Romanɛ 12 - ONUGBÙ NYƐNYÃ VUVƆ

Ishuyɛyɛkɔtsye Gɛ Lɛ Nɛ Ɛkpã

¹ Klɛso nɛɛ, badzya mɔ, itsre nɔ sɛ, nɛ Kpaya eshutukubui didi mɛ, tɛ ayɛkɔ wɔnɔ shuidzya ansɛ ishuyɛyɛkɔ tsye gɛ lɛ nɛ ɛkpã, gɛ ɛlɛshubhui klɛ kɛku Kpaya awɔ̃, kɛlɛ nu wɔnɔ ɔfufɔɛ mɛzɛza kɛtɔkpuesi kpɛkpɛ.

² Nɔ tɔɔ yɛkɔ wɔnɔ shu nɛ ɔkpɛ kanɔ nɛ tɛzɛza mɛ ɔtsɔlɛ, pɔ no dzi banɔ gɛ otsyina ganɔ wɔnɔ atɔkpum vuvɔ bhɛbhɛtɛ. Kɛlɛmɛ nɔ bɔ na Kpaya tɛpɛpɛ nu fekedi pɛ nɔ bɔ trɔahwɛ yɛ tɛpɛpɛ nɛa bha—yɛ tɛpɛ̃pɛ, kɛku awɔ̃ klɛ kɛna.

³ Alasɛ ganɔ eshutukubui didi nɛ gɛ ba kɔm mɛ ɛɖɔ tsre wɔnɔmɛayɛ kanyaka sɛ: Nɔ tɔɔ di wɔnɔ shu nɛ ɔsɛ nɔ ɖama dɛ kana gɛ alasɛ tɛ nɔ za, pɔ no bui tɔkpum nɛ wɔnɔ shu nɛ ishubububɔ kebhuikuklum, ansɛ gɛ tɛyɛyɛkɛŋa tɛdzidze nɛm gɛ Kpaya akɔ nɔ.

⁴ Ansɛ gɛ ishuidzya tirikpo lɛ kɔ bulɔmɛayɛ kanyaka nɛ ɛlɛm bupɛpɛɛpɛ gelee, klɛ ganɛ kɛxwɛ tirikpo bulɛ petee wa,

⁵ so nɛ Kristo mɛ bulɔ gɛ bu kpe nɛ ishuidzya tirikpo mɛ, klɛ kapɛ kanyaka lɛ kɔ bugɔgɔɛ nɛ petee.

⁶ Kɛdɔkukɔ ɔtutɔtɔ lɛ kɔ lɔ, nɛ bulɔ eshutukubui didi nɛ nu. Onu gɛ anɔteli kɛdɔkukɔ nɛ nu atɔnu, kɔ yɛ awa kɛlɛ shuixwɛ nɛ tɛyɛyɛkɛŋa nɛ gɛ lɛ yɛahwɛ nɛ nu.

⁷ Onu gɛ kɛ nu kɛxwɛdɛdɛ, kɔ yɛ aza dɛ lɛ, onu kɛ nu kɛdɔkɛkasɛ, kɔ yɛ akasɛ kɛdɔ;

⁸ onu kɛ nu kemikpɛkpɛ, kɔ yɛ akpɛ anɔ kemi, onu kinu kɛdɔdzyudzyɔ kɔ banɔ bhlatɔ, kɔ akɔɛ lɛ nɛ yɛ yam petee, onu kinu anɔnuzɛza, kɔ yɛ agbanɛ anɔ mɔmɔ; onu kinu eshutukubui didi, kɔ abhɛtɛ lɛ nɛ same.

Tɛɖuɖɔ́

⁹ Tɛɖuɖɔ́ alasɛ tɛ kɛtsa. Tɛ dɛmɛ kɛdɔnɔ nɛ gɛ mɛtã; nyɛna kɛgɛ bɔ nɛm ovunɔ.

¹⁰ Nɔ mɔ ɔhwɛ kɔ ɔhayɛ nɛ kɛdzyam anɔ ɖuɖɔ. No kpɛ aglɔ nɛa bha dɛ wɔnɔ nahwɛ shu.

¹¹ No ti zhiesi nɛ kemikpɛkpɛm, pɔ nɔ nyɛna wɔnɔ ɔfufɔɛ mɛ kɛdzyɔgo nɛ ovunɔ, anɛ kɛxwɛdɛdɛm kɔ Apalete.

¹² Nɔ mɔ same nɛ kidzoenu didi mɛ, dɔ fɔɔ̃ nɛ wɔ batɔ nɛm, za tɛyɛyɛkɛŋam nɛ Kpaya kuklum.

¹³ Shɛ̃nahwɛ kɛdɔ shu ɔkɔ Kpaya banɔ nɛ gɛ ba pɛ dɔ. Yɛkɔ ɛyamyuyɔ ɔkpɛ tɛbhɛbhɛtɛm.

¹⁴ Yula bagɛ ba kpatɔnɔ wɔ, yula anɔ klɛ tɛ ɖɔɛ bui ɔkpɛ anɔ.

¹⁵ Mɔ same nɛ baga mɔ same, tsishu nɛ bagɛ be tsi shu.

¹⁶ Nɔ za terikpo bhɛbhɛtɛm nɛ ɔhaglɔ. Tɛ feke ishu, pɔ za tɛpɛpɛm sɛ tɛ ɔbhɛtɛ terikpo nɛ banɔ nɛ gɛ balɛ ɛzakɔ bhli. No ti ku ishuawɔ̃.

¹⁷ Nɔ tɛ buya buzizi kɛbhɛ kɔ anɔ nɛ gɛ abhɛtɛ buzizi amɛna wɔnɔ kɔ. No lu awɔ̃ sɛ tɛ nɔ bhɛtɛ kɛgɛ bɔ nɛ anɔnyanɔ amɛ.

¹⁸ Kɛɛ baza bubuɔɛbɔɛ, nɛ kɛ lɛ nɛ gɛ kɛ lɛ nɛ wɔkɔ, za ishuyuyɔm nɛ anɔnyanɔ.

¹⁹ Nɔ tɛ bhɛtɛ kibui ɔkpɛ kibui nu, mɛ ɔbhɛalɛ mɔ, pɔ nɔ bala kɔ Kpaya obulo, alasɛ kɛ ŋlɔmɛ li sɛ: “Mɛyɛ kɛlɛ nu buwule bibisi; Apalete na sɛ ɛba buya kɛbhɛ kɔ anɔnyanɔ,”

²⁰ Nɛ kɛlɛa pɛ bhla, “Onu bubhɛ buyi agɛ adɛ pɛ wɔ, kɔ yɛ kɛdɔa ŋa; onu gɛ oniwɛ̃ ɔta yɛ, kɔ yɛ kɛdɔ tilia wɛ̃. Nɛ kɛnɛ tɛbhɛbhɛtɛ mɛ, kinu sɛ obu afuɔɛ gɛ atã ɔtrɔ yɛa da mɛ.”

²¹ Tɛ kɔ butsutsɔmɔ ŋa wɔnɔa bha, pɔ nɔ ŋa butsutsɔmɔa bha nɛ kɛdzyɔgo.