Mateo 13 - ONUGBÙ NYƐNYÃ VUVƆ

Kɛkpalɛ Nɛ Adɔhwɛ Teli Shu

¹ Kiwi lɛlɛ nɛ ke Yesu ekoeyi ada za kɛvɔ nɛ butɔ.

² Banɔaza lɛlɛ nɛɛ di na ba kana yɛ atsya klɛ ede tsoku keniabha opupu tolim ezhedzi, nɛ kibe lɛ gɛ banɔ nɛ petee ba kana kɛvɔ nu tɔ atsya.

³ Klɛ etenɔ kaɖɔ ɖɔ tsre banɔ nɛ akpalɛ mɛ asɛ, “Ayadɛ teli ekoeyi avɛ kɛdɔ ɔhwɛ kɔ.

⁴ Kibe lɛ gɛ ahwɛ kɛdɔ nɛɛ, eteli awɔlɛ adɔ kidzo nɛ shu, klɛ buzhuɔɛ ba tɔkɛ alɛ amunɔ.

⁵ Eteli awɔlɛ dɔ aklãgbum, gɛ la dɛ mɔ tisi mɔmɔ. Le yi zia, alasɛ tisi nɛ dɛ do nɛ ɔklɛ.

⁶ Pɔ gɛ buwui nɛ ba tã, eyii nɛ gɛ eyi la tayɛ̃ alasɛ la dɛ kpɛ igu.

⁷ Eyii nɛ teli awɔlɛ adɔ ewim, gɛ ewi nɛ ebe she ada lɛ.

⁸ Kana ke eyii nɛ teli adɔ kesukpa dzyɔgoa bha, gɛ akɔ sɛ le yu, nɛ kɛfɔɛfɔmɛ, anɛ afɛtehlomɛ, anɛ afata mɛ ɔyɛkɔ dɛ agɛ ba ɖa.

⁹ Anɔ nɛ gɛ batɔ alɛ yɛ, tɛ enu.”

¹⁰ Badɔkpasɛ na tɔnɔ yɛ aba klɛ le bisi yɛ asɛ, “Kide so pɛ ɔɖɔ kaɖɔ otsre banɔ nɛ akpalɛ mɛ?”

¹¹ Ebui lɛ nu asɛ, “Ba tɛ yɛkɔ ebui kpukpu nɛ owũsise bukusiɔŋakɔ nɛ tɛtiti akɔ nɔ, pɔ ganɛ kɔ balɛ.

¹² Aanɔ nɛ gɛ kɛdɔ lɛ yahwɛ bazia kɔ yɛ ata, klɛ kɛdɔ ba za yɛ ahwɛ gelee. Aanɔ nɛ gɛ kɛdɔnyɛdɔ ma yahwɛ, kibhliyi nɔɔ gɛ lɛ yɛ ahwɛ tsyɛ ba ba yɛkɛ kɛlɛ nɛ yahwɛ.

¹³ Kibui nɛ so pɛ ɛɖɔ kaɖɔ nɛ akpalɛ mɛ kɔa lɛ, “Bee di, pɔ ba ta mɔ, bee nu, pɔ bete nu kɛlɛe si.

¹⁴ Nɛ balɛ mɛ ba tɛ mɔ Yezaya atɔnu nɛ ebui nɛ mɛ asɛ: “ ‘No bo zo nu xũi, pɔ nɔ tɛ bo nu kɛlɛ esi di, no bo zo di kɛdɔ xũi, pɔ nɔ tɛ bɔ zɔɔ mɔɛ lɛ mɛ.

¹⁵ Alasɛ banɔa nɛ idzyi mɛ aba agɛganɛ; agɛganɛ kɔa lɛ sɛ tɛ benu nɛ balɛ batɔ, klɛ ba da balɛ awɔ̃hũ. Otɔ sɛ anɛ kana bata za mɔ nɛ balɛ awɔ̃hũ, be nu nɛ balɛ batɔ, be nu kibuiesi nɛ balɛ idzyi, klɛ tɛ betsyina, klɛ mɛ ba beke balɛ banya.’

¹⁶ “Pɔ ba yula wɔnɔ awɔ̃hũ alasɛ laa mɔ, wɔnɔ batɔ alasɛ lee nu.

