Tɛbubukasɛ 14 - ONUGBÙ NYƐNYÃ VUVƆ

Obhoshieyi Anɛ 144,000

¹ Ɔkɛlɛ mɛ idi, klɛ nɛ mɛ amɛ obhoshieyi, lo li kititi nɛ Zayɔnɛ Butu nɛa bha, klɛ nɛ ɔlɛ ɔbha banɔ 144,000 gɛ yɛ kinyi anɛ yɛ Aka nɛ yɛ nɛ ŋlɔmɛ tsri balɛ butukpo.

² Klɛ mɛ inu oli toli mɛ denɔ owũsise gɛ ɔɔtɔkɔ ansɛ buni gɛ kpɛ anɛ subha lɛlɛɛ gɛganɛɛ. Oli nɛ mɛ gɛ inu no dzi ansɛ bagɛ be bho sãgu nɛ yɛ mɛ.

³ Klɛ ba zha ɔdzɛ vuvɔ nɛ kekusigbu nɛ amɛ anɛ kɛdɔbhɛbhɛtɛ lulu tɛɛlɛ̃ anɛ beshishe nɛ amɛ. Anɔnyanɔ adɛ na ɔdzɛ nɛ nu kpasɛ ɔyɛkɔdɛ banɔ 144,000 nɛ gɛ be bu nɛ kesukpa nɛa bha.

⁴ Balɛ enu banɔ nɛ gɛ be di zi ishu nɛ badzɛ, alɛasɛ balɛ ba nyɛna shu klɛ balɛ shu bhui. Ba za Obhoshieyi nɛede nɛ ɔkɔnyɔkɔ gɛ lɔ vɛ. Be dzi balɛ ebu denɔ banɔ mɛ klɛ ba yɛkɔa lɛ akɔ ansɛ isieyuyu tutɔpu kɔ Kpaya anɛ Obhoshieyi.

⁵ Ba dɛ mɔ otro kanyaka nɛ balɛ inugbu mɛ; kɛpɔ kanyaka ma balɛ shu.

Kpayaxwɛdɛ Tɛata

⁶ Ɔkɛlɛ mɛ ɛmɔ kpayaxwɛdɛ bhlatɔ gɛ epruru gɛ adɛ vɛ kɛlɛ mɛ fanɔ, klɛ evunɔ ɛkpã mabeke mabeke anɛ kibuidzyɔgo sɛ tɛ aɖɔɛ lɛ etsre bagɛ be tsri kesukpa nɛa bha— kɔ kɛmadigbla kanyaka, amadibhli, bunuhu anɛ banɔ nɛ petee.

⁷ Aɖɔaɖɔ nɛ oli mɛ gɛganɛɛa sɛ, “Si Kpaya tɛ ɔkɔ yɛ kabhakpɛkpɛ, alasɛ yɛ kebhuikuklu ɔɖɔ nɛ mɛ ɔba. Kpɛtɔkpuesi ɔkɔ yɛ gɛ abhɛtɛ owũsise, kesukpa, aƒu anɛ beni nɛ gɛ ba ta de tisi mɛ.”

⁸ Kpayaxwɛdɛ bhla tsyɛ aba klɛ aɖɔ sɛ, “Babilɔnɛgbla Awɔlɛ! Awɔlɛ! Agɛ abhɛtɛ amadi nɛ petee la wɛ̃ adzɛ nɛ azhuzhɔlɛbui aputɔ bulu.”

⁹ Kpayaxwɛdɛ tramɛ tsyɛ aba nɛ balɛe de klɛ aɖɔ nɛ oli mɛ gɛganɛɛ asɛ: “Onu gɛ anɔ teli aakpɛ kɛtɔkpuesi kɔ ayakpamaga anɛ yɛ abhubhɔ klɛ aayɛkɛ yɛ kibi nɛ ketukpo ɔdɔgɔsɛ nɛ yɛ ɔhwɛ,

¹⁰ yɛ tsyɛ, aba wɛ̃ Kpaya oblo mɛ bulu, gɛ ba balɛ gɛganɛɛ akpɛ butɔ kantse nɛ mɛ. Ba ba kpɛ yɛ butɔ nɛ kɛklãgbuifu tɛtã mɛ nɛ kpayaxwɛdɛ nɛ gɛ balɛ shu bhui anɛ Obhoshieyi nɛ amɛ.

