Romanɛ 10 - ONUGBÙ NYƐNYÃ VUVƆ

¹ Badzya mɔ, mɛ idzyi tɛpɛpɛ nɛ kpayakukulu kɔ Izraɛlanɛ sɛ tɛ ba mɔ tɛbubu.

² Alasɛ ɛba naa ɖɔ denɔ balɛ shu sɛ ba lɛ Kpaya tɛpɛpɛa bha gɛganɛɛ, pɔ balɛ tɛpɛpɛ nɛ de bhɔ trɔ kibuititia bha.

³ Gɛ kɛ lɛ kɛlɛm sɛ be tinyi tɛnɛnamɛzɛza nɛ gɛ de Kpaya ɔkɔ klɛ la lɛ kɛlɛe de sɛ tɛ be dzu balɛ nahwɛ yɛesi, ba dɛ kpɛ kɛtɔkpuesi kɔ Kpaya tɛnɛnamɛzɛza.

⁴ Kristo yɛ enu obekekɔ kɔ ɔshã sɛ tɛ tɛnɛnamɛzɛza za kɔ anɔnyanɔ gɛ ayɛkɛaŋa.

⁵ Mosesɛ ashrɔ nɛ kidzoe nɛa bha kana gɛ tɛnɛnamɛzɛza lɛ plɛnɔ ɔshã: “Anɔɔ nɛ gɛ aabhɛtɛ ebuia nɛɛ aba za plɛnɔ alɛ.”

⁶ Pɔ tɛnɛnamɛzɛza nɛ gɛ de tɛyɛyɛkɛŋa mɛ nɛ ɖɔ sɛ: “Tɛ ɖɔ nɛ wɔ idzyim ɔsɛ, ‘Anee gɛ ebe wu avɛ owũsise?’ ” (kɛlɛ nu sɛ, tɛ ozhinɔ Kristo ɔmɛna kesi)

⁷ “ɔdɔgɔsɛ ‘Anee gɛ ebe zhi avɛ odzudzukɔ?’ ” (kɛlɛ nu sɛ, tɛ obu Kristo nɛ bekpum ɔmɛna kabha).

⁸ Pɔ kide kibui nɛ ɖɔ? “Kibui nɛ tsobunɔ wɔ, kɛ kpasɛ wɔ onugbu nɛm anɛ wɔ idzyi nɛm,” kɛlɛ nu, tɛyɛyɛkɛŋa kibui nɛ gɛ buu bu ɖɔ sɛ:

⁹ Onu gɛ ɔdanɛ wɔ shum nɛ wɔ onugbu sɛ, “Yesu yɛ nu Apalete,” klɛ ɔyɛkɛŋa nɛ wɔ idzyim ɔsɛ Kpaya yɛ anyɛmɛ yɛ edenɔ bekpu mɛ, be be bu wɔ.

¹⁰ Alasɛ wɔ idzyi nɛ ɔyɛkɛ ɔŋa nɔ klɛ la yɛkɔ danɛ wɔ shu nɔ, klɛ wɔ onugbu nɛ ɔyɛkɔ danɛ wɔ shu nɔ pɛ be bu wɔ.

¹¹ Anasɛ gɛ Kpayabuieplukpa nɛ aɖɔ sɛ, “Anɔnyanɔ gɛ aka nɛ yɛa bha ba tɛ ba kpɛ yɛ kɛwɛ̃ edi.”

¹² Alasɛ ɔtɔgɛga ɔma Yuɖaeyi anɛ bagɛ ba dɛ yɛkɛaŋa nɛ Apalete lɛlɛ yɛ ko yɛ enu Apalete kɔ anɔnyanɔ klɛ ayula bagɛ balɛ petee balɛ aba yɛ ɔkɔ nɛ gelee,

¹³ alasɛ, “Anɔnyanɔ gɛ eklu Apalete nɛ nyi be be bu yɛ.”

¹⁴ Kɛlɛ, kɛba za sɛ be kulu anɔɔ nɛ gɛ yɛa bha ba dɛ yɛkɛ aŋa? Klɛ kɛlɛ la ba yɛkɛ aanɔ nɛ gɛ be ke nu yɛ dɔ di nɛa bha aŋa? Klɛ kɛlɛ le be nu yɛ dɔ gɛ odi nu sɛ anɔ teli yɛ aɖɔ yɛbui etsrea lɛ?

¹⁵ Klɛ kɛlɛ la ba ɖɔ yɛ shui bui onu gɛ baa ka kpɛ alɛ? Ansɛ gɛ ba ŋlɔmɛ kɛlɛ elu sɛ, “Kɛlɛ bagɛ ba mɛna kibui dzyɔgo nɛ butsrukpɔ ba pudi!”

¹⁶ Pɔ ganɛ Izraɛlanɛ nɛ petee balɛ ayɛkɛ kibui dzyɔgo. Alasɛ Yezaya aɖɔ asɛ, “Apalete, anee yɛ atɛ yɛkɛ bulɔ kibui nɛa bha aŋa?”

¹⁷ Nɛ kɛlɛ mɛ, tɛyɛyɛkɛŋa kɛɛ de kibui nɛ tɛnunu mɛ, klɛ kibui nɛɛ be nui lɛ ganɔ Kristo kaɖɔ nɛ mɛ.

¹⁸ Pɔ ibisi sɛ: Be di nu kibui? Kɛgba be nui lɛ asɛ: “Balɛ oli nɛm oti yi ɔvɛ kesukpa nɛa bha petee, balɛ ebuiɖuɖɔ la vɛ kanɔ nɛ ibekekɔ.”

¹⁹ Ɛkaa bisi sɛ: Izraɛl edi nu kɛlɛesi? Putɔnɔ, Mose aaɖɔ sɛ, “Ɛba bhɛtɛ nɔ sɛ tɛ bagɛ be di nu kɛmadi nɛ ba kpɛ nɔ awɔ̃; Ɛba bhɛtɛ sɛ tɛ kɛmadi nɛ gɛ kibuiesi nunu ma kɛlɛ ahwɛ nɛ kɛkpɛ nɔ obulo.”

²⁰ Klɛ Yezaya edzuawɔ̃ aɖɔ asɛ, “Bagɛ ba dɛ pɛɛ mɛ nɛ balɛ amɔ mɛ; Ibu mɛ shu kasɛ bagɛ be di bisi asɛ amɔ mɛ.”

²¹ Pɔ nɛ Izraɛlanɛ nɛ shu aɖɔ asɛ, “Nɛ kiwi nɛ mɛ petee ibu mɛ ɛhwɛ nɛ sɛsɛ anɔ gɛ ata tatɔ nɛ bagɛ edi tsyina nɛ petee,”