Marko 14 - ONUGBÙ NYƐNYÃ VUVƆ

Ba Sra Bubɔ Kɔ Yesu Nɛ Betani

¹ Gɛ agɔ ansɛ ewi tabha ko tɛ Yuɖanɛ ba ŋa balɛ Ɔmɛwi gɛ nu Tɛfɛflãwi nɛ Gbɛgbɛvu gɛ ba dɛ kpɛ lɛ bunɛyekedɔ kiwi nɛ, ɛshãdɔkasɛ anɛ kpayaɔzakɔanɔ nɛ baa pɛ bushɛdzo nɔɔ nɛa bha gɛ la ba ga pɛ ba ebe vu Yesu pɛ le be yi yɛ.

² “Pɔ basɛ ganɛ kiwi ŋɛŋa nɛ mɛ,” “odibhi banɔ na ba kpɛ ebla.”

³ Kibee lɛ nɛ gɛ aza Betani nɛ, aza ŋa kɛdɔ nɛ anyɛ teli gɛ bee klu asɛ Simɔnɛ gɛ enu bunya dzɛdzãelete nɛ bupa mɛ nɛ, adzɛ teli aba ɔklɛ nɛ bubɔ huhuhu ŋɛŋa kedzi tuli gɛ kpasɛ aklãgbu kɛbɔplui mɛ. Adzɛ nɛ adanɛ bubɔ klɛ ayɛkɔ abalɛ akpɛ Yesu ada nɛ mɛ petee.

⁴ Banɔ teli gɛ baza ɔklɛ nɛ, kibui nɛ dɛ za balɛ buli so nɛ, baa ɖɔ nɛ aglɔ mɛ asɛ, “Kide bubɔ zizi ebui naa?

⁵ Ba taa dɛ bubɔ nɛ kedziŋɛŋa, gɛ aba fla kɛgɔ zɛzɛ bhɛ pɛ la ba yɛkɔ edi bee tsyuitsyuini nɛa bha nɔ.” So nɛ, ba kpa adzɛ nɛ tsutsɔmɔɔ tsɔmɔ.

⁶ Yesu asɛ, “nɔ shɛnahwɛ yɛ shu mɔ.” “Kidee pɛ nɔɔ kpɛ yɛ bunuhu? Abhɛtɛ kibui pupudi amɛna mɛ ɔkɔe.

⁷ Betsyutsyuini nɛ xũ nɛ balɛ wɔnɔ ɔbha kibenyɛbe, gɛ nɔ bɔ plɛnɔa lɛ onu gɛ nɔɔ pɛɛ. Pɔ mɛ ɛtɛ ba za wɔnɔ bha kibenyɛbe.

⁸ Adzɛ nɛ abhɛtɛ kɛgɛ aba naa bhɛtɛ. Edzuawɔ̃ asra bubɔ kɔ mɛ tɛvuvubɔ.

⁹ Itsre nɔ kɛgba sɛ, ɔkɔnyɔkɔ gɛ ba ɖɔ Kpayɛbui nɛ kanɔ nɛ mɛ petee, kɛgɛ adzɛ nɛ abhɛtɛ ba ba ɖɔɛ lɛ tsyɛ, ayɛkɔ abaka yɛbui nɔ.”

¹⁰ Ɔklɛ Yuɖas Iskarɔtɛ, gɛ enu Yesu Kɛfɔntɛabha nɛ teli nɛ ashɛ̃ atɔnɔ kpayaɔzakɔanɔ nɛ asɛ tɛ ada kpɛ Yesu ahwɛ.

¹¹ Same ku kpayaɔzakɔanɔ gɛ be nu ana, klɛ batrɔ sɛ tɛ ba kɔ yɛ ehoeyi. So, abaa pɛɛ kidzo nɔɔ nɛa bha gɛ aba ga pɛ aba yɛkɔɛ akpɛahwɛ kɔa lɛ.

Apalete Nɛ Owulago Kɛdɔŋɛŋa

¹² Nɛ Gbɛgbɛvu manyɛnya-manyɛnyawi nɛ kiwi tutɔpu nɛa bha nɛ, gɛ ki nu bugu sɛ tɛ bebhui Tɛfɛflãwi obhoshieyi, Yesu badɔkpasɛ nɛ bisi yɛ asɛ, “Fakɔ ɔpɛɛ sɛ tɛ bu vɛ da bala kɔ wɔ kɔ Tɛfɛflãwi nɛ tɛ ŋɛŋa?”

¹³ Klɛso nɛɛ akpɛ yɛ badɔkpasɛ tɛabha, etsre alɛ asɛ, “No tsoku ɔmagbla nɛm, klɛ anyɛ teli gɛ etuku bunie tsukpu aba tsyanɛ wɔnɔ. Nɔ za yɛe de.

