Tɛbubukasɛ 15 - ONUGBÙ NYƐNYÃ VUVƆ

Kpayaxwɛdɛ Tiegene Anɛ Banya Tiegene

¹ Ɛzɛ mɔ nɛ owũsise kɛdɔmumɔ gbɛgbla gɛ bhɛtɛ bi tili: kpayaxwɛdɛ tiegene gɛ be vunɔ banya tiegene gɔgɔɛ— be nu bagɔgɔɛ alasɛ ba lɛ plɛnɔ pɛ Kpaya obulo gɛganɛ nɛ ɔna.

² Klɛ mɛ mɔ kɛdɔ nɛ gɛ dzi ansɛ azhuzhuɔɛ aƒu gɛ abhɛsa nɛ kifu klɛ, ba gɛ li kititi nɛ aƒu nɛ shu, balɛ aŋa agavuga anɛ yɛ abhubhɔ anɛ yɛ kinyi tikpikpe mɛ telia bha. Be vunɔ ba sãgu gɛ Kpaya akɔa lɛ

³ klɛ ba zha Mose kpayaxwɛwa nɛ ɔdzɛ anɛ Obhoshieyi nɛ ɔdzɛ na sɛ: “Wɔ ebui nɛ agbɛgbla klɛ la bhɛtɛ bi, Apalete Kpaya gɛ Agbɛgbladɛ. Wɔ edzo nɛ ana klɛ le nu kɛgba, Kibe nɛ Ekusi.

⁴ Ane gɛ eti be si wɔɛ fu, O Apalete, pɛ ata mɛna wɔɛ nyi nɛ kabhakpɛkpɛ? Alasɛ wɔ tite ko shu ɛlɛ bhui. Amadi nɛ petee aba ba klɛ la ba kpɛ kɛtɔkpuesi nɛ wɔa mɛ, alasɛ wɔ tɛnɛnamɛzɛza ebui bhɛbhɛtɛ nɛ eti bu akasɛ.”

⁵ Kɛɛ nɛ nɛe de idi klɛ nɛ owũsise busɔlɛvu, gɛ nu, Kibuimɔɖɔ akpanda, nɛ adanɛ.

⁶ Denɔ busɔlɛvu nɛ mɛ kpayaxwɛdɛ tiegene ɔplɛnɔ banyagbla tigene nɛ ekoeyi. Be nyumu kɛdɔ gɛ kɛlɛ shu bhui, apɔtɛ gɛ atã klɛ la yɛkɔ sɛkadzɛdzã ɛdzadi anya etem.

⁷ Ɔkɛlɛ kɛdɔbhɛbhɛtɛ lulu tɛlɛ̃ nɛ tili yɛkɔ sɛkadzɛdzã busugba tugene gɛ yuku nɛ Kpaya obulo, nɛ akpɛ ahwɛ kɔ kpayaxwɛdɛ tiegene, Kpaya nɛ gɛ alɛ nɛ ɛkpã vɛnɔ mabeke mabeke mɛ.

⁸ Klɛ busɔlɛvu nɛ yuku nɛ ɔnyɔ̃ gɛ ode Kpaya ishubhubhui nɛ mɛ anɛ yɛ kemi mɛ, klɛ anɔnyanɔ atɛ ba na busɔlɛvu nɛ mɛ tsoku ɔdɔnanɔ kibe lɛ gɛ kpayaxwɛdɛ tiegene nɛ banya tigene nɛ beke.