Mateo 22 - ONUGBÙ NYƐNYÃ VUVƆ

Kɛkpalɛ Nɛ Adzɛ Ɔgbanɔkɔ Shu

¹ Yesu aza ɖɔ kaɖɔ nɛ kɛkpalɛ mɛ etsre balɛ asɛ,

² “Owũsise bukusiɔŋakɔ nɛ odzi ansɛ gɛ ekusi abala adzɛ ɔgbanɔkɔ akɔ yɛ eyianyɛ.

³ Akpɛ yɛ baxwɛdɛ nɛ bagɛ ekulu akɔ adzɛgbɛgbanɔɛ wi nɛe si asɛ ba ga ba, pɔ ba dɛ dɛmɛ aba.

⁴ “Ɔkɛlɛ aza kpɛ baxwɛdɛ gelee adɛa na klɛ asɛ, ‘Tsre bagɛ ikulu nɛ sɛ ɛtɛ bala mɛ kɛŋɛŋa, Ɛtɛ yi mɛ nɛtsyɔɛnye gɛ elu bubɔ, klɛ kɛdɔnyɛdɔ lɛ kɛlɛ ɔzakɔ. Nɔ ga ba adzɛ ɔgbanɔ kɔ.’

⁵ “Pɔ ba dɛ yɛkɔ nɛ kɛlɛ mɛ klɛ ba shɛ, teli ashɛ̃ avɛ yɛ ayakpam, klɛ teli tsyɛ ashɛ̃ avɛ yɛ axwɛ mɛ.

⁶ Bagɔgɔɛ nɛ be vu yɛ baxwɛdɛ, ba dɛ bhɛtɛ alɛ mɔmɔ klɛ be yi alɛ.

⁷ Ekusi nɛ amɔ obulo. Klɛ akpɛ yɛ keyutugbani ovulo klɛ le be yi bebudzyi alɛlɛ klɛ la pɔɛ balɛ ɔmagbla.

⁸ “Ɔkɛlɛ etsre yɛ baxwɛdɛ nɛ asɛ, ‘Batɛ bala adzɛ ɔgbanɔkɔ nɛ beke, pɔ bagɛ ikulu nɛ adɛ na kɔ ɔkɛlɛ tɛbɛba.

⁹ Nɔ vɛ kidzo nɛa bha tɛ nɔ gbanɔ anɔnyanɔ gɛ nɔɔ mɔ nɛ ɔmɛna adzɛ ɔgbanɔkɔ.’

¹⁰ Kɛlɛ so baxwɛdɛ ba vɛ klɛ ba da gbanɔ anɔnyanɔ gɛ ba mɔ, ba dzyɔgo anɛ be zizi, klɛ adzɛ nɛ ɔgbanɔkɔ obo yuku nɛ befu.

¹¹ “Pɔ gɛ Ekusi nɛ ebe ku ɔkɛlɛ sɛ tɛ amɔ befu, evu awɔ̃hũ nɛ anɔ teli asɛ yɛ adɛ kpɛ adzɛ ɔgbanɔkɔ awi.

¹² Ebisi asɛ, ‘Ɔbhɛa,’ ‘kɛlɛ ɔbhɛtɛ pɛ otsoku ɔkɛ̃ gɛ ɔdɛ kpɛ adzɛ ɔgbanɔkɔ bawi?’ Anɔ nɛ adɛ ɖɔ kaɖɔnyɛaɖɔ.

¹³ “Ɔkɛlɛ Ekusi nɛ etsre bagɛ ba dɛ axwɛ nɛ asɛ, ‘Nɔ nya yɛ ɛtsrɛ anɛ ɛhwɛ, tɛ nɔ yɛkɔ yɛ ɔtɛ̃ɛ kpɛ ɔtɔ, nɛ otumu nɛ mɛ, ɔkɛlɛ gɛ iyuyo nɛ eletɛtã aba za.’

¹⁴ “Alasɛ be kulu banɔ gelee, pɔ tɛashɛ̃ ko be bu nɛ balɛ mɛ.”

