Mateo 2 - ONUGBÙ NYƐNYÃ VUVƆ

Bebuinyi Teli Ede Kiwiɔyɛkɔ Ebe Di Yesu

¹ Kɛlɛede gɛ ba mɔ Yesu beke nɛ Betlehem anɛ Yuɖia, anɛ Ekusi Heroɖesɛ kibe, bebuiti teli be de kiwiɔyɛkɔ aba Yerusalɛm

² klɛ le be bisi asɛ, “Fakɔ eyi nɛ gɛ ba mɔ anasɛ Yuɖanɛ ekusi nɛ alɛ? Bumɔ yɛ nɛ kiwiɔyɛkɔ klɛ lɔ ba sɛ tɛ buba kpɛ kɛtɔkpuesi kɔ yɛ.”

³ Gɛ Ekusi Heroɖesɛ enu sɛ kana, kɛ kpɛ yɛ bunuhu, klɛ Yerusalɛm petee aza plɛnɔ yɛ.

⁴ Gɛ ekulu yɛ kpayaɔzakɔanɔ gbla anɛ ɛshãdɔkasɛ nɛ petee ebe xogo, ebisi alɛ ɔkɛlɛ gɛ ba ɖɔ sɛ ba baa mɔ Kristo.

⁵ Be bu kɛlɛ nu etsrea sɛ, “Nɛ Betlehem nɛ Yuɖia,” alasɛ kana atɔnu nɛ aŋlɔmɛ elu asɛ:

⁶ “ ‘Pɔ wɔ, Betlehem, nɛ Yuɖia kesukpa nɛa bha, odinu ebhliyi nɛ bagɛ baa ŋɛabha nɛ shi nɛ Yuɖia, alasɛ wɔ mɛ agɛ aba ŋa anɔabha nɛ ebee de yɛ ebe dzi agbɛgbanɔ kɔ mɛ Izraɛlanɛ.’ ”

⁷ Ɔkɛlɛ Heroɖesɛ ekulu kiwiɔyɛkɔ bebuiti nɛ tɛkpukpum klɛ ebisi alɛ ɔɖa nɔɔ nɛ mɛ pɔtɛɛ gɛ kɛwũwɔɛ nɛ wɛ̃ kɔa lɛ.

⁸ Asɛsɛ balɛ nɛ Betlehem klɛ asɛ, “Nɔ vɛ tɛ nɔ dɔ pɛ anuvɔ nɛ mɔmɔ. Kibe lɛ gɛ nɔɔ mɔ yɛ, nɔ ba tɛ nɔ bɔ kɔ mɛ ti, sɛ tɛ mɛ tsyɛ ɛda kpɛ kɛtɔkpuesi kɔ yɛ.”

⁹ Gɛ be nu ekusi nɛ kibui nɛ beke, ba vɛ balɛ kidzoa bha, klɛ kɛwũwɔɛ nɛ gɛ bamɔ nɛ kiwiɔyɛkɔ nɛ putɔ kɔa lɛ ɔdɔnanɔ kɛlɛ tɛdzudzrɔ nɛ ɔklɛ gɛ anuvɔ nɛ alɛ.

¹⁰ Gɛ ba mɔ kɛwũwɔɛ same ekua lɛ adɔ kidzo afla.

¹¹ Gɛ be de ku bupa nɛ mɛ, ba mɔ ŋɛvuvɔ anɛ yeni Maria, klɛ be zhiakpla klɛ ba kpɛ kɛtɔkpuesi akɔ yɛ. Ɔkɛlɛ ba danɛ balɛ ɔkpɛtɛ klɛ be bu kɛdɔkukɔ ansɛ, elifi anɛ sɛkadzɛdzã anɛ babɔhuhu akɔ yɛ.

¹² Klɛ gɛ beti bu akasɛ alɛ nɛ bulɛla mɛ sɛ be tee tsodzi avɛ Heroɖesɛ ɔkɔ so, ba da ga kidzo bhlatɔ avɛ balɛe pi.

