Mateo 1 - ONUGBÙ NYƐNYÃ VUVƆ

Yesu Oku Nɛ Mɛ Gɛ Ede

¹ Kɛdɔ ŋuŋlɔmɛ lu nɛ Yesu Kristo Daviti yɛ Eyi gɛ enu Abraham yɛ Eyi nɛ shu:

² Abraham yɛ edzi Isak yɛ aka, Isak yɛ edzi Yakɔb yɛ aka, Yakɔb yɛ edzi Yuɖa anɛ yɛadzyalɛ nɛ aka,

³ Yuɖa yɛ edzi Pɛrɛz anɛ Zera balɛ aka, gɛ balɛ eni edzi Tamar, Pɛrɛz yɛ edzi Hɛzrɔn yɛ aka, Hɛzrɔn yɛ edzi Ram yɛ aka,

⁴ Ram yɛ edzi Amminadab yɛ aka, Amminadab yɛ edzi Nashɔn yɛ aka, Nashɔn yɛ edzi Salmɔn yɛ aka,

⁵ Salmɔn yɛ edzi Boaz yɛ aka, gɛ yɛ eni edzi Rahab, Boaz yɛ edzi Obeti yɛ aka, gɛ yɛ eni edzi Ruth, Obeti yɛ edzi Yesse yɛ aka,

⁶ Klɛ Yesse ebe dzi Ekusi Daviti yɛ aka. Daviti yɛ edzi Salomonɛ yɛ aka, gɛ yɛ eni edzi Yuriah yɛedzini aba fla,

⁷ Salomonɛ yɛ edzi Rehoboam yɛ aka, Rehoboam yɛ edzi Abiya yɛ aka. Abiya yɛ edzi Asa yɛ aka,

⁸ Asa yɛ edzi Yehoshafɛt yɛ aka, Yehoshafɛt yɛ edzi Yehoram yɛ aka, Yehoram yɛ edzi Uzzia yɛ aka,

⁹ Uzzia yɛ edzi Yotam yɛ aka, Yotam yɛ edzi Ahaz yɛ aka, Ahaz yɛ edzi Hezekia yɛ aka,

¹⁰ Hezekia yɛ edzi Manase yɛ aka, Manase yɛ edzi Amɔn yɛ aka, Amɔn yɛ edzi Yosia yɛ aka,

¹¹ klɛ Yosia yɛ edzi Yekonia anɛ yɛadzyalɛ balɛ aka, nɛ kibelɛ nɛ gɛ keyu ebe vua lɛ avɛnɔ Babilɔn.

¹² Nɛ Babilɔn tɛzɛza beke mɛ, Yekonia yɛ edzi Shealtiɛl yɛ aka, Shealtiɛl yɛ edzi Zerubabɛl yɛ aka,

¹³ Zerubabɛl, Abiud yɛ aka, Abiud yɛ edzi Eliakim yɛ aka, Eliakim yɛ edzi Azɔ yɛ aka,

¹⁴ Azɔ yɛ edzi Zadɔk yɛ aka, Zadɔk yɛ edzi Akim yɛ aka, Akim yɛ edzi Eliud yɛ aka,

¹⁵ Eliud yɛ edzi Eleaza yɛ aka, Eleaza yɛ edzi Matan yɛ aka, Matan yɛ edzi Yakɔb yɛ aka,

¹⁶ klɛ Yakɔb yɛ enu Yosɛfu yɛ aka, Maria yɛ enyine gɛ ba mɔ Yesu akɔ, gɛ be klu asɛ Kristo.

¹⁷ So tɛmumɔm lɔfɔntialɛ̃ petee klɛ za denɔ Abraham ɔbɔ nanɔ Daviti yɛa bha, tɛmumɔm lɔfɔntialɛ̃ denɔ Daviti yɛa bha ɔdɔ nanɔ tɛtutu vɛ Babilɔn, klɛ kɛfɔntialɛ̃ za denɔ tɛtutu nɛ ɔdɔ nanɔ Kristo.

Yesu Kristo Tɛmumɔ

¹⁸ Kana mɛ Yesu Kristo tɛmumɔ nɛ ga pɛ kɛba: Ba kpɛ yɛeni Maria bunuwã akɔ Yosɛfu sɛ tɛ aba gbanɔ, pɔ flogo tɛ la ba zanɛ aglɔ nɛɛ kɛba wɛ̃ sɛ Maria eti munɔ ɛya ganɔ Ɔfufɔɛ Dzyɔgo nɛa bha.

¹⁹ Alasɛ Yosɛfu gɛ edzi Maria yɛenyine nɛ enu anɔ dzyɔgo so nɛɛ, adɛ pɛɛ sɛ tɛ akpɛ Maria kɛwɛ̃ so, atrɔ nɛ kɛtɔkpum asɛ aba shɛnahwɛ Maria shu kɛdzyɛɛ.

²⁰ Pɔ kɛlɛede gɛ akpɛ kɛtɔkpum ana nɛɛ, Kpaya axwɛdɛ ebe bu ishu akasɛ yɛ nɛ bulɛla mɛ asɛ, “Yosɛfu Daviti yɛeyi, tɛ si kifu nɛ Maria tɛgbɛgbanɔ vɛnɔ bupa mɛ ansɛ wedzini ana nɛ shu, alasɛ ɛya nɛ gɛ ɛlɛ yɛ shu nɛɛ lɛ de Ɔfufɔɛ Dzyɔgo nɛ ɔkɔ.

²¹ Aba mɔ eyianyɛ, gɛ kɛlɛ sɛ tɛ ɔkɔ yɛ nyi sɛ Yesu, alasɛ yɛ ebe bu yɛ banɔ nɛ edenɔ balɛ buzizi mɛ.”

²² Ebuia nɛ petee la ba kɛlɛ mɛ sɛ tɛ ba yɛkɔ mɔ Apalete nɛ ebui nɛ gɛ aɖɔ ganɔ atɔnu nɛa bha na asɛ:

²³ “Kebite nɛ kebe munɔ ɛya klɛ ka ba mɔ eyianyɛ, klɛ le be kulu yɛ asɛ Yimanuɛlɛ” gɛ kɛlɛesi nu sɛ, “Kpaya alɛ plɛnɔ lɔ.”

²⁴ Gɛ Yosɛfu anyɛmɛ denɔ tra nɛ mɛ, abhɛtɛ ansɛ gɛ Kpaya axwɛdɛ nɛ etsre yɛ klɛ agbanɔ Maria avɛnɔ bupa mɛ ansɛ yɛedzini ana.

²⁵ Pɔ yɛ anɛ Maria ba dɛ za tɛnyɛ anɛ tɛdzɛ mɛ ɔdɔ nanɔ yɛ eyianyɛ nɛ tɛmumɔ. Klɛ akɔ yɛ kinyi asɛ Yesu.