Romanɛ 8 - ONUGBÙ NYƐNYÃ VUVƆ

Ɛkpã Ganɔ Ɔfufɔɛ Nɛm

¹ Kɛlɛso, ɔtsɔ̃ kɛpɔbubu va ma kɔ bagɛ ba kpasɛ Yesu Kristo mɛ,

² alasɛ ganɔ Yesu Kristo mɛ ɛkpã Ɔfufɔɛ ɔshã nɛ obu mɛ nɛ buzizi anɛ butsi ɔshã nɛm.

³ Alasɛ kɛdɔnɔ nɛ gɛ ɔshã nɛ ɔdɛ mɔ kemi pɛ lɔ na bhɛtɛ akpɛasɛ buzizi tɛzɛzam zi dɔ nɛ ɔlɛ shu so, Kpaya xũ nɛ abhɛtɛ kɛlɛ ganɔ yɛnahwɛ Yɛeyi nɛ gɛ akpɛ asɛsɛ ansɛ anɔ zizi gɛ ba yɛkɔ akɔ nɛ buzizi kɛtɔkpu. Klɛ so ebu buzizi kɛpɔ nɛ anɔ gɛ abhɛtɛ buzizi mɛ,

⁴ sɛ tɛ ɔshã nɛ tɛzɛzam dzyɔgo nɛ gɛ lo bisi nɛɛ, ba mɔɛ lɛ nɛ bulɔ mɛ, bulɔa gɛ bu ma nɛ ɛkpã nɛ buzizi mɛ tɛzɛza kidzoa bha, pɔ bu lɛ nɛ ɛkpã nɛ Ɔfufɔɛ nɛ kidzoa bha.

⁵ Bagɛ ba lɛ nɛ ɛkpã nɛ buzizi mɛ tɛzɛza kidzoa bha, balɛ atɔkpu nɛm petee tsri kɛdɔnɔ nɛ gɛ tɛzɛzaɛlɛ nɛm bisi, pɔ bagɛ ba lɛ nɛ Ɔfufɔɛ nɛ kidzoa bha nɛ atɔkpu nɛ mɛ etsri Ɔfufɔɛ nɛ tɛ bibisia bha.

⁶ Anɔ gɛ abhɛtɛ buzizi nɛ tɔkpu mɛ nu butsi, pɔ kɛtɔkpu nɔɔ nɛm gɛ Ɔfufɔɛ ɔlɛ ɔŋa kɛlɛa bha nɛ nu ɛkpã nɛ ishuyuyɔ,

⁷ Anɔ gɛ abhɛtɛ buzizi nɛ tɔkpu mɛ nu kititilulɔ nɛ Kpaya shu. Kɛ tɛɛ kpɛ kɛtɔkpuesi kɔ Kpaya ɔshã, ɔdɔgɔsɛ kɛ ba naa bhɛtɛ ana.

⁸ Banɔ nɛ gɛ buzizi tɛzɛzam kɛlɛ gbanɔa lɛ nɛ ti be ku Kpaya awɔ̃.

⁹ Wɔnɔ, pɔ nɛɛ, tɛzɛzamkpã nɛ tɛ ŋa nɔa bha, Ɔfufɔɛ nɛ ɔlɛ ɔŋa nɔa bha, onu gɛ Kpaya Ɔfufɔɛ nɛ ɔlɛ wɔnɔ mɛ. Klɛ onu gɛ anɔ teli Kristo Ɔfufɔɛ nɛ ɔma yɛ mɛ, edi nu Kristoa yɛ.

¹⁰ Pɔ onu gɛ Kristo akpasɛ wɔ mɛ, wɔ shuidzya nɛ tsi akpɛasɛ buzizi so, pɔ wɔ ɔfufɔɛ nɛ ɔlɛ nɛ ɛkpã akpɛ tɛzɛzam dzyɔgo so.

¹¹ Klɛ onu gɛ agɛ ebu Yesu edenɔ bekpu mɛ nɛ Ɔfufɔɛ ɔlɛ lɛ wɔnɔ mɛ, klɛ agɛ ebu Kristo edenɔ bekpu mɛ tsyɛ aba kɔ wɔnɔ ishuidzya nɛ ɛkpã ganɔ yɛ Ɔfufɔɛ nɛ gɛ ɔlɛ nɔ mɛ.

¹² Klɛso nɛɛ, badzya mɔ, kɛlɛ bulɔ kɔ—pɔ ganɛ bulɔ buzizi ɛkpã nɛ nu lɔ ba za.