Kadzyɔ Kɔ Kaɛza

¹⁵ Ɔkɛlɛ Farisianɛ ne koeyi avɛ ada nya nɛ yɛ shu kana gɛ ba ba ga pɛ be be vu yɛ ganɔ yɛnahwɛ ebui ɖuɖɔ mɛ.

¹⁶ Ba kpɛ balɛ badɔkpasɛ nɛ aplɛnɔ Heroɖesɛanɛ nɛ yɛ ɔkɔ. Ba ɖɔa sɛ, “Adɔkasɛ, ” “bunyi sɛ onu anɔ gɛ ɔbhɛtɛ ebui nɛ alɛ ɔzakɔ klɛ ɔkasɛ dɔ nɛ Kpaya dzo nɛ kɛgba nɛ nu. Banɔdzyrame ataa hwanɛ wɔ, alasɛ oto di balɛ ɔkɔ sɛ banee di be nu dza.

¹⁷ Tsre lɔ ɔtsɔ̃, kidee gɛ nu wɔɛ yɛ? Kɛbɔ sɛ ba dzyɔ kɛdɔ kɔ Kaɛza pɛnɔɔ kɛmɛtã?”

¹⁸ Pɔ gɛ Yesu enyi butsutsɔmɔ nɔ gɛ kpasɛ balɛ kɛtɔkpum so, etsre balɛ asɛ, “Wɔnɔ betroni, kide pɛ nɔ pɛ mɛ sɛ tɛ no bu nɛ kɛgbam?

¹⁹ Nɔ kasɛ mɛ ehoeyi nɛ gɛ nɔɔ dzyɔ kɛdɔ nɛ nɔ.” Ba yɛkɔ kihueyi gɛ nu denarosɛ terikpo amɛna yɛ,

²⁰ klɛ Yesu ebisi balɛ asɛ, “Ane tɛtɛta nɛɛ? Klɛ anee dɔ ŋuŋlɔmɛ?”

²¹ Be bui lɛ nu asɛ, “Kaɛza yɛ.” Ɔkɛlɛ etsre alɛ asɛ, “Yɛkɔ kɛgɛ nu Kaɛza yɛ nɛ ɔkɔ Kaɛza, tɛ ɔyɛkɔ kɛgɛ nu Kpaya yɛ nɛ ɔkɔ Kpaya.”

²² Gɛ be nu kibui nɛɛ, kɛ bhɛtɛ alɛ bi. So ba shɛnahwɛ yɛ shu klɛ ba shɛ.

Adzɛ Gbɛgbanɔ Nɛ Kɛlɔwia Bha

²³ Nɛ kiwi lɛlɛ nɛ tutuutu Sarusianɛ, gɛ baa ɖɔ sɛ tɛ nyɛnyɛmɛ denɔ butsi mɛ ma, ba ba tɔnɔ Yesu nɛ tɛbibisi.

²⁴ Ba sɛ, “Adɔkasɛ, ” “Mosesɛ etsre lɔ sɛ onu gɛ anyɛ etsi pɛ kɛɛ lɛ sɛ adɛ mɔ beyi, kɛ lɛ sɛ tɛ yɛadzya nɔɔ gɛ alɛ nɛ ayɛkɔ yɛedzini nɛ agbanɔ tɛ amɔ beyi akɔ yɛ.

²⁵ Ɔtsɔ̃ nɛɛ badzya tiegene teli ba za bulɔ mɛ. Atutɔpu nɛ agbanɔ adzɛ klɛ etsi alɔ yɛ, klɛ gɛ adɛ mɔ beyi nɛ yɛ shu so, ashɛ̃lɔ yɛedzini nɛ akɔ yɛadzya.

²⁶ Kana kɛ za kɔ adzya bhla anɛ atramɛ, ɔdɔ nanɔ egigenemi nɛa bha.

²⁷ Gugɔɛ nɛɛ, adzɛ nɛ ebe tsi.

²⁸ Ɔtsɔ̃, nɛ tɛnyɛnyɛmɛ kiwi nɛa bha, eɖueɖu yɛedzini yɛ ebe dzi nɛ tɛegene nɛ shi, gɛ balɛ petee ba tɛ gbanɔ yɛ edi?”

