Romanɛ 14 - ONUGBÙ NYƐNYÃ VUVƆ

Agɛ Agɛganɛ Anɛ Agɛ Adɛ Gɛganɛ

¹ Yɛkɛ agɛ yɛ tɛyɛyɛkɛŋa nɛ ma kemi, kebhui maklumaklu nɛ yɛ nɛ ebui nɛ gɛ ba ba wlãnkɛ nɛ shu.

² Anɔ teli tɛyɛyɛkɛŋa kɔ yɛ dzo sɛ aŋa kɛdɔnyɛdɔ, pɔ anɔ bhlatɔ, gɛ yɛ tɛyɛyɛkɛŋa nɛ dɛ gɛganɛ, aŋa tɛga ko.

³ Anɔ nɛ gɛ aŋa kɛdɔnyɛdɔɛdi ama sɛ ebu agɛ ataa ŋa ana nɛa bha agɔ, klɛ anɔ nɛ gɛ ataa ŋa kɛdɔnyɛdɔɛdi, ama sɛ tɛ ebu agɛ aaŋa nɛa bha agɔ, alasɛ Kpaya atɛ yɛkɛ yɛ.

⁴ Anee onu gɛ obo kulu kebhui nɛ anɔ teli yɛ axwɛdɛ? Yɛ nahwɛ apalete amɛ aba na ɔdɔgɔsɛ aba wɔlɛ. Klɛ aba za na, alasɛ Akagbla nɛ aba na yɛ bhɛtɛ sɛ tɛ ana.

⁵ Anɔ teli ayɛkɔ kiwi tiili asɛ kɛlɛ shu bhui dɛ tiili; anɔ bhlatɔ teli ayɛkɔ sɛ ewi nɛ petee alɛ terikpo. Anɔnyanɔ alasɛ tɛ kɛ ku yɛ awɔ̃ petee nɛ yɛnahwɛ tɔkpum.

⁶ Anɔɔ nɛ gɛ ayɛkɔ kiwi tili ansɛ kɛlɛ ɔtɔ, abhɛtɛ lɛ akɔ Apalete. Anɔɔ nɛ gɛ aŋa kɛdzya, aŋa kɛlɛ akɔ Apalete, alasɛ ehu Kpaya ahwɛ; klɛ anɔ nɛ gɛ ata ŋa, abhɛtɛ lɛ ana akɔ Apalete klɛ ehu ahwɛ.

⁷ Alasɛ bulɔmɛayɛ kanyaka ama nɛ ɛkpã kɔ shu tite klɛ bulɔmɛayɛ kanyaka etee tsi kɔ ishu tite.

⁸ Onu gɛ bulɛ nɛ ɛkpã, bulɛ kɔ Apalete; klɛ onu gɛ bu tsi, bu tsi kɔ Apalete. Kklɛso, bulɛ nɛ ɛkpã o bu tsi o, bu nu Apalete nɛayɛ.

⁹ Nɛ kibui nɛ shu so, Kristo etsi klɛ etsodzi aba ɛkpãm sɛ tɛ ebe dzi Apalete kɔ be tsitsi nɛ belulu.

¹⁰ Kɛlɛ, wɔ, kide so pɛ okulu kebhui nɛ wadzya? Ɔdɔgɔsɛ obu wadzya bha ɔgɔ? Alasɛ bulɔ petee ba lɔ Kpaya kebhuiegbu nɛ amɛ.

¹¹ Ba ŋlɔmɛ elu asɛ: Apalete nɛ asɛ, “ ‘Anasɛ gɛ kɛ lɛ kɛlɛ mɛ sɛ ɛlɛ nɛ ɛkpã,’ ‘kikuisi kanyaka ba zhikpla nɛ mɛ amɛ; kɛnɛkɛ kanyaka ba danɛ ishum kɔ Kpaya.’ ”

¹² So nɛ kɛlɛ mɛ, bulɔmɛayɛ kanyaka ebe bu yɛnahwɛ shu nu kɔ Kpaya.

