Mateo 27 - ONUGBÙ NYƐNYÃ VUVƆ

Yuɖasɛ Akpɛhuioli

¹ Nɛ kɛvulɔ nɛ pinii, kpayaɔzakɔanɔ anɛ banɔ anɛ beshishe na ba trɔ asɛ be be yi Yesu.

² Klɛ so ba ba nya yɛ klɛ la gbanɔ yɛ avɛnɔ ada kpɛ ahwɛ akɔ Pilatio, gɛ enu anɔ nɛ gɛ aŋa kɛmadi nɛa bha.

³ Gɛ Yuɖasɛ nɛ gɛ akpɛ yɛ ahwɛ nɛ amɔ asɛ, be bu Yesu butsipɔ, kɛ trɔ yɛa bha klɛ etsodzini kɔbafufu ehoeyi afata nɛ gɛ ba kɔ yɛ nɛ avɛnɔ kpayaɔzakɔanɔ anɛ beshishe.

⁴ Klɛ aɖɔ asɛ, “Ɛbhɛtɛ buzizi, ” “alasɛ ɛga dzyosu gɛ adɛ bhɛtɛ buzizi kanyaka nɛe si.” Banɔ nɛ be bisi Yuɖasɛ asɛ, “Bulɔ pɔ, kide kibui lɛ nɛ nu kɔlɔ?” “Wɔ nahwɛ kibui nɛɛ lɛlɛ.”

⁵ Kɛlɛ so Yuɖasɛ ayɛkɔ kɔba nɛ ada tɛa kpɛ busɔlɛvu nɛ mɛ klɛ ashɛ̃. Klɛ ashɛ̃ avɛ ada kpɛ kihuioli.

⁶ Kpayaɔzakɔanɔ nɛ aba tɔkɛ kɔba klɛ ba ɖɔ asɛ, “Kinu kibui gɛ lɔ kititi nɛ ɔshã nɛ shu sɛ tɛ ba yɛkɔ kɔbaa nɛ ada kpɛ balɛ kɔba shi, alsɛ enu dzyosu kɔba.”

⁷ So nɛ ba ba trɔɛ lɛ asɛ ba ba yɛkɔ kɔba nɛ ede dzi kesukpa nɛ tisiotsukɔ toli tɛ ba zaa vubɔ befu.

⁸ Kɛlɛ so pɛɛ bee kulu ɔkɛlɛ asɛ, Dzyosuesukpa ɔbɔnanɔ nɛ obo.

⁹ Ɔkɛlɛ kɛgɛ Yeremia atɔnu nɛ aɖɔ lu kɛ ba kɛlɛ mɛ sɛ, “Ba yɛkɔ kɔba afata, gɛ enu kedzi nɛ gɛ Izraɛlanɛ ba dɛ nɛ yɛ shu,

¹⁰ klɛ ba yɛkɔ kɔba nɛ ede dzi kesukpa nɛ tisiotsukɔ, ansɛ gɛ Apalete nɛ akɔ mɛ ɔshã sɛ ɛbhɛtɛ.”

Yesu Nɛ Pilatio Amɛ

¹¹ Nɛ kɛlɛ mɛ Yesu eli kititi nɛ ɔma ekusigbla nɛ amɛ, klɛ ebisi yɛ asɛ, “Wo nu Yuɖanɛ ekusi?” Yesu ebui lɛ nu asɛ, “Ee, kɛlɛ ansɛ gɛ ɔɖɔɛ lɛ.”

¹² Gɛ kpayanɔgbla nɛ ɔma banɔ shishe nɛ be bisi yɛ ebui nɛ gɛ ba yɛkɔ nɛ yɛ shu, edi bu kibui nyɛbui nu.

¹³ Ɔkɛlɛ Pilatio ebisi yɛ asɛ, “Oto nu ebui nɛ gɛ baa yɛkɔ nɛ wɔ shu?”

¹⁴ Pɔ Yesu adɛ fɔɛ, klɛ edi bu kibui tirikpo tsyɛ nu, klɛ kɛbhɛtɛ ɔmakuisigbla nɛ bi.

¹⁵ Ɔtsɔ̃ nɛɛ ki nu bugu kɔ ɔmaekusigbla nɛ kiwiŋɛŋa nɛa bha sɛ tɛ ashɛ̃nahwɛ bevuza nɛ terikpo gɛ banɔɛza nɛ ba pɛɛ nɛ shu akɔ alɛ.

¹⁶ Nɛ kibe lɛ nɛ mɛ evuza butɔm gɛganɛ teli gɛ be kulu asɛ Barabasɛ tsyɛ aza buvu.