¹⁷ Kɛlɛ so nɛ itsre nɔ kɛgba sɛ, batɔnu gelee nɛ banɔ dzyɔgo teli ba pɛɛ sɛ tɛ ba mɔ kɛ gɛ nɔ mɔ, pɔ ba dɛ mɔ kɛlɛ, klɛ tɛ be nu kɛ gɛ no nu pɔ be di nuɛ lɛ.

¹⁸ “Nɔ tatɔ tɛ no nu adɔhwɛ kɛkpalɛ nɛe si,

¹⁹ Kibe lɛ gɛ anɔ teli enu bukusiɔŋakɔ kibui pɛ edi nu klɛe si, ɔfufɔɛkpã nɛ ɔbɔ ba ɔbɔ bhɛ kɛ gɛ ba tɛ ɖa kpɛ idzyi nɛ mɛ nɛ obu. Kɛlɛ nu eyii nɛ gɛ awɔlɛ adɔ kidzo nɛ shu.

²⁰ Eyii nɛ gɛ adɔ aklãgbu nɛ mɛ alɛ nu anɔ nɛ gɛ enu kibui klɛ ayɛkɛ lɛ nɛ same.

²¹ Pɔ gɛ kibui nɛ dɛ kpɛ igu nɛ yɛ mɛ so adɛ nyɛna kibui nɛm dzroɖoɖo. So onu gɛ bunuhu ɔdɔgɔsɛ tɛkpɛkpatɔnɔ tili nya ba nɛ kibui nɛ shu ko awɔlɛ ekoeyi.

²² Eyii nɛ gɛ adɔ ewi mɛ alɛ nu anɔ gɛ enu kibui, pɔ ɛkpã nɛ mɛ butɔ nɛ kɛnɔmɛdɔ anɔwuwɔɛ eshe ada yɛ so kibui nɛ dɛ yu eyuyu nɛ yɛ mɛ.

²³ Pɔ eyii nɛ gɛ adɔ kesukpa dzyɔgo nɛa bha, alɛ nu anɔ gɛ enu kibui klɛ enu kɛlɛe si. Klɛ kibui nɛ ba yu eyuyu gelee nɛ kɛfɔɛfɔm, nɛ ɛzakɔ afɛtehlo, afata mɛ ɔyɛkɔ dɛ eyi nɛ gɛ ba ɖa.”

Kɛkpalɛ Nɛ Tɛwa Shu

²⁴ Yesu aza kpɛ kɛkpalɛ bhlatɔ akɔa lɛ asɛ: “Owũsise bukusiɔŋakɔ nɛ ɔsɔnɔ ansɛ anɔ gɛ avɛ yɛ buya mɛ klɛ ada hwɛ kɛdɔeyi dzyɔgo.

²⁵ Pɔ kibe lɛ gɛ anɔnyanɔ avɛnɔ tra, agɛ adɛ ɖɔ yɛ na vɛ ada hwɛ tɛwaeyi akpɛ amɔ nɛshi, klɛ ashɛ̃.

²⁶ Gɛ amɔ nɛ eyi pɛ le she, klɛ tɛwa nɛ tsyɛ yi koeyi.

²⁷ “Ayadɛ nɛ baxwɛdɛ na ba tɔnɔ yɛ asɛ, ‘Aka, anɛ eyi dzyɔgo ɔhwɛ nɛ buya nɛ mɛ dza? Klɛ fakɔ tɛwa nɛ de?’

²⁸ Ebu kɛlɛ nu asɛ, “ ‘Anɔ nɛ gɛ adɛ ɖɔ mɛ nɛ yɛ ada wa kɛxwɛ lɛlɛ.’ “Baxwɛdɛ nɛ be bisi yɛ asɛ, ‘Ɔpɛ sɛ tɛ buvɛ da kpa tɛwa nɛ bu dza?’

²⁹ Ebu kɛlɛ nu asɛ, “ ‘Oo,’ alasɛ onu gɛ nɔ vɛ tɛwa nɛ ɔkpabu kɔ, kɛ ba ba kɛlɛ mɛ sɛ nɔ bɔ kpa amɔ nɛ ɔta.

³⁰ Nɔ kɔ kɛlɛ nɛ tɛwa nɛ petee she ketsu ɔdɔ na nɔ alɛ ɔpɔkɔ. Nɛ kibe lɛ mɛ ɛba tsre baxwɛwa nɛ sɛ: Putɔnɔ no xogo tɛwa tɛ nɔ nya kɛlɛ kɔ tɛ pupɔɛ, klɛ tɛ no xogo amɔ nɛ tsyɛ ɔyɛkɔ bɔ kpɛ mɛ owule nɛ mɛ.’ ”

Akpalɛ Nɛ Eyixwɛtsɛ Anɛ Bunayekedɔ Shu

³¹ Yesu aza kpɛ kɛkpalɛ bhlatɔ asɛ: “Owũsise bukusiɔŋakɔ nɛ odzi ansɛ eyixwɛtsɛ, gɛ anɔ teli ada ɖa nɛ yɛ buya mɛ.

