Romanɛ 9 - ONUGBÙ NYƐNYÃ VUVƆ

Kpaya Nɛ Yɛ Banɔ Kukulu

¹ Ɛɖɔ kɛgba nɛ Kristo mɛ—iti hu otro, mɛ kititi nɛ ɖɔ trɔɛ lɛa bha nɛ Ɔfufɔɛ Dzyɔgo nɛm,

² Same mamɔmamɔ gbla anɛ butɔ vɛa bha nɛ mɛ idzyim.

³ Alasɛ ɛta pɛɛ sɛ mɛnahwɛ ba ta ɖɔɛbui akpɛm tɛ ba pɔ mɛ nɛ Kristo shu akpɛ madzyalɛ nɛ so, gɛ be nu mɛnahwɛ kɛmadim banɔ,

⁴ gɛ be nu Izraɛlanɛ. Balɛ yɛ kɛlɛ nu sɛ tɛ bayɛkɛ balɛ ansɛ beyi, balɛ yɛ kɛlɛ nu ɔfufɔɛ mɛ ishubhubhui, inugbunyɛnya, ɔshã anɛ tɛyɛyɛkɛ, busɔlɛvu mɛ tɛsusɔlɛ nɛ tɛtutrɔ.

⁵ Balɛ yɛ kɛlɛ nu banɔshishe, klɛ denɔ balɛ mɛ Kristo ansɛ anɔdzyrame ana la ba mɔ yɛ bakakuku, gɛ enu Kpaya kɔ anɔnyanɔ, gɛ ba kpɛ nɛa bha! Tɛ kɛbɛlɛm.

⁶ Anɛ sɛ gɛ Kpaya kibui nɛ dɛ ba kɛlɛ mɛ. Alasɛ ganɛ banɔ nɛ petee gɛ ba mɔ denɔ Izraɛl nɛ balɛ nu Izraɛlanɛ.

⁷ Ɔdɔgɔsɛ alasɛ be de yɛ oku nɛ mɛ so balɛ petee be nu Abraham yɛeyialɛ. Kɛlɛ mazɛ lɛ mɛ, “Ganɔ Isakɛ mɛ la ba mɔ wɔnɔeyialɛ nɛ edenɔ.”

⁸ Nɛ kaɖɔɖuɖɔ bhlatɔ mɛ, ganɛ beyi nɛ gɛ ba mɔ nɛ ishuidzya nɛ mɛ balɛ enu Kpaya yeyialɛ, pɔ beyi nɛ gɛ ba tɛ ɖɔa lɛ bui elu gɛ le di ansɛ Abraham yɛeyialɛ.

⁹ Alasɛ kana tɛtutrɔ nɛ ɖɔ sɛ: “Nɛ kibe nɛ mɛ gɛ ba kɔ nɛ mɛ ɛba tsodzi ɛba, klɛ Sara aba mɔ eyianyɛ.”

¹⁰ Ganɛ kana tite, pɔ Rebeka yɛeyialɛ aka terikpoa lɛ nɛ ko yɛenu balɛ aka, gɛ enu bulɔ aka Isakɛ.

¹¹ Pɔ, flogo tɛ la ba mɔ tɛabhaeyi ɔdɔgɔsɛ ba bhɛtɛ kibui dzyɔgo ɔdɔgɔsɛ kɛkpã tili, sɛ tɛ kɛdɔnɔ nɛ so pɛ Kpaya akasɛ wɔɛ nɛ ba za:

¹² ganɛ ganɔ axwɛwɛwam pɔ ganɔ agɛ yɛ ekulu anɔ nɛa bha, be tsre Rebeka asɛ, “Eshishe nɛ aba dɛ kɛxwɛ akɔ anuvɔ.”

¹³ Ansɛ gɛ ba ŋlɔmɛ elu sɛ: “Yakɔb ɛɖɔ yɛ, pɔ Esao ɛdɛ dɛmɛ yɛ bui.”

¹⁴ Kide lɔ ba ɖɔ ɔtsɔ̃? Kpaya edi anɔa mɛ? Kɛma na!

¹⁵ Alasɛ aɖɔ etsre Mose asɛ, “Eshutukubui didi aba za mahwɛ kɔ anɔ nɛ gɛ ɛba di eshutukubui, klɛ ɛyamyuyɔ ba za mahwɛ nɛ anɔ nɛ gɛ mɛ ɛyamyuyɔ nɛ lɛ kɔ.”

¹⁶ Kɛlɛso, ganɛ anɔdzyrame tɛpɛpɛ ɔdɔgɔsɛ yɛ tɛbhɛbhɛtɛ mɛ kɛlɛ, pɔ Kpaya eshutukubui didi mɛ.

¹⁷ Alasɛ Kpayɛbuieplukpa nɛ tsre Farawo sɛ, “Ifeke wɔ wunɔ kɔ tɛtutrɔɛ nɛ, sɛ tɛ ibu mɛ kemi nɛ kasɛ nɛ wɔm klɛ sɛ tɛ be kulu mɛ kinyi akana nɛ kesukpa nɛa bha petee.”

