Mateo 21 - ONUGBÙ NYƐNYÃ VUVƆ

Yesu Etsoku Yerusalɛm Nɛ Same Mumɔ

¹ Gɛ bee tsobunɔ Yerusalɛm pɛ be be ku Betfage nɛ Olivɛ Butu nɛa bha, Yesu akpɛ yɛ badɔkpasɛ tɛabha,

² etsre alɛ asɛ, “Nɔ vɛ ɔmabhli nɛ gɛ ɔlɛ wɔnɔ otugba, nɔ bɔ mɔ kitukuaga teli gɛ akpasɛ ohuim, gɛ yeyi eli yɛ ɔbha. No bule balɛ tɛ nɔ gbanɔa lɛ ɔmɛna mɛ.

³ Onu gɛ anɔ teli aɖɔɛ bui tili no tsre yɛ ɔsɛ Apalete nɛ ya pɛa lɛ, ko ba ba shɛnahwɛ balɛ shu asɛsɛ.”

⁴ Kibui nɛ kɛba klɛm sɛ tɛ ba yɛkɔ amɔ ebui nɛ gɛ ba ɖɔ ganɔ batɔnu nɛa bha sɛ:

⁵ “Tsre Zayɔnɛ Adzɛnuvɔɛ nɔ sɛ, ‘Di, wɔ ekusi na ba wɔbha, adɔfɔɔ̃ klɛ etsri kitukuaga nɛa bha, nɛ agaeyi nɛa bha, gɛ enu kitukuagaeyi.’ ”

⁶ Badɔkpasɛ na vɛ ada bhɛtɛ ansɛ gɛ Yesu ashrɔa lɛ.

⁷ Ba mɛna kitukuaga nɛ yeyi, ba yɛkɔ balɛ apɔtɛ nɛ ada kɔa lɛ, klɛ Yesu aza alɛa bha.

⁸ Banɔɛza gelee bule balɛ apɔtɛ elu kidzo nɛm, klɛ be teli edzyini isishɛ elu kidzo nɛa bha.

⁹ Banɔɛza nɛ gɛ putɔ kɔ yɛ nɛ bagɛ ba za yɛe de na kpɛ igugu asɛ, “Hosiana kɔ Daviti yɛ Eyi!” “Ba yula anɔ nɛ gɛ aaba nɛ Apalete nɛ kinyim!” “Hosiana nɛ ɔɖɛɖamakɔ dɛ!”

¹⁰ Gɛ Yesu etsoku Yerusalɛm, ɔmagbla nɛ petee oshuku klɛ le bisi asɛ, “Ane naa?”

¹¹ Banɔɛza nɛ asɛ, “Yesu naa, atɔnu gɛ ede Nazarɛtɛ nɛ Galelia.”

Yesu Nɛ Busɔlɛvu Nɛm

¹² Yesu etsoku busɔlɛvu nɛ kɛma nɛ mɛ klɛ akɛka bagɛ bee dzi kɛdɔ pɛ baa dɛ kɛdɔ nɛ ɔkɛlɛ. Akaka bagɛ baa tsrakɛ ehoeyi anɛ bagɛ baa dɛ bagɔgɔwi nɛ bakplɔ̃ nɛ petee.

¹³ Etsre balɛ asɛ, “Ba ŋlɔmɛ elu sɛ, ” “ ‘Mɛ bupa be be kulu lɛ asɛ kpayakuklu bupa,’ pɔ nɔ yɛkɔ bulɛ ɔɔbhɛtɛ ‘bezi ɔzakɔ.’ ”

¹⁴ Awɔ̃hũpu anɛ akpata atɔnɔ yɛ aba busɔlɛvu nɛ mɛ klɛ ebeke balɛ banya.

¹⁵ Pɔ gɛ kpayaɔzakɔanɔ anɛ ɛshãdɔkasɛ na mɔ ebui nɛ di gɛ Yesu abhɛtɛ nɛ bunuvɔɛ nɛ igugu nɛ gɛ baa kpɛ nɛ busɔlɛvu nɛ ɔbha be nɛ asɛ, “Hosiana kɔ Daviti yɛ Eyi, ” kɛ kua lɛ obulo.

¹⁶ Bee bisi yɛ asɛ “No nu ebui nɛ gɛ bunuvɔɛa nɛ baa ɖɔ?” Yesu ebui lɛ nu sɛ, “Ee,” nɔ kɔ kla, “ ‘Denɔ beyi anɛ bunuvɔɛ bhli nɛ inugbu mɛ nɔ tɛ trɔahwɛ kabhakpɛkpɛ nɛa bha.’ ”

¹⁷ Klɛ ashɛ̃ alɔ balɛ klɛ ekoeyi nɛ ɔmagbla nɛm avɛ Betani, ɔkɛlɛ gɛ ada za.

Kabhɔ Tsitsi

¹⁸ Nɛ kɛvulɔ nɛ pinii, gɛ etsri yɛ kidzoa bha etsodzi avɛ ɔmagbla nɛ mɛ, bubhɛ yi yɛ.