³² Kɛnya lɛ kɛlɛ mɛ sɛ alɛ enu eyibliyii adɛ nɛ wɔ eyinyeyi shi, pɔ onu gɛ ki she, kɛ ba dzi kevudeya osi gbɛgbla dɛ, gɛ kɛ ba kɔ sɛ kɛlɛm buzhuɔɛ bu ba ba dɔ ɔlɛ ɛshɛ nɛ mɛ.”

³³ Aza kpɛ kɛkpalɛ bhlatɔ kɔ balɛ asɛ, “Owũsise bukusiɔŋakɔ nɛ odzi ansɛ bunayekedɔ gɛ anɔdzɛ aayɛkɔ akpɛ buna gelee mɛ kɔ tɛ yiyeke nɛ tɛ pipe.”

³⁴ Yesu aɖɔ ebuia nɛ petee nɛ akpalɛ mɛ etsre banɔɛza, adɛ ɖɔ kibuinyɛbui etsrea lɛ gɛ odinu sɛ ganɔ kɛkpalɛm.

³⁵ So kana ebui nɛ gɛ baɖɔ aganɔ atɔnu nɛa bha nɛ aba ba kɛlɛ mɛ asɛ: “Ɛba danɛ mɛ onugbu nɛ akpalɛ, Ɛba ɖɔ ebui kpukpu nɛ gɛ ekpu denɔ kanɔ nɛ kesi kpɛkpɛ.”

Tɛwa Akpalɛ Nɛ Kesibubu

³⁶ Ɔkɛlɛ ashɛ̃ lɔ banɔɛza nɛ avɛ bupa mɛ. Yɛ badɔkpasɛ nɛ ba tɔnɔ yɛ aba klɛ la ɖɔ asɛ, “Bu buya mɛ tɛwa nɛɛ kpalɛ nɛesi kɔ lɔ.”

³⁷ Ebu kɛlɛ nu asɛ, “Anɔ nɛ gɛ aɖa eyi dzyɔgo nɛ yɛ enu Anɔdzyrame yɛ Eyi.

³⁸ Buya nɛ mɛ bulɛ nu kanɔ nɛ mɛ, klɛ eyi dzyɔgo nɛ alɛ nu bukusiɔŋakɔ nɛ mɛ bee yi. Tɛwa nɛ klɛ nu ezizi nɛ yeyialɛ,

³⁹ klɛ anɔkpã nɛ gɛ aɖa lɛ nɛ yɛ enu ɔfufɔɛkpã. Kɛdɔ yɛyɛkɔ kibe nɛ kɛlɛ nu kanɔ nɛ obekekɔ, klɛ badɔyɛkɔ nɛ balɛ enu Kpaya baxwɛdɛ.

⁴⁰ “Kana gɛ ba kpa tɛwa pɛ ba pɔɛ lɛ nɛ kifu mɛ, kana kɛ ba za nɛ kanɔ nɛ obekekɔ.

⁴¹ Anɔdzyrame yɛ Eyi nɛ aba kpɛ yɛ baxwɛdɛ nɛ asɛsɛ, klɛ le be bu kizizi kanyaka nɛ yɛ bukusiɔŋakɔ nɛ mɛ gɛ kɔ buzizi nɛ bagɛ ba bhɛtɛ butsutsɔmɔ.

⁴² Ba ba yɛkɔ balɛ ada tɛɛ̃ akpɛ kifu gɛganɛm, ɔkɛlɛ gɛ iyuyo nɛ eletɛtã aba za.

⁴³ Klɛ badzyɔgo nɛ ba ba tã ansɛ kiwi nɛ balɛ Aka nɛ bukusiɔŋakɔ. Anɔɔ nɛ gɛ batɔ alɛ yɛ, tɛ enu.

