Marko 5 - ONUGBÙ NYƐNYÃ VUVƆ

Ɛfufɔɛkpã Tɛkɛkɛka Bu Nɛ Anyɛ Teli Mɛ

¹ Batsɔkɛ kɛvɔ nɛ ede ku Gɛrasɛnisɛ kesi mɛ.

² Gɛ Yesu ekoeyi nɛ keniabha opupu nɛ mɛ ko, ɛfufɔɛkpã anɔ teli ekoeyi denɔ idzre nɛ shi aba tsyanɛ yɛ.

³ Anyɛ anɛ aza idzre nɛ mɛ klɛ anɔnyanɔ atɛ kaa na yɛ nya, onu buɖɛ wɔ yɛkɔ tsyɛ.

⁴ Alasɛ nɛ ebea nɛ mɛɛ, baa ganɛ yɛ ɛtsrɛ nɛ ɛhwɛ anya, pɔ apɔ buɖɛ klɛ edzyini ɛɖa nɛ yɛ butsrukpɔ. Anɔnyanɔ adɛ gɛganɛ gɛ aba ŋa yɛa bha.

⁵ Elishi anɛ kemuze akpasɛ idzre nɛ shi, nɛ betushɛ nɛ mɛ, ebhui ishu nɛ aklagbu klɛ akpɛ igugu.

⁶ Gɛɛ amɔ Yesu asɛsɛ akpanɛsi klɛ ede dzu ekuisiesi nɛ yɛ etem.

⁷ Akpɛ ogugu gɛganɛɛ asɛ, “Yesu, Apaletedɛ nɛ yɛ Eyi, kɛdee wɔ pɛɛ denɔ mɛ ɔkɔ? Tanɛ Kpaya sɛ ɔtɛ bɔ bhɛtɛ mɛ kibui kpã!”

⁸ Alasɛ Yesu eti tsre yɛ asɛ, “Koeyi ɔbɔ fla, wɔ ɔfufɔɛkpã nɛ anyɛ anɛ mɛ!”

⁹ Klɛ Yesu ebisi yɛ asɛ, “Kidee gɛ nu wɔ kinyi?” Ebui lɛ nu asɛ, “Mɛ kinyi klɛ nu Ovulo, ” “alasɛ bu kpe.”

¹⁰ Klɛ akɔ kɛtɔkpu etsodzini akɔ asɛ, Yesu atɛ kɛka balɛ ebu nɛ ɔkɛlɛ kɛma nɛ mɛ.

¹¹ Bahɛ kɛhagbla tili zɛɛ ŋa kɛdɔ nɛ betu nɛ shu nɛ ɔkɛlɛ.

¹² Ɛfufɔɛkpã nɛ kɔ kɛtɔkpu Yesu sɛ, “Kɛka lɔ ɔdɔ kpɛ bahɛ nɛ mɛ, kɔ bulɔ kidzo sɛ tɛ butsoku balɛ mɛ. ”

¹³ Yesu akɔ ɛfufɔɛkpã nɛ dzo klɛ lɛ koeyi da tsoku bahɛ nɛ mɛ, gɛ lɛ koeyi nɛ anyɛ nɛ mɛ. Bahɛha nɛ ba na ansɛ akpã tabha gɛ la kpanɛ si ada dɔku kɛvɔ nɛ mɛ, klɛ la dɔe ni.

¹⁴ Bagɛ balɛ agbanɔ bahɛha nɛ be si avɛ ɔma nɛ mɛ nɛ ɛbha, ada ɖɔ kɛgɛ vɛa bha nɛ ɔklɛ, klɛ banɔ be si avɛ sɛ tɛ be de di kɛdɔnɔ nɛ gɛ kɛlɛ bɛ lɛ mɛ.

¹⁵ Gɛ banɔ nɛ be ku Yesu ɔbha nɛɛ, ba mɔ anyɛ gɛ yɛa bha ɛfufɔɛkpã ovulo nɛ otsri gɛ ezhidzi ɔkɛlɛ nɛ bawi dzyɔgo mɛ nɛ kibui titi mɛ, kifu ku ba ga mɔ anyɛ nɛ ana.

