Mateo 17 - ONUGBÙ NYƐNYÃ VUVƆ

Yesu Ishutsyitsyina

¹ Nɛ ewi tehloe de Yesu agbanɔ Petro, Yakobo anɛ Yohanɛsɛ Yakobo yadzya, klɛ avɛnɔ balɛ nɛ butu ɖɛɖama tulia bha nɛ balɛ nahwɛ ishua hwɛ.

² Ɔkɛlɛ Yesu etsyina shu nɛ balɛ amɛ. Yamɛ nɛ mɛ atã nasɛ kiwi, klɛ yɛ bawi nɛ be fuli ansɛ kifu.

³ Ɔkɛlɛ nɛ ko Mose anɛ Eliya ba wɛ̃ nɛ balɛ amɛ pɛ bedza ɖɔaɖɔ nɛ Yesu.

⁴ Petro etsre Yesu sɛ, “Apalete, kɛpɛ kɔlɔ sɛ bulɛ ɔkɛ̃. Onu gɛ ɔbɔ pɛɛ lɛ ana, ɛba dzu bugba tɔta, tierikpo kɔ wɔ, tierikpo kɔ Mose anɛ tierikpo kɔ Eliya.”

⁵ Nɛ kibe lɛ gɛ Petro ekedza ɖɔ kaɖɔ, ɔmunɔ fufu toli ɔbɔ kana balɛ ɔtsya, klɛ olim toli oyi denɔ ɔlɛ mɛ sɛ, “Meyi naa, gɛ ɛdɛmɛ yɛ bui; yɛmɛ mɛ mɔ amɛ zhizhiesi. Nɔta yɛa tɔ!”

⁶ Kibe lɛ gɛ badɔkpasɛ nɛ nu ana, ba wɔlɛ adɔ klɛ le kumu amɛesi, nɛ kifu sisi.

⁷ Pɔ Yesu aba klɛ ebe hunɔ alɛ. Kɛlɛa sɛ, “Nɔ lɔ,” “No to si kifu.”

⁸ Kibe lɛ gɛ bebu amɛ ewunɔ ba da mɔ anɔnyanɔ ɔyɛkɔdɛ Yesu.

⁹ Gɛ be zhi butu nɛ aaba, Yesu akpɛ alɛ ɔshã sɛ, “Nɔ tɛ ɖɔ tɛ anɔnyanɔ enu kɛdɔnɔ gɛ nɔ dɔ mɔ, ɔdɔ nanɔ kibe lɛ gɛ be feke Anɔdzyrame yɛ Eyi nɛ edenɔ bekpum.”

¹⁰ Badɔkpasɛ nɛ bisi yɛ asɛ, “Kɛlɛ kide so pɛ ɛshãdɔkasɛ nɛ baa ɖɔ asɛ, kɛlɛ sɛ tɛ Eliya eputɔ aba?”

¹¹ Yesu ebu kɛlɛ nu asɛ, “Tɛ nɔ yɛkɛ ɔŋa, Eliya aba ba klɛ ebe tsodzini kɛdɔnyɛdɔ elu klɛ ɔzakɔ.

¹² Pɔ itsre nɔ, Eliya atɛ ba kukuuku, klɛ ba dɛ kpɛ yɛ xaŋũ, pɔ ba bhɛtɛ kɛdɔnyɛdɔ gɛ ba pɛɛ nɛ yɛ. Kana Anɔdzyrame yɛ Eyi nɛ tsyɛ abaa tɔ nɛ balɛ tɛhwɛm.”

¹³ Ɔkɛlɛ badɔkpasɛ nɛ enu kɛlɛesi asɛ Yohanɛsɛ Enikpɛ nɛ aaɖɔ.

Ɔfufɔɛkpã Eyi Teli Bunya Tibibeke

¹⁴ Kibe lɛ gɛ ba ba tɔnɔ banɔɛza, anyɛ teli aba tɔnɔ Yesu klɛ edzu ekuisie si kɔ yɛ.

¹⁵ Klɛ aɖɔ asɛ, “Apalete, di mɛeyi nɛ eshutukubui.” “Aawɔlɛ ebho klɛ aatɔ tsutsɔmɔ tsɔmɔ. Ebe gelee adɔ ku kifu mɛ nɛ buni mɛ.

¹⁶ Ɛyɛkɔ yɛ ɛmɛna wɔ badɔkpasɛ, pɔ ba dɛ na yɛ bunya nu beke.”

