Tɛbubukasɛ 21 - ONUGBÙ NYƐNYÃ VUVƆ

Yerusalɛm Vuvɔ

¹ Ɔkɛlɛ mɛ mɔ owũsise vuvɔ anɛ kesukpa vuvɔ, alasɛ owũsise tutɔpu nɛ kesukpa tutɔpu anɛ atɛ ba fla, klɛ aƒu nya aƒu ada za.

² Ɛmɔ Ishubhuibhui Ɔmagbla, gɛ onu Yerusalɛm vuvɔ, gɛ ozhide Kpaya ɔkɔ nɛ owũsise ɔɔba, gɛ ba bala kɔ ɔlɛ ansɛ adzɛ pupudi gɛ ba kpɛ bunuwã gɛ ba bala yɛ akɔ yɛenyine.

³ Klɛ mɛ inu olim gɛganɛɛ denɔ kekusigbu nɛ ɔkɔ gɛ ɔɔɖɔ sɛ, “Ɔtsɔ̃ nɛɛ Kpaya tɛzɛza nɛ lɛ plɛnɔ banɔ, klɛ aba za plɛnɔ balɛ. Be be dzi yɛanɔalɛ, klɛ Kpaya nahwɛ nɛ aba za plɛnɔa lɛ klɛ ebe dzi balɛ Kpaya.

⁴ Ebe tsru ɔwɔ̃mɛ nyɔ wɔ̃mɛ nɛ balɛ anhũm. Butsi tɛaza ɔdɔgɔsɛ ishutsitsi pɛ iyuyobibi ɔdɔgɔsɛ tɛpupɔɛ, alasɛ ebui kuku nɛ tɛzɛza nɛm atɛ ba fla.”

⁵ Agɛ yɛ edzi kekusigbu nɛa bha nɛ asɛ, “Ɛbhɛtɛ kɛdɔnyɛdɔɛ lɛ ba dzi kɛvuvɔ!” Ɔkɛlɛ asɛ, “Ŋlɔmɛ kɛdɔɛ nɛ olu, alasɛ ebuia nɛ enu agɛ alɛa bha la ba yɛkɛ aŋa klɛ enu kɛgba.”

⁶ Aɖɔ etsrem asɛ: “Kɛ tɛ bhɛtɛ beke. Mɛ nu Alfa anɛ Omega, Kesikpɛkpɛ anɛ Obekekɔ. Aanɔ nɛ gɛ oniwɛ̃ ɔɔta yɛ ɛba kɔ yɛ awɛ̃ buni edenɔ ɛkpãni nɛ gɛ de tisi mɛ kɛbhɛ mabuya mabuya.

⁷ Aanɔ nɛ gɛ aŋɛabha aba mɔ ɔŋakɔ nɛ anɛ nɛ peteem, klɛ ɛba dzi yɛ Kpaya klɛ ebe dzi mɛ eyi.

⁸ Pɔ efufluni, gɛ ataa yɛkɛaŋa, bagɛ abhɛtɛ atsɔbui, bagɛ eyianɔ, bagɛ abhɛtɛ azhuzhɔlɛbui, bagɛ abhɛtɛ ihuiebui, bagɛ akpɛ kɛtɔkpuesi kɔ kɛdɔbhubhɔ anɛ betroni—balɛ ɛzakɔ nɛ ba za kɛvɔ gɛ tã nɛ kɛlɛ aklãgbu. Kɛɛnɛ kɛlɛ nu butsi bhla.”

⁹ Kpayaxwɛdɛ tɛegene nɛ ɔmɛayɛ teli gɛ evunɔ busugba tugene nɛ gɛ yuku nɛ batɔ tiegene nɛ aba klɛ aɖɔ etsrem asɛ, “Ba, ɛba kasɛ wɔ adzɛ nɛ gɛ bakpɛ bunuwã, gɛ enu Obhoshieyi nɛ yɛedzini.”

¹⁰ Klɛ efekem ashɛnɔ nɛ Ɔfufɔɛ mɛ avɛnɔ butugbla ɖɛɖama tulia bha, klɛ akasɛm Ishubhuibhui Ɔmagbla, gɛ onu Yerusalɛm, gɛ ozhide owũsise nɛ Kpaya kɔ ɔɔba.

¹¹ Lɔ tã nɛ Kpaya ishubhubhui, klɛ ɔlɛ tɛpupudim nɛ za ansɛ kɛsɛkadɔ ŋɛŋɛedzi, ansɛ kɛklãgbu shɛ̃ashɛ̃a, kɛlɛ shu bhui ansɛ azhuzhuɔɛ.

¹² Edri ɖɛɖama gbɛgbla, anɛ budunu tugene lɛ ɔlɛ, nɛ kpayaxwɛdɛ tɛegene nɛ budunu kanyaka. Budunu nɛ shu ba ŋlɔmɛ Izraɛlanɛ amadi lɔfɔntabha nɛ enyi na trɔ.

