Filimɔnɛ 1 - ONUGBÙ NYƐNYÃ VUVƆ

Paolo Evuza Nɛ Keplukpa

¹ Paolo, Kristo Yesu evuza, anɛ Timotio bulɔ adzya, Kɔ Filimɔnɛ bulɔ ɔbhɛa dzyɔgo anɛ bulɔ axwɛwaglɔ,

² kɔ Afia bulɔ ada, kɔ Atsyipus bulɔ keyutugbaniglɔ kɔ busɔlɛɔha nɛ gɛ ooxogo nɛ wɔ bupa nɛ mɛ:

³ Ɛyamyuyɔ anɛ ishuyuyɔ kɔ wɔ denɔ Kpaya bulɔ Aka anɛ Apalete Yesu Kristo.

Ahwɛhuhu Anɛ Kpayakuklu

⁴ Kibenyɛbe ihu mɛ Kpaya nɛ ahwɛ ansɛ gɛ ɛbaka wɔɛ bui nɛ mɛ kpayakuklu mɛ,

⁵ alasɛ inu wɔ tɛyɛyɛkɛŋa anɛ Apalete Yesu nɛ wɔ tɛɖuɖɔ kɔ kpayabanɔ nɛ petee.

⁶ Ikulu kpaya sɛ tɛ ɔza kɛxwɛwɛwa mɛ nɛ wɔ tɛyɛyɛkɛŋa anɛ ketsukpɛkpɛ, sɛ tɛ kibuiesi nunu nɛna za wɔ ahwɛ kɔ kibui dzyɔgo kanyaka di gɛ lɛ bulɔ ahwɛ nɛ Kristo mɛ.

⁷ Wɔ tɛɖuɖɔ nɛ kɔ mɛ same piim kemikpɛkpɛ, alasɛ wɔ, adzya, ɔkpɛ kpaya banɔ nɛ idzyi same.

Paolo Akɔ Kɛtɔkpu Nɛ Onesimusɛ Nu

⁸ Kɛlɛso, nɛ Kristo mɛ ɛba nyaa na kite kpɛ klɛ ɛba kɔ sɛ ɔbhɛtɛ kɛgɛ kɛlɛ sɛ tɛ ɔbhɛtɛ,

⁹ pɔ ibisi denɔ wɔ ahwɛ mɛ nɛ tɛɖuɖɔ shu so. Mɛ ɔtsɔ̃, ansɛ Paolo ana, gɛ inu anɔshishe klɛ ɔtsɔ̃ tsyɛ idzi anɔ gɛ akpasɛ buvu nɛ Kristo Yesu,

¹⁰ ibisi denɔ wɔ ahwɛ mɛ kɔ mɛ eyi Onesimusɛ, gɛ edzi mɛ eyi nɛ kibe lɛ gɛ ɛza bɔɖɛ mɛ.

¹¹ Kukuku nɛɛ adɛ za kibuinyɛbui mɛ akɔ wɔ, pɔ ɔtsɔ̃ ebe dzi apɛplɛnɔ kɔ wɔ anɛ mɛ.

¹² Ɛɛkpɛ yɛ, gɛ enu mɛ idzyi, itsodzini yɛ ɛsɛsɛ wɔ.

¹³ Analo ɛta kɔ yɛ aza mɛ ɔbha sɛ tɛ aza wɔɛ nyi mɛ anɛ mɛ tɛpɛplɛnɔ mɛ nɛ kibe lɛ mɛ gɛ ɛkpasɛ bɔɖɛm nɛ Kpayɛbui nɛ shu.

¹⁴ Pɔ ɛdɛ pɛ sɛ tɛ ɛbhɛtɛ kɛbuinyɛbui nɛ wɔede, sɛ tɛ kɛdzyɔgo nɔɔ nɛ gɛ ɔbɔ bhɛtɛ kɛ ba dzi wɔ tɛdɛdɛmɛ klɛ ganɛ sɛ ɛtrɔ wɔa bha.

¹⁵ Ebhi kɛdɔnɔ nɛ so pɛ ba yɛkɔ yɛ ashɛnɔ kɛbɔɛ nɛ wɔ bha kɛlɛ nu sɛ tɛ be be tsodzini yɛ amɛna wɔ petee,

¹⁶ ansɛ anɔ gɛ etie dzi anɔdzidzi, pɔ aba pɛ̃ dɛ anɔdzidzi, aba za ansɛ adzya gɛ ɔɖɔ. Enu anɔ ɖuɖɔ kɔ mɛ pɔ ɔzɔ ɖɔ yɛ ɔdɛ mɛ, ansɛ anyɛ klɛ ansɛ adzya na nɛ Apalete nɛ mɛ.

¹⁷ So onu gɛ odim ansɛ wɔabhla ana, klɛ yɛkɛ yɛ ansɛ gɛ ɔbɔ yɛkɛ mɛ.

¹⁸ Onu gɛ abhɛtɛ kibui kpã tili ɔdɔgɔsɛ adɔ wɔ kɛdɔ tili kɛbhɛ, yɛkɔɛ lɛ ɔbɔ tɔnɔ mɛ.

¹⁹ Mɛ, Paolo, ɛŋlɔmɛ kɛdɔɛ nɛ mɛnahwɛ ɔhwɛ. Ɛba buya kɛlɛ tsodzini kɔ wɔ, kɛ ka za sɛ ɛɖɔ sɛ wɔnahwɛ tsyɛ ɔlɛ kɔ mɛ.

²⁰ Madzya, ɛpɛ sɛ, tɛ ɛmɔ kɛdɔ dzyɔgo tili denɔ wɔ kɔ anɛ Apalete nɛ mɛ, tɛ ɔkɔ mɛ idzyi ezhieku nɛ Kristo mɛ.

²¹ Nɛ wɔa bha yɛyɛkɛŋa anɛ batɔ tɛta mɛ, ɛŋlɔmɛ kɔ wɔ, klɛ mɛ nyi sɛ ɔbɔ bhɛtɛ ɔkɔ mɛ ɔdɛ kana gɛ ibisi.

²² Klɛ kibui tirikpo ka gɔ: Bala ɔyakɔ kɔ mɛ, alasɛ ididzoenu sɛ ɛba tsodzi ba wɔ bha nɛ kibisi nɛ gɛ obisi nɛ nu nɛ wɔ kpayakukulu mɛ.

²³ Epafras, mɛɔhayɛ evuza nɛ Kristo Yesu mɛ, asɛnɛ wɔ asɛsɛ.

²⁴ Kana ke Marko, Aristatsyusɛ, Dimas anɛ Luka, mɛɔhayɛalɛ baxwɛwa.

²⁵ Apalete Yesu Kristo ɛyamyuyɔ nɛ za plɛnɔ wɔ ɔfufɔɛ.