Romanɛ 7 - ONUGBÙ NYƐNYÃ VUVƆ

Kɛdɔkɛkasɛ Nɛ Aglɔgbɛgbanɔ Shu

¹ Badzya mɔ, no ti nyi— alasɛ ɛɖɔ kaɖɔ tsre banɔ nɛ gɛ be nyi ɔshã—sɛ ɔshã nɛɛ lɔ ŋa Anɔdzyrame abha nɛ yɛ kɛ lɛ nɛ gɛ anya lɛ nɛ ɛkpã ko?

² Ansɛ, nɛ ɔshã nɛ nu adzɛ gɛ bagbanɔ alɛ plɛnɔ yɛenyine nɛ kɛ lɛ nɛ gɛ anyɛ nɛ anya lɛ nɛ ɛkpã ko, pɔ onu gɛ yɛenyine nɛ etsi, eboli nɛ aglɔgbɛgbanɔ ɔshãm.

³ So onu gɛ, aza da zanɔ anyɛ bhlatɔ nɛ kibelɛ gɛ yɛenyine nɛ aka lɛ nɛ ɛkpã, be be klua sɛ adzɛ gɛ adɛ ɔma mɛ. Pɔ onu gɛ yɛenyine eetsi, ɔshã ɔdɔɔ nya yɛ klɛ edi nu ɔmamɛ adɛdɛ, kii dzi sɛ aza da zanɔ anyɛ bhlatɔ tsyɛ.

⁴ So, madzyalɛ mɔ, wɔnɔ tsyɛ no tsi kɔ ɔshã ganɔ Kristo ishuidzya mɛ, sɛ tɛ no bo dzi anɔbhlatɔa yɛ, gɛ yɛ la nyɛmɛ ebu nɛ bekpum, sɛ tɛ bu ba yu eyuyu kɔ Kpaya.

⁵ Alasɛ nɛ kibe lɛ nɛ gɛ buzizi tɛzɛzam ŋa bulɔa bha, buzizi mɛ ɛdzyɛ nɛ gɛ ɔshã nɛ obuyinɔ nɛ wa kɛxwɛ nɛ bulɔ ishuidzyam, gɛ kɛkɔ sɛ bu yu eyuyu kɔ butsi.

⁶ Pɔ ɔtsɔ̃ nɛɛ, gɛ bu ti tsi ɔkpɛ kɛgɛ nya lɔ nɛ so, be ti bule lɔ nɛ ɔshã nɛ mɛ sɛ tɛ bu da wa kɛxwɛ nɛ Ɔfufɔɛ Dzyɔgo nɛ kidzo vuvɔa bha, klɛ ganɛ nɛ kidzo kuku nɛa bha gɛ ɔshã nɛ ɔŋlɔmɛ olu.

Tɛwũwlãnkɛ Nɛ Buzizi

⁷ Kide lɔ ba ɖɔ ɔtsɔ̃? Buzizi ɔshã nɛ onu? Nɛ kɛgbɛagba mɛ kɛma na! Kɛgbɛagba ɛgɛ ta ti kɛdɔnɔ nɛ gɛ buzizi nu gɛ odi nu sɛ ganɔ ɔshã nɛm. Alasɛ ɛgɛ ta ti kɛdɔnɔ nɛ gɛ kawɔ̃kpɛ ke nu otɔsɛ ɔshã nɛ ɔdɛ ɖɔ sɛ, “Tɛ kpɛ awɔ̃.”

⁸ Pɔ buzizi, bu nyɛna kidzo nɛ gɛ ɔshã nɛ ɔkɔ lɛ nɛm ovunɔ, bu bhɛtɛ kpɛ mɛmɛ kawɔ̃kpɛ tɛpɛpɛɛ kanyakɛdi. Alasɛ nɛ ɔshã nɛede, buzizi nu kɛdɔtsitsi.

⁹ Ɛza nɛ ɛkpã nɛ ɔshã nɛ mazamazam, pɔ gɛ ɔshã nɛ obo koeyi, buzizi ba koeyi ba ɛkpãm klɛ mɛ tsi.

¹⁰ Ɛba mɔ sɛ ɔshã nɛ gɛ ɔba sɛ tɛ ɔmɛna ɛkpã ɔlɛ ɔbuyɔ mɛna butsi.

¹¹ Alasɛ buzizi, bu mɔ kidzo ganɔ ɔshã nɛa bha, bu wɛɛm, klɛ ganɔ ɔshã nɛ mɛ klɛ bu yim.

¹² Klɛso, ɛshã nɛ shu ibhui, klɛ tɛtutrɔkɔ nɛ shu obhui, kɛna klɛ kɛbɔ.