¹⁷ So gɛ banɔɛza nɛ be ku, Pilatio ebisi alɛ asɛ, “Eɖueɖu shu nɔ pɛɛ sɛ tɛ ɛshɛ̃nahwɛ kɔ nɔ, Barabasɛ pɛnɔɔ Yesu nɛ gɛ be kulu asɛ Kristo?

¹⁸ Alasɛ enyi asɛ kawɔ̃kpɛ mɛ la ga pɛ baa yɛkɔ Yesu nɛ akpɛ ahwɛ kɔ yɛ.

¹⁹ Nɛ kibe lɛ mɛ gɛ Pilatio ezhiedzi yɛ kebhuiegbu nɛa bha, yedzini nɛ asɛsɛ yɛ ɔklasɔ toli asɛ, “Kibuinyɛbui kɛ tɛ za wɔ ahwɛ kɔ anyaa nɛ gɛ buzizi kanyaka ma yɛ shu, alasɛ ɛmɔ butɔ tsutsɔmɔ nɛ yɛ shu nɛ bulɛla mɛ obo.”

²⁰ Pɔ, kpayaɔzakɔanɔ anɛ ɔma banɔ shishe nɛ bakɔ sɛ tɛ banɔɛza nɛ be bisi sɛ tɛ ba shɛnahwɛ Barabasɛ shu tɛ ba yɛkɔ Yesu avɛnɔ ede yi.

²¹ Ɔmaekusigbla nɛ bisi balɛ asɛ, “Anee shu nɔ pɛ sɛ eshɛnahwɛ kɔ nɔ nɛ banɔ tɛabha nɛ shi?” Banɔɛza nɛ asɛ, “Barabasɛ lɔ pɛɛ.”

²² Pilatio ebisi asɛ, “Kɛlɛ kidee mɛ ba bhɛtɛ, nɛ Yesu nɛ gɛ bee kulu asɛ Kristo nɛ ɔtsɔ̃?” Banɔɛza nɛ asɛ, “Alasɛ tɛ ɔkɔ la kplaɛasɔ!”

²³ Pilato ebisi banɔɛza nɛ asɛ, “Kide so? Buzizi ɖueɖu abhɛtɛ?” Pɔ, banɔɛza nɛ ba za kpɛ ogugu gɛganɛɛ adɛa na sɛ, “Kɔ la kplaɛasɔ!”

²⁴ Gɛ Pilatio amɔ asɛ eti be ku ɔkɔnyɔkɔ akɔ kibui, pɛ igugu kpɛkpɛ ɛlɛ ba kpɛesi nɛɛ, ayɛkɔ buni klɛ eplu ahwɛ nɛ banɔɛza nɛ amɛ, klɛ aɖɔ asɛ, “Itinyi kibuinyɛbui nɛ anyaa nɛ dzyosu shu, wɔnɔ amɛ lɛ di!”

²⁵ Banɔ nɛ petee be bu klɛ nu asɛ, “Kɔ yɛ dzyosu nɛ aba bulɔ nɛ bulɔeyia lɛ nɛa bha fãa!”

²⁶ Ɔkɛlɛ ashɛ̃nahwɛ Barabasɛ shu akɔ alɛ. Pɔ akɔ sɛ be tu Yesu, klɛ ayɛkɔ yɛ akpɛ ahwɛ kɔa lɛ kɔ yɛ tɛkpɛkplasɔ.

Keyutugbani Na Kpɛ Yesu Butsɔ

²⁷ Ɔkɛlɛ ɔmaekusigbla nɛ keyutugbani na yɛkɔ Yesu avɛnɔ Ɔmaekusigbla nɛ bupagbla mɛ klɛ ivulo nɛ petee ba kana yɛ atsya.

²⁸ Ba tsywɛ̃ bawi nɛ yɛ shu klɛ ba yɛkɔ awidzɛdzã akpɛ akɔ yɛ,

²⁹ klɛ ba bhɛtɛ ewikutu klɛ ba yɛkɔ ekumu akɔɛ. Ba yɛkɔ ovusi akpɛ yɛ kɛŋahwɛ nɛm klɛ be zhi akpla nɛ yɛ otugba klɛ ba kpɛ yɛ butsɔ asɛ, “Obuii, Yuɖanɛ ekusi nɛ naa!”

³⁰ Be bu butu ata yɛ, klɛ ba yɛkɛ ovusi nɛ yahwɛ klɛ ba yɛkɔ ehu yɛ etsodzini ehu.

³¹ Gɛ ba kpɛ yɛ butsɔ nɛ beke, be bule kɛdɔ dzɛdzã nɛ yɛ shu klɛ ba yɛkɔ yɛ nahwɛ bawi nɛ akpɛ akɔ yɛ. Klɛ ba yɛkɔ yɛ avɛnɔ ɔkplasɔ kɔ.

