Tɛbubukasɛ 1 - ONUGBÙ NYƐNYÃ VUVƆ

Kesikpɛkpɛ

¹ Yesu Kristo tɛbubukasɛ gɛ, Kpaya akɔ yɛ sɛ tɛ ayɛkɔ kasɛ yɛ baxwɛdɛ kɛgɛ baa ba kɛlɛ mɛ nɛ kibe kplitaa mɛ. Akɔ le ti lɛ ganɔ yɛ kpayaxwɛdɛ nɛ tɛkpɛkpɛ sɛsɛ yɛ axwɛdɛ Yohanɛsɛ,

² gɛ aɖɔakasɛ kɛdɔnyɛdɔ gɛ amɔ kɛlɛ nu, Kpaya kibui nɛ tɛmumɔɖɔ denɔ Yesu Kristo ɔkɔ.

³ Bayula anɔ nɛ gɛ aakla ebui nɛ gɛ ede kibuiɖuɖɔlui nɛ mɛ, klɛ bayula bagɛ balɛ enui lɛ klɛ ba yɛkɔ kɛgɛ ba ŋlɔmɛ nɛ akpɛ balɛ idzyi mɛ, alasɛ kibe nɛ tsobunɔ.

Tɛsɛsɛnɔ Anɛ Kabhakpɛkpɛ

⁴ Denɔ mɛ Yohanɛsɛ ɔkɔ, Kɔ basɔlɛha tigene nɛ Esia kɛdɔ nɛ mɛ: Ɛyamyuyɔ anɛ ishuyuyɔ kɔ nɔ denɔ agɛ yɛ alɛ, anɛ agɛ yɛ aza, nɛ agɛ yɛ aba tɛ ba nɛ ɔkɔ, anɛ denɔ ɛfufɔɛ tigene nɛ ɔkɔ nɛ yɛ kegbu nɛ amɛ,

⁵ anɛ denɔ Yesu Kristo ɔkɔ, gɛ yɛ enu ebuimɔɖɔ kɛgbɛagbayɛ, eyitutɔpu nɛ gɛ ba mɔ denɔ bekpu nɛ mɛ, anɛ agɛ yɛ aŋa bekusi nɛa bha anɛ kesukpa nɛa bha. Kɔ agɛ yɛa dɛmɛ lɔɛ bui klɛ ebu lɔ edenɔ bulɔ buzizi mɛ ganɔ yɛ dzyosu mɛ,

⁶ klɛ abhɛtɛ lɔ sɛ tɛ bu dzi bukusiɔŋakɔ anɛ kpayabanɔ tɛ bu kpɛ kɛtɔkpuesi kɔ yɛ Kpaya anɛ Aka—yɛ ishubhuibhui anɛ kemi ka lɛ ɔyɛkɔ vɛnɔ mabeke mabeke mɛ! Tɛlɛbɛlɛm.

⁷ Di! aaba nɛ ɔmunɔ, klɛ kɛwɔ̃hũ nyɛwɔ̃hũ ba mɔ yɛ, bagɛ ba shɔ yɛ dɔ nɛ tsyɛ, klɛ banɔ nɛ petee nɛ kesukpa nɛa bha nɛ ba za anhũdzɛdzam ɔkpɛ yɛ so. So kana kɛ ba za! Tɛlɛbɛlɛm.

⁸ Apalete Kpaya nɛ asɛ, “Mɛ nu Kesikpɛkpɛ anɛ Tɛbibeke,” “gɛ alɛ, klɛ aza, klɛ yɛ aba ba, Agɛ yɛa dɛ.”

Anɔ Ansɛ Anɔdzyrame Yɛ Eyi

⁹ Mɛ, Yohanɛsɛ, wɔnɔ adzya anɛ apɛplɛnɔ nɛ butɔ anɛ bukusiɔŋakɔ anɛ tɛdudɔfɔ̃ kitekpɛkpɛ gɛ le nu bulɔa yɛ nɛ Yesu mɛ, gɛ aza Patmosɛ kenimokpo nɛa bha ɔkpɛ Kpayɛbui nɛ tɛmumɔɖɔ nɛ Yesu shu so.

