Mateo 9 - ONUGBÙ NYƐNYÃ VUVƆ

Yesu Ebeke Anɔgbɛgba Bunya

¹ Yesu atɛɛ ku kenia bha opupu toli mɛ, klɛa tsɔkɛ avɛ yɛ nahwɛ ɔma nɛ mɛ.

² Banɔ teli be tuku anɔgbɛgba nɛ oputsoa bha ebe lu. Gɛ Yesu amɔ bagɛ ba mɛna anɔ nɛ tɛyɛyɛkɛŋa, etsre anɔgbɛgba nɛ asɛ, “Kpɛɛ te, meyi; ba yɛkɔ wɔ buzizi nɛ etsye wɔ.”

³ Nɛ kɛɛ anɛ nɛ shu, ɛshãdɔkasɛ nɛ ba kpa ɖɔ nɛ aglɔ mɛ asɛ, “Anyaa nɛɛ aabhɛtɛ ebusobui!”

⁴ Gɛ Yesu atɛ mɔ balɛ atɔkpu nɛ mɛ so, aɖɔ asɛ, “Kide so pɛɛ nɔ nyɛna atɔkpumkpã ebui ɔkpɛ wɔnɔ idzyi mɛ ana?

⁵ Kiɖue gɛ lɛ bubɔɛbɔɛ dɛ: sɛ tɛ baɖɔ asɛ, ‘Ba yɛkɔ wɔ buzizi nɛ etsye wɔ,’ pɛnɔɔ sɛ tɛ baɖɔ asɛ, ‘Lɔ tɛ ɔga’?

⁶ Pɔ sɛ tɛ no ti sɛ Anɔdzyrame Yeyi nɛɛ kabhaŋɛŋa ka lɛ yɛahwɛ nɛ kesukpa nɛa bha sɛ tɛ ayɛkɔ buzizi etsye.” Klɛ aɖɔ etsre anɔgbɛgba nɛ asɛ, “Lɔ, yɛkɔ wɔ oputso tɛ ɔga vɛ bupa mɛ.”

⁷ Klɛ anyɛ nɛ alɔ klɛ ashɛ̃ avɛ bupa mɛ.

⁸ Gɛ banɔɛza nɛ ba mɔ ebuia nɛɛ, kɛ bhɛtɛ balɛ bi, klɛ ba kpɛ Kpaya nɛa bha, agɛ yɛ akɔ banɔ kabhaŋɛŋɛa nɛɛ di.

Mateo Tɛ Kukulu

⁹ Gɛ Yesu aba shɛ edenɔ ɔkɛlɛ, amɔ anɔ teli gɛ be kulu asɛ Mateo gɛ ezhedzi badɔdzyɔ kɛkpako nɛ mɛ. Yesu etsre yɛ asɛ, “Za mɛe de,” klɛ Mateo evualɔ klɛ atɔnɔ yɛ.

¹⁰ Gɛ Yesu edzi aŋa kɛdɔ nɛ Mateo bupa mɛ, badɔdzyɔ gelee nɛ “bezizi” nɛ ba ba ŋa kɛdɔ nɛ aplɛnɔ yɛ anɛ badɔkpasɛ.

¹¹ Gɛ Farisianɛ na mɔa na, be bisi yɛ badɔkpasɛ nɛ asɛ, “Kide so pɛɛ wɔnɔ Adɔkasɛ nɛ xũ nɛ aaŋa kɛdɔ nɛ badɔdzyɔ anɛ ‘bezizi’?”

¹² Gɛ enu balɛ tibibisi, Yesu etsre alɛ asɛ, “Ganɛ agɛ ataa nya nɛ yɛ ebisi awani, anyɛnya yɛ alɛ kɔ awani.

¹³ Pɔ nɔ vɛ tɛ nɔ dɔ pɛɛ kibui nɛe si onu: ‘Ɛpɛɛ eshutukubui didi, ganɛ busoyiyi.’ Alasɛ ɛdɛ ba kɔ badzyɔgo nɛ tɛkukulu, pɔ kɔ bezizi.”