¹⁴ Nɔ ɖɔ tsre apalete nɛ bupa nɛ mɛ gɛ anyɛ nɛ ebe tsoku nɔ sɛ, ‘Adɔkasɛ nɛ yɛ ebisi asɛ: Mɛ ɔyakɔ vu nɛ xɔ̃, ɔkɛlɛ gɛ ɛba ŋa Tɛfɛflãwi nɛ mɛ badɔkpasɛ?’

¹⁵ Aba kasɛ wɔnɔ kabha buvugbla tuli, gɛ batɛ bala elu. Bhɛtɛ tɛbɛbala kɔɔ lɔ nɛ ɔklɛ.”

¹⁶ Badɔkpasɛ nɛ ashɛ̃, ede tsoku ɔmagbla nɛm klɛ ba da mɔ ebui nɛ ansɛ gɛ Yesu eti tsrea lɛ. So ba bala Tɛfɛflãwi nɛ dɔ ŋɛŋa.

¹⁷ Gɛ owulago nɛ ɔna, Yesu ebe ku nɛ yɛ Kɛfɔntɛabha.

¹⁸ Kibee lɛ gɛ bedzi pɛ baa ŋa kɛdɔ nɛɛ, Yesu asɛ, “Itsre wɔnɔ kɛgba, wɔnɔ mɛayɛ teli aba yɛkɔ mɛ akpɛ ahwɛ edzi aŋa kɛdɔ nɛ mɛ.”

¹⁹ Badɔkpasɛ nɛ shuku, klɛ terikpo terikpo ba ɖɔ tsre yɛ asɛ, “Ɛdɛ yɛkɛ ŋa sɛ mɛ.”

²⁰ Ebui lɛ nu asɛ, “Kɛfɔntɛabha nɛ ɔmɛayɛ teli,” “agɛ yɛa kpɛahwɛ kesugba tierikpo mɛ nɛ mɛ.

²¹ Anɔdzyrame yɛ Eyi nɛ aba shɛ ansɛ gɛ ba ŋlɔmɛ elu nɛ yɛ shu. Pɔ butɔ kɔ aanɔ nɛ gɛ yɛ aba kpɛ Anɔdzyrame yɛ Eyi nɛ ahwɛ! Aba pɛ̃ kɔ anɔa lɛlɛ nɛ adɛ onu gɛ ba dɛ mɔɛ.”

²² Kibe lɛ gɛ be dzia ŋa kɛdɔ nɛɛ, Yesu ayɛkɔ gbɛgbɛvu, ehu ahwɛ klɛ aya lɛ, klɛ ayɛkɔ akɔ yɛ badɔkpasɛ, aɖɔ asɛ, “Nɔ tã yɛ; mɛ ishuidzya nɛ lɛ.”

²³ Ɔkɛlɛ ayɛkɔ kantse, ehu ahwɛ, klɛ ayɛkɔ akɔa lɛ, klɛ balɛ petee awɛ̃.

²⁴ Etsre alɛ asɛ, “Mɛ onugbu nyɛnya dzyosu nɛ naa, gɛ be bu abalɛ lu kɔ banɔ gelee.”

²⁵ “Itsre nɔ kɛgba, ɛtia fla wɛ̃ vãyɛ̃ eyuyu mɛ ni ɔdɔ na nɔ kibe lɛ gɛ ɛba tɛ wɛ̃ yɛ avuvɔ nɛ Kpaya bukusiɔŋakɔ nɛm.”

²⁶ Gɛ ba zha ɔdzɛ toli beke, klɛ be koeyi ashɛ̃ avɛ Olivɛ Butu nɛa bha.

Yesu Aɖɔ Elu Sɛ Petro Aba Dɛada Sɛ Eti Nyi Yɛ

²⁷ Yesu etsre badɔkpasɛ nɛ asɛ, “Nɔ bɔ shɛ ɔlɔm petee,” alasɛ ba ŋlɔmɛ lɛ elu asɛ, “ ‘Ɛba hu ibhoshi agbɛgbanɔ nɛ ibho, klɛ ibhoshi nɛ ba kɛka.’

²⁸ Pɔ onu gɛ ɛba lɔ, ɛba putɔ kɔnɔ tsoku Galelia.”

²⁹ Petro ebu aɖɔ asɛ, “Onu gɛ anɔnyanɔ ehle tsyɛ mɛ ɛtɛ baa shɛ.”

