Marko 15 - ONUGBÙ NYƐNYÃ VUVƆ

Yesu Aba Wɛ̃ Nɛ Pilato Amɛ

¹ Nɛ kɛvlɔ nɛ pinii, kpayaɔzakɔanɔ, anɛ ɛshãdɔkasɛ anɛ ɔhamɛ bebhuiklu afɛtegene nɛ petee na ba dɛmɛ atrɔ kibui tirikpoa bha. Banya Yesu, klɛ ba gbanɛ yɛ ada kpɛ ahwɛ akɔ Pilato.

² Pilato ebisi Yesu asɛ, “Wɔ nu Yuɖanɛ ekusi dza?” Yesu asɛ, “Ee, kɛlɛ ansɛ gɛ ɔɖɔ.”

³ Kpayaɔzakɔanɔ nɛ ayɛkɔ ebui kpi nɛ yɛ shu.

⁴ So Pilato eze bisi yɛa sɛ, “Ɔtɛ bɔ bu kibui nɛ nu? Di ebuia nɛ nyɔɔ gɛ ba yɛkɔ nɛ wɔ shu.”

⁵ Pɔ tsyɛ Yesu eze di bu kibuinyɛbui nu, klɛ kɛ bhɛtɛ Pilatio bi.

⁶ Ɔtsɔ̃ nɛ kinu bugu sɛ tɛ ba shɛ̃nahwɛ evuza terikpo gɛ banɔ nɛ ba pɛɛ nɛ shu nɛ Tɛfɛflãwi ŋɛŋa nɛa bha.

⁷ Anyɛ teli gɛ bee kulu asɛ Barabasɛ nɛ aza vu plɛnɔ anɔ dzyidzyeaga teli gɛ eyi anɔ nɛ kititilulɔɛ be tilim.

⁸ Banɔɛza na ba tɔnɔ Pilato sɛ abhɛtɛ kɛgɛ aabhɛtɛ tsã nɛ akɔ balɛ.

⁹ Pilato ebisi alɛ asɛ, “Nɔ pɛɛ sɛ ɛshɛnahwɛ Yuɖanɛ ekusi nɛ shu kɔnɔ?”

¹⁰ Enyi asɛ ganɔ kawɔ̃kpɛ mɛ kpayaɛzakɔanɔ nɛ ba yɛkɔ Yesu akpɛ yɛ ahwɛ.

¹¹ Pɔ kpayaɛzakɔanɔ nɛ ba kpɛahwanɔ banɔɛza nɛ asɛ tɛ be tui lɛ akpɛ tɛ Pilato ashɛ̃nahwɛ Barabasɛ shu.

¹² Pilato ebisi banɔ nɛ asɛ, “Kidee mɛ ba bhɛtɛ ɔtsɔ̃, nɛ agɛ noo kulu sɛ Yuɖanɛ ekusi?”

¹³ Ba kpɛ igugu asɛ, “Kplayɛɔsɔ!”

¹⁴ Pilato ebisi asɛ, “Kidee so? Buzizi ɖuweɖu abhɛtɛ?” Pɔ ba za kpɛ igugu nɛ gɛganɛɛ adɛa na sɛ, “Kplãyɛɔsɔ!”

¹⁵ Sɛ tɛ Pilato eku banɔ nɛ awɔ̃ so nɛ, ashɛ̃nahwɛ Barabasɛ shu akɔa lɛ. Akɔ ba mɛna Yesu kɛtamu, klɛ ayɛkɔ yɛ akpɛahwɛ kɔa lɛ sɛ ba da kplasɔ.

Keyutugbani Na Kpɛ Yesu Butsɔ

¹⁶ Keyutugbani na gbanɔ Yesu ebu eyinɔ avɛnɔ ada kpɛ bukusi bupagbla nɛm (gɛ nu Praɛtorium keyutugbani ivulo nɛ oxogokɔ) klɛ be kulu ivulo nɛ petee ebe xogo.

¹⁷ Ba kpɛ awi dzɛdzã akɔ yɛ, klɛ be tro bɔkpɔewi abhɛtɛ kikutu pɛ ba yɛkɔ ekumu akɔ yɛ.

