Romanɛ 3 - ONUGBÙ NYƐNYÃ VUVƆ

Kpaya Tɛyɛyɛkɛŋa

¹ Kɛdzyɔgo ɖueɖu, kɛlɛ lɛ kɛlɛm sɛ onu Yuɖaeyi, ɔdɔgɔsɛ kedziŋɛŋa ɖueɖu ka la lɛ bunyɛnyɛ bhubhui mɛ?

² Gelee nɛ kidzonyɛdzoa bha! Putɔnɔ, ba tɛ yɛkɔ Kpaya ebuia lɛ nɛɛ di akpɛ balɛ ahwɛ.

³ Kɛlɛ onu gɛ tɛyɛyɛkɛŋa ma beteli ahwɛ nɛ xɔ? Tɛyɛyɛkɛŋa nɛ gɛ ma balɛ ahwɛ kɛ ba tsa odi kpɛ Kpaya tɛyɛyɛkɛŋa nɛm dza?

⁴ Kɛma na! Kɔ Kpaya edzi kɛgba, klɛ tɛ anɔnyanɔ edzi etroni. Anasɛ gɛ ba ŋlɔmɛ elu asɛ, “Sɛ tɛ ba trɔ ahwɛ nɛ wɔabha sɛ ɔna onu gɛ ɔɖɔaɖɔ klɛ tɛ wɔɛ bui nɛ ŋa onu gɛ okuluebhui.”

⁵ Pɔ onu gɛ bulɔ manamana nɛ kɛ bu Kpaya tɛnɛna nɛ kasɛ wee, kide lɔ ba ɖɔ? Sɛ Kpaya adɛ na bhɛtɛ sɛ yɛ obulo nɛ ɔba bulɔa bha? (Anɔdzyrame kibui ɖuɖɔ nu shuixwɛ mɛ ewa.)

⁶ Ganɛ kana kɛ lɛ! Onu gɛ kana kɛɛ lɛ, kɛlɛ Kpaya eze be kuluebhui nɛ kanɔ?

⁷ Anɔteli yɛ aba ɖɔ asɛ, “Onu gɛ mɛ otrohuhu ɔbɔ kpɛ Kpaya kɛgbam zɛza nɛ otugba, pɛ kɛ ba kpɛ yɛ ishubhubhui nɛ otugba, kide so pɛ be ze be bu nɔɛ pɔ ansɛ anɔ gɛ abhɛtɛ buzizi?”

⁸ Kide so pɛ nɔ tɔɔ ɖɔ— ansɛ gɛ bee zi bulɔ shu sɛ buu ɖɔ klɛ ansɛ gɛ beteli ebu aɖɔ asɛ bu ɖɔ sɛ— “Nɔ kɔ lɔ bhɛtɛ kizizi sɛ tɛ kɛdzyɔgo ba koeyi?” Ba lɛ kɔ kɛpɔbubu.

Anɔnyanɔ Adɛ Na

⁹ Kɛlɛ kiɖueɖu lɔ ba yɛkɔ ɔtsɔ̃? Bu pɛ̃ dɛ xãa? Kɛ ma ana! Bu tɛ bhui lɛm sɛ Yuɖanɛ anɛ bagɛ di nu Yuɖanɛ nɛ petee ba kpasɛ buziziesi.

¹⁰ Anasɛ gɛ ba ŋlɔmɛ elu asɛ: “Anɔnyanɔ adɛ na, terikpo tsyɛ ama,

¹¹ anɔnyanɔ ama gɛ enu kibuiesi, akanyaka gɛ apɛɛ Kpaya tsyɛ ama.

¹² Balɛ petee be ti tsyina ashɛ, ba tɛ kpɛetsu edzi banɔ gɛ kedziŋɛŋa kanyaka ma lɛ; akanyaka ama gɛ abhɛtɛ kɛdzyɔgo, terikpo pɛ tsyɛ ama.”

¹³ “Balɛ ahali nɛm enu idzre gɛ danɛ dzi, balɛ anɛkɛ nɛ awɛ anɔ.” “Atagblashã aɖii ala lɛ balɛ nu.”

¹⁴ “Balɛ inugbu nɛ mɛ yuku nɛ ebuiɖuɖɔkpɛ anɔ nɛ bukɛtɛkɛtɛ.”

¹⁵ “Balɛ ɛtsrɛ ɛtsɔ nɛ dzyosu bɛbalɛesim,

¹⁶ bubibeke anɛ butɔ kpasɛ balɛ edzo mɛ,

¹⁷ klɛ beti nyi ishuyuyɔɛ dzo.”

