Tɛbubukasɛ 17 - ONUGBÙ NYƐNYÃ VUVƆ

Adzɛ Anɛ Agavuga

¹ Kpayaxwɛdɛ tiegene nɛ ɔmayɛ teli gɛ evunɔ busugba tugene nɛ aba klɛ etsrem asɛ, “Ba, ɛba kasɛ wɔ butɔhihe kɔ adzɛzhuzhɔlɛ gbla, nɛ gɛ ezhiaza beni gelee abha.

² Yɛ kesukpɛabha bekusi nɛ abhɛtɛ azhuzhɔlɛbui nɔ klɛ banɔ nɛ gɛ alɛ kesukpa nɛa bha nɛ buku yɛ azhuzhɔlɛbui nɛ bulu.”

³ Ɔkɛlɛ kpayaxwɛdɛ nɛ efeke mɛ nɛ Ɔfufɔɛ mɛ avɛnɔ ayakpam. Ɛkɛlɛ mɛ mɔ adzɛ teli gɛ ezhiedzi agavuga anhũmdzɛdzã abha gɛ ebusobui enyi ada yɛ atsya klɛ atɔkpu tegene anɛ ashã lɔfɔ alɛ yɛ.

⁴ Adzɛ nɛ enyumu kɛdɔ hẽhe anɛ kɛdzɛdzã, klɛ atã nɛ sɛkadzɛdzã, aklãgbu gɛ aŋaedzi anɛ ehuiŋɛŋɛedzi. Evunɔ sɛkadzɛdzã ɔɖɛantse nɛ ahwɛmɛ, gɛ keyuku nɛ ebui gɛ etutruanɔ anɛ yɛ buzhuzhɔlɛ atsɔbui.

⁵ Ba ŋlɔmɛ kinyi nɛ atrɔ yɛ ketukpo na sɛ: KIBUIKPUKPU BABILONIA GBLA BADZƐZHUZHƆLƐ ENI ANƐ KESUKPƐABHA EBUSOBUI

⁶ Ɛmɔ sɛ adzɛ nɛɛ ebuku nɛ banɔnɛna dzyosu, banɔ nɛ gɛ amɔ ebuiaɖɔ nɛ Yesu shu. Gɛ ɛmɔ yɛ nɛɛ, kɛ bhɛtɛ mɛ bi piim.

⁷ Ɔkɛlɛ kpayaxwɛdɛ nɛ aɖɔ tsrem asɛ: “Kide so pɛ kɛbhɛtɛ wɔɛ bi? Ɛba bu adzɛ anɛ agavuga nɛa bha gɛ aza nɛ ebuikpukpu nɛe si kɔ wɔ, gɛ atɔkpu tegene anɛ ashã lɔfɔ nɛ alɛ.

⁸ Agavuga nɛ gɛ ɔmɔ, atɛ za di, ɔtsɔ̃ ama, klɛ ebe de Ogloboglobokɔ ekoeyi klɛ aba vɛ kɔ le zi. Kesukpa nɛabha banɔ gɛ balɛ enyi la dɛ ŋlɔmɛ akpɛ ɛkpãeplukpa nɛ mɛ denɔ kanɔ nɛ tɛbhɛbhɛtɛ be, kɛ ba bhɛtɛ alɛ bi onu gɛ bamɔ agavuga, alasɛ atɛ za edi, ɔtsɔ̃ ama, klɛ otsi aba ba.

⁹ “Kɛnɛɛ nɛ kulu kɛtɔkpu mɛ plɛnɔ kibuinyinyi. Atɔkpu tegene nɛ enu atukpɛ tegene gɛ alɛa bha adzɛ nɛ aaza.

¹⁰ Bekusi tiegene tsyɛ alɛ. Tieti batɛ wɔlɛ, terikpo alɛ, teli otsi aba ba; pɔ onu gɛ aaba, alasɛ tɛ adzrɔɛ buɔɛ.

¹¹ Agavuga nɛ gɛ atɛ za edi, klɛ ama ɔtsɔ̃ nɛɛ, enu ekusi asuɛmɛ. Tiegene nɛ ɔmayɛ teli enu klɛ aavɛ kɔ yɛ tɛ zizi.

¹² “Ashã lɔfɔ nɛ gɛ ɔmɔ nɛ enu bekusi lɔfɔ gɛ ba ka yɛkɛ bukusiɔŋakɔ, pɔ nɛ ɔɖɔ torikpo mɛ ba ba yɛkɛ kabhaŋɛŋa ansɛ bekusi ɔyɛkɔ plɛnɔ agavuga.

¹³ Kibui tirikpo le vunɔ klɛ la ba yɛkɔ balɛ kemi anɛ kabhŋɛŋa nɛ akɔ agavuga.

¹⁴ Ba ba ta keyu nɛ Obhoshieyi, pɔ Obhoshieyi nɛ ɔbɔ ŋa balɛa bha alasɛ yɛ enu bapalete nɛ Apalete anɛ bekusi nɛ Ekusi—klɛ ɔyɛkɔ plɛnɔ yɛ le kulu, bagɛ bebu anɛ bagɛ ayɛyɛkɛŋa nɛ kedeazɛza.”

¹⁵ Ɔkɛlɛ kpayaxwɛdɛ nɛ aɖɔ etsrem asɛ, “Beni nɛ gɛ ɔmɔ, ɔklɛ gɛ adzɛzhuzhɔlɛ nɛ aaza, nɛ onu banɔ, banɔɛha, amadi anɛ benuhu.

¹⁶ Agavuga nɛ ashã lɔfɔ nɛ gɛ ɔmɔ na tɛ ba pɛɛ adzɛzhuzhɔlɛ nɛ bui. Ba ba mɛna yɛ ebe zi klɛ la ba shɛnahwɛ yɛ shu kɛdɔ manyumu manyumu; ba ba tã yɛ dzya klɛ la ba puɔɛ yɛ nɛ kifu.

¹⁷ Alasɛ Kpaya atɛ yɛkɔ akpɛ balɛ idzyim asɛ tɛ ba bhɛtɛ yɛ tɛtutrɔ nɛ beke ganɔ tɛdɛdɛmɛ mɛ asɛ aba yɛkɔ agavuga nɛ kemi anɛ kabhaŋɛŋa akɔa lɛ, ɔdɔnanɔ kibe lɛ gɛ Kpaya ebuiɖuɖɔ nɛ abɛ lɛ mɛ.

¹⁸ Adzɛ nɛ gɛ ɔmɔ nɛ yɛ enu ɔma gblagbla nɛ gɛ ɔŋa kesukpa nɛ bekusi nɛa bha.”