Marko 3 - ONUGBÙ NYƐNYÃ VUVƆ

Anyɛ Ɔhwɛsisiku Bunya Tɛbibeke

¹ Nɛ kibe bhlatɔ mɛ Yesu aza ba vɛ oxogokɔvu nɛm, klɛ anyɛ teli nɛ ɔhwɛsisiku aza ɔklɛ.

² Banɔ teli nɛ ɔkɛlɛ naa pɛ sɛ tɛ be bu buzizi akɔ Yesu so, be vu awɔ̃hũ nɛ yɛ, sɛ tɛ ba mɔ sɛ nɛ, pɔ ebe beke anyɛ nɛ ɔhwɛsisiku bɔnya nɛ Kimuenewi nɛa bha.

³ Yesu etsre anyɛ ɔhwɛsisiku nɛ asɛ, “Lɔ kititi nɛ anɔnyanɔ amɛ.”

⁴ Ɔkɛlɛ Yesu ebisi balɛ asɛ, “Kiduwe gɛ lɛ ɔshã mɛ nɛ Kimuenewi nɛa bha: tɛ ɔbhɛtɛ kɛdzyɔgo pɛnɔɔ abhɛtɛ kizizi, tɛ belu ɛkpã pɛnɔɔ be yi anɔ?” Pɔ ba dɔ sɛɛ̃.

⁵ Yesu edi banɔ na kana nɛ obulo klɛ, same edi ku yɛ nɛ balɛ idzyim gɛganɛ nɛ shu, so etsre ɔhwɛsisiku anɔ nɛ asɛ, “Bu wɔ ɔhwɛ nɛ oyinɔ, ” Ebu ɔlɛ eyinɔ, klɛ yɛ ɔhwɛ nɛ lo tsodzi okoeyi ɔba.

⁶ Klɛ so, Farisianɛ ba shɛ avɛ ada bhɛtɛ terikpo nɛ Heroɖesɛanɛ akɔ Yesu tiyiyi.

Banɔɛza Batɔnɔ Yesu

⁷ Yesu anɛ yɛ badɔkpasɛ nɛ ba shɛ avɛ kɛvɔ nɛ shu, klɛ banɔɛza gbla lɔ de Galelia ba za yɛede.

⁸ Gɛ be nu yɛ ebui nɛ gɛ alɛ aabhɛtɛ nɛ, banɔ gelee balɔ ede Yuɖia, Yerusalɛm, Idumea, anɛ Yɔdan kibe, ɔyɛkɔ kana Tire anɛ Sidon kɛdɔ nɛ mɛ petee atɔnɔ yɛ aba.

⁹ Banɔɛza nɛ so, etsre yɛ badɔkpasɛ nɛ asɛ ba pɛ keniabha opupu bhli toli akɔ yɛ gɛ ebe ti tsoku ɔlɛ mɛ sɛ tɛ banɔ nɛ beti fuekumu yɛ.

¹⁰ Alasɛ eti beke banɔ gelee banya, klɛso bagɛ bakaa nya nee tieku otugba sɛ tɛ be hunɔ yɛ.

¹¹ Onu gɛ ɛfufɔɛkpã nɛ mɔ yɛ ko lɛ wɔlɛ dɔ nɛ yɛ otugba nɛ igugu kpɛkpɛ sɛ, “Wo nu Kpaya Yeyi.”

¹² Pɔ akpɛ ɔshã gɛganɛɛ akɔ ɛfufɔɛkpã nɛ asɛ lɛ tɛ ɖɔ anɔ nɛ di gɛ enu.

Yesu Banɔkpɛkpɛ Lɔfɔntɛabha Nɛ Tɛkukulu

¹³ Yesu avɛ butu tulia bha klɛ ede klu banɔ nɛ gɛ apɛɛ, klɛ la ba yɛ ɔbha.

¹⁴ Yesu ebu banɔ lɔfɔntɛabha, klɛ edzua lɛ kinyi asɛ Banɔkpɛkpɛ, sɛ tɛ ba za plɛnɔ yɛ tɛ aba kpaa lɛ tɛ bada ɖɔ Kpayɛbui

¹⁵ tɛ ba mɔ kabhaŋɛŋa akɔ ɛfufɔɛkpã tɛkɛkɛka.

