Tɛbubukasɛ 20 - ONUGBÙ NYƐNYÃ VUVƆ

Agɔ Akpã

¹ Klɛ mɛ mɔ kpayaxwɛdɛ teli gɛ ezhi edenɔ owũsise nɛ aaba, gɛ evunɔ Ogloboglobo ɔkɔ nɛ kedunuaɖɛ klɛ evunɔ ɔɖaohui gbla nɛ yɛahwɛ nɛ mɛ.

² Evu eblidzyagbla, gɛ enu atiti eblidzya, gɛ enu ɔfufɔɛkpã, ɔdɔgɔsɛ Satana, klɛ anya yɛ agɔ kɛkpã zɛzɛ.

³ Awãnya yɛ akpɛ ogloboglobo kɔ, klɛ akpɛaɖɛ klɛ ada adɛda nɛ akpɛ yɛ, sɛ tɛ ataa mɔ kidzo aza wɛɛ amadi nɛ ɔtsɔlɛ ɔdɔnanɔ kibelɛ gɛ agɔ kɛkpã zɛzɛ nɛ beke. Kɛlɛe de nɛɛ, alasɛ tɛ be bule yɛ kɔ kibe bhli ko.

⁴ Ɛmɔ bukusigbu gɛ bulɛa bha bagɛ ba kɔ kabhaŋɛŋa sɛ be kulu bubhui nɛ be zhiedzi. Klɛ mɛ mɔ bagɛ balɛ atɔkpu be bhui nɛ atɔwi, akpɛ balɛ ebuimɔɖɔ nɛ Yesu shu anɛ Kpaya kibui nɛ shu so. Ba ka kpɛ kɛtɔkpue si kɔ agavuga ɔdɔgɔsɛ yɛ abhubhɔ klɛ ba ka yɛkɛ yɛ kibi nɛ balɛ butukpo ɔdɔgɔsɛ nɛ balɛ ɛhwɛ. Ba bá ɛkpã mɛ klɛ ba ŋɛabha ɔplɛnɔ Kristo agɔ kɛkpã zɛzɛ.

⁵ (Betsitsi gɔgɔɛ nɛ be di tsodzi aba ɛkpã mɛ ɔdɔnanɔ kibe lɛ gɛ agɔ akpã nɛ ebeke.) Kɛlɛ nu tɛnyɛnyɛmɛ denɔ bekpu mɛ tutɔpu.

⁶ Bagɛ ba za tɛlɛlɔ tutɔpui nɛ mɛ nɛ nu banɔ yuyula klɛ balɛ shu bhui. Butsi bhla nɛ dɛ mɔ kemi nɛ balɛa bha, pɔ be be dzi kpayanɔ kɔ Kpaya anɛ Kristo klɛ ba ba ŋɛa bha plɛnɔ yɛ agɔ kɛkpã zɛzɛ.

Satana Tɛwuwɔlɛ

⁷ Onu gɛ agɔ akpà zɛzɛ nɛ aafla, Be be bu Satana nɛ yɛ buvu

⁸ klɛ ebe koeyi avɛ ada wɛɛ amadi nɛ kesukpa nɛ bupɛ tɔlɛ nɛ mɛ—Gɔg anɛ Magɔg—tɛ ede xogo balɛ akɔ keyu. Nɛ tikpikpe mɛɛ be dzi ansɛ aƒuayɛ̃sɛ nɛ aƒuitɔ.

⁹ Ba fɔlee aga kesukpa nɛ tɛnɛnɛ mɛ afla klɛ la kana Kpaya banɔ nɛ atsya nɛ balɛ okpukɔ, ɔmagbla nɛ gɛ aɖɔ. Pɔ kifu wɔlɛ de owũsise klɛ kɛ ba tã alɛ.

¹⁰ Klɛ ɔfufɔɛkpã, nɛ gɛ ɔwɛa lɛ, ba yɛkɔ ɔlɛ atɛ̃akpɛ kɛklãgbui fui vɔ gɛ tã nɛ mɛ, ɔkɛlɛ gɛ ba yɛkɔ ayakpamaga anɛ itro batɔnu nɛ atɛ̃a kpɛ. Ba ba nyagbã nɛ balɛ elishi anɛ kemuze ɔvɛnɔ mabeke mabeke mɛ.

Be Kuluebhui Nɛ Betsitsi

¹¹ Ɔkɛlɛ mɛ mɔ kekeusigbu gbɛgbla fufu tieli anɛ anɔ nɛ gɛ edzia lɛa bha. Kesukpa anɛ owũsise ɔshɛ nɛ yɛ amɛ, klɛ ɔkɔnyɔkɔ ɔdɔɔ za kɔa lɛ.

¹² Klɛ mɛ mɔ betsitsi, bagbɛgbla anɛ bebhliyi, gɛ be li kititi nɛ kegbu nɛ amɛ, klɛ ba danɛ buplukpa. Ba za danɛ keplukpa bhlatɔ, gɛ ke nu ɛkpã keplukpa. Be kulu kebhui nɛ betsitsi nɛ ebui nɛ gɛ ba bhɛtɛ nɛ nu ansɛ gɛ ba ŋlɔmɛ akpɛ buplukpa nɛ mɛ.

¹³ Aƒu nɛ ebu betsitsi nɛ gɛ ba kpasɛ yɛ mɛ nɛ elu, klɛ butsi nɛ Bekpum ashɛnahwɛ bagɛ etsi akpasɛ balɛ mɛ nɛ elu, klɛ be kulu kebhui nɛ anɔnyanɔ nɛ ebui nɛ gɛ abhɛtɛ nɛ nu.

¹⁴ Ɔkɛlɛ ba yɛkɔ butsi nɛ Bekpum atɛa kpɛ kifu kɛvɔ nɛ mɛ. Kifuivɔ nɛ kɛlɛ nu butsi bhla.

¹⁵ Onu gɛ ba dɛ mɔ anɔ teli kinyi nɛ ɛkpã keplukpa nɛ mɛ, ba ba yɛkɔ yɛ atɛ̃ akpɛ kifuivɔ nɛ mɛ.