Mateo 10 - ONUGBÙ NYƐNYÃ VUVƆ

Yesu Akpɛ Yɛ Banɔ Lɔfɔntɛabha

¹ Yesu ekulu yɛ badɔkpasɛ lɔfɔntɛabha nɛ amɛna yɛ ɔbha klɛ akɔ balɛ kabhaŋɛŋa sɛ tɛ ba yɛkɔ akɛka ɛfufɔɛkpã ebu tɛ be beke banyanyanyɛ di.

² Banɔkpɛkpɛ lɔfɔntɛabha nɛ enyi naa: putɔnɔ, Simɔnɛ (gɛ bee kulu asɛ Petro) anɛ yadzya Andrɛasɛ, Yakobo Zebeɖi yɛ eyi, anɛ yɛadzya Yohanɛsɛ,

³ Filipo anɛ Batelemeo, Tomasɛ anɛ Mateo gɛ enu adɔdzyɔ, Yakobo Alfeosɛ yɛ eyi, anɛ Tadeosɛ,

⁴ Simɔnɛ Zelɔtɛ anɔ anɛ Yuɖasɛ Iskarɔtɛ nɛ, gɛ akpɛ Yesu ahwɛ.

⁵ Banɔ lɔfɔntɛabha nɛ gɛ Yesu akpɛ asɛsɛ anɛ ɛshãɛ nɛ asɛ: “Nɔ tɛ ga nɛ bagɛ ba dɛ ayɛkɛ Kpaya abha aŋa ɔdɔgɔsɛ tɛ no do tsoku Samarianɛ ɔma nyɔma mɛ.

⁶ Nɔ vɛ Izraɛlanɛ ibhoshi nɛ gɛ lɛla nɛ ɔkɔ.

⁷ Onu gɛ nɔɔ vɛ, nɔ ɖɔ kibui nɛ ɔsɛ, ‘Owũsise bukusi nɛ tɛ tsuba.’

⁸ No beke banyɛnya nɛ banya, nɔ nyɛmɛ betsitsi, no xule bagɛ baa nya bunyadzɛdzã nɛ shu, nɔ kɛka ɛfufɔɛkpã obu. Fãa nɔ yɛkɛ, fãa nɔ kɔɛ dɔ.

⁹ Nɔ tɛ yɛkɔ sɛkadzɛdzã pɛ sɛkafufu ɔdɔgɔsɛ sɛkahẽhẽ ɔkpɛ wɔnɔ ɔdzadi mɛ,

¹⁰ nɔ tɛ yɛkɔ ɔkpɛtɛ kɔ wɔnɔ kidzo gɛga, ɔdɔgɔsɛ kabhawi pɛ ɔtsrɛklɔ nɛ ovusi, alasɛ axwɛwa alɛ kɔ kɛbhɛ yɛyɛkɛ.

¹¹ “Ɔmanyɔma ɔdɔgɔsɛ obhliyi kanyaka mɛ gɛ noo tsoku, nɔ pɛɛ anɔ dzyɔgo teli ɔkɔ tɛ nɔ za ɔdɔ nanɔ kibe nɔɔ nɛ mɛ gɛ nɔ bɔ shɛ.

¹² Onu gɛ noo tsoku bupa tuli mɛ, nɔ kɔ aye.

¹³ Bupa nɔɔ nɛ gɛ bɔɔ yɛkɛ nɔ, nɔ kɔ wɔnɔ ishuyuyɔ nɛ za plɛnɔ bulɛ, kɛɛ ma ana, nɔ kɔ wɔnɔ ishuyuyɔ nɛ tsodzi ba nɔ kɔ.

¹⁴ Onu gɛ anɔ teli atɛ ba yɛkɛ wɔnɔ pɛ ɔdɔgɔsɛ ataa nɔ kibui nɛ atɔ, no xule wɔnɔ butsrukpɔ osumududu nɛ olu bupa ɔdɔgɔsɛ ɔma nɔɔ nɛ mɛ onu gɛ nɔɔ shɛ.