¹⁰ Nɛ Apalete Kiwi nɛa bha ɛza Ɔfufɔɛ mɛ, klɛ mɛ inu ogugu gɛganɛ toli nɛ mɛe de ansɛ kaxũlɛ̃,

¹¹ gɛ kaa ɖɔ sɛ, “Ŋlɔmɛ kɛdɔnɔ nɛ gɛ ɔmɔ nɛ ɔtrɔ keplukpa bha tɛ ɔyɛkɔ sɛsɛ basɔlɛha tigene: Efesusɛ, Simina, Pɛgamum, Taɛtira, Saɖisɛ, Filadelfia anɛ Laoɖisea.”

¹² Itsyina tsya sɛ tɛ idi oli nɔɔ nɛ mɛ gɛ ɔɖɔ kaɖɔ nɛ otsre mɛ. Klɛ gɛ itsyina ɛmɔ sɛkadzɛdzã kanɛgbɛsi tigene,

¹³ klɛ nɛ kanɛgbɛsi nɛ shi anɔ teli ansɛ anɔdzyrame yɛ Eyi, akpasɛ awidzidze mɛ gɛ ezhi aba da yɛ butsrukpɔ anɛ sɛkadzɛdzã kɛkulɔ tili gɛ ga yɛ kite nɛ mɛ fla nɛ awi nɛ shu.

¹⁴ Yɛ kɛtɔkpu tɛka nɛ kifuli ansɛ agatɛka, ansɛ subhɛklãgbu, klɛ yɛ anhũ nɛ atã ansɛ kifu,

¹⁵ Yɛ butsrukpɔ nɛ dzi ansɛ ayawa gɛ atã nɛ kifuowule mɛ, klɛ yɛ oli nɛ mɛ ɔtɔkɔ ansɛ beni gɛ ba kpɛ.

¹⁶ Nɛ yɛ kɛŋa ɔhwɛ nɛ mɛ evunɔ awɛ̃wɛ̃ tegene, klɛ ɛhɛ shɛshɛ inugbutɛbha de koeyi nɛ yɛ onugbu nɛ mɛ. Yɛ amɛnɛm aza ansɛ kiwi gɛ kɛɛ tã nɛ kɛlɛ tɛgɛganɛ mɛ petee.

¹⁷ Gɛ ɛmɔ yɛ, ɛwɔlɔdɔ nɛ yɛ otugba ansɛ butsi mɛ itsi. Kɛlɛ ayɛkɔ yɛ kɛŋa ɔhwɛ nɛ atrɔ mɛa bha klɛ asɛ, “Ti si kifu. Mɛ nu atutɔpu anɛ agɔgɔɛ.

¹⁸ Mɛ nu Agɛ alɛ nɛ Ɛkpã, Iti tsi, klɛ no di ɛlɛ nɛ ɛkpã ɔyɛkɔ vɛnɔ! Klɛ ivunɔ butsi anɛ bekpu mɛ kedunuaɖɛ.

¹⁹ Kɛlɛ so, “Ŋlɔmɛ kɛdɔnɔ nɛ gɛ ɔmɔ, kɛgɛ lɛ ɔtsɔ̃ anɛ kɛgɛ ba ba kɛlɛ mɛ kidegba.

²⁰ Awɛ̃wɛ̃ tegene nɛ gɛ ɔmɔ nɛ mɛ kɛŋa ɔhwɛ nɛ mɛ anɛ sɛkadzɛdzã kanɛgbɛsi tigene anɛ kibuikpukpu kɛlɛ nu sɛ: Awɛ̃wɛ̃ tegene alɛ enu kpayaxwɛdɛ kɔ basɔlɛha tigene, klɛ sɛkadzɛdzã kanɛgbɛsi tigene nɛ ɛlɛ nu basɔlɛha tigene.