Tɛbubukasɛ 16 - ONUGBÙ NYƐNYÃ VUVƆ

Kpaya Obulo Busugba Tugene

¹ Ɔkɛlɛ mɛ nu olim gɛganɛɛ toli denɔ busɔlɛvu nɛ mɛ gɛ ɔɖɔ tsre kpayaxwɛdɛ tiegene nɛ ɔsɛ, “Vɛ, tɛ ɔdɔ yɛkɔ Kpaya obulo sugba tugene nɛ ɔbalɛ lu kesukpa nɛa bha.”

² Kpayaxwɛdɛ tutɔpu nɛ avɛ ede tsyina yɛ obulo kesugba nɛ abalɛ kesukpa, klɛ apɔ kpã nɛ gɛ edi yiubite gɛ eeve anɔ nɛ adanɛ abalɛ banɔ nɛ gɛ balɛ shu agavuga kibi nɛ tsri klɛ baa kpɛ kɛtɔkpuesi kɔ yɛ abhubhɔ.

³ Kpayaxwɛdɛ bhla nɛ etsyina yɛ kesugba nɛ abalɛ akpɛ aƒu nɛ mɛ, klɛ aƒu nɛ etsyina dzi ansɛ anɔtsitsi dzyosu, klɛ kɛdɔ lulu kanyaka tsi nɛ aƒu nɛ mɛ.

⁴ Kpayaxwɛdɛ tramɛ nɛ etsyina yɛ kesugba nɛ abalɛ akpɛ bunikekpu anɛ beni gɛ ekoeyi nɛ tisi nɛ mɛ, klɛ be tsyina edzi dzyosu.

⁵ Ɔkɛlɛ mɛ nu kpayaxwɛdɛ nɛ gɛ yɛ edi beni nɛa bha nɛ aɖɔ sɛ: “Ɔna nɛ bubhui kukulu nɛ mɛ, wɔ gɛ onu klɛ odzi, Anɔ Nɛna, alasɛ oti kulu bubhui nɛ ana;

⁶ alasɛ ba tɛ balɛ wɔ banɔnɛna anɛ batɔnu nɛ dzyosue si, klɛ ɔtɛ kɔa lɛ dzyosu la wɛ̃ ansɛ gɛ be bisi.”

⁷ Klɛ mɛ nu gɛ busɔlɛvu mɛ kedɔpɔɛkɔ nɛ ɔdɛmɛ sɛ: “Ee, Apalete Kpaya gɛ Agbɛgbladɛ, wɔ bubhui kukulu nɛ nu kɛgba klɛ bu na.”

⁸ Kpayaxwɛdɛ lɛlɛ̃mɛ nɛ abalɛ yɛ kesugba nɛ atrɔ kiwi nɛa bha, klɛ kɛ kɔ kiwi nɛ kemi sɛ tɛ kɛ tã banɔ ansɛ kifu.

⁹ Bukpɛkpɛkpɛ tsutsɔmɔ nɛ vua lɛ klɛ ba ɖɔɛbui akpɛ Kpaya kinyi, gɛ yɛaŋa banyakpã tɛata nɛa bha, pɔ ba dɛ dɛmɛ etsyina kitem akpɛ yɛ nɛa bha.

¹⁰ Kpayaxwɛdɛ trimi nɛ etsyina yɛ kesugba nɛ abalɛ atrɔ agavuga anɛ bukusiegbu nɛa bha, klɛ yɛ bukusiɔŋakɔ nɛ otsoku otumu mɛ. Banɔ ba tã balɛ anɛkɛ nɛ iyuyo mɛ

¹¹ klɛ ba ɖɔ kibui akpɛ owũsise Kpaya akpɛ balɛ ishumpupɔɛ anɛ apɔ nɛ so, pɔ ba dɛ dɛmɛ etsyina kitem nɛ ebui nɛ gɛ ba bhɛtɛ nɛ shu.

¹² Kpayaxwɛdɛ hlomi nɛ abalɛ yɛ kesugba nɛ akpɛ Efratesɛ keni gbla nɛ mɛ, klɛ kalɛmɛ buni nɛ tsi sɛ tɛ kidzo danɛ kɔ bekusi nɛ gɛ ede Kiwiɔyɛkɔ.

¹³ Ɔkɛlɛ mɛ ɛmɔ ɛfufɔɛ kpã tɛta gɛ dzi ansɛ agbɔkɔ; le koeyi edenɔ eblidzyagbla nɛ onugbu mɛ, agavuga nɛ onugbu mɛ anɛ otro atɔnu nɛ onugbu mɛ.

¹⁴ Be nu satana ɛfufɔɛ gɛ bhɛtɛ ebui gɛ abhɛtɛbi, klɛ le koeyi tɔnɔ kanɔ mɛ bekusi nɛ petee, tɛ be xogoa lɛ akɔ keyu nɛ Kpaya Gbɛgbladɛ nɛ kiwigbla nɛa bha.

¹⁵ “Di, ɛba ansɛ ezi! Bayula agɛ yɛa lɛ nɛ awɔ̃ klɛ anyɛna yɛ apɔtɛ nɛ ebunɔ shu, sɛ atɛ ba vɛ eti bu ishu elu nɛ kɛwɔɛ̃ mɛ.”

¹⁶ Ɔkɛlɛ be xogo bekusi nɛ akpɛ ketsu nɛ ɔkɛlɛ gɛ be kulu nɛ Hebriu bunuhu mɛ asɛ Amagedɔn.

¹⁷ Kpayaxwɛdɛ gigenemi nɛ ebu yɛ kesugba nɛ abalɛ akpɛ kɛlɛɛ mɛ, klɛ nɛ busɔlɛvu nɛ mɛ olim gɛganɛɛ toli oyi denɔ bukusiegbu nɛ ɔkɔ, lɔɔ ɖɔ sɛ, “Kɛ bhɛtɛ beke!”

¹⁸ Ɔkɛlɛ kifuɛmɔɛ, igugu gɛganɛɛ, anɛ subhalɛlɛ gɛganɛɛ anɛ kesukpa huhwa tsutsɔmɔ tsutsɔmɔ ka ba. Kesukpɛa lɛlɛ nɛ di ka hwa edi denɔ gɛ anɔ alɛa nɔ mɛ, so kalɛ tɛhuhwa nɛ kuifu.

¹⁹ Ɔmagbla ɔma kpɛ bupɛ tɔta, klɛ amadi anɛ ɛmagbla nɛ ɛyɛɛ. Kpaya abaka Babilonia Gbla nɛ bui klɛ akɔ yɛ ɔɖɛantse gɛ keyuu nɛ obulo kanya lu.

²⁰ Kenimɛesukpa kanyaka afla ekoeyi klɛ betu anɔnyanɔ ada mɔa lɛ.

²¹ Denɔ owũsise amuklãgbu gɛ alɛ bupu klɛ alɛ bugbĩgbĩ mɛ ba za ansɛ paɔ̃sɛ ɛzakɔ kɛfɔɛfɔ gɛ la wɔlɛ dɔ banɔa bha terikpo terikpo. Klɛ baɖɔ kibui akpɛ Kpaya nɛ bunyakpã amuklãgbu nɛ shu so, alasɛ bunyakpã nɛ gɛganɛ zi.