¹⁸ Kɛlɛso eshutukubui didi alɛ Kpaya mɛ nɛ anɔ nɛ gɛ apɛa sɛ tɛ edi eshutukubui, klɛ agɛganɛ anɔ nɛ gɛ apɛa sɛ tɛ agɛganɛ.

¹⁹ Wɔnɔmɛayɛ teli ebe tsrem asɛ, “Kɛlɛ kide so pɛ Kpaya eke bu bulɔɛ pɔ? Alasɛ anee gɛ yɛ awlãnkɛ nɛ yɛ tɛpɛpɛ?”

²⁰ Pɔ anee wɔ onu, wɔ anɔdzyrame, pɛ obo dzu onugbu nɛ Kpaya? “Klɛ kɛdɔnɔ nɛ gɛ ba bhɛtɛ, nɛ ba ɖɔ tsre agɛ abhɛtɛ lɛ nɛ asɛ, ‘Kide so pɛ ɔbhɛtɛ mɛ kana?’ ”

²¹ Kɛlɛ adɔbhɔ nɛ ataa mɔɛ dzo ayɛkɔ tisi tirikpoe lɛ nɛ abhɔɛ dɔ gɛ kɛlɛ shuixwɛ wɛwa gbla ba za pɛ ataa yɛkɔ tisi lɛ nɛ ke abhɔ kɛdɔ tite ko nɔ?

²² Kɛlɛ kide, onu gɛ Kpaya, aba pɛa sɛ tɛ akasɛ yɛ obulo tɛ be ti yɛ kemi, gɛ tɛdɛdɔfɔ̃ɔ gelee lɛ yɛahwɛ nɛ bagɛ balɛ amɔ obulo nɛ nɔ—ba tɛ bala elu kɔ tɛzizi?

²³ Kide lɛ nu, onu gɛ abhɛtɛ ana sɛ tɛ be ti yɛ ishubhubhui mɛ kesrɔdɔ kɔ yɛ eshutukubuididi, nɛ gɛ be putɔ abala lu kɔ ishubhubhui—

²⁴ bulɔ krua, gɛ eklu nɛ tsyɛ, ganɛ denɔ Yuɖanɛ nɛm tite pɔ denɔ bagɛ di nu Yuɖanɛ nɛ tsyɛ mɛ?

²⁵ Ansɛ gɛ aɖɔ nɛ Hoseya mɛ asɛ: “Ɛba kulua lɛ ‘manɔalɛ’ gɛ edi nu manɔalɛ; klɛ mɛ ba kulu adzɛ nɛ sɛ ‘mɛaɖɔyi’ gɛ edi nu maɖɔyi,”

²⁶ klɛ, “Kɛba ba kɛlɛ mɛ nɛ ɔkɛlɛ gɛ ba ɖɔɛ lɛ etsrea lɛ, ‘Wɔnɔ no di nu mɛ banɔ,’ be be kulua lɛ asɛ ‘Kpaya gɛ alɛ nɛ ɛkpã yɛeyianyɛalɛ.’ ”

²⁷ Yezaya akpɛ ogugu aɖɔ tsre Izraɛlanɛ na sɛ: “Kɛlɛ lɛ mɛ sɛ Izraɛlanɛ nɛ tɛkpikpem nya lɛ ansɛ aƒu anyɛsɛ̃, bagɔgɔɛ nɛ ko le be bu.

²⁸ Alasɛ Apalete nɛ aba vɛ lɛa bha nɛ yɛ kɛpɔbubu nɛ kesukpa nɛa bha anɛ tɛtsutsɔm nɛ kalɛ tɛbibekem.”

²⁹ Kidzi ko ansɛ gɛ Yezaya aɖɔ aba flanɔ, “Odi nu sɛ Apalete gɛ Adɛ ashɛnahwɛ bulɔ ansɛ okuɔ nɛ mɛ anɛ, bu ta ba dzi ansɛ Soɖom, bu ta ba dzi ansɛ Gomora.”

Izraɛlanɛ Nɛ Kabhamayɛkɛŋa

³⁰ Kide lɔ ba ɖɔ ɔtsɔ̃? Sɛ Bagɛ be di nu Yuɖanɛ, gɛ ba dɛ nyɛna tɛnɛnamɛzɛza evunɔ, na tɛ yɛkɛ lɛ, tɛnɛnamɛzɛza ganɔ tɛyɛyɛkɛŋɛa bha;

³¹ pɔ Izraɛlanɛ, gɛ ba kpatɔnɔ tɛnɛnamɛzɛza ɔshã, na ka yɛkɛ lɛ.

³² Kide so? Alasɛ ba za kɛlɛe de ganɛ ganɔ tɛyɛyɛkɛŋɛa bha pɔ edzi ansɛ axwɛwɛwa bha. Ba kpatanɔ “kɛklãgbu kpɛkpatanɔ.”

³³ Ansɛ gɛ ba ŋlɔmɛ elu: “Di, ilu kɛklãgbu nɛ Zayɔnɛ gɛ kɛ kpatanɔ anɔ nɛ kɛklãgbugbla gɛ kɔ sɛ banɔa wɔlɛ adɔ, klɛ anɔ nɛ gɛ ayɛkɛ yɛabha aŋa ba tɛ ba kpɛ yɛ kɛwɛ̃.”