Be Bisi Yesu Ebui Nɛ́ Onugbu Nyɛnya Shu

¹⁴ Klɛ Yohanɛsɛ badɔkpasɛ nɛ ba klɛ be bisi Yesu asɛ, “Kide so pɛɛ bulɔ anɛ Farisianɛ nɛ bunya onugbu pɛɛ, wɔnɔ nɛ wɔ badɔkpasɛ nɛ xũ nɔ tɔɔ nya onugbu?”

¹⁵ Yesu ebui lɛ nu asɛ, “Klɛ adzɛenyine befu ebe ze bi yɛ nɛ kibe lɛ gɛ alɛ balɛ ɔbha? Kibe tili baa ba gɛ ba ba nyɛna adzɛenyine nɛ agbanɔ ashɛ̃nɔ nɛ balɛ ɔbha, ka ba nya onugbue.

¹⁶ “Anɔnyanɔ atɛ yɛkɔ kɛpɔtɛ gɛ ka dzi kɛkuku akamɛ atsa nɛ kɛvuvɔ, alasɛ ɔkamɛkɔ nɛ ɔbɔ tsyɔɛ koeyi nɛ kɛpɔtɛ nɛ shu, gɛ kɛ ba kɔ sɛ tɛtsyutsyɔɛ nɛ tsɔmɔ dɛa na.

¹⁷ Kana ke anɔ atɛ yɛkɔ bulu vuvɔ akpɛ keluplui kuku mɛ. Onu gɛ baa bhɛtɛ ana, keluplui nɛ ka ba yɛɛ, klɛ bulu nɛ ba balɛ zi. Owo, bulu vuvɔ nɛɛ kelutsukpu vuvɔ mɛ la kpɛ bulɛ ka editabha na za mɔmɔe.”

Yesu Anyɛmɛ Adzɛnuvɔɛ Tsitsi Klɛ Ebeke Adzɛ Teli Bunya

¹⁸ Kibe lɛ gɛ edzi aɖɔ ebuia nɛ, ekusi teli aba edzu ekuisie si akɔ yɛ klɛ aɖɔ asɛ, “Meyiadzɛ nuvɔɛ nɛ etsi ɔtsɔtsiɔ̃. Pɔ bɔ trɔ ahwɛ nɛ yɛa bha tɛ anyɛmɛ.”

¹⁹ Yesu alɔ klɛ aza anyɛ nɛe de avɛ, klɛ yɛ badɔkpasɛ nɛ tsyɛ atɔnɔ yɛ.

²⁰ Nɛ kibe lɛ nɛ mɛ adzɛ teli gɛ dzyosu eekoeyi nɛ yɛ shu agɔ lɔfɔntubha nyɔɔ, aga yɛede klɛ ebe hunɔ yɛ awi nɛ butɔ.

²¹ Adzɛ nɛ aɖɔ etsre yɛ shu asɛ, “Onu gɛ ɛhunɔ yɛ awi nɛ butɔ nɛ ko, mɛ bunya nɛ ba beke.”

²² Yesu etsyina edi adzɛ. Klɛ aɖɔ asɛ, “Kpɛɛ te, eyiadzɛ,” “wɔ tɛyɛyɛkɛŋa nɛ tɛ beke wɔ bunya.” Klɛ adzɛ nɛ bunya nɛ gbla beke kɔ yɛ denɔ ɔɖɔ lɛ nɛ mɛ.

²³ Gɛ Yesu etsoku agɛ aaŋɛabha nɛ bupa nɛ mɛ amɔ bagɛ baa bɔ ezhue anɛ banɔɛza anɛ igugu kpɛkpɛ,

²⁴ klɛ asɛ, “Nɔ shɛ nɛ ɔklɛ. Adzɛnuvɔɛ nɛ edi tsi pɔ tra yɛa dɔ.” Pɔ banɔ nɛ amɔɛ yɛ.