¹⁶ Banɔ lɔfɔntɛabha nɛ gɛ ekulu nɛ naa: Simɔnɛ (gɛ akɔ kinyi asɛ Petro);

¹⁷ Yakobo Zebeɖi yɛeyi anɛ yɛadzya Yohanɛsɛ, (balɛ eklu asɛ Boanerges, gɛ kɛlɛ kesi enu asɛ Subhalɛlɛeyi);

¹⁸ Andrɛasɛ, Filipo, Batolomeo, Mateo, Tomasɛ, Yakobo Alfeusɛ yɛeyi, Tadeosɛ anɛ Simɔnɛ Zealɔtɛ ɔha mɛeyi, ɔha nɛ gɛ ɔɔwlɔãkɛ kɔ ishuahwɛ zɛza,

¹⁹ anɛ Yuɖas Iskarɔtɛ anɔ nɛ gɛ aba kpɛ yɛ ahwɛ.

Yesu Anɛ Ɛfufɔɛkpã Ekusi

²⁰ Yesu ezɛ de tsoku bupa tuli mɛ gɛ banɔɛza bebe fuekumu alɛ gɛ kɛkɔ sɛ Yesu anɛ yɛ badɔkpasɛ nɛ ba dɛ mɔ kidzo ada ŋa kɛdɔ tsyɛ.

²¹ Gɛ yɛletealɛ nɛ nu kana nɛɛ ba vɛ sɛ tɛ be de di yɛ ɔkɔ, alasɛ baa ɖɔ asɛ, “Ama mɔmɔ.”

²² Klɛ ɛshãdɔkasɛ nɛ gɛ be zhi de Yerusalɛm aba naa ɖɔ asɛ, “Bɛlzebul gɛ enu Ɛfufɔɛkpãekusi ɔlɛ otsri yɛa bha. Ganɔ ɛfufɔɛkpã ekusieyi nɛ kabha yɛ aakɛka ɛfufɔɛkpã.”

²³ Klɛ so Yesu eklu balɛ klɛ etsre alɛ nɛ akpalɛ mɛ asɛ, “Kɛlɛ Satana aba kɛka Satana?

²⁴ Onugɛ bukusi ɔzakɔ tuli ma kpɛ bupɛ tɔbha mɛ, bukusi ɔŋakɔ ɔlɛlɛ nɛ ɔtɛbɔ naa za.

²⁵ Onu gɛ bupa tuli bu pɔ nɛ aglɔ shu, bupa lɛlɛ nɛ tɛ ba naa za.

²⁶ Klɛ onu gɛ Satana alɔ kɛtiti nɛ yɛ nahwɛ shu pɛ apɔ, atɛ ba naa za, akasɛ asɛ yɛ kibeke na.

²⁷ Kɛgbɛagba, anɔnyanɔ atɛ ba na anɔ gɛganɛ bupa mɛ etsoku ede zru, gɛ odunu sɛ evu anɔ gɛganɛ nɛ anya elu. Klɛ ko aba naa zuru nɛ bupa nɛ mɛ.

²⁸ Kɛgbɛagba mɛ tsre nɔ, ebuizizi anɛ ebusobui nɛ petee gɛ banɔ abhɛtɛ nɛɛ ba ba yɛkɔ etsye alɛ.

²⁹ Pɔ aanɔ nɛ gɛ abhɛtɛ buzizi nɛ Ɔfufɔɛ Dzyɔgo nɛ shu nɛɛ ba tɛ ba yɛkɔ etsye yɛ, aŋa buzizi gɛ tɛ ba beke pɔ.”

³⁰ Yesu aɖɔ kibui nɛ, alasɛ baa ɖɔ asɛ “Ɔfufɔɛkpã ɔlɛ otsri yɛa bha.”

Yesu Yɛeni Anɛ Yɛadzyalɛ

³¹ Ɔkɛlɛ Yesu yɛeni anɛ yɛadzyalɛ nɛ be ku. Be li kititi nɛ ɔtɔɔ, klɛ ba kpɛ anɔ asɛ eklu yɛ akɔ balɛ.

³² Banɔɛza ba za kana yɛ atsya, klɛ be tsre yɛ asɛ, “Wɔeni anɛ wɔadzyalɛ be li ɔtɔ naa pɛɛ wɔ.”

³³ Yesu ebisi asɛ, “bane gɛ enu mɛeni anɛ mɛadzyalɛ?”

³⁴ Klɛ edi banɔ nɛ gɛ bedzi akana yɛ klɛ ehunu asɛ, “Meni nɛ madzyalɛ naa!

³⁵ Anɔnyanɔ gɛ aabhɛtɛ Kpaya tɛpɛpɛɛ nɛɛ yɛ enu mɛadzya anɛ mɛada anɛ meni.”