Tɛsisi Vɛ Egipte

¹³ Gɛ kiwiɔyɛkɔ bebuiti na shɛ beke, Apalete nɛ axwɛdɛ nɛ ada wɛ̃ nɛ Yosɛfu bulɛlam klɛ etsrea sɛ, “Lɔ, yɛkɔ ŋɛvuvɔ anɛ yeni tɛ osi vɛ Egibte. Za ɔkɛlɛ ɔdɔ nanɔ kibe lɛ gɛ eba tsre wɔ, alasɛ Heroɖesɛ abaa pɛ anuvɔ na sɛ tɛ eyi.”

¹⁴ So evu alɔ, ayɛkɔ ŋɛvuvɔ anɛ yeni nɛ elishim klɛ ashɛ̃ avɛ Edzyibite,

¹⁵ ɔkɛlɛ aza ɔdɔ nanɔ kibe lɛ gɛ Heroɖesɛ ebe tsi. Klɛ kɛ ba kɛlɛm anasɛ gɛ Apalete nɛ aɖɔ ganɔ atɔnu nɛa bha sɛ, “Nɛ Edzyibite mɛ ɛba kulu mɛ eyianyɛ nɛ denɔ.”

¹⁶ Kibe lɛ gɛ Heroɖesɛ aba mɔ sɛ kiwiɔyɛkɔ bebuiti nɛ be ti bui adɛ yɛ, obulo oku yɛ, klɛ akɔ ɔshã sɛ be yi eyianyɛnuvɔ kanyaka nɛ Betlehem anɛ yɛ kɛdɔ nɛm petee, denɔ agɔ tabha ɔmɛnaesi, anasɛ gɛ enu denɔ kiwiɔyɛkɔ bebuiti nɛ ɔkɔ.

¹⁷ Ɔkɛlɛ kibui nɛ gɛ ba ɖɔ lu ganɔ atɔnu Yeremia bha nɛ ba kɛlɛ mɛ sɛ:

¹⁸ “Be nu ogugu toli kɛdɔ nɛ Rama, anɛ iyuyo anɛ awɔ̃hũdzɛdzã, Rashɛ̃l ebi kɔ yeyialɛ klɛ ataa dɛmɛ sɛ tɛ ba yɔ yɛ idzyi, alasɛ ba va ma.”

Tɛ Tsitsodzi Vɛ Nazarɛtɛ

¹⁹ Kɛlɛe de gɛ Heroɖesɛ etsi, Apalete nɛ axwɛdɛ aba wɛ̃ nɛ Yosɛfu bulɛlam nɛ Edzyibite

²⁰ klɛ asɛ, “Vu ɔlɔ, yɛkɔ anuvɔ anɛ yɛeni tɛ nɔ shɛ vɛ Izraɛl kesukpam, alasɛ bagɛ ba pɛɛ anuvɔ nɛ asɛ tɛ be yi nɛ eti tsi.”

²¹ So evu alɔ, klɛ ayɛkɔ anuvɔ anɛ yɛeni nɛ avɛnɔ Izraɛl kesukpam.

²² Pɔ gɛ enu asɛ Heroɖesɛ yeyi Atsyɛlausɛ yɛ aŋa bukusi nɛ yɛaka kinyi mɛ nɛ Yuɖia nɛɛ, kifu kui sɛ tɛ avɛ ɔkɛlɛ. Gɛ batɛ kpɛ yɛ ɔshã nɛ bulɛla mɛ so, etsodzi ɔkɛlɛ klɛ ada fla vɛ Galelia kɛdɔ nɛm,

²³ klɛ ada za ɔma toli gɛ bee kulu asɛ Nazarɛtɛ nɛm. Kana kɛda ba kɛlɛm anasɛ gɛ ba ɖɔɛ lɛ aganɔ batɔmu nɛa bha asɛ: “Be be kulu yɛ asɛ Nazarɛtɛeyi.”