Romanɛ 6 - ONUGBÙ NYƐNYÃ VUVƆ

Tɛtsitsi Kɔ Buzizi, Ɛkpãzɛza Nɛ Kristom

¹ Kide lɔ ba ɖɔ ɔtsɔ̃? Buzizi nɛa bha ko lɔ ba za sɛ tɛ eshutukubuididi nɛ eze wuabha?

² Kidzonyɛdzo ma na! Bu tɛ tsi kɔ buzizi, klɛ bu zɛ ba za bulɛ mɛ fla vɛnɔ?

³ Ɔdɔgɔsɛ no tinyi ɔsɛ bulɔa gɛ ba kpɛ buni akɔ petee nɛ Yesu Kristo mɛ ba kpɛ buni akɔ lɔ nɛ yɛ butsi mɛ?

⁴ Kɛlɛso ba vubɔ lɔ aplɛnɔ yɛ ganɔ bunikpɛkpɛm akpɛ butsi mɛ sɛ tɛ, ansɛ gɛ be feke Kristo ebu denɔ bekpu mɛ ganɔ Aka nɛ ishubhuibhui mɛ, bulɔ tsyɛ bu ba za nɛ ɛkpã vuvɔ.

⁵ Onu gɛ batɛ bhɛtɛ lɔ terikpoa na nɛ yɛ butsi mɛ, klɛalɛ bulɔ tsyɛ ba za terikpo nɛ yɛ nɛ yɛ tɛlulɔ nɛm.

⁶ Alasɛ bunyi sɛ ba tɛ kpla bulɔ ɛkpãkuku nɛ asɔ plɛnɔ yɛ sɛ tɛ buzizi ishuidzya nɛ beke, sɛ tɛ bu taa ba dzi anɔdzidzi kɔ buzizi,

⁷ alasɛ anɔnyanɔ gɛ eti tsi ebuoli nɛ buzizi mɛ.

⁸ Ɔtsɔ̃ onu gɛ buu tsi nɛ Kristo, bu yɛkɛŋa sɛ bu ba za nɛ ɛkpã tsyɛ nɛ yɛ.

⁹ Alasɛ bunyi sɛ gɛ beti feke Kristo ebu nɛ bekpu mɛ, etie fle tsi, butsi dɛ ka ŋa yɛa bha.

¹⁰ Butsi nɛ gɛ etsi, etsi kɔ buzizi butsi trukpo ko; pɔ ɛkpã nɛ gɛ alɛ, alɛ ɛlɛ kɔ Kpaya.

¹¹ Nɛ kidzoe lɛ nɛ dia bha, nɔ kla wɔnɔ shu sɛ no tsi kɔ buzizi pɔ nɔ lɛ nɛ ɛkpã kɔ Kpaya nɛ Yesu Kristo mɛ.

¹² Kɛlɛso, nɔ tɛ kɔ sɛ buzizi ŋa wɔnɔa bha nɛ ishuidzyam sɛ tɛ nɔ bɔ ta batɔ nɛ ɛlɛ tɛpɛpɛɛ tsutsɔmɔ.

¹³ Nɔ tɛ yɛkɔ wɔnɔ ishu nɛ bupɛ nɛ ɔkɔ buzizi, ansɛ kɛtɔkpum gɛganɛ kɛxwɛwadɔ, pɔ nɔ yɛkɔ wɔnɔ ishu ɔkɔ Kpaya, ansɛ banɔ gɛ be bu edenɔ butsi mɛ amɛna ɛkpãm, tɛ nɔ yɛkɔ wɔnɔ ishu nɛ bupɛ ɔkɔ yɛ ansɛ tɛnɛnamɛzɛza kɛxwɛwadɔ.

¹⁴ Alasɛ buzizi tɛ ba dzi wɔnɔ apalete, alasɛ wɔnɔ nɔ ma ɔshãesi, pɔ eshutukubui didi esi nɔ kpasɛ.

Banɔdzidzi Kɔ Tɛnɛnamɛzɛza

¹⁵ Kɛlɛso kide ɔtsɔ̃? Bu bhɛtɛ buzizi sɛ bu ma ɔshãesi pɔ eshutukubui didi esi lɔ kpasɛ? Kɛma kidzonyɛdzoa bha na!

¹⁶ No ti nyi ɔsɛ onu gɛ nɔ yɛkɔ wɔnɔ shu ɔkɔ anɔ teli sɛ tɛ nɔ ta yɛatɔ ansɛ yɛ anɔdzidzi ana, no nu banɔdzidzi kɔ agɛ yɛ nɔ tatɔ— kii dzi sɛ banɔdzidzi kɔ buzizi, gɛ gbanɔ anɔ kpɛ butsi mɛ, ɔdɔgɔsɛ batɔtɛta, gɛ aba gbanɔ nɔ avɛnɔ tɛnɛnamɛzɛza?

¹⁷ Pɔ ahwɛhuhu kɔ Kpaya sɛ, kɛ nya lɛ kɛlɛm sɛ tsã no dzi banɔdzidzi kɔ buzizi, nɔ yɛkɔ wɔnɔ idzyi petee ɔtatɔ nɛ kɛdɔkɛkasɛ nɛ di gɛ ba yɛkɔ kpɛ ahwɛ kɔ nɔ.

¹⁸ Be bule wɔnɔ nɛ buzizi mɛ, klɛ no dzi banɔdzidzi kɔ tɛnɛnamɛzɛza.

¹⁹ Ɛɖɔ kibui nɛ anɔdzyrame dzoenu alasɛ nɔ ma kemi nɛ wɔnɔ nahwɛshum. Anasɛ gɛ nɔɔ yɛkɔ wɔnɔ shu bupɛ nɛ ɔkpɛ anɔdzidzi mɛ ɔkɔ bumabhui mabhui klɛ tɛ no zo wunɔ kɛtɔkpum gɛganɛa bha, so ɔtsɔ̃ nɔ yɛkɔ ɛlɛ ɔkpɛ anɔdzidzi mɛ ɔkɔ tɛnɛnamɛzɛza kɔ ishubhubhui.

²⁰ Kibelɛ nɛ gɛ no dzi banɔdzidzi kɔ buzizi, nɔ mɔhwɛ nɛ tɛnɛnazɛzam ahwɛ.

²¹ Kide nɔ mɔ denɔ ebui nɛ gɛ alɛ eku wɔnɔ kɛwɛ̃ nɛ ɔtsɔ̃ nɛ mɛ? Ebuia lɛlɛ alɛ ebe dzi butsi!

²² Pɔ ɔtsɔ̃ nɛ gɛ be ti bule nɔ edenɔ buzizi mɛ, klɛ no dzi banɔdzidzi kɔ Kpaya, kɛ gɛ nɔ bɔ mɔ denɔ kɛlɛ mɛ nɛ ba kpɛ nɔ nɛ ishubhubhui mɛ, klɛ kɛ gɛ ba de koeyi nɛ kɛlɛ mɛ nɛ nu ɛkpã mabeke mabeke.

²³ Alasɛ buzizi kɛbhɛ kɛlɛ nu butsi, pɔ Kpaya kɛdɔkukɔ kɛlɛ nu ɛkpã gɛ tɛ ba beke nɛ bulɔ Apalete Yesu Kristom.