Tɛbubukasɛ 2 - ONUGBÙ NYƐNYÃ VUVƆ

Kɔ Busɔlɛɔha Nɛ Efesusɛ

¹ “Kɔ kpayaxwɛdɛ nɛ Efesusɛ busɔlɛɔha nɛ mɛ ɔsɛ: Ebui ɖuɖɔa nɛ alɛ nu agɛ evunɔ awɛ̃wɛ̃ tegene nɛ yɛ kɛŋa ɔhwɔɛ nɛ mɛ klɛ aaga fla nɛ sɛkadzɛdzã kanɛgbɛsi tigene nɛ shi sɛ:

² Inyi wɔ ebuibhɛbhɛtɛ, wɔ kɛxwɛwɛwa gɛganɛɛ anɛ wɔ kanyɛtsitsi. Inyi sɛ ɔtɛ bɔ kɔ atɔkpum gɛganɛelete nɛ amɛ, klɛ ɔtɛ feke bagɛ asɛ be nu banɔkpɛkpɛ pɔ pɛ be di nu nɛ odi, klɛ ɔtɛ mɔ sɛ be nu betroni.

³ Oti tsianyɛ klɛ ɔtɛ za ebuigɛganɛ nɛ nu ɔkpɛ mɛ kinyi nɛ so, klɛ oko si kifu.

⁴ Pɔ evunɔ kibui nɛ wɔ shu sɛ: Ɔtɛ shɛnahwɛ wɔ tɛɖuɖɔ tutɔpu nɛ shu.

⁵ Baka ɔkɛlɛ gɛ ɔtɛ wɔlɛ ode! Tsyina kitem tɛ ɔbhɛtɛ ebui nɛ gɛ ɔbhɛtɛ putɔnɔ. Onu gɛ ɔdɛ tsyina kite mɛ, ɛba tɔnɔ wɔ ba klɛ ɛba nyɛna wɔ kanɛgbɛosi nɛ yɛkɔ nɛ ɔlɛ ɔzakɔ.

⁶ Pɔ kɛɛ nɛ nɛ lɛ gɛ kɛ trɔ wɔa bha: Ɔdɛ pɛɛ Nikolatanɛ ebui bhɛbhɛtɛ nɛ bui, gɛ alɛ mɛ tsyɛ ɛdɛ pɛɛ.

⁷ Anɔ nɛ gɛ batɔ alɛ yɛ, nɔ kɔ yɛ enu kɛgɛ Ɔfufɔɛ nɛ ɔɔɖɔ tsre busɔlɛha. Aanɔ nɛ gɛ yɛaŋɛabha, ɛba kɔ yɛ kidzo sɛ tɛ aŋa kɛdɔ edenɔ ɛkpãosi nɛ mɛ, gɛ ɔlɛ Kpaya buka mɛ.

Kɔ Busɔlɛɔha Nɛ Smiɛna

⁸ “Kɔ kpayaxwɛdɛ nɛ Smirna busɔlɛɔha nɛ mɛ ɔsɛ: Aanɛ alɛ nu yɛ ebui gɛ yɛ enu Atutɔpu anɛ Agɔgɔɛ, gɛ etsi pɛ etsodzi aba ɛkpã mɛ.

⁹ Inyi ebui nɛ gɛ atrɔ wɔabha anɛ wɔ kitsyui—pɔ ehoeyi alɛ wɔahwɛ! Inyi bagɛ asɛ enu Yuɖanɛ flogo pɛ bedi nu, pɔ be nu Satana oxogokɔvu.

¹⁰ Ti si kifu nɛ butɔ nɛ gɛ ɔbɔ mɔ. Itsre wɔ, ɔfufɔɛkpã nɛ ɔbɔ yɛkɔ wɔnɔ beteli ɔkpɛ buvu sɛ tɛ lo feke nɔ odi, klɛ nɔ bɔ tɔ nɛ tɛkpɛkpatɔnɔ mɛ nɛ ewi lɔfɔ mɛ. Nɔ za tɛyɛyɛkɛŋa mɛ, ɔyɛkɔ ɔdɔ nanɔ butsi fãa, klɛ mɛ ba kɔ wɔ ɛkpã kabhaŋɛŋa kikutu.

¹¹ Aanɔ nɛ gɛ batɔ alɛ yɛ, kɔ yɛ enu kɛgɛ Ɔfufɔɛ nɛ ɔɔɖɔ tsre busɔlɛha. Aanɔ nɛ gɛ aŋɛabha butsi bhla nɛ tɛ ba zi kɛdɔnyɛdɔ nɛ yɛ shu.

Kɔ Busɔlɛɔha Nɛ Pɛgamum

¹² “Kɔ kpayaxwɛdɛ nɛ Pɛgamum busɔlɛɔha nɛ mɛ ɔsɛ: Aanɛ nɛ alɛ nu agɛ evunɔ ɛhɛshɛshɛ inugbu-tɛbha nɛ ebuiɖuɖɔ.

¹³ Inyi ɔkɛlɛ gɛ ɔlɛ— ɔkɛlɛ gɛ Satana bukusiegbu nɛ alɛ. Tsyɛ pɛ ɔlɛ nɛ kɛgba mɛ nɛ mɛ nyi mɛ. Ɔdɛ shɛ̃nahwɛ wɔ tɛyɛyɛkɛŋa nɛ mɛmɛ, nɛ Antipasɛ kibe nɛ mɛ tsyɛ, mɛ ebuimɔɖɔ gɛ tɛyɛyɛkɛŋa lɛ yɛahwɛ, gɛ be yi nɛ wɔnɔ ɔmagbla nɛmɛ—nɛ ɔkɛlɛ gɛ Satana alɛ.