¹⁸ “Kpaya kifusisi ma balɛ amɛ.”

¹⁹ Ɔtsɔ̃ bu nyi sɛ kibuinyɛbui gɛ ɔshã nɛ ɔɔɖɔ, lɔɔ ɖɔ tsre bagɛ ba kpasɛ ɔlɛesi, sɛ tɛ onugbu kanyaka ba da ɔlɛ klɛ kanɔ nɛ petee ke be bu ishunu nɛ Kpaya amɛ.

²⁰ Kɛlɛso beti be bu anɔnyanɔ aɖɔ asɛ ana nɛ yɛ amɛ sɛ abhɛtɛ ɔshã nɛa bha so, pɔ, ganɔ ɔshã nɛ mɛ klɛ bu ti bulɔ buzizi.

Tɛnɛna Ganɔ Tɛyɛyɛkɛŋam

²¹ Pɔ ɔtsɔ̃ nɛɛ tɛnɛna denɔ Kpaya ɔkɔ, nɛ ɔshã nɛede, nɛ lɛ tɛtitim, gɛ Ɔshã anɛ Batɔnu nɛ ebu aɖɔ.

²² Tɛnɛna nɛɛ di denɔ Kpaya ɔkɔ kɛɛ ba ganɔ tɛyɛyɛkɛŋa nɛ Yesu Kristom kɔ bagɛ ba yɛkɛaŋa nɛ petee. Ɔtɔgɛga ɔma,

²³ alasɛ banɔ nɛ petee ba tɛ bhɛtɛ buzizi klɛ Kpaya ishubhubhui nɛ lɛla nɛ balɛ shu,

²⁴ klɛ ba tɛ mɔ tɛwũwũse ganɔ yɛ eshutukubui didi mɛ ganɔ Yesu Kristo anɔ bhubhuiyɛkɛ mɛ.

²⁵ Kpaya ayɛkɔ yɛ akɔ anasɛ kɛtɔkpu tsɛtsrakɛ, ganɔ tɛyɛyɛkɛŋa nɛ yɛ dzyosu mɛ. Abhɛtɛ kibui nɛ asɛ tɛ ayɛkɔ ebu yɛ tɛnɛna nɛ akasɛ, alasɛ nɛ yɛ tɛdudɔfɔ̃ɔ mɛ atɛ shɛ̃nahwɛ ebuizizi nɛ gɛ ba bhɛtɛ eputɔnɔ nɛ shu butɔ matɛtamatɛta—

²⁶ abhɛtɛ kɛlɛ asɛ tɛ ayɛkɔ ebu yɛ tɛnɛna nɛ akasɛ nɛ kibe nɛm, sɛ tɛ ana tɛ edzi anɔ nɛ gɛ adanɛ banɔ nɛ gɛ tɛyɛyɛkɛŋa lɛ balɛ ahwɛ nɛ shu nɛ Yesu mɛ.

²⁷ Kɛlɛ fakɔ, ishufifeke ka lɛ? Be builɛ atɛ̃. Nɛ kidzo ɖueɖua bha? Nɛ ɔshã nɛ tɛbhɛbhɛtɛ abha yɛ? Ao, pɔ nɛ tɛyɛyɛkɛŋa yɛa bha.

²⁸ Alasɛ bu nyɛna kɛlɛm vunɔ sɛ, anɔdzyrame aba danɛ yɛshu ganɔ tɛyɛyɛkɛŋam nɛ ɔshã bha bhɛbhɛtɛ ede.

²⁹ Kpaya Yuɖanɛ Kpaya tite ko enu? Gnɛ yɛ ko yɛ enu bagɛ ba dɛ yɛkɛaŋa nɛ tsyɛ ayɛ? Ee, enu kɔ balɛ tsyɛ,

³⁰ nɛ kiwili gɛ Kpaya terikpo ko yɛalɛ, gɛ yɛ aba danɛ bagɛ be bhui bunyɛnyɛ nɛ shu ganɔ tɛyɛyɛkɛŋɛa bha anɛ bagɛ edi bhui bunyɛnyɛ ganɔ tɛyɛyɛkɛŋa tirikpoe lɛlɛ nɛa bha.

³¹ Kɛlɛ sɛ tɛ, ɔtsɔ̃, bu tsa odi kpɛ ɔshã nɛm ganɔ tɛyɛyɛkɛŋa nɛ so? Kɛma ana! Nɛ kɛlɛ ɔzakɔ, alɛasɛ tɛ bu nyɛna ɔshã nɛm vunɔ.