¹⁶ Bagɛ ba mɔɛ lɛ nɛ aɖɔ kɛgɛ ba ɛfufɔɛkpã anyɛ nɛa bha nɛ etsre banɔ—klɛ ba ɖɔaɖɔ edenɔ bahɛ nɛ tsyɛ shu.

¹⁷ Ɔkɛlɛ banɔ nɛ ba kpa kɛtɔkpuesi kpɛ kɔ Yesu asɛ ashɛ̃ nɛ balɛ kɛma nɛ mɛ.

¹⁸ Gɛ Yesu eetsoku keniabha opupu nɛ mɛ, anyɛ nɛ gɛ ɛfufɔɛkpã nɛ za yɛa bha nɛ tsyɛ asɛ aba tɔnɔ yɛ.

¹⁹ Yesu adɛ kɔ yɛ kidzo, pɔ etsre yɛ asɛ, “Vɛ bupa mɛ tɛ ɔdɔ tsre wɔ beshopo, kana gɛ Apalete nɛ edi wɔ eshutukubui, nɛ kɛdɔnɔ nɛ gɛ abhɛtɛ akɔ wɔ.”

²⁰ So anyɛ nɛ ashɛ̃ avɛ Dekapoli, gɛ enu emagbla lɔfɔ nɛ mɛ, klɛ ada ɖɔ kana gɛ Yesu ayɛkɛ akɔ yɛ. Klɛ kibui nɛ bhɛtɛ banɔ nɛ petee kibi.

Adzɛnuvɔɛ Tsitsi Nɛ Adzɛ Nyɛnya Teli

²¹ Gɛ Yesu eze ku opupu nɛ avɛ keni nɛ kapɛ bhla nɛ, banɔ gelee ba za ba kana yɛ atsya nɛ kɛvɔ nu tɔ.

²² Ɔkɛlɛ anɔgbla teli gɛ eedi oxogokɔ nɛa bha gɛ bee klu asɛ Yairusɛ, nɛ aba ɔkɛlɛ. Gɛ amɔ Yesu, ezhiadɔ nɛ yɛ otugba

²³ klɛ abhɛtɛ tɛbibisi edenɔ yɛ ɔkɔ asɛ, “Mɛeyi adzɛnuvɔɛ bhli nɛ eetsi. So ɛkɔwɔ kɛtɔkpu, bɔ trɔ ahwɛ nɛ yɛa bha tɛ alɔ tɛ aza nɛ ɛkpã.”

²⁴ So Yesu atɔ nɔ anyɛ nɛ avɛ. Banɔɛza nɛ zɛ tɔnɔ yɛ, klɛ ba kana yɛ atsya.

²⁵ Adzɛ teli tsyɛ aza ɔklɛ gɛ dzyosuyiyi bunya za yɛ shu agɔ lɔfɔntabha nyɔɔ.

²⁶ Atɛ mɔ butɔ nɛ bawani gelee ahwɛmɛ, klɛ yɛ ehoei petee ebeke, tsyɛ buzi ko ekee zi adɛa na akɔ yɛ.

²⁷ Gɛ enu Yesu kɛdɔ nɛ, yɛ tsyɛ aba klɛ ebeli yɛ kede nɛ kɛma nɛ shu klɛ akpɛ ɔhwɛ ehunɔ Yesu awi dzidze,

²⁸ alasɛ ayɛkɛ aŋa sɛ, “Onu gɛ ihunɔ yɛ awi nɛ ko bunya nɛ ba beke.”

²⁹ Ɔkɛlɛ nɛ ko dzyosuyiyi na dzrɔ klɛ eti nɛ yɛ ishu mɛ asɛ yɛ bunya nɛ beke.

³⁰ Yesu eti tsiɔ̃ sɛ kemi tieli ke koeyi nɛ yɛ mɛ. Etsyina klɛ ebisi akana sɛ, “Anee gɛ ehunɔ mɛ awi nɛ?”

