Marko 4 - ONUGBÙ NYƐNYÃ VUVƆ

Kɛkpalɛ Nɛ Adɔhwɛ Shu

¹ Yesu aza ba vɛ yɛ kɛdɔkɛkasɛ nɛa bha nɛ Galelia kɛvɔ nu tɔ. Banɔɛza nɛ gɛ za ɔkɛlɛ nɛ bekpe kudzɔ. Kɛkɔsɛ etsoku keniabha opupu nɛ mɛ, nɛ kibe lɛ gɛ banɔɛza na wɔ keni nɛ tɔ.

² Akasɛ banɔ nɛ kɛdɔ gelee ganɔ akpalɛ mɛ, klɛ nɛ yɛ kɛdɔ kɛkasɛ nɛ mɛ aɖɔ asɛ,

³ “Nɔ tatɔ mɔ! Ayadɛ teli avɛ kɛdɔ ɔhwɛ kɔ.

⁴ Gɛ ahwɛ kɛdɔ nɛɛ, eyi teli awɔlɛ adɔ kɛdzo nɛ mɛ, klɛ buzhuɔɛ ba tɔkɛ alɛ amunɔ.

⁵ Eteli adɔ aklagbua bha, gɛ tisi gelee dɛ za ɔklɛ. Eyi ne yi zia alasɛ tisi dɛ do nɛ ɔklɛ kɔ alɛ.

⁶ Pɔ gɛ buwui ba tã eyi nɛ aba tãyɛ̃, alasɛ igu nɛ dɛ vɛ tisi mɛ.

⁷ Abhlatɔ tsyɛ awɔlɛ adɔ ewi mɛ, klɛ ewi nɛ ebe she ada alɛ, so le di yu.

⁸ Pɔ tsyɛ eteli adɔ kesukpa dzyɔgo abha. Alɛ xũ nɛɛ ebe she, le yu gelee; laya nɛ tɛkpikpe afata, afɛtehlo ɔyɛkɔ vɛnɔ kɛfɔɛfɔ mɛ.”

⁹ Ɔkɛlɛ Yesu asɛ, “Anɔ nɛ gɛ butɔ lɛ yɛ pɛ ebe nu, tɛ enu.”

Kɛdɔnɔ Nɛ Gɛ Akpalɛ Nɛ Alɛ Kɔ

¹⁰ Gɛ Yesu tite agɔ, yɛ banɔkpɛkpɛ anɛ banɔ gɔgɔɛ nɛ be bisi yɛ ebui denɔ akpalɛ nɛ shu.

¹¹ Etsre alɛ asɛ, “Ebuikpukpu nɛ gɛ alɛ Kpaya bukusi nɛ mɛ, ba tɛ yɛkɔ akɔ wɔnɔ. Pɔ banɔ nɛ gɛ ba ma wɔnɔɛshi xũ nɛ kibuinyɛbui ga akpalɛ mɛ kɔ alɛ

¹² sɛ tɛ, “ ‘ba za mɔ pɔ batɛ ba mɔ klɛ mɛ, klɛ le be ze nu pɔ be ti be nu klɛesi, odinu sɛ bee be tsyina klɛ la ba yɛkɔ etsyea lɛ!’ ”

Yesu Ebu Adɔhwɛ Kɛkpalɛ Nɛesi

¹³ Klɛ Yesu ehunu etsre alɛ asɛ, “Nɔ di nu kɛkpalɛɛ nɛe si? Klɛ nɔ bɔ bhɛtɛ pɛ nɔ bo nu kɛkpalɛ tili kesi?

¹⁴ Ayadɛ nɛɛ, Kpayɛbui nɛa hwɛ.

¹⁵ Banɔ teli ba sɔnɔ eyi nɛ gɛ adɔ kɛdzyo nɛ mɛ, nɛ ɔklɛ gɛ ba hwɛ Kpaya bui. Balɛ gɛ benye nu kibui nɛ ko, Satana aba nyɛna kibui nɛ gɛ ba ɖa nɛ akpɛ ebu nɛ balɛ mɛ.