²⁵ Gɛ be bu banɔɛza nɛ eyinɔ beke, Yesu etsoku atɔnɔ adzɛnuvɔɛ klɛ ada nyɛna yɛ ɔhwɛ klɛ evu alɔ.

²⁶ Yɛ tɛnyɛnyɛmɛ nɛ yi kana nɛ kibee lɛ nɛ petee.

Yesu Ebeke Anhũpu Nɛ Omumuu Banya

²⁷ Gɛ Yesu ashɛ̃ aavɛ denɔ ɔkɛlɛ, awɔ̃hũ pupuelete tɛabha ba za yɛe de, nɛ yɛ tɛ kukulu sɛ, “Di bulɔ eshutukubui, Daviti Yeyi!”

²⁸ Kibe lɛ nɛ gɛ etsoku buvu nɛ mɛ beke, awɔ̃hũ pupuelete tɛabha ba tɔnɔ yɛ avɛ, klɛ ebisi balɛ asɛ, “Nɔ yɛkɛ ɔŋa sɛ ɛba na kibui nɛ bubhɛtɛ?” Be bui lɛ nu asɛ, “Ee, Apalete.”

²⁹ Ɔkɛlɛ Yesu ehunɔ balɛ awɔ̃hũ nɛ klɛ aɖɔ asɛ, “Nɛ wɔnɔ tɛyɛyɛkɛŋa nɛ nu kɛ ba kɛlɛ mɛ kɔnɔ”,

³⁰ klɛ balɛ awɔ̃hũ nɛ adanɛ. Yesu akpɛ balɛ ɔshã gɛganɛɛ asɛ, “Nɔ dii lɛ ɔkɔ sɛ anɔnyanɔ eti ti kibuinyɛbui edenɔ kibui nɛ shu.”

³¹ Pɔ ba shɛ avɛ ada kaka kibui nɛ akpɛ kibe lɛlɛ nɛ mɛ petee.

³² Gɛ bee koeyi nɛ ɔkɔlɛ, ba yɛkɔ anyɛ teli gɛ ɔfufɔɛkpã otsri yɛa bha pɛɛ ataa na kaɖɔ ɖɔ nɛ amɛna Yesu.

³³ Klɛ gɛ akɛka ɔfufɔɛ nɛ ebu beke anyɛ nɛ akpa kaɖɔ ɖɔ. Kibui nɛ bhɛtɛ banɔɛza nɛ bi klɛ ba ɖɔ asɛ, “Kibuinyɛbui ana ka ba kɛlɛ mɛ di nɛ Izraɛl.”

³⁴ Pɔ Farisianɛ na asɛ, “Ɔfufɔɛkpã ekusi nɛa bha aaga pɛ aakɛka ɛfufɔɛkpã nɛ ebu.”

Baxwɛwa Nɛ Be Di Kpe

³⁵ Yesu aga ɛma anɛ ɛmabhli nɛ petee mɛ, aakasɛ dɔ nɛ ixogokɔevu nɛ mɛ, klɛ aaɖɔ kibui dzyɔgo nɛ edenɔ bukusiɔŋakɔ nɛ shu klɛ eebeke banyanyanya nɛ banɔ mɛ.

³⁶ Gɛ amɔ banɔɛza, eshutukubui eku yɛ nɛ balɛ, alasɛ ba kpɛ balɛ bunuhu klɛ tɛpɛplɛnɔ kɛma kɔa lɛ, ansɛ ibhoshi gɛ agbɛgbanɔ ama kɔ ɛlɛ.

³⁷ Klɛ etsre yɛ badɔkpasɛ nɛ asɛ, “Kɛdɔbubu nɛ lɛ kpi pɔ baxwɛwa nɛ ba dɛ na tɛashɛ̃.

³⁸ No bisi Kɛxwɛaka sɛ tɛ asɛsɛ baxwɛwa nɛ buya nɛ mɛ.”