¹³ Alasɛ onu gɛ nɔɔ lɛ nɛ buzizi ɛkpã nɛ nu, no bo tsi, pɔ onu gɛ nɛ Ɔfufɔɛ nɛ nu kɛlɛ alɛ nɔ bɔ yɛkɔ ishuidzyam ebuikpã nɛ ɔkɔ butsi, nɔ bɔ za nɛ ɛkpã,

¹⁴ alasɛ bagɛ Kpaya Ɔfufɔɛ nɛ ɔɔgbanɔ be nu Kpaya yeyialɛ.

¹⁵ Alasɛ nɔ dɔɔ flɔ yɛkɛ ɔfufɔɛ nɛ gɛ ɔbhɛtɛ nɔ anɔdzidzi kɔ kifusisi, pɔ nɔ yɛkɛ eyidzidzi Ɔfufɔɛ. Klɛ ganɔ yɛa bha bu kpɛ ogugu sɛ, “Abba, Aka.”

¹⁶ Ɔfufɔɛ nɛ nahwɛ obu ɔɖɔ plɛnɔ bulɔ ɔfufɔɛ nɛ ɔsɛ bu nu Kpaya yɛeyialɛ.

¹⁷ Ɔtsɔ̃ nɛɛ, onu gɛ buu nu banuvɔ, klɛa lɛ bu nu beyi gɛ aba ŋa Kpaya ɔzakɔ, Kpaya ɔŋakɔeyi anɛ ɔŋakɔeyi plɛnɔ Kristo, onu gɛ kɛɛ lɛ lɛm sɛ bu plɛnɔ nɛ yɛ batɔ́ nɛ mɛ sɛ tɛ bulɔ tsyɛ ba za yɛ ishu bhuibhui nɛ mɛ plɛnɔ yɛ.

Ishubhubhui Gɛ Ba Bá Nɛ Otugba

¹⁸ Idi lɛ sɛ bulɔ ɔtsɔ̃ nɛ batɔ́ nɛ ama gɛ ba ba yɛkɔ sɔnɔ ishubhuibhui nɛ gɛ be be bu akasɛ nɛ bulɔ mɛ.

¹⁹ Kanɔ nɛ mɛ kepo nɛ kidzoenu didi gɛganɛ kɔ Kpaya yɛeyialɛ nɛ tɛbubukasɛ.

²⁰ Alasɛ kanɔ nɛ mɛ kɛbe kuakpã, ganɛ kalɛ nahwɛ tɛpɛpɛɛ nu, pɔ agɛ akpɛa lɛ kakpã, nɛ kidzoenudidi

²¹ sɛ kanɔ nɛ nahwɛ ka ba za tibubule mɛ edenɔ kalɛ tɛnyɛnyam vɛnɔ tɛtsutsɔmɔ mɛ klɛ la ba yɛkɔ amɛna Kpaya yɛeyialɛ nɛ ishubhubhui tɛbuboli mɛ.

²² Bu nyi sɛ kanɔ nɛ petee kee nimi ansɛ onu gɛ ba ba mɔ eyi ɔyɛkɔ ɔbɔ tɔnɔ nɛ ɔtsɔ̃.

²³ Ganɛ kana tite ko, pɔ bulɔ nahwɛ, nɛ gɛ Ɔfufɔɛ nɛ eyuyu tutɔpu nɛ alɛ lɔ ahwɛ, bu nimi nɛ kɛmɛ flogo pɛ bu dzi po gɛganɛɛ bulɔ tɛyɛyɛkɔ dzi ansɛ beyi, kɔ bulɔ ishuidzya nɛ tɛbubu.

²⁴ Alasɛ nɛ kidzoenudidi nɛ mɛ le bu lɔ. Pɔ kidzoenudidi nɛ gɛ ɔɔmɔ kidi nu kidzoenudidi. Ane gɛ ekee di kidzoenu kɔ kɛdɔnɔ nɛ gɛ lɛ yɛahwɛ kukuku?

²⁵ Pɔ onu gɛ bu di kidzoenu kɔ kɛgɛ ka za lɔ ahwɛ, bu poe lɛ nɛ tɛdudɔfɔ̃ mɛ.

²⁶ Kidzoe lɛ nɛa bha ke, Ɔfufɔɛ nɛ ɔga pɛ lɔ plɛnɔ lɔ nɛ kibe lɛ gɛ budɛ gɛganɛ nɛm. Bu ti nyi kɛdɔnɔ nɛ gɛ kɛlɛ alasɛ bu kulukpaya kɔ, pɔ Ɔfufɔɛ nɛ nahwɛ ovuibue nɛ lɔ nu nɛ tininimi nɛ gɛ atɔnu tɛ ba naa bu kasɛ.