¹⁶ Babhlatɔ, gɛ dzi ansɛ eyi gɛ ba hwɛ atrɔ ɔklɛ gɛ aklagbu alɛ, be nu kibui, klɛ la gbla yɛkɛɛ lɛ nɛ same.

¹⁷ Pɔ gɛ igu dɛ za alɛ so la dɛ za nɛ ɛkpã dzidze. Kibe lɛ gɛ butɔ ɔdɔgɔsɛ tɛkpɛkpatɔnɔ ba nɛ kibui nɛ shu ko ba wɔlɛ kplitaa.

¹⁸ Kana ke babhlatɔ tsyɛ teli ba sɔnɔ eyi nɛ gɛ awɔlɛ ku ewi nɛ mɛ, be nu kibui;

¹⁹ pɔ kanɔa nɛ mɛ butɔ, ehoeyi anɔ wɛwɛɛ, nɛ kɛnɔmɛdɔ tɛpɛpɛ she da kibui nɛ balɛ mɛ, gɛ kɛ kɔ sɛ kibui nɛ dɛ yu.

²⁰ Ba ga sɔnɔ eyi nɛ gɛ adɔ kesukpa dzyɔgo nɛa bha, balɛ benu Kpayɛbui klɛ bayɛkɛ kɛlɛ klɛ kɛ yu gelee nɛ, afata, afɛtehlo, ɔyɛkɔ nanɔ kɛfɔɛfɔ nɛ balɛ mɛ ansɛ kana gɛ bahwɛ alɛ.”

Kanɛgbɛ Gɛ Etsri Osiabha

²¹ Yesu ebisi asɛ, “Be deke kanɛgbɛ ayɛkɔ akpɛ ketsukpuesi ɔdɔgɔ sɛ ba yɛkɔ akpɛ apa kesi dza? Anɛ yɛ osia bha ɔbɔ yɛkɔ ɔtrɔ?

²² Alasɛ kɛdɔ nyɛdɔ gɛ be kpu nɛɛ kɛ nu kɛdɔ gɛ le be bu eyinɔ, klɛ kɛkanyaka gɛ la ba da klɛ kɛdɔ nɛ kinu kɛdɔ gɛ la ba danɛ kɛdɔ nɛ klɛa bha lu ɔtɔ.

²³ Onu anɔ nɛ gɛ batɔ alɛ yɛ pɛ ebe nu tɛ enu.”

²⁴ Avɛ kɛlɛa bha sɛ, “Lu awɔ̃ nɛ kibui nɛ gɛ oonu nɛ mɔɔ mɔ.” “Kedzyidzyi nɔ gɛ kalɛ shui kɛxwɛ wɔ ɔwa nɛ, kalɛ la ba yɛ kɔ edzyidzyi akɔ wɔ nɔ, klɛ kɛ ba dɛa na.

²⁵ Aanɔ gɛ kɛdɔ lɛ yɛahwɛ ba ba kɔ yɛ kɛdɔ gelee, agɛ yɛahwɛ kɛma, kɛbhliyi nɔ nɛ gɛ kɛlɛ yɛahwɛ nɛ tsyɛ baa yɛkɛ kɛlɛ nɛ yɛahwɛ.”

Kɛkpalɛ Nɛ Kiyi Gɛ She Shu

²⁶ Aza ɖɔ asɛ, “Kana Kpaya bukusiɔŋakɔ nɛ odzi. Anyɛ teli ahwɛ eyi elu kesukpa.

²⁷ Elishi anɛ kemuze, adɔ tra o alɛ nɛ awɔ̃ o, kiyi nɛ kii yi klɛ kii she, pɔ etinyi kana gɛ kɛɛ bhɛtɛ pɛ kii she.

²⁸ Kesukpa nɛ kalɛ ishuahwɛ, ka kɔ sɛ kɛdɔ nɛ kiyu. Putɔnɔ eyuyu nɛ onugbu vuvɔ nɛ obo koeyi nɛ osi nɛ shu, ka kɛklɔ anɛ eyi nɛ gɛ akpasɛ lɛ mɛ nɛ ebe koeyi, flogo pɛ eyuyu nɛ ebe ti she nɛ eyi nɛ mɔɔmɔ.

