Mateo 6 - ONUGBÙ NYƐNYÃ VUVƆ

Kɛdɔkɛkasɛ Nɛ Kɛdɔkukɔ Shu

¹ “Dii mɔ sɛ ɔtɛ ‘bhɛtɛ wɔ ebuidzyɔgo’ nɛ banɔa mɛ, sɛ tɛ ba mɔ wɔ. Onu gɛ ɔbhɛtɛ ana, ɔtɛ bɔ yɛkɛ kɛbhɛnyɛbhɛ denɔ wɔ Aka nɛ Owũsise nɛ ɔkɔ.

² “So onu gɛ ɔɔkɔ etsyutsyuini dɔ, tɛ kpɛ kɛlɛ ogugu ganɔ buxulɔ̃ɛ bubɔ mɛ, ansɛ gɛ itroelete nɛ baa bhɛtɛ nɛ ixogokɔevu nɛ mɛ nɛ edzogbla nɛa bha, sɛ tɛ be ku anɔ awɔ̃. Itsre wɔnɔ kɛgba sɛ, bagɛ baa bhɛtɛ ana ba tɛ yɛkɛ balɛ ahwɛhuhu nɛ petee.

³ Pɔ onu gɛ ɔɔkɔ anɔɔ nɛ gɛ alɛasɛ ba kɔ kɛdɔ, tɛ kɔ wɔ kɛbɛtɛkpɛ ɔhwɛ nɛ oti kɛdɔnɔ nɛ gɛ kɛŋa ɔhwɛ nɛ ɔɔbhɛtɛ,

⁴ sɛ tɛ wɔ kɛdɔ kukɔ nɛ za tikpukpu mɛ. Klɛ mɛ ko Wɔaka, nɛ gɛ aamɔ kɛdɔ nɛ tɛkpukpu mɛ nɛ aba buya kɛlɛ kɛbhɛ akɔ wɔ.

Kpayakuklu

⁵ “Klɛ kibe nɔɔ nɛ gɛ ɔsɛ okulukpaya, tɛbhɛtɛ ansɛ gɛ itroelete nɛ baa bhɛtɛ, alasɛ balɛ nɛɛ ba pɛɛa sɛ tɛ ba za kititi nɛ oxogokɔevu nɛm, anɛ edzogbla nɛa bha sɛ tɛ banɔ ba mɔ balɛ. Itsre nɔ kɛgba sɛ, balɛ nɛɛ di na tɛ yɛkɛ balɛ ahwɛhuhu nɛ petee.

⁶ Pɔ onu gɛ no bo kulu Kpaya, no tsoku wɔnɔ bee vu nɛ mɛ, tɛ nɔ da opupu tɛ no kulu wɔnɔ Aka nɛ gɛ ba taa mɔ. Klɛ wɔnɔ Aka, gɛ aamɔ kibuinyɛbui gɛ ba bhɛtɛ nɛ tikpukpu mɛ, aba buya kɛlɛ kɛbhɛ akɔ nɔ.

⁷ Klɛ kibe nɔɔ nɛ gɛ ókulukpaya, nɔ tɔɔ zɔ kpɛ igugu anɛ kaɖɔ ɖuɖɔ gelee ansɛ bagɛ ba dɛ sɔlɛ, alasɛ balɛ bee di asɛ ganɔ kana mɛ tɛ be nu balɛɛ dɔ.

⁸ Nɔ tɛ za ansɛ balɛ, alasɛ wɔnɔ Aka enyi kɛgɛ nɔɔ pɛɛ flogo pɛ nɔ bɔ ɖɔ sɛ obisi yɛ.

⁹ “Ɔtsɔ̃, kanii, alɛ asɛ tɛ no zo klukpaya: “ ‘Bulɔ Aka nɛ owũsise, wɔɛ nyi la ba kpɛ nɛ abha,

¹⁰ Kɔ wɔ bukusiɔŋakɔ nɛ ɔba, wɔ tɛpɛpɛɛ lɔ ba bhɛtɛ nɛ kesukpa nɛabha, ansɛ gɛ kɛlɛ nɛ owũsise.

