganɛ bhli lɛ wɔ ahwɛ, pɔ ɔnyɛna mɛ kibuiɖuɖɔ nɛ ovunɔ klɛ ɔkɔ shɛ̃nahwɛ mɛ kinyi nɛ shu olu.

⁹ Ɛba bhɛtɛ bagɛ nu Satana oxogokɔanɔ, gɛ be kulu shu asɛ nu Yuɖanɛ flogo pɛ be di nu, pɔ be nu betroni, ɛba bhɛtɛ balɛ le be zhiadɔ nɛ wɔ otugba klɛ be be buaɖɔ sɛ ɛpɛɛ wɔɛ bui.

¹⁰ Nɛ kibe lɛ gɛ ɔtɛ nyɛna mɛ tɛtutrɔ nɛ mɛ ovunɔ kɛdzyɛɛ so, mɛ tsyɛ ɛba nyɛna wɔ shɛnɔ nɛ ɔɖa nɛ mɛ gɛ ɔbɔ ba kɔ kebhui kuklu nɛ kanɔ nɛ petee tɛ ba yɛkɔ efeke bagɛ balɛ kesukpa nɛa bha nɛ edi.

¹¹ Ɛɛba kplitaa. Nyɛna kɛ gɛ lɛ wɔahwɛ nɛ mɛ ovunɔ, sɛ tɛ anɔnyanɔ atɛ ba yɛkɛ wɔ bukusikutu.

¹² Agɛ yɛa ŋɛabha ɛba bhɛtɛ yɛ kidriosi nɛ mɛ Kpaya busɔlɛvu nɛ mɛ. Kɛlɛ atɛa shɛ̃nahwɛ kɛlɛ shu. Ɛba ŋlɔmɛ mɛ Kpaya nɛ nyi trɔ yɛa bha, anɛ mɛ Kpaya ɔmagbla nɛ nyi nɛ trɔ yɛa bha, gɛ onu Yerusalɛm vuvɔ, gɛ ezhi edenɔ owũsise nɛ mɛ Kpaya ɔkɔ nɛ aaba, klɛ ɛba ŋlɔmɛ mɛ kinyi vuvɔ nɛ tsyɛ ta yɛ.

¹³ Aanɔ nɛ gɛ batɔ alɛ yɛahwɛ, kɔ yɛ enu kɛ gɛ Ɔfufɔɛ ɔɔɖɔ tsre basɔlɛha.

Kɔ Busɔlɛha Nɛ Laodisea

¹⁴ “Kɔ kpayaxwɛdɛ anɛ busɔlɛha nɛ Laodisea: Ebui ɖuɖɔa nɛ alɛ nu Tɛlɛbɛlɛm nɛ ayɛ, tɛyɛyɛkɛŋa anɛ kɛgba ebuimɔɖɔ, agɛ yɛa ŋa Kpaya kɛdɔbhɛbhɛtɛ nɛa bha.

¹⁵ Inyi wɔ axwɛwɛwa, sɛ ɔdɛ yɔ ɔdɔgɔsɛ ovu kifu. Ɛta pɛɛ sɛ tɛ odzi kɛlɛɔmayɛ ɔdɔgɔsɛ kɛbhlatɔ tili!

¹⁶ So, gɛ ɔdɛ yɛkɔ nɛ lɛmɛ—sɛ ovuifu ɔdɔgɔsɛ ɔyɔ so— ɛba pi wɔ tɛ̃ nɛ mɛ onugbu mɛ.

¹⁷ Ɔɖɔ sɛ, ‘Inu ehoeyielete, ɛtɛ mɔ kɛnɔmdɔ klɛ ɛda zhã kɔ kɛdɔnyɛdɔ.’ Pɔ ɔtɔ mɔɛ lɛ ɔsɛ ɔzhɔlɛ, oku eshutukubui, ɔdɔɛ tsyui, opu anhũ klɛ ɔlɛ zholia nɛ ɔfufɔɛ mɛ.

¹⁸ Ɛkasɛ wɔɛdɔ sɛ tɛ odzi ɔfufɔɛ mɛ sɛkadzɛdzã gɛ be plui nɛ kifu mɛ, sɛ tɛ obo dzi ehoeyielete, nɛ apɔtɛ fufu sɛ tɛ onyumu, sɛ tɛ ɔyɛkɔ ɔda wɔ kɛwɛ̃ buzholia, anɛ bubɔ gɛ ɔbɔ kpɛ anhũm sɛ tɛ ɔzɔɔ mɔ.

¹⁹ Bagɛ balɛ bui mɛ dɛmɛ ɛkpa lɛ klɛ ɛbubɔalɛ. So yɛkɔ trɔ shu, tɛ otsyina kitem.

²⁰ Ɔkɛ̃ nɛ mɛ li! Ili kititi nɛ kedunu klɛ mɛ huahwɛ opupu. Onu gɛ anɔ teli enu mɛ oli mɛ pɛ adanɛ opupu nɛɛ, ɛba tsoku klɛ ɛba ŋa kɛdɔ nɛ yɛ, klɛ yɛ tsyɛ aba ŋa nɛ mɛ.

²¹ Aanɔ nɛ gɛ aŋɛabha, ɛba kɔ yɛ kidzo sɛ tɛ aza mɛ kegbu nɛa bha plɛnɔ mɛ, ansɛ kana gɛ ɛŋɛabha klɛ mɛ zhiza Maka kegbu nɛa bha plɛnɔ yɛ.

²² Agɛ yɛ batɔ alɛ, kɔ enu kɛ gɛ ɔfufɔɛ nɛ ɔɖɔ tsre basɔlɛha.”