¹³ Kɛlɛ so nɛɛ, nɔ kɔ lɔ yɛlɔ kebhui kulu nɛ ɔhayɛ. Tɛ, nɔ tɛ bhɛtɛ kɛtɔkpum ɔsɛ tɛ nɔ tɛ yɛkɔ kɛdɔnyɛdɔ gɛ ba kpatanɔ anɔ ɔdɔgɔsɛ nɔ yɛkɔ kɛdɔ obhui dzo mɛ kɔ nɔ adzyalɛ.

¹⁴ Anasɛ anɔ gɛ akpasɛ Apalete Yesu mɛ, kɛ kum awɔ̃ sɛ kɛdɔŋɛŋa kanyaka ma gɛ kɛlɛ shu dɛ bhui nɛ kɛlɛ tɛzɛzam. Pɔ onu gɛ anɔ teli edi kɛdɔ tili asɛ kɛlɛ shu dɛ bhui, kɛlɛ alɛ yɛshui lɛ di bhui kɔ.

¹⁵ Onu gɛ wɔadzya etsoku butɔm akpɛ kɛdɔnɔ nɛ gɛ ɔŋa nɛ so, kɛlɛ ɔtɔ kɔɔ ga nɛ tɛɖuɖɔ mɛ nɛ yɛ. Tɛ kɔ sɛ ganɔ wɔ kɛŋɛŋa shu tɛ ozi wɔadzya nɛ gɛ yɛ tɔkpu Kristo etsi.

¹⁶ Tɛ kɔ sɛ kɛdɔnɔ nɛ gɛ odi sɛ kɛbɔ ba ɖɔ kaɖɔ nɛ kɛlɛ shu anasɛ butsutsɔmɔ.

¹⁷ Alasɛ Kpaya bukusiɔŋakɔ, ganɛ kɛdɔŋɛŋa anɛ kɛdɔwɛ̃wɛ bui, pɔ tɛnɛnamɛzɛza, ishuyuyɔ anɛ same nɛ Ɔfufɔɛ Dzyɔgo nɛ mɛ,

¹⁸ alasɛ anɔnyanɔ gɛ akpɛ kɛtɔkpuesi kɔ Kristo nɛ kidzoe nɛa bha, kɛ ku Kpaya awɔ̃ klɛ banɔa trɔ ahwɛ kɛlɛa bha.

¹⁹ Kɛlɛso nɔ kɔ lɔ ga kidzo kanyakɛabha sɛ tɛ bu bhɛtɛ kɛgɛ ba gbanɔ lɔ vɛnɔ ishuyuyɔ anɛ kɛtɔkpu tirikpom bhɛbhɛtɛ.

²⁰ Tɛ zi Kpaya kɛdɔ bhɛbhɛtɛ ɔkpɛ kɛŋɛŋa so. Kɛŋɛŋa kanyaka shu bhui, pɔ kɛ dɛ pɛ̃ sɛ tɛ anɔ aŋa kɛdɔnyɛdɔ gɛ ba kɔ sɛ anɔ teli ebe tuitsɛɖɛ.

²¹ Kɛ bɔ dɛ sɛ tɛ ɔtɛ ŋa kɛdzya ɔdɔgɔsɛ ɔwɛ̃ bulu ɔdɔgɔsɛ ɔbhɛtɛ kɛdɔnyɛdɔɛ di gɛ ba kɔ sɛ wɔadzya aba wɔlɛ.

²² So, kɛdɔnyɛdɔɛ dia bha gɛ ɔyɛkɛ ɔŋa nɛ ebuia nɛ shu nɔ nyɛna kɛlɛ ovunɔ nɛ aglɔɛshi anɛ Kpaya. Ba yula anɔ nɛ gɛ eti bu ishuipɔ ganɔ kɛgɛ kɛlɛa bha atrɔ ahwɛ.

²³ Pɔ anɔ nɛ gɛ adɛ yɛkɛaŋa, be ti bu yɛ kɛpɔ onu gɛ aŋaɛdɔ, alasɛ yɛ kɛdɔŋɛŋa nɛ dɛ de tɛyɛyɛkɛŋam; klɛ kɛdɔnyɛdɔ gɛ kɛ dɛ de tɛyɛyɛkɛŋa mɛ kinu buzizi.