Tɛbubukasɛ 13 - ONUGBÙ NYƐNYÃ VUVƆ

¹ Klɛ eblidzyagbla nɛ alɔɛ titi nɛ axui nutɔ. Klɛ mɛ ɛmɔ agavuga teli gɛ ede aƒu nɛ mɛ ekoeyi. Ashã lɔfɔ nɛ atɔkpu tegene ala lɛ yɛ, anɛ bukusiekutu lɔfɔ nɛ yɛ ashã nɛa bha, klɛ nɛ kɛtɔkpu kanykɛa bha kibusobuinyi tsri.

Bayakpamaga Denɔ Aƒuim

² Agavuga nɛ gɛ ɛmɔ nɛ eyi ashuiɛ, pɔ ɛtsrɛ nɛ dzi ansɛ agudui yɛ klɛ onugbu ansɛ adzyata ɔyɛ. Eblidzyagbla nɛ akɔ agavuga nɛ yɛ kemi anɛ yɛ ekusiegbu anɛ kabhaŋɛŋa gbɛgbla.

³ Agavuga nɛ kɛtɔkpu nɛ tili wɛ̃ ansɛ kɛ yɛkɛ kɛpɔbgla, pɔ kɛpɔ nɛ tɛ bele. Kɛ bhɛtɛ kanɔ nɛ mɛ petee bi klɛ ka lɛ agavuga nɛede.

⁴ Banɔ ba kpɛ kɛtɔkpuesi kɔ eblidzyagbla alasɛ atɛ kɔ agavuga nɛ kabhaŋɛŋa, klɛ balɛ tsyɛ ba kpɛ kɛtɔkpuesi kɔ agavuga klɛ bee bisi asɛ, “Ane gɛ edzi ansɛ agavuga? Anee gɛ aba na keyu ta nɛ yɛ?”

⁵ Ba kɔ agavuga nɛ onugbu sɛ tɛ aɖɔ ishufifeke ebui anɛ ebusobui tɛ awa yɛ kabhaŋɛŋa nɛ shuixwɛ wele afɛtanlɛ̃ntɛabha.

⁶ Adanɛ yɛ onugbu nɛ sɛ tɛ ayɛkɔ aɖɔ ebusobui nɛ Kpaya shu, nɛ tɛ ayɛkɔ ezi yɛ kinyi nɛ yɛ ɔzakɔ anɛ bagɛ alɛ owũsise.

⁷ Ba kɔ yɛ kemi sɛ tɛ ata keyu nɛ banɔnɛna tɛ aŋa balɛa bha. Klɛ ba kɔ yɛ kabhaŋɛŋa nɛ kɛmadi, banɔ, bunuhu anɛ amadigbla nɛ peteea bha.

⁸ Banɔ nɛ petee ga lɛ kesukpa nɛabha na ba kpɛ kɛtɔkpuesi kɔ agavuga— banɔ nɛ petee enyi nɛ gɛ ba dɛ ŋlɔmɛ akpɛ ɛkpã keplukpa nɛ gɛ enu Obhoshieyi nɛa yɛ gɛ be yi denɔ kanɔ nɛ tɛbhɛbhɛtɛ be nɛ mɛ.

⁹ Anɔ nɛ gɛ batɔ alɛ yɛ, tɛ enu.

¹⁰ Onu gɛ anɔ teli alɛ asɛ tɛ etsoku tɛvuvu mɛ, tɛvuvu mɛ koe be tsoku. Onu gɛ anɔ teli alɛ asɛ tɛ be yi yɛ nɛ ɛhɛɛ, ɛhɛɛ la ba yɛkɔ eyi yɛ nɔ. Kɛɛ nɛ nɛ bisi sɛ tɛdudɔfɔ̃ mɛ zɛza anɛ tɛyɛyɛkɛŋa nɛ banɔnɛna nɛa pɛ mɛ.

Agavuga Nɛ Ekoeyi Nɛ Kesukpa Nɛ mɛ

¹¹ Ɔkɛlɛ mɛ ɛmɔ agavuga bhlatɔ, gɛ ekoeyi denɔ kesukpa nɛ mɛ. Ashã tabha alɛ yɛ ansɛ obhoshieyi, pɔ aɖɔ kaɖɔ ansɛ eblidzyagbla.

¹² Awa kabhaŋɛŋa nɛ gɛ kenu agavuga tutɔpu nɛa yɛ nɛ shu xwɛ nɛ yɛ nu, klɛ abhɛtɛ kesukpa anɛ bagɛ akpasɛa lɛ mɛ nɛ la kpɛ kɛtɔkpuesi kɔ agavuga tutɔpu, gɛ yɛ kɛpɔgbla nɛ tɛ bele.

¹³ Klɛ abhɛtɛ kɛdɔmumɔ anɛ ebui gɛ abhɛtɛ bi gbla, gɛ kɛ kɔ tsyɛ sɛ kifu de owũsise ba dɔ kesukpa wee nɛ banɔ amɛ.

¹⁴ Alasɛ kɛdɔmumɔ nɛ gɛ ba kɔ yɛ kemi sɛ tɛ abhɛtɛ nɛ agavuga tutɔpu nɛ nu so, awɛɛ banɔ nɛ ga lɛ kesukpa nɛa bha. Akɔ sɛ ba bhɛtɛ kɛdɔ bhubhɔ tɛ ba yɛkɔ akpɛ agavuga nɛ gɛ ba kpɛ kɛpɔ nɛ ɛhɛɛ tsyɛ pɛ aza nɛ ɛkpã.

¹⁵ Ba kɔ yɛ kemi sɛ tɛ afɔɛ kpɛ kɛdɔbhubhɔ nɛ mɛ, sɛ tɛ ana kaɖɔ ɖɔ, tɛ akɔ sɛ banɔ nɛ petee gɛ ba dɛ dɛmɛ asɛ tɛ ba kpɛ kɛtɔkpuesi akɔ kɛdɔbhubhɔ, tɛ be yi alɛ.

¹⁶ Etui lɛ akpɛ anɔnyanɔa nu, ebhliyi anɛ agbɛgbla, ehoeyielete anɛ etsyutsyuini, anɔdzidzi anɛ agɛ le di dzi, sɛ tɛ ayɛkɛ kibi nɛ yɛ kɛŋahwɛ ɔdɔgɔsɛ yɛ ketukpo,

¹⁷ sɛ tɛ anɔnyanɔ eti dzi kɛdɔ ɔdɔgɔsɛ adɛ kɛdɔ gɛ odi nu sɛ kibi lɛ yɛ shu, gɛ kɛ nu agavuga nɛ kinyi ɔdɔgɔsɛ yɛ nyi nɛ kɛdɔkɛkla mɛ.

¹⁸ Kɛɛ nɛ ki kulu kibuinyinyi. Onu gɛ anɔnyanɔ gɛ kɛmɛ mɛ kɛdɔmumɔ lɛ yahwɛ, kɔ yɛ atɔkɛ agavuga nɛ kɛdɔkɛkla nɛ exogo, alasɛ ki nu anɔ kɛdɔkɛkla. Yɛ kɛdɔkɛkla nɛ nu 666.