¹¹ Kɔ lɔ obo nɛ kɛŋɛŋa.

¹² Yɛkɔ bulɔ buzizi nɛ otsye lɔ, ansɛ gɛ bulɔ tsyɛ bu yɛkɔ buzizi tsye bagɛ ba bhɛtɛ buzizi amɛna bulɔ kɔ.

¹³ Klɛ tɛ gbanɔ lɔ kpɛ tɛfifekedi mɛ, pɔ bu lɔ odenɔ ezizi nɛ ahwɛ mɛ.’

¹⁴ Alasɛ onu gɛ ɔyɛkɔ tsye bagɛ ba bhɛtɛ buzizi amɛna wɔ kɔ, wɔ Owũsise Aka nɛ tsyɛ aba yɛkɔ etsye wɔ.

¹⁵ Pɔ onu gɛ ɔɔtɛ yɛkɔ buzizi otsye anɔ, wɔ Aka nɛ tsyɛ atɛ ba yɛkɔ etsye wɔ.

Kɛdɔkɛkasɛ Nɛ Onugbu Nyɛnya Shu

¹⁶ “Onu gɛ nɔɔ sɛ tɛ nɔ nya onugbu, nɔ tɔɔ bhɛtɛ ishu ansɛ butɔ mɛ nɔ kpasɛ, ansɛ gɛɛ betroni na bhɛtɛ, alasɛ balɛ bee ɖuɖu amɛ nɛm sɛ tɛ ba wɛ̃ ansɛ banɔ gɛ baa nya inugbu. Itsre nɔ kɛgba sɛ, batɛ yɛkɛ bala abhɛ nɛ petee.

¹⁷ Pɔ onu gɛ nɔɔ sɛ tɛ nɔ nya onugbu, nɔ kpɛ bubɔ nɛ adamɛ tɛ no plu amɛ,

¹⁸ sɛ tɛ atɛ wɛ̃ kɔ banɔ ansɛ onugbu nɔɔ nya, pɔ kɔ wɔnɔ Aka nɛ gɛ nɔ tɔɔ mɔ, gɛ yɛ aamɔ kɛkanyaka gɛ kɛɛ bhɛtɛ nɛ tɛkpukpu mɛ, aba buya kɛbhɛ akɔ nɔ.

Kɛdɔ Bɛbala Lu Nɛ Owũsise

¹⁹ “Nɔ tɛ bala wɔnɔ kɛkesrɔdɔ nɛ kesukpa nɛa bha, gɛ babɔ nɛ budzyewule lɛ gɛ ba zi kɛ lɛ, bezi tsyɛ be be zuruɛ kɛ lɛ.

²⁰ Pɔ nɔ bala wɔnɔ kɛkesrɔdɔ nɛ owũsise kɔ ishu, ɔkɛlɛ bugɛ anɛ budzyewule ma gɛ ba zi kɛ lɛ, bezi tsyɛa tɛ be tsoku ɔkɛlɛ pɛ be be zuru.

²¹ Alasɛ ɔkɛlɛ gɛ anɔ kɛdɔ dzyɔgo kɛɛ lɛ ɔkɛlɛ yɛ idzyi nɛ aaza.

²² “Kɛwɔ̃hũ kɛ lɛ nu kanɛgbɛ kɔ anɔosi. Onu gɛ wɔ awɔ̃hũ nɛ abɔ, wɔ anɔ nɛ petee obo yuku nɛ kifu gɛ kɛɛ tã.

²³ Pɔ onu wɔ awɔ̃hũ nɛ amɛtã, wɔ anɔɔ nɛ petee obo yuku nɛ otumu. So, onu gɛ kifu nɛ gɛ lɛ wɔ mɛ nɛ nu otumu kpɛkpa, kɛlɛ otumu ɔɔlɛlɛ nɛ obo tri!

