Marko 7 - ONUGBÙ NYƐNYÃ VUVƆ

Bagɛ Balɛ Ishu Bhui Nɛ Bagɛ Balɛ Ishu Di Bhui

¹ Farisianɛ anɛ ɛshãdɔkasɛ teli gɛ be de Yerusalɛm nɛ be xogo nɛ Yesu ɔbha klɛ

² ba mɔ Yesu badɔkpasɛ teli gɛ be dzi aŋa kɛdɔ nɛ ahwɛ gɛ alɛ ishu “edibhui ” alasɛ bedi plu alɛ.

³ (Farisianɛ anɛ Yuɖanɛ petee batɛ ŋa kɛdɔ onu gɛ ahwɛ edi plu, nɛ balɛ be gu nɛ bunu, anasɛ gɛ bakakuku nɛ baa bhɛtɛ.

⁴ Onu gɛ bee de kedzim pɛ baa ba, beeke plu ishu ba tɛ ŋa kɛdɔ. Klɛ ba ka nyɛna begu kpi mɛ evunɔ, ansɛ buntse, butsukpu anɛ bunieplui mɛ tɛtsitsi).

⁵ So Farisianɛ anɛ ɛshãdɔkasɛ nɛ be bisi Yesu asɛ, “Kide so pɛɛ wɔ badɔkpasɛ nɛ ba taa bhɛtɛ bakakuku nɛ begu nɛa bha pɛ balɛ baa ŋa kɛdɔ nɛ ahwɛ gɛ alɛ shu edi bhui?”

⁶ Yesu ebui lɛ nu asɛ, “Yezaya kibui dzyɔ nɛ ebui nɛ gɛ aɖɔ elu nɛ wɔnɔ shu sɛ no nu baa nɔ gɛ nɔtɔɔ ɖɔ kibui kɛwɔ̃hu; ansɛ gɛ ba ŋlɔmɛ elu asɛ: “ ‘Banɔa nɛ baɖɔ mɛ nɛ balɛ inugbu, pɔ balɛ idzyi mɛ aga ɔtɔ nɛ mɛ shu.

⁷ Ba kpɛ kɛtɔkpuesi kɔ mɛ kito; balɛ kɛdɔ kɛkasɛ nɛ nu banɔdzyrame eshã gɛ bakpɛ elu.’

⁸ Nɔ shɛnahwɛ Kpaya ɛshã nɛ shu olu klɛ nɔ dɔ lɛ banɔdzyrame begu nɛ ede.”

⁹ Klɛ etsre balɛ asɛ, “Edzo dzyɔgo alɛ wɔnɔ ahwɛ gɛ nɔ ga pɛ nɔɔ yɛkɔ plɛ Kpaya ɛshã nɛ olu kɛwã sɛ tɛ nɔ mɔ wɔnɔ nahwɛ begu nɛ bu gu!

¹⁰ Alasɛ Mose aɖɔ asɛ, ‘Kpɛ kɛtɔkpu kesi kɔ wɔaka anɛ wɔeni,’ klɛ ‘Anɔnyanɔ gɛ aɖɔ kibui akpɛ yɛeni nɛ yɛaka, alasɛ tɛ be yi yɛ.’

¹¹ Pɔ nɔ sɛ onu gɛ anɔ teli etsre yɛaka ɔdɔgɔsɛ yɛeni asɛ, ‘Tɛpɛplɛnɔ nɔɔ nɛ gɛ aba yɛkɛ denɔ yɛ ɔkɔ nɛ, kinu kɛdɔ gɛ ba yɛkɔ etsye Kpaya,’

¹² klɛ so kɛ tɛa kɔ sɛ anɔ afla bhɛtɛ kɛdɔnyɛdɔ akɔ yɛaka pɛ ɔdɔgɔsɛ yɛeni.

¹³ Kɛ kɔ sɛ no xule Kpaya kibui ganɔ wɔnɔ begu nɛ gɛ nɔ nyɛna ovunɔ nɛ mɛ. Klɛ nɔɔ bhɛtɛ ebui gelee kana.”

¹⁴ Yesu eze klu banɔɛza nɛ amɛna yɛ ɔbha klɛ etsre alɛ asɛ, “Nɔ ta mɛ batɔ, anɔnyanɔ, tɛ no nu kibui nɛ kesi.

¹⁵ Kɛdɔnyɛdɔ gɛ kɛ lɛ ɔtɔ pɛ kɛ tsoku anɔ ishu mɛ nɛ kɛtɛ ‘tutru’ anɔ. Pɔ, kɛ gɛ koeyi nɛ anɔ mɛ kɛ lɛ ‘tutru’ anɔ.”

¹⁶ Anɔ nɛ gɛ batɔ alɛ yɛ tɛ enu.

¹⁷ Kibe lɛ gɛ ashɛ̃ alɔ banɔɛza nɛ beke pɛ ede tsoku bupa nɛ mɛ, yɛ badɔkpasɛ nɛ be bisi yɛ ebui edenɔ kɛkpalɛ nɛ shu.

¹⁸ Ebisi asɛ, “Klɛ so wɔnɔ atɔkpu nɛ egble tsi kana lo?” “So nɔ tɔɔ mɔ sɛ kɛdɔnyɛdɔ gɛ kitsoku anɔ mɛ denɔ ɔtɔ nɛɛ kɛtɛ tutru anɔ?

¹⁹ Alasɛ kɛ tɛɛ tsoku yɛ idzyi nɛ mɛ, eya nɛ mɛ lɛɛ vɛ, flogo pɛ kɛ ba tɛ koeyi nɛ yɛ ishu mɛ.” (Nɛ kibui lɛ nɛ tɛ ɖuɖɔ mɛ nɛ, Yesu atrɔ ahwɛ kɛlɛa bha sɛ kɛdɔŋɛŋa kanyaka di ko kɛlɛ shu bhui.)