³⁰ Yesu etsre yɛ asɛ, “Kɛgba mɛ itsre wɔnɔ,” “obo— ee, elishia— tɛ ɔkukɔ ɔbɔ bɔ abɔ tabha, wɔ Petro nahwɛ nɛ ɔbɔ dɛada ada tata sɛ oti nyi mɛ.”

³¹ Pɔ Petro atrɔ kɛklãgbu asɛ, “Onu kɛ dzi sɛ itsi plɛnɔ wɔ, ɛtɛ ba shɛnahwɛ wɔshu di.” Klɛ badɔkpasɛ gɔgɔɛ nɛ petee aɖɔ atrɔ ana.

Getsemane

³² Ba shɛ avɛ ɔkɔ toli gɛ bee klu asɛ Getsemane, klɛ Yesu etsre yɛ badɔkpasɛ nɛ asɛ, “Nɔ za kesi nɛ ɔkɛ̃ tɛ ɛda klukpaya.”

³³ Agbanɔ Petro, Yakobo anɛ Yohanɛsɛ evunɔ avɛnɔ, klɛ ebe tsoku butɔ nɛ awɔ̃ gɛganɔ mɛ.

³⁴ Yesu etsre alɛ asɛ, “Mɛ ɔfufɔɛ nɛ oyuku nɛ butɔ ɔdɔ tɔnɔ butsi,” “Nɔ dzrɔ nɛ ɔkɛ̃ tɛ nɔ za nɛ awɔ̃.”

³⁵ Gɛ aza ga vɛ otugba nɛ bɔɛ ko, awɔlɛ adɔ kesukpa klɛ eklukpaya sɛ onu gɛ kɛba za bubɔɛbɔɛ tɛ ɔɖɔ nɛm ɔfla mɛ.

³⁶ Yesu asɛ, “Aba, Aka,” “kibuinyɛbui lɛ bubɔɛbɔɛ kɔ wɔ. Tsunɔ butɔ katsea nɛ mɛ nu. Pɔ anɛ kɛgɛ mɛ ɛpɛɛ, pɔ kɛgɛ wɔ ɔdɛmɛ.”

³⁷ Ɔkɛlɛ etsodzi avɛ yɛ badɔkpasɛ nɛ ɔbha klɛ ada mɔa lɛ le dzi adɔ tra. “Simɔnɛ,” ebisi Petro asɛ, “tra no dzi ɔdɔ? So nɔ tɛ bɔ na awɔ̃ za ɔɖa tɛta torikpo tsyɛ?

³⁸ Nɔ za nɛ awɔ̃ nɛ kpayakuklu mɛ sɛ tɛ nɔ tɛ bɔ dɔ ku tɛfifekedi mɛ. Ɔfufɔɛ nɛ ɔɔpɛ ɔsɛ, pɔ ishuidzya nɛ ɛtɔ.”

³⁹ Bu vɛ turukpo plɛnɔ aza shɛ avɛ klɛ ede kulukpaya nɛ kibui lɛ nɛ shu.

⁴⁰ Gɛ ede aba, aza ba mɔa lɛ le dzia dɔ tra, alasɛ balɛ awɔ̃hũ nɛ egbĩĩ. Ba dɛ mɔ kibui nɔɔ nɛ gɛ le be tsre Yesu.

⁴¹ Gɛ eze de aba butramɛ, etsre alɛ asɛ, “No ko dzi ɔdɔ tra klɛ no muene? Abɔ! Kibe nɛɛ na. No di, ba yɛkɔ Anɔdzyrame Yi nɛ ada kpɛ bezizi nɛ ahwɛmɛ.

⁴² Lɔ! Nɔ kɔ lɔ shɛ! Agɛ ada kpɛ mɛ ahwɛ nɛ yɛa baa!”

Be Vu Yesu

⁴³ Gɛ Yesu azaa ɖɔaɖɔ nɛ ko, Yuɖasɛ Kɛfɔntɛabha nɛ ɔmɛayɛ teli aba wɛ̃. Yɛ anɛ banɔɛza tili gɛ ba bala shu nɛ bupamɛ anɛ busukpogunu, gɛ ba kpɛ edenɔ bakpayanɔgbla, ɛshãdɔkasɛ anɛ beshishe nɛ ɔkɔ.

⁴⁴ Ɔtsɔ̃ nɛ agɛ akpɛahwɛ nɛ abhɛtɛ tɛtɛtrɔ tili nɛ banɔ: “Anɔ nɛ gɛ yɛ onugbu mɛ eba mukɔ yɛ nu anɔ; no vu yɛ tɛ nɔ gbanɛ yɛ ɔshɛnɔ nɛ tɛpupoe si.”

⁴⁵ Yuɖasɛ aga tɔnɔ Yesu tsiɔɔ̃, klɛ eklu yɛ asɛ, “Adɔkasɛ!” klɛ amukɔ yɛ onugbu.