¹⁸ Klɛ la kpa yɛ dzɔ sɛ, “Hee, Yuɖanɛ ekusi nɛ naa!”

¹⁹ Be hu yɛ kesukpogunu nɛ kɛtɔkpu nɛ etsodzini ehu klɛ be bu bututu ata yɛ. Be dzu ekuisiesi akɔ yɛ, sɛ tɛ ba yɛkɔ akpɛ yɛ butsɔ nɔ.

²⁰ Klɛ gɛ ba kpɛ yɛ butsɔ nɛ beke, be bu awi dzɛdzã nɛ yɛ shu, klɛ ba yɛkɔ yɛnahwɛ bawi nɛ akpɛ kɔ yɛ. Ɔkɛlɛ ba gbanɔ yɛ ebueyinɔ sɛ tɛ ba da kplasɔ.

Yesu Tɛkpɛkplasɔ

²¹ Anyɛ teli gɛ ede Sirene, Simɔnɛ, gɛ enu Alɛksanda anɛ Rufusɛ alɛ aka, abaa fla denɔ yɛ dzogɛga bha ebe tsoku ɔma nɛ mɛ, klɛ banɔ nɛ ba trɔ yɛa bha sɛ ayɛkɛ butsiosi nɛ etuku.

²² Ba gbanɔ Yesu ede kunɔ ɔklɛ gɛ be kulu asɛ Golgata (atɔkpuxwa ɔzakɔ).

²³ Nɛ ɔklɛ nɛ ba hɔ aɖuɖo akpɛ bulu mɛ akɔ Yesu sɛ awɛ̃, pɔ adɛ wɛ̃.

²⁴ Klɛ ba kplayɛasɔ. Be dzyidzyidɔ nɛ yɛ bawi nɛ tɔkpu tɛ bamɔ kapɛ nɔɔ nɛ gɛ anɔnyanɔ aba yɛkɛ.

²⁵ Ɔɖa ɔtramɛ nɛ mɛ la kplayɛasɔ.

²⁶ Ebui nɛ gɛ ba yɛkɔ nɛ yɛ shu, ba ŋlɔmɛ alɛ ata yɛ asɛ, Yuɖanɛ ekusi.

²⁷ Ba kpla bezi tɛabha teli tsyɛ asɔ aplɛnɔ yɛ, terikpo nɛ yɛ kɛŋa nɛm, teli tsyɛ nɛ yɛ kɛbɛtɛkpɛm.

²⁸ [Klɛ kibui ŋuŋlɔmɛ nɛ ba klɛ mɛ sɛ, “Kplayɛasɔ akpɛ banɔ nɛ gɛ ata bhɛtɛ ɔshã bha nɛ shi.”]

²⁹ Banɔ nɛ gɛ aba fla nɛ balɛ akulatu nɛ yɛa bha, ba hwanɔ atɔkpu atrɔ pɛ ba ɖɔ sɛ, “Klɛ so! Wɔ nɛ gɛ ɔsɛ ɔbɔ yɛ busɔlɛvu pɛ obo tsodzini ɔbhɔ nɛ ewi tata mɛ,

³⁰ zhiɔba nɛ butsiosi nɛ shu tɛ obu ishue!”

³¹ Kana ke kpayaɛzakɔanɔ anɛ ɛshãdɔkasɛ petee baa kpɛ Yesu butsɔ nɛ aglɔmɛ. Klɛ baa ɖɔ asɛ, “Ebu banɔ,” “pɔ ataa na shu bu!

³² Nɔ kɔ Kristoanɛ, Izraɛlanɛ Ekusia nɛ, ezhi ɔtsɔtsiɔ̃ aba nɛ butsiosi nɛ shu, tɛ bu mɔ tɛ bu yɛkɛ yɛabha ŋae.” Bagɛ yɛnalɛ ba kplasɔ nɛ tsyɛ ba yalɛ akulatu abalɛ akpɛ yɛa bha.

Yesu Tɛtsitsi

³³ Nɛ kemuze ɛɖa lɔfɔntɛbha mɛ otumu ɔdɔ nɛ kesukpa nɛa bha ɔdɔ nanɔ owulago ɛɖa tɛta mɛ.