¹⁹ Gɛ amɔ kabhɔosi nɛ kidzo nɛ tɔ, ebunɔ ɔlɛ pɔ adɛ mɔ eyuyu kanyaka nɛ ɔlɛm ɔkɔ dɛ awulakpa kpɛkpa. Ɔkɛlɛ etsre osi nɛ asɛ, “Wɔ otio yu eyuyu nɛ kanɔ mɛ kiwinyɛwi!” Nɛ ɔkɛlɛ osi nɛ ɔgblɔ wɔlɛawa.

²⁰ Gɛ badɔkpasɛ na mɔa na kɛ bhɛtɛ alɛ bi. Be bisi asɛ, “Kɛlɛ lɛ za pɛɛ kabhɔosi nɛ ogblo tsi ki tsi tili ana?”

²¹ Yesu ebui lɛ nu asɛ, “Itsre nɔ kɛgba sɛ, onu gɛ tɛyɛyɛkɛŋa lɛ wɔahwɛ, ganɛ kɛ gɛ ba bhɛtɛ osi nɛ ko ɔbɔ na bhɛtɛ, ɔbɔ na butu nɛ otsre sɛ, ‘Vɛ, yɛkɔ wɔ shu ɔdɔ tɛ̃ kpɛ aƒu mɛ,’ klɛ kɛ ba bhɛtɛ.

²² Onu gɛ ɔyɛkɛŋa, ɔbɔ yɛkɛ kɛdɔnyɛdɔ gɛ obisi ganɔ kpayakuklu mɛ.”

Ebuibibisi Nɛ Yesu Kabhaŋɛŋa Nɛ Shu

²³ Yesu etsoku busɔlɛvu nɛ kibee, klɛ, gɛ aza kasɛ dɔ, kpayaɔzakɔanɔ anɛ beshishe kɔ banɔ nɛ ba tɔnɔ yɛ aba. Be bisi asɛ, “Kabhaŋɛŋa ɖueɖu mɛ ɔɔbhɛtɛ ebuia nɛ petee?” “Klɛ anee gɛ akɔ wɔ kabhaŋɛŋɛa nɛɛ di?”

²⁴ Yesu ebui lɛ nu asɛ, “Mɛ tsyɛ ba bisi nɔ kibui tirikpo. Onu gɛ noo bui lɛ nu ɔkɔ mɛ, ɛba tsre nɔ kabhaŋɛŋa nɔɔ nɛ mɛ gɛ ɛbhɛtɛ ebuia nɛɛ.

²⁵ Yohanɛsɛ bunikpɛkpɛ— fakɔ lu de? Owũsise lu de pɛnɔɔ banɔ kɔ?” Ba kpa kibui nu nyɛnadi nɛ aglɔm klɛ la ɖɔ asɛ, “Onu buɖɔ sɛ, ‘Bu de owũsise,’ ebe bisi lɔ asɛ, ‘Klɛ kide so pɛ bu dɛ yɛkɛ yɛa bha ŋa dza?’

²⁶ Pɔ onu buɖɔ sɛ, ‘Bu de banɔ kɔ,’ klɛ buu si banɔ nɛ kifu, alsɛ balɛ petee ba yɛkɛ kɛlɛ asɛ Yohanɛsɛ nɛɛ edzi atɔnu.”

²⁷ So, be bui lɛ etsre Yesu asɛ, “Bu ti nyi.” Klɛ Yesu asɛ, “Klɛ mɛ tsyɛ tɛ ba tsre nɔ kabhaŋɛŋa nɔɔ nɛ shu gɛ ɛga pɛ ɛbhɛtɛ ebuia nɛ.”

Kɛkpalɛ Nɛ Beyianyɛ Tɛabha Shu

²⁸ “Wɔnɔ kɛtɔkpu nɛ mɛ sɛ kɛlɛ? Anyɛ teli aza gɛ beyianyɛ tɛabha za yɛahwɛ. Atɔnɔ atutɔpu nɛ avɛ asɛ, ‘Eyi, vɛ tɛ ɔdɔ wa kɛxwɛ nɛ vãyɛ̃ buya nɛ mɛ obo.’

²⁹ Eyi nɛ asɛ, ‘Ɛtɛɛ vɛ,’ pɔ kɛlɛe de mɛ ebe tsyina yɛ kɛtɔkpum klɛ avɛ.

³⁰ “Ɔkɛlɛ aka nɛ atɔnɔ eyi bhla nɛ avɛ klɛ ede tsre yɛ tsyɛ kibui lɛ. Yɛ tsyɛ asɛ, ‘Ɛba vɛ, aka,’ pɔ adɛ vɛ.

³¹ “Nɛ beyi tɛabha nɛ shi, eɖueɖu ya bhɛtɛ aka nɛ tɛ pɛpɛɛ?” Be bui lɛ nu asɛ, “Eyi tutɔpu.” Yesu etsre alɛ asɛ, “Itsre nɔ kɛgba sɛ, badɔdzyɔ anɛ badzɛ zhuzhɔlɛ nee tsoku kpyakusiɔŋakɔ nɛ mɛ aalɔ nɔ.