¹⁴ Pɔ, ebuibhli teli alɛ mahwɛ nɛ wɔ shu: Banɔ teli ba lɛ wɔ ɔbha nɛ ɔkɛlɛ gɛ ba nyɛna Balaam kɛdɔkɛkasɛ nɛ mɛ evunɔ, gɛ ba kasɛ Balak kɛdɔ sɛ tɛ ba yɛkɔ awɛɛ Izraɛlanɛ sɛ tɛ ba bhɛtɛ buzizi ganɔ kɛŋɛŋa nɛ gɛ ba bhɛtɛ kɔ ibuidi nɛ tɛŋɛŋa nɛ ganɔ azhuzhɔlɛbui tɛbhɛbhɛtɛ mɛ.

¹⁵ Kana wɔnɔ mɛ tsyɛ banɔ teli ba lɛ gɛ ba nyɛna Nikolaitansɛ kɛdɔkɛksɛ nɛ mɛ evunɔ.

¹⁶ Kɛlɛ so no tsyina kitem! Odinuana nɛɛ, eti be dze ɛba ba tɔnɔ nɔ klɛ ɛba gɔnɛ nɛ balɛ nɛ mɛ onugbu mɛ ɛhɛ.

¹⁷ Aanɔ gɛ batɔ alɛ yɛ, kɔ yɛ enu kɛ gɛ Ɔfufɔɛ nɛ otsre basɔlɛha. Agɛ yɛ aŋɛabha, ɛba kɔ yɛ mɛ tɛkpukpu mɛ ofomɛŋɛŋa. Ɛba kɔ yɛ tsyɛ kɛklãgbu fufu nɛ gɛ ba ŋlɔmɛ kinyi vuvɔ atrɔ kɛlɛa bha, gɛ agɛ yɛ ayɛkɛ lɛ nɛ ko yɛ enyi lɛ.

Kɔ Busɔlɛha Nɛ Taɛtira

¹⁸ “Kɔ kpayaxwɛdɛ nɛ Taɛtira sɛ: Ebuia nɛ alɛ enu Kpaya yɛ Eyi nɛ kaɖɔɖuɖɔ, gɛ yɛ anhũ nɛ edzi ansɛ kifu tɛtã klɛ yɛ butsrukpɔ nɛ dzi ansɛ ayawa gɛ atã.

¹⁹ Inyi wɔ ebui bhɛbhɛtɛ, wɔ anɔ ɖuɖɔ anɛ tɛyɛyɛkɛŋa, wɔ kɛxwɛdɛdɛ anɛ kemikpɛkpɛ, klɛ ɔtsɔ̃ ɔɔbhɛtɛ gelee ɔdɛ kɛtutɔpu nɛ gɛ ɔbhɛtɛ.

²⁰ Pɔ, kibui lɛ mɛ ahwɛ nɛ wɔ: Adzɛ alɛlɛ Yezebɛl ɔkɔ yɛ amɛ, gɛ ekulu shu as enu adzɛ atɔnu. Ganɔ yɛ kɛdɔkɛkasɛ nɛ nu agbanɔ mɛ baxwɛdɛ ada kpɛ azhuzhɔlɛbui bhɛbhɛtɛ mɛ anɛ ibuidi dɔŋɛŋa mɛ.

²¹ Ɛtɛ kɔ yɛ kibe sɛ tɛ etsyina kitem nɛ yɛ azhuzhɔlɛbui nɛ mɛ, pɔ ataa pɛ asɛ.

²² So ɛba trɔ yɛ nɛ butɔ oputsoa bha, klɛ ɛba bhɛtɛ bagɛ ba la bhɛtɛ aglɔbui nɛ yɛ nɛ batɔ gɛganɛɛ, odinu sɛ betsyina nɛ yɛ edzo nɛa bha.

²³ Ɛba husi yɛeyialɛ nɛ yi. Kɛlɛ basɔlɛha nɛ petee be be ti asɛ mɛ nu agɛ yɛ edi idzyi anɛ atɔkpu mɛ, klɛ ɛba buya kɛbhɛ kɔ anɔnyanɔ nɛ yɛ tɛbhɛbhɛtɛ nɛ nu.

²⁴ Ɔtsɔ̃ nɛɛ ɛɖɔ tsre wɔnɔ banɔ gɔgɔɛ nɛ Taɛtira, kɔ wɔnɔa gɛ nɔ dɛ nyɛna yɛ kɛdɔkɛkasɛ nɛ mɛ ovunɔ klɛ nɔ kɔ kpasɛ Satana ebuikpukpu dzudzu alɛlɛ nɛ mɛ (ɛtɛa trɔ nɔ kituku bhlatɔ kanyaka):

²⁵ Nɔ nyɛna kɛgɛ lɛ wɔnɔ ahwɛ nɛ mɛ ovunɔ ɔdɔ nanɔ mɛ tɛbɛba.

²⁶ Aanɔ nɛ gɛ aŋa ishua bha klɛ abhɛtɛ mɛ tɛpɛpɛ ɔdɔnanɔ obekekɔ, ɛba kɔ sɛ yɛ aŋa amadi nɛa bha—

²⁷ ‘Aba ŋa balɛa bha nɛ ɔɖa dzyamgbɛ; aba yɛalɛ akpɛ bupɛpɛpɛ mɛ ansɛ budzrepe’ ansɛ gɛ ɛtɛ yɛkɛ kabhaŋɛŋa denɔ Maka ɔkɔ.

²⁸ Ɛba kɔ yɛ kɛvulɔɛ wɛ̃wɛ̃ nɛ tsyɛ.

²⁹ Agɛ yɛ batɔ alɛ yɛ ahwɛ, kɔ yɛ enu kɛgɛ Ɔfufɔɛ nɛ ɔɔɖɔ tsre basɔlɛha.