¹³ Budunu tɔta nɛ kiwiɔyɛkɔa pɛ, tɔta nɛ owuwua pɛ, tɔta nɛ ozhizhia pɛ anɛ tɔta nɛ kiwiɔdɔkɔa pɛ.

¹⁴ Ɔmagbla nɛ kidri nɛ tsri kesikpɛkpɛ edi lɔfɔntabhɛa bha, klɛ nɛ alɛabha Obhoshieyi anɛ banɔkpɛkpɛ lɔfɔntɛabha nɛ enyi nɛ etsri.

¹⁵ Kpayaxwɛdɛ nɛ gɛ aɖɔaɖɔ nɛ mɛ nɛ evunɔ sɛkadzɛdzã kedzyidzyi gɛ ba ba yɛkɔ edzyidzyi ɔmagbla nɛ nɔ, nɛ ɔlɛ budunu nɛ edri nɛ nɔ.

¹⁶ Ɛxãkɔ tɛlɛ̃ ɛlɛ lɛ kɔ ɔmagbla, klɛ bupɛ tɔlɛ̃ nɛɛ kakanyaka ke di dze dɛ kalɛ ɔhayɛ. Edzyidzyi ɔmagbla nɛ kedzyidzyi klɛ amɔ sɛ kapɛ zɛzɛ tidzidzem lɛ ɛdzrɔkɔ 1,400, klɛ tɛnɛnɛ nɛ tɛɖɛɖama nɛm lɛ tirikpo.

¹⁷ Kidri nɛ tɛdidom lɛ butsrukpɔ 200 nɛ kpayaxwɛdɛ kedzyidzyi nɛ nu.

¹⁸ Ba bhɛtɛ kidri nɛ aklãgbu gɛ aŋa kedzi, klɛ ba yɛkɔ sɛkadzɛdzã abhɔ ɔmagbla nɛ nɔ, gɛ lobhui ansɛ azhuzhuɔɛ.

¹⁹ Edri nɛ kesikpɛkpɛ aklãgbu, ba kpɛ atsyã kɔa lɛ nɛ aklãgbu ŋɛŋaedzi kanyakaɛdi. Kɛklãgbu tutɔpu be kulu kɛlɛ asɛ yaspa, kɛbhla sapfɛre, kɛtramɛ kalsedoni, kɛlɛ̃lɛmɛ ɛmarald

²⁰ kitrimi sardoniks, kihlomi kanelian, gigenemi krisolaɛtɛ, kɛsɔmɛ bɛril, kizhitamɛ topazɛ, kɛfɔmɛ krisopresɛ, kɛfɔntolimɛ yasint, klɛ kɛfɔntɛabhamɛ nɛ nu ametistɛ.

²¹ Budunu lɔfɔntɔbha nɛ nu ehui lɔfɔntabha, kedunu kanyaka ba bhɛtɛ kalɛ nɛ ehuiɔya terikpo. Kidzogbla nɛ ɔmagbla nɛ mɛ nɛ nu sɛkadzɛdzã kpɛkpa, ansɛ azhuzhuɔɛ gɛ yɛ mɛ aawɔɛ̃ wee.

²² Ɛdɛ mɔ busɔlɛvu kanyaka nɛ ɔmagbla nɛm, alasɛ Apalete Kpaya Agɛadɛ anɛ Obhoshieyi balɛ enu ɔlɛ busɔlɛvu.

²³ Ɔmagbla nɛ ɔma kɔ kiwi odɔgɔsɛ wele atã nɛ ɔlɛm, alasɛ Kpaya ishu bhubhui nɛ ɛɛtã kɔlɛ, klɛ Obhoshieyi nɛ onu ɔlɛ kanɛgbɛ.

²⁴ Amadi nɛ aba ga nɛ ɔlɛ kifui, klɛ kesukpɛabha bekusi na ba yɛkɔ balɛ tɛpupudi nɛ etsoku ɔlɛm.

²⁵ Kiwinyɛwi tɛ ba za gɛ ɔlɛ budunu nɛ ba da, alasɛ elishi atɛ ba za ɔkɛlɛ.

²⁶ Amadi nɛ ishubhubhui nɛ alɛa bha kpɛkpɛ ba ba yɛkɔ amɛna ɔlɛm.

²⁷ Kɛdɔnyɛdɔ gɛ dɔɛbo nɛ tɛ ba tsoku ɔlɛm di, ɔdɔgɔsɛ anɔnyanɔ gɛ abhɛtɛ awɛ̃ɛbui pɛ awɛanɔ, pɔ bagɛ balɛ enyi la ŋlɔmɛ akpɛ Obhoshieyi nɛ ɛkpãeplukpa nɛm ko.