Marko 2 - ONUGBÙ NYƐNYÃ VUVƆ

Yesu Ebeke Anɔ Gɛ Awɔesukpa Bunya

¹ Ewui bhli telie de, gɛ Yesu eze be ku Kapenaumɛ, banɔ nɛ nu yɛ dɔ sɛ aba kepi.

² So, banɔ gelee be xogo nɛ yɛ ɔbha, ɔzakɔ ɔdɔ za, ɔyɛkɔ obo yinɔ kedunu nɛ ɔtɔ nɛ petee, klɛ aɖɔ Kpayabui nɛ etsre alɛ.

³ Banyɛ tɛalɛ̃ teli be tuku anyɛ gɛ awɔesukpa ebe lu kɔ yɛ.

⁴ Banɔ nɛ be kpe so ba dɛ na Yesu nanɔ, so be de wu buvu klɛ be de pu ovutɔ klɛ be zhinɔ anyɛnya anɛ oputso nɛ akpɛ Yesu abha.

⁵ Amɔ balɛ tɛyɛyɛkɛŋa, so aɖɔ etsre anyɛnya nɛ asɛ, “Meyi ba yɛkɔ wɔ buzizi nɛ etsye wɔ.”

⁶ Kibe lɛlɛ nɛ mɛ, ɛshãdɔkasɛ teli baza kesi nɛ ɔklɛ, ba zaa nyɔ kibui nɛ mɛ edi nɛ ɔhaglɔ asɛ,

⁷ “Kide so pɛ anyɛa nɛ aaɖɔ kaɖɔa nɛɛ di? Aaɖɔ ebusobui! Anee gɛ aba na buzizi ayɛkɔ etsye, gɛ odu nu sɛ Kpaya?”

⁸ Yesu eti tsiɔ̃ nɛ yɛ ɔfufɔɛ mɛ asɛ kana banɔ nɛ baa ɖɔ nɛ balɛ idzyi mɛ, klɛ etsre alɛ asɛ, “Kide so pɛ no di ebuia nɛ ana?

⁹ Kiɖue gɛ lɛ bɔbɔɛbɔɛ dɛ sɛ, tɛ be tsre anɔ gɛ awɔesukpa nɛ asɛ, ‘Ba yɛkɔ wɔ ebuizizi nɛ etsye wɔ,’ anɛ, ‘Lɔ, yɛkɔ wɔ oputso tɛ ɔga?’

¹⁰ Pɔ kɛ lɛ sɛ tɛ no ti sɛ Anɔdzyrame yɛ Eyi nɛɛ kabhaŋɛŋa kalɛ yɛ ahwɛ nɛ kesukpa nɛa bha sɛ tɛ ayɛkɔ buzizi etsye.” Aɖɔ etsre anɔ nɛ gɛ awɔesukpa nɛ asɛ,

¹¹ “Itsre wɔ, vu ɔlɔ, yɛkɔ wɔ oputso tɛ ɔvɛ bupa mɛ.”

¹² Evu alɔ, ayɛkɔ yɛ oputso klɛ aga ekoeyi ashɛ nɛ banɔ petee amɛ. Yesu bui nɛ gɛ abhɛtɛ nɛ yinɔ anɔnyanɔ klɛ banɔnyanɔ nɛ ɔkɛlɛ ba kpɛ Kpaya nɛa bha. Klɛ baa ɖɔ asɛ, “Bu ka mɔ kibui nɛ di dí!”

Yesu Eklu Lewi

¹³ Yesu aza ba vɛ kɛvɔ nɛ tɔ. Banɔ gelee aza ba ebe xogo nɛ yɛ ɔbha, klɛ akpa balɛ kɛdɔ kasɛ.

¹⁴ Gɛ aga afla, amɔ Alfeusɛ yɛeyi Lewi gɛ ezhidzi adɔdzyɔ kɛkpako nɛ shu. Yesu etsre yɛ asɛ, “Za mɛe de,” klɛ Lewi alɔ tɔnɔ yɛ.

¹⁵ Nɛ Lewi bupa nɛ mɛ, Yesu aaŋa owulagoe dɔ, badɔdzyɔ gelee anɛ “bezizi ” ba zaa ŋaɛ dɔ nɛ yɛ anɛ yɛ badɔkpasɛ, alasɛ banɔ gelee ba za yɛe de.