¹³ Kɛdɔnɔ nɛ gɛ bɔ, klɛ zɛ ba dzi butsi kɔ mɛ? Kɛma na nɛ kidzo nyɛdzoa bha! Pɔ sɛ tɛ ba kpɛ buzizi kɛxawũ sɛ bu nu buzizi, bu bhɛtɛ butsi nɛ mɛmɛ ganɔ kɛdɔnɔ nɛ gɛ bɔ nɛ mɛ, sɛ tɛ ganɔ tɛtutrɔkɔ nɛa bha buzizi zɛ ba tsɔmɔ trɔ.

¹⁴ Bu nyi sɛ ɔshã nɛ onu ɔfufɔɛ; pɔ mɛ ɛma ɔfufɔɛ mɛ, ba dɛ mɛ ansɛ anɔdzidzi kɔ buzizi.

¹⁵ Ɛtɛ nu kɛgɛ ɛbhɛtɛ nɛesi. Alasɛ kɛgɛ ɛpɛɛ sɛ tɛ ɛbhɛtɛ ɛtɛɛ bhɛtɛ, pɔ kɛgɛ edɛ pɛɛ kɛlɛ mɛ ɛbhɛtɛ.

¹⁶ Klɛ onu gɛ ɛbhɛtɛ kɛgɛ ɛtɛɛ pɛɛ sɛ tɛ ɛbhɛtɛ, ɛdɛmɛ sɛ ɔshã nɛ ɔbɔ.

¹⁷ Anasɛ gɛ kɛ lɛɛ, kɛ dɛ kanu sɛ mɛnahwɛ mɛ bhɛtɛ lɛ, pɔ buzizi nɛ gɛ kpasɛ mɛmɛ.

¹⁸ Ɛnyi sɛ kɛdzyɔgo kanyaka ma mɛ́mɛ, kɛlɛ nu sɛ, nɛ mɛ buzizi tɛzɛza nɛ mɛ. Alasɛ tɛpɛpɛɛ sɛ tɛ ɛbhɛtɛ kɛdzyɔgo nɛ kpasɛ mɛ́mɛ, pɔ ɛtɛ na kɛlɛ bubhɛtɛ.

¹⁹ Alasɛ kɛgɛ ɛbhɛtɛ ganɛ kɛlɛ nu kɛdzyɔgo nɛ gɛ ɛpɛɛ sɛ tɛ ɛbhɛtɛ, ao, kɛtsutsɔmɔ nɛ gɛ ɛtɛɛ pɛɛ sɛ tɛ ɛbhɛtɛ, kɛlɛ tɛbhɛbhɛtɛa bha ko itsri ɛbhɛtɛ.

²⁰ Ɔtsɔ̃ nɛɛ, onu gɛ ɛbhɛtɛ kɛgɛ ɛdɛ pɛɛ sɛ tɛ ɛbhɛtɛ, ganɛ mɛ kaa bhɛtɛ lɛ, pɔ buzizi nɛ gɛ lɛ mɛ́mɛ bulɛ bhɛtɛ lɛ.

²¹ So ɛmɔ ɔshã nɛ lɔ wa kɛxwɛ: Kibe nɔɔ gɛ ɛsɛ bhɛtɛ kɛdzyɔgo, butsutsɔmɔ li ɔkɛlɛ plɛnɔ mɛ.

²² Alasɛ nɛ mɛ ishu mɛ ɛmɔ same nɛ Kpaya ɔshã nɛ mɛ,

²³ pɔ ɛɛmɔ ɔshã bhlatɔ gɛ odzi ɔwa kɛxwɛ nɛ mɛ ishu mɛ dɔ nɛ mɛ, gɛ ɔɔta keyu nɛ ɔshã nɛ gɛ ɔlɛ mɛ tɔkpu mɛ, klɛ lɔɔ bhɛtɛ mɛ evuza kɔ buzizi ɔshã nɛ gɛ odzi ɔwa kɛxwɛ nɛ mɛ ishu mɛ.

²⁴ Anyɛ gɛ ama kibuinyɛbuim ɖueɖuidi mɛ ɛba dzi ana! Anee gɛ ebe bu mɛ edenɔ ishuidzya butsi nɛ mɛ?

²⁵ Ahwɛhuhu kɔ Kpaya ganɔ Yesu Kristo bulɔ Apalete nɛa bha! Kɛlɛso, mɛ nahwɛ nɛ mɛ kɛtɔkpu mɛ inu anɔdzidzi kɔ Kpaya ɔshã, pɔ nɛ buzizi tɛzɛza mɛ inu anɔdzidzi kɔ buzizi ɔshã.