³¹ Yɛ badɔkpasɛ nɛ be bui lɛ bunu etsre yɛ asɛ, “ɔmɔ kana gɛ banɔɛza nɛ ba kana wɔ atsya, flogo pɛ obisi sɛ ‘Anee yɛ ehunɔ mɛ?’ ”

³² Pɔ Yesu aza kɛlɛ kabha apɛɛ anɔ nɛ gɛ ehunɔ yɛ.

³³ Ɔkɛlɛ adzɛ nɛ gɛ enyi kɛdɔnɔ nɛ gɛ ba yɛa bha so nɛɛ, ekoeyi aba klɛ ebe zhiadɔ nɛ yɛ otugba, klɛ eshuku nɛ kifu, klɛ etsre yɛ kɛ gɛ ba nɛ yɛa bha.

³⁴ Yesu etsre yɛ asɛ, “Adzɛ wɔ tɛyɛyɛkɛŋa nɛ tɛ beke wɔ bunya. Gavɛ nɛ ishu yuyɔ mɛ tɛ ɔmɔ ɔhwɛ denɔ wɔ butɔ nɛ mɛ.”

³⁵ Kibe lɛlɛ nɛ gɛ Yesu aka za yɛa ɖɔɖuɖɔ nɛa bha nɛɛ, banɔ teli be de Yairusɛ gɛ enu anɔ nɛ gɛ edi oxogokɔvu nɛa bha nɛ bupa mɛ aba. Klɛ la ba ɖɔ asɛ, “Wɔ eyiadzɛnuvɔ nɛ etsi.” “Kidee butɔ ɔkɔ bɔɔ kpɛ Adɔkasɛ nɛ?”

³⁶ Yesu adɛ yɛkɛ banɔ nɛ kibui so, etsre Yairus asɛ, “Tosi kifu, yɛkɛ ɔŋa ko.”

³⁷ Adɛ kɔ anɔnyanɔ atɔnɔ yɛ ɔyɛkɔ dɛ Petro, Yakobo anɛ yɛadzya Yohanɛsɛ.

³⁸ Gɛ bede ku agɛ edi oxogokɔvu nɛa bha nɛ bupa nɛ mɛ, Yesu amɔ sɛ bugbudu gbudu anɛ iyuyo anɛ igugu kpɛkpɛ gɛganɛɛ za bupa nɛ mɛ.

³⁹ Etsoku atɔnɔ balɛ klɛ etsrea lɛ asɛ, “Kɛdee klɛ nu bugbudu gbudu nɛ igugu kpɛkpɛɛ nɛ? Anuvɔ nɛ edi tsi pɔ adɔ tra.”

⁴⁰ Pɔ ba mɔɛ yɛ. Gɛ akɛka balɛ petee ebu beke, agbanɔ anuvɔ nɛ yɛaka, yɛeni anɛ badɔkpasɛ nɛ gɛ baza plɛnɔ yɛ, klɛ betsoku ɔkɛlɛ gɛ anuvɔ nɛ eli.

⁴¹ Yesu anyɛna anuvɔ nɛ ɔhwɛ klɛ etsre yɛ asɛ, “Talita Koum!” (Kɛlɛesi enu asɛ, “Adzɛnuvɔɛ bhli, itsre wɔ sɛ, vu ɔlɔ!” Nɛ Hela bunuhu mɛ).

⁴² Ɔkɛlɛ nɛ ko adzɛnuvɔɛ nɛ evu alɔ klɛ aaga kana (agɔ lɔfɔntabha alɛ aza yɛ ahwɛ). Kibui nɛ kɛ bhɛtɛ balɛ kibi.

⁴³ Akpɛ ɔshã gɛganɛɛ sɛ batɛ kɔ anɔnyanɔ eti kibuinyɛbui nɛ kɛnɛ nɛ shu, klɛ etsre balɛ asɛ bakɔ yɛ kɛdɔ tili tɛ aŋa.