²⁹ Kibee lɛ nɛ gɛ kɛdɔyi nɛ she pɛ kɛ kpã ko, ba yɛkɔ kɛpamɛ ko ba da kpa yɛ ayalɛ, alasɛ kɛlɛ kpa be na.”

Kɛkpalɛ Nɛ Ɔyurɔpɔɛeyi Shu

³⁰ Yesu ekee hunu asɛ, “Kɛdee lɔ ba ɖɔ sɛ kɛlɛ Kpayakusiɔŋakɔ nɛ odzi ansɛ, klɛ kɛkpalɛ ɖueɖu lɔ ba yɛkɔ shrɔ ɔkɛlɛ?

³¹ Kpayakusiɔŋakɔ nɛ odzi anasɛ ɔyurɔpɔɛeyi gɛ baa hwɛ nɛ kesukpa.

³² Flogo pɛ eeshe edzi osi nɛ ɛshɛgbla dɛ nɛ buka nɛ mɛ, gɛ buzhuɔɛ bu baa dɔ nɛ ɔlɛ mɛ.”

³³ Akpalɛa nɛ nɛdi Yesu ayɛkɔ akasɛ Kpaya kibui nɛ nɔ etsre banɔ, nɛ kana gɛ la ba na kibui nɛ kɛlɛe si nu.

³⁴ Yesu adɛ tsre yɛ banɔ nɛ kibuinyɛbui gɛ adɛ kpɛɛ lɛ kɛkpalɛ. Pɔ onu gɛ yɛ nɛ yɛ badɔkpasɛ nɛ tite bee li, adanɛ kibuinyɛbui mɛ petee akɔ balɛ.

Yesu Ayɔ Kɛlɛgɛganɛ Nu

³⁵ Kiwi lɛlɛ nɛ gɛ owulago nɛ ɔna, etsre yɛ badɔkpasɛ nɛ asɛ, “Nɔ kɔ lɔ tsɔkɛ vɛ ogbigbe bhla nɛa bha.”

³⁶ Gɛ ba shɛ̃ alɔ banɔɛza nɛ elu kide, ba gbanɔ yɛ ashɛ̃nɔ ansɛ gɛ aza opupu nɛ mɛ nɛ balɛ. Keniabha ipupu bhlatɔ tili tsyɛ za plɛnɔ yɛ.

³⁷ Keniabhalɛ gɛganɛɛ ba kpaa fu, gɛ kɛ kɔsɛ buni nɛ yalɛku opupu nɛ mɛ klɛ buni nɛɛ sɛsɛ vu balɛ.

³⁸ Kɛbee lɛ nɛ mɛ nɛ, Yesu ada vɛnɔ tra nɛ sumuia bha nɛ opupu nɛ kedeapɛ nɛ mɛ. Badɔkpasɛ na da nyɛmɛ yɛ klɛ bee tsre asɛ, “Adɔkasɛ, ɔdɛ yɛkɔ nɛ kɛlɛ mɛ onu gɛ keni nɛ kee vu lɔ nɛ dza?”

³⁹ Evua lɔ, akpɛ ozi nɛ kɛlɛɛ nia bha sɛ, “Kɔlenu! Dɔ sɛɛ̃!” Klɛ kɛlɛɛ nɛ yulɔ fu, klɛ ɔklɛ ɔdɔ sɛɛ̃.

⁴⁰ Etsre yɛ badɔkpasɛ nɛ asɛ, “Kidee so pɛ no si kifu kana? So tɛyɛyɛkɛŋa ka za wɔnɔ ahwɛ nɛ ɔtsɔ̃ nɛɛ dza?”

⁴¹ Kifu kua lɛ tsutsɔmɔ tsɔmɔ klɛ bee bisi aglɔ asɛ, “Anee di naa? Gɛ kɛlɛɛ nɛ bunigiglebe tsyɛ ta yɛa tɔ!”