²⁴ “Anɔnyanɔ atɛ ba na axwɛ dɛ kɔ baka tɛabha. Aba ɖɔ teli adɛ teli, klɛ aba mɔ ɔhwɛ kɔ teli adɛ teli. Ɔtɛ bɔɔ na axwɛ dɛ kɔ Kpaya anɛ Ehoeyi.

Tɛ Ganɛ Awɔ̃

²⁵ “So, itsre nɔ, nɔ tɛ ga nɛ awɔ̃ nɛ wɔnɔ ɛkpãm, kɛ gɛ nɔ bɔ ŋa pɛ nɔ bɔ wɛ̃, ɔdɔgɔsɛ kɛpɔtɛ gɛ no bo nyumu nɛ shu. Ɛkpã nɛ dɛ zhã dɛ kɛŋɛŋa, klɛ anɔosi nɛ tsyɛ ɔdɛ zhã dɛ kɛpɔtɛ?

²⁶ Di kɛlɛɛ mɛ buzhuɔɛ, butɛ ɖa kɛdɔ, butɛ bu kɛdɔ nɛ buya mɛ akpɛ iwule mɛ, tsyɛ wɔnɔ Owũsise Aka nɛ aanyunɔ bulɛ. Sɛ nɔ lɛ otugba kɔ lɛ?

²⁷ Anee gɛ alɛ wɔnɔ mɛ pɛ yɛ awɔ̃ gɛganɔ nɛ aba na ɔɖa tɛta torikpo ayɛkɔ ata yɛ ɛkpã?

²⁸ “Klɛ kide so pɛ nɔɔ ganɛ awɔ̃ nɛ kɛdɔ nyunyumu shu? Di kana gɛ kpɔkɔɛ nɛ ayakpam nɛ eeshe. Ba taa wa kɛxwɛ pɛ ɔdɔgɔsɛ bee tro oɖoti.

²⁹ Pɔ itsre nɔ sɛ, Salomo anɛ yɛ ehoeyidɔ nyunyumu mɛ petee tsyɛ adɛ pudi ansɛ kpɔkɔɛ.

³⁰ Onu gɛ kana Kpaya eenyumuɛ dɔ kɔ tɛwa nɛ ayakpa mɛ, gɛ kɛ lɛ ɔkɛ̃ nɛ oboo klɛ kivu pɛ ba ba yɛkɔ atɛ̃a kpɛ kifu mɛ, kide so pɛ Kpaya etee nyumu kɛdɔ kɔ nɔ adɛ, O tɛyɛyɛkɛŋa bhli anɔ?

³¹ So nɔ tɔɔ ganɛ awɔ̃, tɛ nɔ zɔɔ ɖɔ sɛ, ‘Kide lɔ ba ŋa?’ ɔdɔgɔsɛ ‘Kide lɔ ba wɛ̃?’ pɛ ‘Kide lɔ ba nyumu?’

³² Alasɛ bagɛ ba dɛ yɛkɛ Kpayɛa bha ŋa balɛ akpatɔnɔ kɛdɔɛ nɛɛ di petee, klɛ wɔnɔ Owũsise Aka nɛ enyi asɛ kɛdɔɛ nɛ petee zhã wɔnɔ.

³³ Pɔ pɛɛ yɛ bukusi ɔŋakɔ nɛ yɛ tɛnɛnamɛzɛza nɛ oputɔnɔ, klɛ la ba yɛkɔ kɛdɔɛ nɛ petee tsyɛ ata kɔ nɔ.

³⁴ So tɛ ganɛ awɔ̃ nɛ kivu shu, alasɛ kivu nahwɛ ba ganɛ kɛlɛ shu awɔ̃. Kiwinyɛɛwi kɛ lɛ nɛ kɛlɛ nahwɛ tibui.