³² Alasɛ Yohanɛsɛ aba kasɛ nɔ tɛnɛnamɛzɛza, klɛ nɔ dɛ yɛkɛ yɛa bha ŋa, pɔ badɔdzyɔ anɛ badzɛ zhuzhɔlɛ nɛ xũ ba yɛkɛ aŋa. Klɛ nɛ klɛe de gɛ nɔɔ mɔ kɛɛ nɛɛ tsyɛ, no di tsyina kitem pɛ ɔyɛkɛ yɛa bha ŋa.

Kɛkpalɛ Nɛ Badɔwa Shu

³³ “Nɔ tatɔ nɛ kɛkpalɛ bhlatɔɛ nɛ tsyɛ: Kesukpaelete teli aza gɛ adɛ vãyɛ̃ buya. Abhɔ kidri akana buya, ebu wãyɛ̃ kizi nɛ bɔlɛ mɛ klɛ edzu opokɔvu nɛ buya nɛ mɛ. Klɛ ayɛkɔ buya nɛ akpɛ ahwɛ kɔ bayadɛ teli klɛ aga ɛdzo.

³⁴ Gɛ kɛdɔ nɛ bu be nɛɛ na, akpɛ yɛ baxwɛdɛ nɛ asɛsɛ bagɛ bee di buya nɛa bha na sɛ ba yɛkɛ yɛ ɔŋakɔ nɛ amɛna yɛ.

³⁵ Bagɛ bee di buya nɛa bha nɛ vu baxwɛdɛ, be tu terikpo, be yi abhla, klɛ be hu atramɛ nɛ aklãgbu.

³⁶ Klɛ anyɛ nɛ aza kpɛ baxwɛdɛ bhlatɔ asɛsɛ balɛ, gɛ balɛ tɛkɛklam vɛ otugba dɛ batutɔpu, klɛ bagɛ alɛ buya nɛa bha na za bhɛtɛ balɛ tsyɛ ana.

³⁷ Gugɔɛ gugɔɛ nɛɛ, anyɛ na ba kpɛ yɛeyianyɛ nɛ asɛsɛ alɛ. Anyɛ na sɛ, ‘Be be di mɛ eyianyɛ nɛ xũ ɔkɔ.’

³⁸ Pɔ gɛ bamɔ yɛ eyianyɛ, klɛ la ɖɔ nɛ aglɔm asɛ, ‘Agɛ abaa za aka nɛ ɔzakɔ nɛ naa. Nɔ ba, kɔ lɔ yiyɛ tɛ buyɛkɛ yɛ ɔŋakɔ.’

³⁹ Kɛlɛ so bevu anyɛ nɛ yɛ eyianyɛ na tɛɛ̃ ebu nɛ buya nɛ mɛ klɛ le de yi yɛ.

⁴⁰ So onu gɛ ayalete nɛ aba ba, kidee aba bhɛtɛ nɛ bagɛ tsri buya nɛa bha?”

⁴¹ Be bui lɛ nu sɛ, “Aba yɛkɔ batsutsɔmɔa lɛlɛ nɛ akpɛ ɔtsutsɔmɔkɔ, klɛ aba yɛkɔ buya na kpɛ ahwɛ kɔ bayadɛ bhlatɔ, gɛ ba ba ma kɛdɔ nɛ pɛ ba ba yɛkɔ yɛ ɔŋakɔ nɛ akɔ yɛ onu gɛ be bui dɔ.”

⁴² Yesu etsre banɔ nɛ asɛ, “Nɔ kɔ kla mɔ nɛ Kpayɛbuieplukpa nɛ mɛ odi sɛ: “ ‘Kɛklãgbu nɛ gɛ bevubhɔ nɛ be gbe, kɛba dzi buvu nɛ ɔxãkɔɛklãgbu; Apalete nɛ ya bhɛtɛ kɛɛ nɛɛ, klɛ kɛbhɛtɛ bulɔɛ bi.’

⁴³ Kɛlɛ so itsre nɔ sɛ ba ba nyɛna Kpaya bukusiɔŋakɔ nɛ ayɛkɛ nɛ wɔnɔ ahwɛ ayɛkɔ ada kɔ banɔ nɛ gɛ be yu ɔkɛlɛ eyuyu.

⁴⁴ Anɔ nɛ gɛ aba wɔlɛ adɔ kɛklãgbui nɛa bha ebe dzyini eku bupɛ pɛɛpɛ mɛ, pɔ anɔ nɛ gɛ yɛa bha kɛɛ ba wɔlɛ dɔ aba yɛɛ.”

⁴⁵ Gɛ kpayaɔzakɔanɔ anɛ Farisianɛ nɛ be nu Yesu akpalɛa nɛ, be ti sɛ balɛ aaɖɔ.

⁴⁶ Ba pɛɛ kidzo nɔɔ nɛa bha gɛ ba ba ga pɛ be be vui pɛ be be yi yɛ, pɔ be si banɔɛza nɛ fu alasɛ banɔ nɛ ba yɛkɔ yɛ ansɛ atɔnu.