¹¹ Klɛ balɛ butɔ ɔnyɔ̃ nɛ ɔbɔ lɔ ɔyɛkɔ vɛnɔ mabeke mabeke mɛ. Bumuene kemuze ɔdɔgɔsɛ elishi mɛ ama kɔ bagɛ bakpɛ kɛtɔkpuesi kɔ ayakpamaga anɛ balɛ abhubhɔ, ɔdɔgɔsɛ anɔnyanɔ gɛ ayɛkɛ yɛ kinyi nɛ kibi.”

¹² Kɛɛ nɛ kɛ kulu tɛdudɔfɔ̃ tɛzɛza gɛganɛ anɛ banɔnɛna nɛ kapɛ mɛ gɛ ba ta batɔ nɛ Kpaya ɛshã klɛ ba wɔ tɛyɛyɛkɛŋa mɛ kɔ Yesu.

¹³ Ɔkɛlɛ mɛ nu ogugu denɔ owũsise gɛ ɔɖɔ sɛ, “Ŋlɔmɛ: Ba yula betsitsi anɛ bagɛ be tsi nɛ Apalete nɛ mɛ denɔ ɔtsɔ̃ nɛ ɔvɛnɔ.” Ɔfufɔɛ nɛ ɔɔɖɔ sɛ, “Ee,” “be be muene denɔ balɛ axwɛ nɛ mɛ, alasɛ balɛ ebui bhɛbhɛtɛ nɛ aba za balɛe de.”

Kesukpɛabha Kɛdɔbubu

¹⁴ Idi, klɛ nɛ mɛ amɛ ɔmunɔ fufu, klɛ nɛ ɔlɛ mɛ kɛdɔ tili zhidzi “ansɛ anɔdzyrame yɛ eyi” plɛnɔ sɛkadzɛdzã kikusikutu nɛ yɛ ada mɛ klɛ ɔsɔsɔ shɛshɛ toli nɛ yahwɛmɛ.

¹⁵ Ɔkɛlɛ kpayaxwɛdɛ bhlatɔ ede busɔlɛvu nɛ mɛ ekoeyi klɛ ekulu nɛ olim gɛganɛɛ asɛsɛ agɛ ezhiedzi ɔmunɔ nɛa bha sɛ, “Yɛkɔ wɔ ɔsɔsɔ tɛ ɔgɔɛdɔ, alasɛ kɛdɔɛ gɔ be na, alasɛ kesukpa nɛa bha kɛdɔbubu nɛ kɛdzã.”

¹⁶ So agɛ ezhiedzi ɔmunɔ nɛa bha nɛ awanya yɛ ɔsɔsɔ nɛ kesukpa nɛa bha, klɛ anyɛna kesukpa nɛ ebu.

¹⁷ Kpayaxwɛdɛ bhlatɔ eze de koeyi nɛ busɔlɛvu nɛ mɛ nɛ owũsise, klɛ yɛ tsyɛ evunɔ ɔsɔsɔ shɛshɛ toli.

¹⁸ Ki tsri lɛa bha na kpayaxwɛdɛ bhlatɔ, gɛ edi kifua bha, ekoeyi denɔ busɔlɛvu mɛ kɛdɔpɔɛkɔ klɛ ekulu nɛ olim gɛganɛɛ agɛ yɛ evunɔ ɔsɔsɔ shɛshɛ nɛ asɛ, “Yɛkɔ wɔ ɔsɔsɔ shɛshɛ tɛ ɔyɛkɔ pɔ wayɛ̃ eyuyu nɛ kesukpa nɛa bha, alasɛ kalɛa bha eyuyu nɛ petee adzã.”

¹⁹ Kpayaxwɛdɛ nɛ awãnya yɛ ɔsɔsɔ nɛ kesukpa nɛa bha, exogo yɛ wayɛ̃ eyuyu klɛ ayɛkɔ atɛ̃a kpɛ Kpaya obulo zizi kizi nɛ mɛ.

²⁰ Ba vɔa lɛ akpɛ wayɛ̃ kizi nɛ mɛ nɛ kamade, klɛ dzyosu ekoeyi nɛ kizi nɛ mɛ, gɛ eyuku agbɛgba ansɛ butsrukpɔ tuti gɛ yɛ tɛdzidze mɛ na ɛdzrɔkɔ kɛfɔɛfɔ nɛ afɛtasɔɛ.