³⁴ Nɛ ɛɖa tɛta nɛ mɛ, Yesu akpɛ ogugu gɛganɛɛ asɛ, “Eloi, Eloi, Lama Sabaktani?” Gɛ klɛ kesi enu asɛ, “Mɛ Kpaya, Mɛ Kpaya, kidee so pɛ ɔshɛnahwɛ mɛshu ana?”

³⁵ Gɛ banɔ nɛ gɛ be li ɔklɛ nɛ be nu kaɖɔ nɛ gɛ Yesu aɖɔ nɛ butsiosi nɛ shu, klɛ baa ɖɔ asɛ, “Nonu mɔ, eklu Eliya.”

³⁶ Anyɛ teli akpɛsi, ada yɛkɔ ɔkɔɛsa akpɛ bulu gɛganɛ mɛ, klɛ ayɛkɔ asɔ osi shu, klɛ ayɛkɔ akɔ Yesu sɛ tɛ awɛ̃. “Ɔtsɔ̃ nɛ nɔ shɛnahwɛ yɛ shu. Kɔlɔ di sɛ Eliya aba ba ebe zhinɔ yɛ edzu dza.”

³⁷ Nɛ ogugu gɛganɛɛ, Yesu afɔɛ yɛ ɔfufɔɛ gɔgɔɛ.

³⁸ Busɔlɛvu mɛ kɛpɔtɛ nɛ tswɛ denɔ kabha ɔbɔ nanɔ kesi nɛ wa.

³⁹ Klɛ gɛ keyutugbani Ovuloaka, gɛ aza kititi nɛ Yesu otugba, nɛ enu yɛ ogugu klɛ amɔ kana gɛ etsi nɛɛ, aɖɔ asɛ, “Kɛlɛlɛm sɛ anyɛa nɛɛ enu Kpaya yɛ Eyi!”

⁴⁰ Badzɛ teli aza odzidzekɔ pɛ bee di ɔklɛ asɛsɛ. Balɛ mɛ banɔ balɛ enu Maria Magdaline, Maria Yakobo yɛeni gɛ enu anuvɔ kɔ Yosesɛ, anɛ Salomɛ.

⁴¹ Nɛ Galelia, badzɛa nɛ balɛ aza Yesue de kɔ kɛdɔnɔ nɛ gɛ ba zhã kɔ yɛ. Badzɛ gelee bhlatɔ gɛ ba za yɛe de aba Yerusalɛm nɛ tsyɛ ba za ɔklɛ.

Yesu Tɛvuvubɔ

⁴² Kiwi lɛlɛ nɛ dzi Tɛbɛbala Kiwi (gɛ putɔkɔ Kimuenewi nɛ gɛ nu Sabatɛ). So gɛ owulago nɛ ɔɔna nɛɛ,

⁴³ Yosɛfu Arimatiaeyi, anɔgbla nɛ Beshisheha nɛ shi, gɛ yɛ nahwɛ nɛ eedi kidzoe nu kɔ Kpaya bukusiɔŋakɔ, atɔnɔ Pilato avɛ nɛ awɔ̃dzudzum klɛ ede bisi asɛ ayɛkɔ Yesu ishuidzya tsitsi nɛ akɔ yɛ.

⁴⁴ Kiyinɔ Pilato sɛ Yesu etigble tsi. Eklu Ovuloaka nɛ ebisi asɛ Yesu nɛ eti tsi dza.

⁴⁵ Gɛ Pilato enu denɔ Ovuloaka nɛ ɔkɔ sɛ Yesu etsi kɛgba, ashɛ̃nahwɛ yɛ shu akɔ Yosɛfu.

⁴⁶ Klɛ Yosɛfu ede bhui kɛpɔtɛ fufu, klɛ ede zhinɔ Yesu tsitsi klɛ ayɛkɔ yɛ anya kpɛ kɛlɛ mɛ, klɛ ayɛkɔ yɛ ada vubɔ nɛ kɛklãgbu odzrem. Klɛ ayɛkɔ kɛklãgbugbla bhlatɔ ada ɔlɛ nu.

⁴⁷ Maria Magdaline nɛ Maria Yoses yeni nɛ ba mɔ ɔklɛ gɛ ba vubɔ Yesu.