Tɛkpɛkplasɔ

³² Gɛ ba vɛ yɛ ɔkplasɔ kɔ, ba tsyanɔ anyɛ teli gɛ ede Sirene, gɛ be kulu asɛ Simɔnɛ nɛ kidzo nɛ mɛ, klɛ ba trɔ anyɛ nɛa bha sɛ tɛ ayɛkɛ butsiosi nɛ etuku akɔ yɛ.

³³ Be de ku ɔkɔ toli gɛ be kulu asɛ Golgata (Atɔkpuxwa Ɔzakɔ nɛ butu tulia bha).

³⁴ Ɔkɛlɛ nɛɛ, ba kpɛ bɔwa kɛtɛkɛtɛ nɛ bulu mɛ akɔ Yesu sɛ awɔɛ̃, pɔ gɛ emini bɔlɛ edi, adɛ dɛmɛ awɔɛ̃.

³⁵ Gɛ ba kplaɛasɔ beke, ba tsyuɛ yɛ bawi na kpɛ aglɔm ganɔ kebisi mɛ.

³⁶ Klɛ bezhiedzi ɔkɛlɛ klɛ bee po yɛ.

³⁷ Nɛ yɛ kɛtɔkpu, ba ŋlɔ̃mɛ atrɔ asɛ: Yesu, Yuɖanɛ ekusi nɛ naa.

³⁸ Ba kpla bezi tɛabha tsyɛ asɔ aplɛnɔ yɛ, teli nɛ yɛ kɛŋam, abhla tsyɛ nɛ yɛ kɛbɛtɛkpɛm.

³⁹ Baa nɔ nɛ gaa fla nɛ ɔkɛlɛ nɛ baa kula yɛ, klɛ bee shuku balɛ atɔkpu atrɔ pɛ baa ɖɔ asɛ,

⁴⁰ “Wɔ nɛ gɛ ɔsɛ ɔbɔ yɛ busɔlɛvu, klɛ obo tsodzini bulɛ ɔbhɔ nɛ ewi tata mɛ, bu wɔshue! Zhi ɔba nɛ butsiosi nɛ shue, onu gɛ onu Kpaya yɛ Eyi!”

⁴¹ Kana ke kpayaɔzakɔanɔ, anɛ ɛshãdɔkasɛ anɛ banɔshishe tsyɛ ba kpɛ yɛ butsɔ.

⁴² Klɛ baa ɖɔ asɛ, “Ebu banɔ, ” “pɔ ataa na yɛshu bu! Yɛ enu Izraɛlanɛ nɛ Ekusigbla! Ezhia ba nɛ butsiosi nɛ shue, tɛ bumɔ yɛa bha yɛkɛŋa.

⁴³ Ayɛkɛ Kpaya kabha ŋa. Kɔ Kpaya nɛ ebe bu yɛe onu gɛ apɛɛ yɛ, alasɛ aɖɔ asɛ, ‘Mɛ nu Kpaya yɛ Eyi.’ ”

⁴⁴ Kana bezi nɛ gɛ ba kplasɔ plɛnɔ yɛ nɛ tsyɛ baa kula yɛ nɛ akulatu.

Yesu Tɛtsitsi

⁴⁵ Denɔ ɛɖa lɔfɔntɛbha mɛ ɔdɔ nanɔ ɔtramɛ nɛ mɛ otumu ɔdɔ nɛ kesukpa nɛa bha petee.

⁴⁶ Ansɛ ɛɖa tɛtamɛ ana, Yesu akpɛ ogugu gɛganɛɛ asɛ, “Eloi, Eloi, lama sabaktani?” Gɛ klɛ kesi enu asɛ, “Mɛ Kpaya, Mɛ Kpaya, kide so pɛ ɔshɛnahwɛ mɛ shua na?”

⁴⁷ Gɛ banɔ nɛ teli gɛ be li ɔkɛlɛ nɛ be nu yɛ ogugu ba sɛ, “Eekulu Eliya.”

⁴⁸ Ɔkɛlɛ balɛ ɔmayɛ teli esi avɛ ada yɛkɔ ɔkɔɛsa atsakpɛ vinega wayɛ̃ mɛ, klɛ ayɛkɔ sɔ osi toli nu, klɛ ayɛkɔ ada tɔ Yesu onugbu sɛ awɔɛ̃.

⁴⁹ Banɔ gɔgɔɛ na sɛ, “Nɔ shɛnahwɛ yɛ shu. Kɔlɔ di sɛ Eliya nɛ aba ba ebe bui yɛ dza.”