¹⁵ Itsre nɔ kɛgba sɛ, kɛ ba za bubɔɛbɔɛ kɔ Sorom anɛ Gomora nɛ kebhuikluwi nɛa bha ɔyɛkɔ dɛ ɔma nɔɔ lɛlɛ.

¹⁶ Ɛɛsɛsɛ wɔnɔ ansɛ ibhoshi nɛ ayakpam bukudzɔgɛ shi. So nɔ bhɛtɛ bushɛ ansɛ eblidzya tɛ wɔnɔ shu ibhui ansɛ gɔgɔwii.

¹⁷ “Nɔ lu awɔ̃ nɛ banɔdzyrame, be be vu nɔ ayɛkɔ akpɛ ahwɛ kɔ bamani klɛ ba ba mɛna nɔɛ dɔ nɛ balɛ ixogokɔevu nɛ mɛ.

¹⁸ Nɛ mɛ tɔkpu so ba ba gbanɔ nɔ avɛnɔ baga ŋɛabha anɛ bekusigbla nɛ ɔkɔ ansɛ bebuimɔɖɔ kɔ balɛ anɛ bagɛ be di nu Yuɖanɛ.

¹⁹ Pɔ onu gɛ bee vu nɔ, nɔ tɛ ga nɛ awɔ̃ nɛ kibui nɔ nɛ gɛ nɔ bɔ ɖɔ ɔdɔgɔsɛ kana gɛ nɔ bɔ ɖɔɛ lɛ. Ɔɖɔ lɛlɛ nɛ mɛ ba ba kɔ nɔ kibui nɔ nɛ gɛ nɔ bɔ ɖɔ,

²⁰ alasɛ kɛ tɛ ba dzi sɛ wɔnɔ ɖɔ kaɖɔ, pɔ wɔnɔ Aka nɛ Ɔfufɔɛ nɛ ɔlɛ ɔbɔ ɖɔ kaɖɔ nɛ ɔganɔ wɔnɔa bha.

²¹ “Adzya aba ga yadzya esi ayɛkɔ ada kpɛ butsi mɛ, klɛ aka tsyɛ aba bhɛtɛ ana nɛ yeyi, beyi ba ba lɔ kititi nɛ balɛ eni anɛ aka shu klɛ ba ba yɛkɔ balɛ ada kpɛ butsi mɛ.

²² Banɔ petee ba tɛ ba dɛmɛ wɔnɔɛ bui akpɛ mɛ so, pɔ aanɔ nɛ gɛ aza mɔmɔ ɔdɔ nanɔ obekekɔ be be bu yɛ.

²³ Kibe lɛ gɛ bakpatɔnɔ nɔ nɛ ɔkɔtoli, no si ɔvɛ ɔkɔ bhlatɔ. Itsre nɔ kɛgba sɛ, nɔ tɛ bɔ ga Izraɛl ɛma nɛ mɛ beke flogo pɛ Anɔdzyrame yɛ Eyi nɛ aba ba.

²⁴ “Adɔkpasɛ adɛ ɖama dɛ yɛ adɔkasɛ, pɛɛ ɔdɔgɔsɛ axwɛdɛ yɛ aba dɛ yɛ apalete.

²⁵ Abɔ kɔ adɔkpasɛ sɛ tɛ aza ansɛ yɛ adɔkasɛ, tɛ axwɛdɛ tsyɛ aza anasɛ yɛ apalete. Onu gɛ bee kulu apaka nɛ asɛ Ɔfufɔɛkpã ekusi, klɛ le be kulu yɛ bupa mɛanɛ!

²⁶ “So no too si balɛ fu. Kɛdɔnyɛdɔ ma gɛ ba dɛ lɛ dɔ pɛ ba tɛ ba danɛ dɔ nɛ klɛa bha, ɔdɔgɔsɛ be kpui lɛ pɛ ba tɛ be bui lɛ eyinɔ sɛ be ti.

²⁷ Kɛgɛ itsre nɔ nɛ otumu mɛ, nɔ ɖɔɛ lɛ nɛ kelizɛzam, kɛgɛ bee tsre nɔ hunihuni, nɔ kpɛ lɛ igugu nɛ buvu aɖam.