²⁷ Klɛ agɛ ya nyɔ bulɔ idzyi nɛ mɛ enyi Ɔfufɔɛ nɛ tɔkpum, alasɛ Ɔfufɔɛ nɛ ovuibue nɛ banɔnɛna nɛ tɔkpu nɛ Kpaya tɛpɛpɛ nu.

Adɛ Bagɛ Baŋɛabha

²⁸ Klɛ bu nyi sɛ nɛ ebui nɛ petee mɛ Kpaya awa kɛxwɛ akɔ bagɛ ba ɖɔ yɛ nɛ tɛpɛ̃pɛ, gɛ be kulu nɛ yɛ kɛgɛ apɛɛ nɛ nu.

²⁹ Alasɛ banɔ nɛ gɛ Kpaya enyi putɔnɔ atɛ bhɛtɛ alɛ sɛ tɛ ba za Yɛeyi nɛ tɛzɛzam, sɛ tɛ ebe dzi amumɔtutɔpu nɛ badzya gelee shi.

³⁰ Klɛ bagɛ atɛ bala elu, balɛ tsyɛ ekulu; bagɛ ekulu, adanɛ balɛ shu tsyɛ; bagɛ balɛ shu adanɛ, ebhuialɛ shu tsyɛ.

³¹ Kɛlɛ, kide, lɔ ba ɖɔ yɛkɔ bu kibui nɛ nu? Onu gɛ Kpaya enu bulɔa yɛ, anee gɛ aba na kititi lɔ nɛ bulɔ shu?

³² Agɛ adɛ da ahwɛ akpɛ yɛ nɛahwɛ Yeyi, pɔ ayɛkɔ yɛ akpɛahwɛ nɛ lɔɛ tɔkpu, klɛ tsyɛ ataa yɛkɔ aplɛnɔ yɛ, nɛ eshutukubuididi mɛ akɔ lɔ kɛdɔnyɛdɔɛdi?

³³ Anee gɛ aba yɛkɔ kibui tili nɛ bagɛ Kpaya eti bu nɛ shu? Kpaya ya danɛ anɔ shu.

³⁴ Anee nalɛlɛ nɛ gɛ ebuipɔ? Kristo Yesu, gɛ etsi, ɔyɛkɔ ɔdɛa na, gɛ be bu amɛna ɛkpã mɛ, akpasɛ Kpaya kɛŋa ɔhwɛ mɛ klɛ eke vuibue tsyɛ nɛ lɔɛ tɔkpu.

³⁵ Anee gɛ aba pɔɛ lɔ ehle nɛ Kristo tɛɖuɖɔ kɔ lɔ nɛ shu? Bunuhu pɛnɔɔ, ɔdɔgɔsɛ kanɔmgɛganɛ ɔdɔgɔsɛ tɛkpɛkpatɔnɔ ɔdɔgɔsɛ bubhɛ ɔdɔgɔsɛ alagba ɔdɔgɔsɛ ɔtsrekpã ɔdɔgɔsɛ kɛpamɛ?

³⁶ Ansɛ gɛ ba ŋlɔmɛ elu asɛ: “Akpɛ wɔnɔ so bu dzu amɛ nɛ butsi nɛ ewia nɛ mɛ nyɔ̃ɔ; ba mɔ bulɔ ansɛ ibhoshi gɛ lɛ kɔ tɛbhubhui.”

³⁷ Ao, nɛ ebuia nɛ mɛ petee bu dɛ banɔ gɛ ba ŋɛabha ganɔ anɔ nɛ gɛ aɖɔ lɔ nɛa bha.

³⁸ Alasɛ kixuim sɛ butsi ɔdɔgɔsɛ ɛkpã o, kpayaxwɛdɛ ɔdɔgɔsɛ ɛfufɔɛkpã o, ɔtsɔ̃ ɔdɔgɔsɛ otugbam, ɔdɔgɔsɛ kemi kanyaka,

³⁹ buɖɛɖama ɔdɔgɔsɛ budzudzu o, ɔdɔgɔsɛ kɛdɔnyɛdɔɛdi nɛ kanɔa nɛm petee, kɛlɛ ba na lɔ pɔ nɛ Kpaya tɛɖuɖɔ nɛ gɛ kpasɛ Kristo Yesu bulɔ Apalete nɛm kɔ lɔ.