Tɛbubukasɛ 11 - ONUGBÙ NYƐNYÃ VUVƆ

Bebuimɔɖɔ Tɛabha

¹ Ba kɔ mɛ kesukpogunu bhli tieli, kalɛ tidzidzem aba za ansɛ ɔɖaedzyidzyi klɛ be tsre mɛ asɛ, “Vɛ tɛ odo dzyidzyi Kpaya busɔlɛvu anɛ busɔlɛvu mɛ kɛdɔpɔɛkɔ, tɛ ɔkla basɔlɛsɔlɛ tɛashɛ̃ nɔɔ nɛ gɛ li ɔklɛ.

² Pɔ shɛ̃nahwɛ ɔtɔ buka nɛ mɛ shu olu, tɛ dzyidzyi bɔ lɛ mɛ xũ, alasɛ ba tɛ yɛkɔ bɔlɛ akɔ bagɛ be di nu Yuɖanɛ. Balɛ ba ga ishubhubhui omagbla nɛa bha nɛ butsrukpɔ bewele afɛtalɛ̃ntɛabha.

³ Klɛ ɛba kɔ mɛ bebuimɔɖɔ tɛabha nɛ kemi, klɛ la ba ɖɔ ebui elu ewi 1,260 mɛ, nɛ ɛdɔnyinye apɔtɛ mɛ.”

⁴ Alɛ enu olivɛ isi tɛbha anɛ kanɛgbɛsi tɛbha nɛ gɛ li kesukpɛabha Apalete nɛ amɛ.

⁵ Onu gɛ anɔteli apɛa sɛ abhɛtɛ balɛ kibuizizi tili, kifu ba de balɛ inugbu mɛ koeyi klɛ kɛ ba tã bagɛ ba dɛ pɛa lɛ. Kana anɔnyanɔ gɛ aba pɛa sɛ tɛ abhɛtɛ balɛ kibui tili nɛ alasɛ tɛ etsi.

⁶ Banɔa nɛɛ kemi ka lɛ balɛ ahwɛ sɛ tɛ ba nyɛna kɛlɛɛ nɛ mɛ ada sɛ subha atɛ ba dɔ nɛ kibe li mɛ gɛ baa ɖɔ ebui elu; klɛ kemi ka lɛ balɛ ahwɛ sɛ tɛ be tsyina beni nɛ edzi dzyosu klɛ ba ba na butsutsɔmɔ kanyakɛdi ebe hu kesukpa nɛa bha kɛ pɛɛ gɛ ba pɛɛ.

⁷ Ɔtsɔ̃ kibe lɛ gɛ ba bhɛtɛ balɛ ebuimumɔɖɔ nɛ beke, agavuga nɛ gɛ ebe de koeyi nɛ Ozidzudzu nɛ mɛ aba dɔa lɛa bha, klɛ aba ŋalɛabha klɛ ebe yia lɛ.

⁸ Balɛ ishuidzya tsitsi nɛ ba wɔ ɔmagbla nɛ edzo nɛa bha, gɛ be kulu nɛ kɛkpalɛ mɛ asɛ Soɖomu anɛ Egibite, nɛ ɔklɛ tsyɛ gɛ ba kpla Apalete nɛ asɔ.

⁹ Nɛ ewi tata nɛ kapɛ mɛ banɔ denɔ banɔɛtsu, kɛmadi, bunuhu huhu anɛ amadigbla nɛ be di balɛ ishuidzya tsitsi nɛ asɛsɛ klɛ ba tɛ ba dɛmɛ asɛ tɛ la vubɔa lɛ.

¹⁰ Bagɛ balɛ kesukpa nɛabha na ba dɔa lɛ afla klɛ la ba ŋa kiwi ganɔ kɛdɔ kukɔ ɔhayɛ, alasɛ batɔnu tɛabha na tɛ nyagbã nɛ bagɛ balɛ kesukpa nɛabha.

¹¹ Pɔ nɛ ewi tata nɛ kapɛ nɛede ɛkpã ɔfufɔɛ ode Kpaya ɔkɔ obo tsoku balɛ mɛ, klɛ ba lɔ kititi nɛ balɛ ɛtsrɛa bha, klɛ kifu tsutsɔmɔ ku ba gɛ ba mɔa lɛ.

¹² Ɔkɛlɛ be nu olim toli gɛganɛɛ denɔ owũsise gɛ ɔɖɔ tsrea lɛ ɔsɛ, “Wu ba ɔkɛ̃.” Klɛ be wu avɛ owũsise nɛ ɔmunɔ nɛ mɛ, nɛ kibe lɛ gɛ bagɛ ba dɛ pɛa lɛ ne dzi edi asɛsɛ.

¹³ Nɛ ɔɖɔ lɛlɛ nɛ mɛ ɖɛɛ kesukpa gɛganɛ tieli ka ba hwa klɛ ɔmagbla nɛ kapɛ tierikpo nɛ bupɛ lɔfɔm na tsra. Banɔ akpã tegene balɛ etsi nɛ kesukpa huhwa nɛ mɛ, klɛ bagɛ ba gɔ nɛ si kifu zizi klɛ ba kɔ Kpaya nɛ owũsise nɛ kabhakpɛkpɛ.

¹⁴ Butɔ bhla nɛ ba fla, butramɛ nɛɛ ba nɛ kibe kplitaa mɛ.

Kaxũlɛ̃ Gigenemi

¹⁵ Kpayaxwɛdɛ gigenemi na bɔ yɛa xũlɛ̃, klɛ ilim gɛganɛɛ yi nɛ owũsise, gɛ ka ɖɔ sɛ: “Kanɔ nɛ mɛ bukusiɔŋakɔ nɛ bo dzi bulɔ Apalete anɛ yɛ Kristo bukusiɔŋakɔ, klɛ aba ŋɛabha ɔvɛnɔ mabeke mabekem.”

¹⁶ Klɛ beshishe afɛtabhantɛalɛ̃, nɛ gɛ be zhiedzi balɛ bukusigbu nɛa bha nɛ Kpaya amɛ, be zhiadɔ ekumu amɛesi klɛ ba kpɛ kɛtɔkpuesi akɔ Kpaya,

¹⁷ aaɖɔ sɛ: “Bu hu wɔ ahwɛ, Apalete Kpaya gɛ adɛ, Agɛ yɛ alɛ klɛ aza, alasɛ ɔtɛ yɛkɛ wɔ kemi gbla klɛ ɔtɛ kpɛesi ɔŋɛabha.

¹⁸ Amadi nɛ apɔɛshum; klɛ wɔ obulo nɛ ɔtɛ ba. Kibe nɛ na sɛ tɛ be kulu kebhui nɛ betsitsi, klɛ tɛ ba buya kɛbhɛ kɔ wɔ baxwɛwa batɔnu anɛ wɔ banɔnɛna anɛ bagɛ ba kpɛ wɔɛ nyi nɛabha, be bhliyi anɛ bagbɛgbla— ganɛ kɔ bagɛ be zi kesukpa nɛ tɛzizi.”

¹⁹ Ɔkɛlɛ Kpaya busɔlɛvu nɛ owũsise nɛ danɛ, klɛ nɛ yɛ busɔlɛvu nɛ mɛ ba mɔ yɛ onugbunyɛnya osiakputɔ. Klɛ kifu ɛmɔɛ ba, ilimgugu, subhalɛlɛ aklãgbu, kesukpa huhwa anɛ amuklãgbuilɛ gbɛgbla.