²⁸ No ti si fu nɛ bagɛ be be yi nɔ pɛ ba tɛ ba na kɛtɔwi nɛ buyi. Pɔ no si fu nɛ agɛ aba na wɔ ɔfufɔɛ anɛ ishuidzya nu yi nɛ fu gɛ tɛ ba ni di mɛ.

²⁹ Anɛ buyɛ̃kpakpɛ tɔbha ba dɛ kaple ko? Tsyɛ pɛ tierikpo nɛ bulɛ shi atɛ ba wɔlɛ adɔ kesukpa gɛ odi nu Aka nɛ tɛ pɛpɛɛ.

³⁰ Klɛ wɔnɔ kɛtɔkputɛka nɛ ada mɛ tsyɛ lɛ tɛkɛkla mɛ.

³¹ So no ti si fu, nɔ lɛ kedziŋɛŋa mɛ ɔdɛ buyɛ̃kpakpɛ gelee.

³² “Anɔnyanɔ gɛ aabaka mɛ bui nɛ banɔdzyrame amɛ, mɛ tsyɛ ba baka yɛ bui nɛ Maka nɛ gɛ alɛ owũsise nɛ amɛ.

³³ Pɔ aanɔ nɛ gɛ ashɛ̃nahwɛ mɛ shu nɛ banɔ amɛ, mɛ tsyɛ ba shɛnahwɛ yɛ shu nɛ Maka nɛ gɛ alɛ Owũsise nɛ amɛ.

³⁴ “No ti di lɛ ɔsɛ ɛba sɛ tɛ ɛmɛna ishuyuyɔ nɛ kesukpa nɛa bha, ganɛ ishuyuyɔ mɛ mɛna, pɔ keyu.

³⁵ Alasɛ ɛba sɛ tɛ ɛba tsyina “ ‘eyianyɛ kɔ kititi lulɔ nɛ yaka shu, eyiadzɛ kɔ kititi lulɔ nɛ yeni shu, eyinidze kɔ kititi lulɔ nɛ yandze shu

³⁶ banɔ nɛ gɛ ba dɛ pɛɛ anɔ teli bui be de yɛ bupa mɛ.’

³⁷ “Anɔnyanɔ gɛ aɖɔ yaka anɛ yeni adɛ mɛ klɛ adɛ na kɔ mayɛ tɛdzidzi, anɔnyanɔ gɛ aɖɔ yɛ eyianyɛ anɛ yɛ eyiadzɛ adɛ mɛ klɛ adɛ na kɔ mayɛ tɛdzidzi,

³⁸ klɛ anɔnyanɔ gɛ adɛ yɛkɔ yɛnahwɛ butsiosi pɛ aaza mɛe de adɛ na kɔ mayɛ tɛdzidzi.

³⁹ Anɔnyanɔ gɛ aaba pɛɛ yɛ ɛkpã aba lɛla ɛlɛ, klɛ anɔnyanɔ gɛ aaba lɛla yɛ ɛkpã akpɛ mɛ so aba mɔɛ lɛ.

⁴⁰ Aanɔ nɛ gɛ aayɛkɛ wɔnɔ mɛ ayɛkɛ, klɛ agɛ aayɛkɛ mɛ ayɛkɛ anɔ nɛ gɛ akpɛ mɛ.

⁴¹ Anɔnyanɔ gɛ aayɛkɛ atɔnu sɛ enu atɔnu so, aba yɛkɛ atɔnui bhɛ, klɛ anɔnyanɔ gɛ aayɛkɛ anɔnɛna sɛ enu anɔnɛna so aba yɛkɛ anɔnɛna kɛbhɛ.

⁴² Klɛ onu gɛ anɔ teli aakɔ beyibhlianɛ ɔmayɛ teli buni yuyɔ kantse sɛ enu mɛ adɔkpasɛ so, itsre nɔ kɛgba sɛ, yɛ tsyɛ atɛ ba lɛla yɛ kɛbhɛ.”