¹⁷ Yesu ebui lɛ nu asɛ, “Ao banɔ gɛ ba dɛ pɛ̃ klɛ tɛyɛyɛkɛŋa ma nɔ ahwɛ,” “kɛlɛ za mɛ ɛba za wɔnɔ bha ɔdɔnanɔ? Kɛlɛ za mɛ ɛba za plɛnɔ wɔnɔ ɔdɔnanɔ? Yɛkɔ anuvɔ nɛ ɔmɛna mɛ nɛ ɔkɛ̃.”

¹⁸ Yesu anyɛna nɛ ɔfufɔɛkpã nɛa bha, klɛ lɔ fla okoeyi nɛ anuvɔ nɛ mɛ, klɛ yɛ bunya nɛ beke nɛ ɔɖɔ lɛlɛ nɛ mɛ.

¹⁹ Ɔkɛlɛ badɔkpasɛ nɛ ba tɔnɔ Yesu nɛ tikpukpum klɛ be bisi yɛ asɛ, “Kide so pɛɛ bulɔ xũ nɛ dɛ na ɔlɛ kɛka bu?”

²⁰ Yesu asɛ, “Alasɛ tɛyɛyɛkɛŋa bhli ko kɛlɛ lɛ wɔnɔ ahwɛ. Itsre nɔ kɛgba sɛ, onu gɛ tɛyɛyɛkɛŋa bhli ansɛ ɔyurɔpɔɛyi kɛɛ lɛ wɔnɔ ahwɛ, nɔ bɔ na butu nɛ tsre sɛ, ‘Shɛ nɛ ɔkɛ̃ tɛ ɔvɛ ɔkɛ̃,’ klɛ bu ba vɛ. Kɛdɔnyɛdɔ ma gɛ nɔ tɛ bɔ naa bhɛtɛ.”

²¹ Pɔ ɔfufɔɛ ɔnɛ nɛɛ di ɔtɛ boo koeyi odinu ganɔ kpayakuklu nɛ onugbunyɛnya mɛ.

²² Kibe lɛ gɛ be be xogo nɛ Galelia, etsre alɛ asɛ, “Ba ba ga Anɔdzyrame yɛ Eyi nɛe si akpɛ banɔ ahwɛ.

²³ Be be yi yɛ, klɛ nɛ kiwi tramɛ nɛa bha ebe tsodzi alɔ aba ɛkpãm.” Klɛ badɔkpasɛ nɛ be yuku nɛ same mamɔmamɔ.

Busɔlɛvu Mɛ Kɛdɔkukɔ

²⁴ Gɛ Yesu nɛ yɛ badɔkpasɛ nɛ ede ku Kapenaumɛ beke, badɔdzyɔ nɛ gɛ ba yɛkɛ kadzyɔ na ba tɔnɔ Petro klɛ be bisi yɛ asɛ, “Wɔnɔ adɔkasɛ nɛ xũ ataa kɔ busɔlɛvu mɛ kadzyɔ?”

²⁵ Ebui lɛ nu asɛ, “Ee, aakɔ,” Kibe lɛ gɛ Petro ebe tsoku bupa nɛ mɛ, Yesu yɛ eputɔ aɖɔa ɖɔ. Ebisi asɛ, “Simɔnɛ wɔ kɛtɔkpum sɛ kɛlɛɛ?” “Ba ne ahwɛ kesukpa bha bekusi nɛ ba yɛkɛ kadzyɔ nɛ ɖutɛɛ—balɛ naɛhwɛ beyi pɛnɔɔ banɔ bhlatɔ ahwɛ?”

²⁶ Petro ebui lɛ nu asɛ, “Denɔ banɔ bhlatɔ ahwɛ.” Yesu etsre yɛa sɛ, “Kɛlɛ alɛ be bu balɛ beyi nɛ xũ nɛ kɛlɛ mɛ.”

²⁷ “Pɔ sɛ tɛ bu tɛ da nɛ balɛa bha, vɛ kɛvɔ nɛ mɛ tɛ ɔdɔ kpɛ wɔ ɖaɖuwɛ. Yɛkɔ kɛkpã tutɔpu nɛ gɛ obo bu, yaka kɛlɛ onugbu nɛ mɛ klɛ ɔbɔ mɔ kɔba tɛalɛ̃ kihoeyi tili. Yɛkɔɛ lɛ tɛ ɔdɔ kɔ kadzyɔ nɛ mɛ nɛ wɔnɔ nu.”