²⁹ Yesu ebui lɛ nu asɛ, “Nɔɔ ga kito alasɛ no ti nyi Kpayɛbui ɔdɔgɔsɛ yɛ kemi.

³⁰ Nɛ kɛlɔwi nɛa bha banɔ batɛa gbanɔ aglɔ ɔdɔgɔsɛ ba yɛkɔ anɔ akɔ sɛ bagbanɔ, ba ba za ko ansɛ baxwɛdɛ nɛ owũsise.

³¹ Pɔ nɛ betsitsi nɛ tɛlulɔ shu, nɔ kɔ kla onu kɛdɔnɔ nɛ gɛ Kpaya aɖɔ tsre nɔ asɛ,

³² ‘Mɛ nu Abraham Kpaya, Isaka Kpaya, anɛ Yakɔpu Kpaya’? Edi nu betsitsi nɛ Kpaya, Belulu na yɛ enu.”

³³ Gɛ banɔɛza nɛ nu kibui nɛɛ, yɛ kɛdɔkɛkasɛ nɛ bhɛtɛ balɛ bi.

Ɔshã Gbɛgbladɛ

³⁴ Gɛ Farisianɛ nɛ be nu asɛ Yesu ehu Sarusianɛ nɛesi, be de xogo.

³⁵ Balɛ ɔmɛayɛ teli, gɛ enyi ɔshã ebe feke yɛ edi nɛ tɛbibisi nɛ asɛ:

³⁶ “Adɔkasɛ, Ɔshã oɖueɖu ɔlɛ onu ɔgbɛgbladɛ nɛ Ɔshã nɛm?”

³⁷ Yesu ebui lɛ nu asɛ: “ ‘Ɖɔ Apalete wɔ Kpaya nɛ wɔ idzyi nɛ wɔ ɔfufɔɛ nɛ wɔ kɛtɔkpum petee.’

³⁸ Ɔshã nɛ ɔlɛ onu ɔtutɔpu nɛ ɔgbɛgbladɛ petee.

³⁹ Klɛ ɔbhla nɛ tsyɛ odzi ansɛ ɔlɛ: ‘Ɖɔ wɔhaɛ ansɛ gɛ ɔɖɔ wɔ shu.’

⁴⁰ Ɛshã anɛ Batɔnu nɛ petee ba sɔmɛ ɛshã tɛbhɛ nɛ shu.”

Anee Yɛ Eyi Yɛ Enu Kristo

⁴¹ Gɛ Farisianɛ nɛ be xogo, Yesu ebisi alɛ asɛ,

⁴² “Kide gɛ nu wɔnɔ kɛtɔkpu mɛ nɛ Kristo shu? Anee yeyi enu?” “Be bui lɛ nu asɛ, “Daviti yɛ Eyi.”

⁴³ Yesu etsre balɛ asɛ, “Kɛlɛ kɛ za so pɛɛ Daviti, nɛ yɛ kaɖɔ ɖuɖɔ nɛ Ɔfufɔɛ nɛ shu, pɛɛ ekulu yɛ asɛ ‘Apalete’? Alasɛ aɖɔ asɛ,

⁴⁴ “ ‘Apalete nɛ tsre mɛ Apalete nɛ asɛ: “Za mɛ kɛŋam ɔdɔnanɔ kibe lɛ gɛ ɛyɛkɔ wɔ bagɛ ba dɛ pɛɛ wɔ nɛ ɛkpɛ wɔ butrukpɔe si.” ’

⁴⁵ Kɛlɛ onu gɛ Daviti ekulu yɛ asɛ, ‘Apalete,’ klɛ eze be dzi yɛ eyi?”

⁴⁶ Anɔnyanɔ ada na kibuinyɛbui ɖɔ ayɛkɔ ebu yɛ bui nɛ nu, klɛ denɔ kiwi lɛ nɛ vɛnɔ anɔnyanɔ adɛ bhɛtɛ edi asɛ eze be bisi yɛ ebuinyɛbui ɔdɛ kana.