Akpalɛ Nɛ Kɛkesrɔdɔ Kpukpu Nɛ Kɛklãgbu Yɛŋaedzi Shu

⁴⁴ “Owũsise bukusiɔŋakɔ nɛ odzi ansɛ kɛkesrɔdɔ tili gɛ bekpu nɛ ayakpam. Gɛ anɔ teli emunɔɛ lɛ, etsodzini kɛlɛ ekpu, klɛ nɛ yɛ same mumɔ mɛ nɛ ada yɛkɔ kɛdɔnyɛdɔ gɛ lɛ yahwɛ nɛ adɛ klɛ avɛ ede dzi kesukpɛa lɛlɛ.

⁴⁵ “Kana, owũsise bukusiɔŋakɔ nɛ odzi ansɛ edziniga gɛ avɛ ada pɛɛ aklãgbu ŋɛŋaedzi dzyɔgo.

⁴⁶ Gɛ avɛ ede munɔ kɛŋɛŋaedzi tili, ashɛ̃ avɛ ada yɛkɔ yɛ kɛdɔ kanyaka gɛ kɛlɛ yahwɛ nɛ adɛ klɛ ede dzia lɛ.

Kɛkpalɛ Nɛ Dzikle Shu

⁴⁷ Kana ke, owũsise bukusiɔŋakɔ nɛ odzi ansɛ kenimdzikle gɛ ba tɛa kpɛ kɛvɔm pɛ ebu akpã edidedi.

⁴⁸ Kibe lɛ gɛ kenimdzikle nɛ eyuku, ba gɛ be bu kenimɛdzya nɛ be he yɛ amɛna ogbigbe nɛa bha. Klɛ be zhiaza kesi klɛ la tɔkɛ kenimɛdzya dzyɔgo nɛ akpɛ bushɔ mɛ, pɔ ba yɛkɔ atsutsɔmɔ nɛ atɛ̃.

⁴⁹ Kana kɛba za nɛ kibe bibeke nɛ mɛ. Kpaya baxwɛdɛ na ba ba klɛ le be bu atɔkpum gɛganɛ elete nɛ badzyɔgo nɛ shi

⁵⁰ klɛ la ba yɛkɔ balɛ atɛ̃akpɛ kifu gɛganɛ nɛ mɛ, ɔkɛlɛ gɛ iyuyo nɛ eletɛtã aba za.

⁵¹ Yesu ebisi balɛ asɛ, “Sɛ no nu ebuia nɛ petee mɛ?” Be bu klɛ nu asɛ, “Ee.”

⁵² Aɖɔ etsre alɛ asɛ, “Kɛlɛ so ɔshãdɔkasɛ kanyaka gɛ ba kasɛ dɔ edenɔ owũsise bukusiɔŋakɔ nɛ shu asɔnɔ ansɛ apalete gɛ ebu yɛ kɛkesrɔdɔ vuvɔ nɛ kɛkuku nɛ edenɔ yɛ kɛdɔ ɔbalakɔ.”

Atɔnu Gɛ Ama Kinyi

⁵³ Gɛ Yesu akpɛ akpalɛa nɛ beke, avɛ yɛ kidzo gɛga nɛa bha denɔ ɔkɛlɛ.

⁵⁴ Gɛ ebe ku yɛ kepiɔma nɛ mɛ, akpa kɛdɔ kasɛ banɔ nɛ balɛ oxogokɔvu nɛ mɛ, klɛ kɛbhɛtɛ balɛ bi. Be bisi asɛ, “Fakɔ anyɛa nɛ edenɔ kibuinyinyi nɛ ebui yiyinɔ anɔ kemia nɛ di?”

⁵⁵ “Ganɛ adɔfatɛ nɛ yeyi nɛ naa? Ganɛ yeni nɛ bee kulu asɛ Maria, klɛ anɛ yadzyalɛ balɛ nu Yakobo, Yosɛfu, Simɔnɛ anɛ Yuɖasɛ?

⁵⁶ Sɛ yadalɛ nɛ petee balɛ bulɔ ɔbha? Klɛ fakɔ anyɛa nɛ edenɔ ebuia nɛ petee?”

⁵⁷ Klɛ ba mɔ obulo nɛ yɛ. Pɔ Yesu etsre alɛ asɛ, “Atɔnu nɛ yɛ kepiɔma nɛ yɛ bupa mɛ ba tɛ yɛkɛ yɛ bui.”

⁵⁸ Klɛ adɛ bhɛtɛ ebui yiyinɔanɔ gelee nɛ ɔkɛlɛ, alasɛ tɛyɛyɛkɛŋa ma balɛ mɛ.