⁵⁰ Klɛ gɛ Yesu aza kpɛ ogugu nɛɛ, klɛ ebhui ɔfufɔɛ.

⁵¹ Nɛ kibe lɛ nɛ mɛ, busɔlɛvu mɛ kɛpɔtɛ nɛ tsywɛ denɔ kabha ɔbɔ na nɔ kesi. Kesukpa nɛ ka hwa, klɛ aklãgbu gbɛgbla ayɛɛ.

⁵² Idzre danɛ klɛ banɔ dzyɔgo gelee gɛ be ti tsi nɛ tsodzi anyɛmɛ klɛ ba lɔ ba ɛkpãm.

⁵³ Be koeyi denɔ idzrem, klɛ nɛ Yesu tɛlulɔ nɛe de, be tsoku ɔmagbla nɛ gɛ ɔlɛ shu obhui nɛ mɛ, klɛ ba wɛ̃ nɛ banɔ gelee amɛ.

⁵⁴ Gɛ keyutugbani anɛ bepupo nɛ Yesu odzre nɛ shu ba mɔ kesukpahuhwa anɛ ebui nɛ petee gɛ aba kɛlɛ mɛ, kifu kua lɛ tsutsɔmɔ tsɔmɔ, klɛ be bu aɖɔ asɛ, “Kɛgbɛagba Kpaya yɛ Eyi edzi!”

⁵⁵ Badzɛ gelee ba za odzidzekɔ pɛ bee di kɛdɔ nɛ asɛsɛ. Ba za Yesue de edenɔ Galelia ke sɛ tɛ ba bhɛtɛ kɛgɛ bazhã nɛ akɔ yɛ.

⁵⁶ Badzɛa lɛlɛ nɛ mɛayɛ teli ebe dzi Maria Magdaline, Maria Yakobo yɛeni, anɛ Yosɛfu, anɛ Zebeɖi yɛ eyi anɛ yɛ eni.

Yesu Tɛvuvubɔ

⁵⁷ Gɛ owulago nɛ ɔna, ehoeyielete teli ede Arimatea, gɛ be kulu asɛ Yosɛfu, gɛ yɛnahwɛ nɛ ebe dzi Yesu adɔkpasɛ.

⁵⁸ Atɔnɔ Pilatio avɛ sɛ, ba yɛkɔ Yesu yɛ etsitsi nɛ akɔ yɛ, klɛ Pilatio asɛ ba da yɛkɔ akɔ yɛ.

⁵⁹ Yosɛfu ada yɛkɔ anɔ tsitsi, klɛ anya yɛ akpɛ kɛpɔtɛ fufum mɔmɔ,

⁶⁰ klɛ ayɛkɔ yɛ ada kpɛ kɛklãgbu odzre vuvɔ mɛ gɛ yɛ nahwɛ ebu kɔ shu. Klɛ eglebe kɛlãgbugbla tili nɛ ɔkɛlɛ nɛ ada odzre nɛ nu klɛ ashɛ̃.

⁶¹ Maria Magdaline anɛ Maria bhla nɛ be zhedzi odzre nɛ ɔbha.

Bepupo Nɛ Odzre Nɛ Shu

⁶² Kiwi bhla nɛ, kɛgɛ ba nɛ Tɛbɛbala Kiwi nɛe de, kpayaɔzakɔanɔ anɛ Farisianɛ na tɔnɔ Pilatio avɛ.

⁶³ Klɛ bede tsre yɛ asɛ, “Aka, ” “bu baka sɛ kibe lɛ nɛ gɛ aka lɛ nɛ ɛkpã etronia lɛlɛ na aɖɔ asɛ, ‘Nɛ ewi tata ede ɛba tsodzi lɔ.’

⁶⁴ So kɔ ɔshã sɛ tɛ be po yɛ odzre nɛ ɔdɔ nanɔ kiwi tramɛ. Odinuana yɛ badɔkpasɛ nɛ be be ti zuru yɛ ebu ka ba sɛ yɛ alɔ denɔ bekpu mɛe. Otro ɔlɛlɛ nɛ lɔ bɔ tsyɔmɔ dɛ ɔtutɔpu.”

⁶⁵ Pilatio ebu kɛlɛ nu asɛ, “Nɔ yɛkɔ epupo, ” “Nɔ vɛ odo di odzre nɛa bha ansɛ kana gɛ no nyi.”

⁶⁶ So, ba vɛ klɛ be de di lɛ ɔkɔ sɛ ba da yɛkɔ kɛdɔ ada odzre, klɛ ba yɛkɔ bepupo edzu ɔkɛlɛ.