²⁰ Avɛ klɛa bha sɛ: “Kɛdɔ nɔɔ nɛ gɛ koeyi nɛ anɔ mɛ, klɛ tutru anɔ.’

²¹ Alasɛ denɔ anɔdzyrame idzyi mɛ, klɛ kɛtɔkpum kpã kii de, anyɛ anɛ adzɛ tɛzɛzam kpã, buzi, anɔyiyi, aglɔbui,

²² kɛdɔgbla pɛpɛ kɔshu, ɔhayɛ shu zizi, anɔ wɛwɛɛ, bu mabhui mabhui, kawɔ̃kpɛ, anɔshu zizi, buwɔ̃dzu anɛ buzizi.

²³ Ebui zizi anɛ petee le de koeyi nɛ anɔ mɛ, klɛ ala bhɛtɛ anɔ pɛ yɛ ishu ‘iti bhui.’ ”

Sirofoenisian Dzi Teli Nɛ Yɛ Tɛyɛyɛkɛŋa

²⁴ Yesu ashɛ̃ nɛ ɔkɛlɛ klɛ avɛ Tire kibee. Ede tsoku bupa tuli mɛ gɛ adɛ pɛ sɛ anɔnyanɔ eti, pɔ adɛ na yɛ ɔkɛlɛ tɛzɛza nɛ bu kpu.

²⁵ Nɛ kɛgbɛagba mɛ, adzɛ teli gɛ ɛfufɔɛkpã tsri yɛ eyia bha, gɛ enye nu yɛ kɛdɔ ko klɛ ebe zhiadɔ nɛ yɛ etem.

²⁶ Adzɛ nɛ enu Griki dzi, gɛ ba mɔ nɛ Sirianɛ Fonesia. Edzu kɛtɔkpu kesi akɔ Yesu sɛ akɛka ɔfufɔɛkpã nɛ ebu nɛ yɛeyi adzɛ nɛ mɛ akɔ yɛ.

²⁷ Etsre adzɛ nɛ asɛ, “Putɔnɔ nɛɛ kɔ beyi nɛ aŋa kɛdɔ nɔɔ gɛ ba pɛɛ nɛ petee, ” “alasɛ kɛdɛ kɔ kidzo sɛ tɛ ba yɛkɔ banuvɔ nɛ ŋɛŋa nɛ atɛɛ elu akɔ balɛ bukudzɔgɛ.”

²⁸ Adzɛ nɛ ebu kɛlɛ nu asɛ, “Yoo, Apalete, ” “pɔ bukudzɔgɛ nɛ gɛɛ za kɛdɔŋa ɔkplɔ̃ nɛ kesi nɛ, butɔkɛ kiwili wili nɛ gɛ kɛ wɔlɛ nɛ xũ nɛ aŋa.”

²⁹ Klɛ etsre adzɛ nɛ asɛ, “Nɛ wɔ kibu nɛ gɛ obu kibui nɛ bunu so nɛ, gavɛ faã, ɔfufɔɛkpã nɛ oti koeyi nɛ wɔ eyiadzɛ nɛ mɛ.”

³⁰ Gɛ adzɛ nɛ ashɛ̃ avɛ ede ku bupa nɛ mɛ nɛ amɔ yɛ eyiadzɛ nɛ gɛ eli kesi nɛ oputsoa bha, klɛ ɔfufɔɛkpã nɛ okoeyi ɔshɛ.

Batɔpu Anɛ Omumu Toli Banya Tibibeke

³¹ Klɛ Yesu ashɛ̃ nɛ Tire kibee klɛ ada ga Sidɔn, ede zhi atɔnɔ Galelia Aƒu klɛ ede tsoku Dekapoli.

³² Ɔkɛlɛ banɔ teli ba gbanɔ anɔ teli gɛ etee nu klɛ kaɖɔ ɖuɖɔ tsyɛ ka gɛganɛ akɔ yɛ, klɛ la ba kpɛ kɛtɔkpu kesi akɔ Yesu asɛ atrɔ ahwɛ nɛ anɔ nɛa bha tɛ yɛ bunya nɛ bu beke.

³³ Gɛ ebu anyɛnya nɛ eyinɔ kide nɛ banɔ nɛ kishi beke nɛ, Yesu ayɛkɔ yɛ ahwɛ nɛ akpɛ anyɛ nɛ batɔ mɛ. Klɛ ebu bututu klɛ ayɛkɔ ala anyɛ nɛ kɛnɛkɛ.

³⁴ Ebu amɛ akpɛ owũsise klɛ afɔɛ vuu, klɛ aɖɔ etsre anyɛ nɛ asɛ, “Efata!” (klɛ kesi asɛ “Danɛ!”).

³⁵ Nɛ ɔklɛ nɛ, anyɛ nɛ batɔ nɛ adanɛ, yɛ kɛnɛkɛ nɛ mɛ kibule, klɛ akpa kaɖɔ ɖɔ wee.

³⁶ Yesu akpɛ ɔshã akɔ balɛ asɛ ba tɛ da ɖɔ etsre anɔnyanɔ. Pɔ kɛkpɛ nɛ gɛ akpɛ ɔshã nɛ, kana ke baa ɖɔ kaɖɔ nɛ kibui nɛ shu.

³⁷ Kɛ bhɛtɛ banɔ nɛ kibi. Klɛ baa ɖɔ asɛ, “Abhɛtɛ kɛdɔnyɛdɔ klɛ kɛ na.” “Akɔa sɛ bagɛ betee nu tsyɛ be nu, bagɛ ba taa ɖɔ kaɖɔ na ɖɔ kaɖɔ.”