Marko 16 - ONUGBÙ NYƐNYÃ VUVƆ

Yesu Tɛlulɔ Denɔ Bekpum

¹ Gɛ Kimuenewi nɛ ba fla, Maria Magdaline anɛ Maria Yakobo yɛeni, anɛ Salomɛ bede dzi bawa huhuhu sɛ tɛ ba yɛkɔ ada sra Yesu ishu.

² Kɛvulɔ nɛ pinii, nɛ ɔgɔnɛ nɛ kiwi tutɔpu nɛa bha, nɛ kiwiyɛyɛ nɛe de ko, batɔnɔɛ dzo aavɛ odzre nɔ bha,

³ klɛ bee bisi ɔhaglɔ asɛ, “Anee gɛ ebe glebe kɛklãgbu nɛ atsɛ nɛ odzre nɛa bha?”

⁴ Pɔ gɛ be vu awɔ̃hũ, ba mɔ sɛ kɛklãgbu, nɛ gɛ tri, be ti glebe lɛ ashɛ̃nɔ.

⁵ Gɛ be tsoku odzre nɛ mɛ, bamɔ anyɛnuvɔɛ gɛ akpasɛ kɛdɔ fufu mɛ pɛ ezhidzi odzre nɛ kɛŋamɛa pɛ, klɛ kɛ wa kɛxwɛ nɛ balɛa bha.

⁶ Anyɛnuvɔɛ nɛ asɛ, “Nɔ tɛ ganɛ awɔ̃,” “Nɔɔ pɛɛ Yesu Nazarɛtɛ eyi, gɛ ba kplasɔ. Atɛ lɔ ekoeyi! Ava ma ɔkɛ̃. No di ɔkɛlɛ gɛ be lu yɛ.

⁷ Pɔ nɔ vɛ, no tsre yɛ badɔkpasɛ anɛ Petro sɛ, ‘Eti putɔ kɔnɔ avɛ Galelia. Ɔkɛlɛ nɔ bɔ mɔ yɛ, ansɛ gɛ etsre nɔ.’ ”

⁸ Ganɔ tɛshushuku mɛ anɛ awɔ̃nyunyɔ mɛ, badzɛ nɛ koeyi klɛ be si ashɛ̃ nɛ odzre nɛ shu. Ba dɛ ɖɔ kibuinyɛbui etsre anɔnyanɔ, alasɛ kifu kua lɛ.

⁹ Gɛ Yesu alɔ kɛvulɔ nɛ pinii nɛ ɔgɔnɛ nɛ kiwi tutɔpu nɛa bha, eputɔ awɛ̃ nɛ Maria Magdaline amɛ, agɛ yɛ mɛ akɛka ɛfufɔɛkpã tigene nɛ ebu.

¹⁰ Adzɛ na shɛ avɛ ede tsre banɔ petee gɛ baza aplɛnɔ yɛ, pɛ be tsishu pɛ be bi iyuyo.

¹¹ Kibelɛ gɛ be nu sɛ Yesu alɛ nɛ ɛkpã, klɛ yɛ atɛ mɔ yɛ, ba dɛ yɛkɛ kɛlɛa bha ŋa.

¹² Kɛlɛede mɛ Yesu aba wɛ̃ nɛ tɛzɛza bhlatɔ mɛ kɔ balɛ tɛa bha nɛ kibe lɛ nɛ mɛ gɛ ba ga afla nɛ ɔma nɛm.

¹³ Banɔa nɛ tsodzi avɛ klɛ la da ɖɔɛ lɛ etsre bagɔgɔɛ; pɔ balɛ tsyɛ adɛ yɛkɛ balɛa bha ŋa.

¹⁴ Kɛlɛede mɛ Yesu aba wɛ̃ nɛ Kɛfɔntoli nɛ amɛ gɛ baa ŋɛ dɔ; Yesu etsrenɔalɛ nɛ balɛ mayɛkɛ mayɛkɛŋa nɛ shu nɛ balɛ tɛmadɛmɛ gɛganɛ sɛ tɛ ba yɛkɛ baga tɛ mɔ yɛ nɛ tsyɛa bha ŋa sɛ atɛ lɔ.

¹⁵ Yesu etsre yɛ badɔkpasɛ nɛ asɛ, “No tsoku kanɔ nɛm petee tɛ nɔ ɖɔ kibui dzyɔgo nɛ otsre kanɔ nɛ petee.

¹⁶ Anɔnyanɔ gɛ ayɛkɛ aŋa pɛ nɔɔ kpɛ buni ɔkɔ yɛ nɛ ebe dzi anɔ gɛ be bu, pɔ anɔnyanɔ gɛ adɛ yɛkɛ aŋa be be bu yɛ butsipɔ.

¹⁷ Klɛ ebuimumɔa nɛ aba ga plɛnɔ bagɛ ba yɛkɛ aŋa: Nɛ mɛ nyi mɛ ba ba kɛka ɛfufɔɛkpã ebu; baba ɖɔa ɖɔ nɛ anɛkɛ vuvɔm;

¹⁸ bee vu beblidzya nɛ ahwɛ; klɛ onu gɛ ba wɛ̃ aɖii tsyɛ etibe bhuia lɛ, baa trɔ ahwɛ nɛ banyɛnya bha, klɛ balɛ banya nɛ be beke.”

¹⁹ Gɛ Apalete Yesu aɖɔ ebuia nɛ etsrea lɛ beke nɛɛ, baa yɛkɔ yɛ avɛnɔ owũsise klɛ ede zhiaza Kpaya kɛŋam,

²⁰ Ɔklɛ badɔkpasɛ nɛ koeyi ashɛ̃, klɛ la da ɖɔ Kpayɛbui nɛ ɔkɔnyɔkɔ, klɛ Apalete nɛ awa kɛxwɛ nɛ balɛ klɛ trɔ kɛklãgbu nɛ yɛ kibui nɛa bha ganɔ kɛdɔmumɔ nɛ gɛ za kɛlɛe de.