¹⁶ Gɛ ɛshãdɔkasɛ nɛ gɛ be nu Farisianɛ na mɔ Yesu gɛ aaŋa kɛdɔ nɛ badɔdzyɔ anɛ “banɔzizi ” nɛɛ, be bisi yɛ badɔkpasɛ nɛ asɛ, “Kidee so pɛɛ aŋaɛ dɔ nɛ badɔdzyɔ anɛ ‘banɔzizi’?”

¹⁷ Gɛ Yesu enu balɛ ebui nɛ gɛ bee bisi, ebu etsre alɛ asɛ, “Bagɛ ba taa nya na ma kɔ awani, banyɛnya balɛ alɛ kɔ awani. Bagɛ ba bhɛtɛ buzizi nɛ so pɛ ɛba, ganɛ bagɛ bana.”

Be Bisi Yesu Ebui Denɔ Onugbunyɛnya Shu

¹⁸ Yohanɛsɛ badɔkpasɛ anɛ Farisianɛ naa nya onugbu. Banɔ teli ba ba ebe bisi Yesu asɛ, “Kɛde so pɛɛ Yohanɛsɛ badɔkpasɛ anɛ Farisianɛ badɔkpasɛ nɛ baa nya onugbu pɛɛ wayɛalɛ xũ na taa nya?”

¹⁹ Yesu ebui lɛ nu asɛ, “Kɛlɛ adzɛenyine yɛ befu aba za nya onugbu nɛ kibe lɛ gɛ adzɛnyine nɛ alɛ balɛ ɔbha? Kɛ tɛ baa za kɛlɛ mɛ kɔa lɛ ana, nɛ kibe lɛ gɛ adzɛenyine nɛ alɛ balɛ ɔbha.

²⁰ Pɔ kibe tili ba ba gɛ la ba gbanɔ adzɛnyine nɛ ashɛ̃nɔ nɛ balɛ ɔbha klɛ flogo pɛɛ onugbu nyɛnya ɔbɔ za.

²¹ “Anɔnyanɔ atɛ yɛkɔ kɛpɔtɛvuvɔ akamɛ atsa nɛ kɛkuku. Onu gɛ abhɛtɛ ana, kɛpɔtɛvuvɔ nɛ ba nunɔ kɛkuku klɛ kɛba tsyuɛ̃ dɛa na.

²² Klɛ anɔnyanɔ atɛ yɛkɔ buluvuvɔ abalɛ akpɛ kepulikuku mɛ. Onu gɛ abhɛtɛ ana kepulikuku nɛ ka ba yɛɛ, klɛ bulu anɛ kepuli nɛ petee be zi. Buluvuvɔ nɛɛ kepuli vuvɔ mɛ bu ba za.”

Apalete Kɔ Kimuenewi

²³ Nɛ kimuenewi tilia bha, Yesu aafla nɛ nikpe buya tuli mɛ klɛ yɛ badɔkpasɛ nɛ be dzyini nikpe nɛ buya nɛ mɛ.

²⁴ Farisianɛ ne tsre Yesu asɛ, “Di, kidee ɔshã dɛda ebui wɔ badɔkpasɛ nɛ baa bhɛtɛ ana nɛ kimuenewi nɛa bha?”

²⁵ Yesu ebui lɛ nu asɛ, “Nɔ kɔ kla onu di kɛgɛ Daviti abhɛtɛ nɛ kibe lɛ gɛ baza pɛɛ bubhɛ buu yi yɛ nɛ yeshopoa lɛ?

²⁶ Nɛ Abiata kpayaɔzakɔanɔ gbla nɛ kibe, Daviti etsoku Kpayavu nɛ mɛ ada tã gbɛgbɛvu gɛ be tsyina ahwɛ nɛ lɛ shu, gɛ kpayaɔzakɔanɔ nɛ ko ɔshã kɔɛ dzo sɛ ba tã. Klɛ akɔ yɛeshopoa lɛ nɛ tsyɛ teli la tã.”

²⁷ Ɔkɛlɛ Yesu etsre alɛ asɛ, “Kimuenewi anɔ ba bhɛtɛ lɛ akɔ, ganɛ anɔ ba bhɛtɛ akɔ Kimuenewi.

²⁸ So nɛɛ, Anɔdzyrame yɛ Eyi nɛ enu Apalete kɔ Kimuenewi nɛ kruatsyɛ.”