Tɛbubukasɛ 12 - ONUGBÙ NYƐNYÃ VUVƆ

Adzɛ Anɛ Eblidzyagbla

¹ Kɛdɔmumɔ gbla gɛ bhɛtɛ bi kɛwɛ̃ nɛ owũsise: adzɛ gɛ ba yɛkɔ kiwi enyumu akɔ ansɛ kɛpɔtɛ, ɔplɛnɔ wele nɛ yɛ butsrukpɔe si klɛ awɛ̃wɛ̃ lɔfɔntabha bukusikutu tsri yɛ ada mɛ,

² Adzɛ nɛ emunɔ ɛya klɛ eebi nɛ ɛyam tɛtã, alasɛ yɛ kɛmɔ na.

³ Ɔkɛlɛ kɛdɔmumɔ bhlatɔ zɛ wɛ̃ nɛ owũsise: eblidzyagbla dzɛdzã teli nɛ atɔkpu tegene anɛ ashã lɔfɔ anɛ bukusiekutu tegene etsri yɛ ada mɛ.

⁴ Yɛ otse nɛ ɔgba awɛ̃wɛ̃ nɛ owũsise kapɛ zɛzɛ nɛ bupɛ tɔtam klɛ awãnya alɛ atrɔ kesukpa nɛabha. Eblidzyagbla nɛ eli titi nɛ adzɛ nɛ gɛ yɛ kɛmɔ na nɛ otugba, sɛ tɛ ebe vu eyi nɛ atã kibelɛ gɛ anya mɔ yɛ ko.

⁵ Adzɛ nɛ amɔ eyianyɛ, gɛ aba ŋa amadi nɛ peteea bha nɛ ɔɖa dzyãmgbɛ. Klɛ ba bhɛ anuvɔ ayɛkɔ ewunɔ avɛnɔ Kpaya ɔkɔ nɛ yɛ bukusiegbu nɛa bha.

⁶ Adzɛ nɛ esi avɛ ayakpam nɛ ɔkɔ toli gɛ Kpaya abala lu kɔ yɛ, ɔkɛlɛ le be di yɛabha kɔ ewi kɛkpã tirikpo, kɛfɔɛfɔ tabha anɛ afɛtehlo (1,260).

⁷ Klɛ keyu akpa nɛ owũsise. Maɛkɛl anɛ yɛ kpayaxwɛdɛ nɛ ba ta keyu nɛ eblidzyagbla, klɛ eblidzyagbla nɛ yɛ baxwɛdɛ nɛ tsyɛ ba gɔnɛ na lɛ.

⁸ Pɔ adɛ gɛganɛ mɔ, klɛ balɛ ɔzakɔ nɛ owũsise nɛ okoeyi nɛ balɛ ahwɛ.

⁹ Be hu eblidzyagbla nɛ ebho— kɛlɛbe eblidzya alɛlɛ nɛ gɛ be kulu asɛ ɔfufɔɛkpã ɔdɔgɔsɛ Satana, gɛ agbanɔ kanɔ nɛ petee alɛla. Be huyɛebho asɛsɛ kesukpa, anɛ yɛ baxwɛdɛ.

¹⁰ Ɔkɛlɛ mɛ nu oli toli mɛ dɔ wee nɛ owũsise gɛ ɔɖɔ sɛ: “Ɔtsɔ̃ nɛɛ tɛyɛyɛkɔ anɛ kemi anɛ bulɔ Kpaya bukusiɔŋakɔ nɛ ɔba, anɛ yɛ Kristo kabhaŋɛŋa. Alasɛ agɛ ayɛkɔɛbui nɛ bulɔ adzyalɛ, gɛ aapɛ bui kɔa lɛ nɛ bulɔ Kpaya nɛ amɛ kemuze anɛ elishi, be hu yɛesi.

¹¹ Ba ŋa yɛabha ganɔ Obhoshieyi nɛ dzyosu mɛ anɛ ganɔ balɛ kibui mumɔɖɔ nɛ nu; ba dɛ dɛmɛ balɛ ɛkpã nɛ bui ana gelee sɛ tɛ ba shɛ lɔ butsi.

¹² Kɛlɛ so nɔ mɔ same, wɔnɔ iwũsise anɛ wɔnɔa gɛ ɔlɛ ɛlɛ mɛ! Pɔ butɔ kɔ kesukpa anɛ aƒu, alasɛ ɔfufɔɛkpã nɛ ɔti zhiɔba kesi nɛ wɔnɔ bha! Eyuku nɛ kanya, alasɛ enyi asɛ yɛ kibe nɛ daa dze.”

¹³ Gɛ eblidzyagbla nɛ amɔ asɛ be huesi asɛsɛ kesukpa nɛɛ, akpatɔnɔ adzɛ nɛ gɛ amɔ eyianyɛ.

¹⁴ Ba kɔ adzɛ nɛɛ odi gbɛgbla beglebe tɛabha, sɛ tɛ aba yɛkɔ epruru nɔ avɛ ɔklɛ gɛ ba bala elu kɔ yɛ nɛ ayakpa nɛ mɛ, ɔkɛlɛ gɛ le be di yɛabha tɔnɔ kibe tili, gɛ nu agɔ tata anɛ kapɛ, ɔkɛlɛ gɛ eblidzya nɛ ɔhwɛ ɔtɛɔ na yɛ.

¹⁵ Ɔkɛlɛ ebe epi buni ansɛ keni, edenɔ yɛ onugbu mɛ, sɛ tɛ adɔ adzɛ nɛ afla tɛ ayɛkɔ agba yɛ anɛ buni nɛ ashɛnɔ.

¹⁶ Pɔ kesukpa nɛ kaplɛnɔ adzɛ ganɔ kalɛ onugbu dɛdanɛ mɛ gɛ ka munɔ keni nɛ gɛ eblidzyagbla nɛ epi abalɛ denɔ yɛ onugbu nɛ mɛ.

¹⁷ Ɔkɛlɛ eblidzyagbla nɛ amɔ obulo nɛ adzɛ klɛ ashɛ avɛ asɛ tɛ ada ta keyu anɛ yeyialɛ gɔgɔɛ—bagɛ bata batɔ nɛ Kpaya ɛshã klɛ la nyɛna yɛ Yesu kibuimumɔɖɔ nɛ mɛ evunɔ.

¹⁸ Klɛ eblidzyagbla nɛ aza aƒu nɛ tɔ.