Mateo 16 - ONUGBÙ NYƐNYÃ VUVƆ

Kɛdɔmumɔ Pɛpɛɛ Denɔ Yesu Ɔkɔ

¹ Farisianɛ anɛ Sarusianɛ na tɔnɔ Yesu aba klɛ le be feke yɛ edi ganɔ tibibisim sɛ abhɛtɛ kɛdɔmumɔ tili gɛ kide owũsise tɛ be di.

² Ebui lɛ nu asɛ, “Kibe lɛ gɛ owulago ɔɔna, nɔ sɛ, ‘Kanɔ nɛ mɛ ka ba pɛ̃, alasɛ owũsise nɛ ɔdzã,’

³ klɛ nɛ kɛvulɔ mɛ, ‘Obo kɛlɛ ba fu, alasɛ owũsise nɛ ɔdzã klɛ lɔ da gblo.’ No nyi kana gɛ nɔ bɔ kla owũsise nɛ obu ɔlɛe si, pɔ nɔ tɛ ɔna kibe nɛ mɛ kɛdɔmumɔ nɛe si bu.

⁴ Atɔkpum gɛganɛ anɛ aglɔbui bhɛbhɛtɛ kanɔa nɛ mɛ banɔ naa pɛɛ ebui yiyinɔanɔɛ dɔmumɔ, pɔ ba tɛ ba kɔ akanyaka odu nu sɛ Yona kɛdɔmumɔ.” Ɔkɛlɛ Yesu ashɛ̃ nɛ balɛ ɔbha klɛ ada fla shɛ.

Farisianɛ Anɛ Sarusianɛ Nɛ Bunayekedɔ

⁵ Kibe lɛ gɛ ba tsɔkɛ kɛvɔ, badɔkpasɛ nɛ ba dzɛkɛ ba dɛ yɛkɔ kɛŋɛŋa kanyaka.

⁶ Yesu etsre balɛ asɛ, “No dii mɔ.” “No lu awɔ̃ nɛ Farisianɛ anɛ Zaɖusianɛ anɛ bunayekedɔ nɛ shu.”

⁷ Ba nyɛna kibui nɛ edi nɛ aglɔm asɛ, “Alasɛ bɔ dɛ mɛna kɛŋɛŋa kanyaka so.”

⁸ Gɛ enyi kibui nɔɔ nɛ gɛ baa nyɛna so, Yesu ebisi asɛ, “Wɔnɔ tɛyɛyɛkɛŋa bhli banɔ, kide pɛɛ kɛŋɛŋa maza maza wɔnɔ ahwɛ bui nɔɔ ɖɔ?

⁹ Kɛlɛ so no too nu kibue si di? Nɔ tɔɔ baka egba titi kɔ banɔ akpã teti, anɛ ashuɔɛ tashɛ̃ nɔɔ nɛ gɛ nɔ yalɛ?

¹⁰ Ɔdɔgɔsɛ egba tigene kɔ banɔ akpã talɛ, anɛ ashuɔɛ tashɛ̃ nɔɔ nɛ gɛ nɔ yalɛ?

¹¹ Kɛlɛ ki dzi so pɛ no too nu kɛlɛe si sɛ ganɛ kɛŋɛŋa shui bui mɛ ɛɖɔ tsre wɔnɔ? Pɔ nɔ za nɛ awɔ̃ nɛ Farisianɛ anɛ Zaɖusianɛ anɛ bunayekedɔ nɛ shu.”

¹² Ɔkɛlɛ be nu kɛlɛe si sɛ ganɛ bunayekedɔ nɛ gɛ ba kpɛ gbɛgbɛvu buna nɛ mɛ bui aaɖɔ, pɔ Farisianɛ anɛ Sarusianɛ kɛdɔkɛkasɛ nɛ shu ya alɔ kititi.

Petro Adanɛ Kristo Shu

¹³ Kibe lɛ gɛ Yesu ebe ku Sizeria Filipi bee, ebisi yɛ badɔkpasɛ nɛ asɛ, “Anee banɔa ɖɔ sɛ yɛ Anɔdzyrame yɛ Eyi nɛ enu?”

¹⁴ Be bu klɛ nu asɛ, “Banɔ teli asɛ Yohanɛsɛ Enikpɛ, be teli asɛ Eliya, klɛ babhlatɔ tsyɛ asɛ, Yeremia nɛ obhi batɔnu nɛ ɔmayɛ teli.”

¹⁵ Yesu ebisi balɛ asɛ, “Pɔ wɔnɔ xɔ̃?” “Anee nɔ sɛ yɛ mɛ inu?”

