Tɛbubukasɛ 22 - ONUGBÙ NYƐNYÃ VUVƆ

Ɛkpã Keni

¹ Ɔkɛlɛ kpayaxwɛdɛ nɛ akasɛ mɛ ɛkpãni anɛ keni, bulɛ mɛ bhui ansɛ kɛdɔbhubhui, bu kpɛ denɔ Kpaya anɛ Obhosheyi nɛ kekusigbu nɛm

² ɔyɛkɔ zhinɔ kidzogbla nɛ kishitɛbha nɛ ɔmagbla nɛm. Nɛ keni nɛ igbigbe tɛbha nɛabha ɛkpãosi torikpo torikpo dzi, gɛ lɛ yu eyu lɔfɔntabha, lɛ yu eyuyu nɛ wele kanyakam. Klɛ osi nɛ awɛlakpa nɛ enu bunya kibekedɔ kɔ amadi.

³ Kibuiɖuɖɔ kpɛ anɔ kanyaka tɛa za. Kpaya anɛ Obhoshieyi nɛe kusigbu nɛ ba za ɔmagbla nɛm, klɛ yɛ baxwɛdɛ na ba dɛ kɛxwɛ akɔ yɛ.

⁴ Ba ba mɔ yɛ amɛ, klɛ yɛ kinyi nɛ ba za balɛ butukpo.

⁵ Elishi atɛa za. Be tie bisi kanɛgbɛ fu ɔdɔgɔsɛ kiwi nɛ fu, alasɛ Apalete Kpaya nɛ aba kɔa lɛ kifu. Klɛ ba ba ŋɛabha ɔkɔ vɛnɔ mabeke mabekem.

⁶ Kpayaxwɛdɛ nɛ etsrem asɛ, “Ebuia nɛ alɛ gɛ ba ba yɛkɛ alɛa bha aŋa klɛ le nu kɛgba. Apalete, batɔnu nɛ ɛfufɔɛ nɛ Kpaya, asɛsɛ yɛ kpayaxwɛdɛ sɛ tɛ akasɛ yɛ baxwɛwa nɛ ebui nɛ gɛ alasɛ tɛ la ba alɛ ɔzakɔ kpataa.”

Yesu Aaba

⁷ “Di, ɛba kpataa! Bayula anɔ nɛ gɛ anyɛna ebui nɛ gɛ ba ɖɔelu nɛ keplukpɛa nɛm.”

⁸ Mɛ, Yohanɛsɛ, mɛ nu anɔ nɛ gɛ enu klɛ amɔ ebuia nɛ. Klɛ gɛ ɛnua lɛ klɛ mɛ mɔa lɛ, ɛwɔlɛ dɔ kpayaxwɛdɛ nɛ butsrukpɔ nu sɛ tɛ ɛkpɛ kɛtɔkpuesi kɔ yɛ gɛ ebu ebuia nɛ akasɛ mɛ.

⁹ Pɔ etsrem asɛ, “Tɛ bhɛtɛ lɛ! Mɛ tsyɛ nu axwɛwa plɛnɔ wɔ anɛ wɔadzyalɛ batɔnu anɛ bagɛ ba nyɛna keplukpɛa nɛm ebui nɛ evunɔ. Kpɛtɔkpuesi kɔ Kpaya!”

¹⁰ Ɔkɛlɛ etsrem asɛ, “Tɛ da ebui nɛ dɔ nɛ ebuiɖuɖɔlu keplukpɛa nɛm, alasɛ kibe nɛ tsuu ba.

¹¹ Kɔ agɛ abhɛtɛ buzizi nɛ aza buzizi bhɛbhɛtɛ nɛa bha; kɔ agɛ abhɛtɛ ebui dudɔɛbo nɛ avɛ alɛa bha aza bhɛtɛ; kɔ agɛ abhɛtɛ kɛdzyɔgo nɛ aza kɛdzyɔgo bhɛbhɛtɛ nɛa bha; klɛ tɛ nɔ kɔ agɛ alɛ ishubhubhui mɛ nɛ aza ishubhubhui nɛa bha.”

¹² “Di, ɛba kpataa! Mɛ kɛbhɛbubuya nɛ lɛ mɛahwɛ, klɛ ɛba kɔ anɔnyanɔ nɛ kɛbhɛtɛ nɛ gɛ abhɛtɛ nɛ nu.

¹³ Mɛ nu Alfa anɛ Omega, Atutɔpu anɛ Agɔgɔɛ, Kesikpɛkpɛ anɛ Tɛbibeke.

¹⁴ “Bayula bagɛ be plu balɛ bawi, klɛ kidzoenu ba za kɔa lɛ nɛ ɛkpãosi nɛ shu klɛ ba ba ga budunu nɛ etsoku ɔmagbla nɛm.

¹⁵ Ɔtsɔ̃ bukudzɔgɛ nɛ li, bagɛ ba bhɛtɛ ihuebui, azhuzhɔlɛ ebui, bagɛ beyianɔ, bagɛ ba bhɛtɛ kɛdɔbhubhɔ anɛ anɔnyanɔ gɛ apɛɛ klɛ abhɛtɛ itrohuhu ebui.

¹⁶ “Mɛ, Yesu, ɛtɛ kpɛ mɛ kpayaxwɛdɛ sɛ tɛ aba yɛkɔ ebuimɔɖɔa nɛ akɔ basɔlɛha. Mɛ nu Ogu anɛ Agɛ ede Daviti mɛ, anɛ Kɛvulɔɛ Wɛ̃wɛ̃ nɛ gɛ tã.”

¹⁷ Ɔfufɔɛ anɛ bunuwãdzɛ nɛ asɛ, “Ba!” Klɛ kɔ agɛ yɛenu nɛ aɖɔ sɛ, “Ba!” Anɔnyanɔ gɛ oniwɛ̃ ɔta, kɔ yɛ aba; anɛ anɔnyanɔ gɛ apɛɛ, kɔ yɛ ayɛkɛ ɛkpãni kɛdɔkukɔ fãa.

¹⁸ Itsre nɔ anɔnyanɔ putɔnɔ gɛ enu keplukpɛa nɛm ebui nɛ asɛ: Onu gɛ anɔ teli aya kibui tili ata alɛ, Kpaya tsyɛ aba ya atrɔ batɔ nɛ gɛ balɛ bui la ɖɔ nɛ keplukpɛa nɛ mɛ nɛ akɔ anɔ.

¹⁹ Klɛ onu gɛ anɔ teli ebe bu ebui nɛ ebuiɖɔlue plukpa nɛmɛa bha, Kpaya tsyɛ ebe bu nɛ kɛgɛ ba na yɛ nɛ ɛkpãeplukpa nɛm nɛ ishubhubhui ɔmagbla nɛm, gɛ alɛ bui la ɖɔ nɛ keplukpɛa nɛ mɛ.

²⁰ Anɔ nɛ gɛ amɔaɖɔ nɛ ebuia nɛ shu nɛ aɖɔ sɛ, “Ee, Ɛba kpataa.” Tɛlɛbɛlɛm. Ba Apalete Yesu.

²¹ Apalete Yesu eshutukubui nɛ aza plɛnɔ Kpaya banɔ. Tɛlɛbɛlɛm.