¹⁶ Simɔnɛ Petro ebui lɛ nu asɛ, “Wɔ nu Kristo, ɛkpã Kpaya nɛ yɛ Eyi.”

¹⁷ Yesu ebu lɛ nu asɛ, “Ba yula wɔ, Simɔnɛ Yona yɛeyi, alasɛ ganɛ anɔdzyrame yɛ bu kibui nɛ akasɛ wɔ, pɔ mɛ Aka nɛ owũsise yɛ bui lɛ akasɛ wɔ.

¹⁸ Klɛ mɛ itsre wɔ sɛ wonu Petro, klɛ nɛ kɛklãgbui nɛa bha mɛ ba bhɔ mɛ busɔlɛɔha nɛ ɛtrɔ, klɛ butsi tsyɛ tɛ ba ŋa ɔlɛa bha.

¹⁹ Ɛba yɛkɔ owũsise bukusiɔŋakɔ buvuaɖɛ nɛ kɔ wɔ, kɛdɔnyɛdɔ gɛ nɔ nya nɛ kesukpa nɛa bha ba ba nya kɛlɛ nɛ owũsise, klɛ kɛdɔnyɛdɔ gɛ no bule nɛ kesukpa be be bule kɛlɛ nɛ owũsise.”

²⁰ Ɔkɛlɛ akpɛ yɛ badɔkpasɛ nɛ ɔshã sɛ ba tɛ ɖɔ tsre anɔnyanɔ sɛ yɛ enu Kristo.

Yesu Aɖɔ Yɛ Titsitsi Nɛ Elu

²¹ Denɔ kibe lɛ nɛ mɛ Yesu etenɔ ebuie si bu kɔ yɛ badɔkpasɛ nɛ asɛ alasɛ tɛ avɛ Yerusalɛm tɛ ada tɔ nɛ ebui gelee mɛ nɛ beshishe nɛ ahwɛ mɛ, kpayaɔzakɔanɔ anɛ ɛshãdɔkasɛ, klɛ kɛ ba za sɛ tɛ be yi yɛ klɛ nɛ kiwi tramɛ ebe tsodzi anyɛmɛ aba ɛkpãm.

²² Petro agbanɛ yɛ eyinɔɛ de klɛ ada kpa yɛ. Ɔkɛlɛ Petro aɖɔ asɛ, “Ao, Apalete!” “Kibui nɛ tɛ ba ba wɔa bha!”

²³ Yesu etsyina klɛ etsre Petro asɛ, “Fla nɛ mɔ bha, Satana! Onu kɛklãgbu gɛ ɔkpatanɛ mɛ; Kpaya ebui nɛ ama wɔ kɛtɔkpu mɛ, banɔdzyrame ayɛ ala lɛ.”

²⁴ Ɔkɛlɛ Yesu etsre yɛ badɔkpasɛ nɛ asɛ, “Onu gɛ anɔ teli asɛ aba za mɛe de, alasɛ tɛ ashɛ̃nahwɛ yɛshu nɛ shu tɛ ayɛkɔ yɛ butsiosi (atitsoga) tɛ aza mɛe de.

²⁵ Alasɛ aanɔ gɛ apɛa sɛ tɛ ebu yɛ ɛkpã aba lɛla ɛlɛ, pɔ aanɔ gɛ aba lɛla yɛ ɛkpã nɛ akpɛ mɛ so aba mɔɛ lɛ.

²⁶ Kibui dzyɔgo ɖueɖu kɛ ba dzi kɔ anɔ sɛ tɛ kanɔ nɛ petee kedzi yɛa yɛ, tɛ yɛ ɔfufɔɛ nɛ ɔdɔ lɛla? Ɔdɔgɔsɛ kidee anɔ aba naa yɛkɔ atsrakɛ yɛ kɛtɔwi nɛ nɔ?

²⁷ Alasɛ Anɔdzyrame yɛ Eyi nɛ aba ba nɛ Yaka ishu bhubhui mɛ nɛ yɛ baxwɛdɛ, klɛ aba buya kɛbhɛ kɔ anɔnyanɔ nɛ kana gɛ awa kɛxwɛ nɛ nu.

²⁸ Itsre nɔ kɛgba, banɔ teli gɛ be lii titi nɛ ɔkɛ̃ be ti be mini butsi flogo pɛ ba ba mɔ Anɔdzyrame yɛ Eyi nɛ aaba nɛ yɛ bukusi mɛ.”