⁴⁶ Banɔɛza nɛ be ge ku Yesu mɛ, klɛ be vu yɛ.

⁴⁷ Ɔkɛlɛ teli gɛ eli ebunɔ ɔkɛlɛ nɛ etso yɛ kɛpamɛ klɛ afatɛ kpayaɔzakɔanɔ nɛ teli yɛ axwɛdɛ nɛ batɔ.

⁴⁸ Yesu ebisi balɛ asɛ, “Iputɔ nɛ banɔ gɛ balɔ kititi nɛ wɔnɔ shu so pɛ nɔ yɛkɔ busukpogunu nɛ bupa mɛ sɛ no bo vu mɛ nɔ?

⁴⁹ Ɛza plɛnɔ wɔnɔ kiwinyɛwi, ɛkasɛ kɛdɔ nɛ basɔlɛvu nɛ baka mɛ, klɛ no di vu mɛ. Pɔ alasɛ tɛ Kpayaeplukpa mɛ kibui ba bhɛtɛ lɛ tɛ kɛnaa.”

⁵⁰ Ɔkɛlɛ anɔnyanɔ ashɛ̃nahwɛ yɛ shu klɛ le si ashɛ̃.

⁵¹ Anyɛayɛsɔ teli, gɛ edi nyumu kɛdɔnyɛdɔ pɔ akpɛ akraɖa awi, klɛ aza Yesue de. Gɛ bevu yɛ,

⁵² esi ashɛ̃ nɛ alagba, ashɛ̃nahwɛ kɛdɔ nɛ gɛ enyumu nɛ shu elui de.

Yesu Nɛ Bebhuiklu Nɛ Amɛ

⁵³ Ba yɛkɔ Yesu avɛnɔ kpayaɔzakɔanɔ ɖɛɖama nɛ amɛ klɛ kpayaɔzakɔanɔ, beshishe anɛ ɛshãdɔkasɛ nɛ petee be xogo.

⁵⁴ Petro aza Yesue de nɛ odzidzekɔɛ bɔɛ, ede tsoku kpayaɔzakɔanɔ ɖɛɖama nɛ bubhui oklukɔ. Ɔkɛlɛ ede zhiaza plɛnɔ bagɛ be po ɔkɛlɛ, klɛ edzi aŋanɛ kifu.

⁵⁵ Kpayaɔzakɔanɔ anɛ Bebhuiklu nɛ petee ba pɛɛ kibui nɔ nɛ gɛ la ba yɛkɔ ebhui Yesu nu nɔ pɛ le be yi yɛ, pɔ ba dɛ mɔ kibuinyɛbui.

⁵⁶ Begelee be hu itro sɛ tɛ ba yɛkɔ etii yɛ akpɛ kibuim, pɔ balɛ ebui nɛ adɛ ŋa.

⁵⁷ Ɔkɛlɛ beteli aba lɔ kititi klɛ be hu itro nɛ yɛ shu asɛ,

⁵⁸ “Bunu gɛ aɖɔ asɛ, ‘Ɛba yɛ busɔlɛvu gɛ nɔ bhɔ nɛ ahwɛ, klɛ nɛ ewi tata mɛ, ɛba bhɔ bubhlatɔ, gɛ budɛ nu anɔdzyrame yɛ bhubhɔ.’ ”

⁵⁹ Pɔ kɛlɛlɛ nɛ mɛ tsyɛ balɛ ebuimɔɖɔ nɛ adɛ ŋa.

⁶⁰ Ɔkɛlɛ balɛ kpayaɔzakɔanɔ nɛ alɔ nɛ balɛ amɛ klɛ ebisi Yesu asɛ, “Ɔtɛ bo bu shu nu? Kidee gɛ nu ebuimɔɖɔa nɛɛ di gɛ banɔ nɛ baa yɛkɔ nɛ wɔ shu?”

⁶¹ Pɔ Yesu adɔ sɛɛ̃ klɛ edi bu shu nu. Kpayanɔgbla nɛ eze bisi Yesu asɛ, “Wo nu Kristo, Kpaya yɛ Eyi Yuyula?”

⁶² Yesu ebui lɛ bunu asɛ, “Mɛnu Kristo.” “Klɛ nɔ bɔ mɔ Anɔdzyrame yɛ Eyi nɛ gɛ ezhiedzi Agbɛgbladɛ nɛ kɛŋam gɛ aaba denɔ ɔmunɔ nɛ mɛ nɛ owũsise.”

⁶³ Kpayaɔzakɔanɔ nɛ atsyuɛ yɛ bawi nɛ ishu. Ebisi asɛ, “Kidee so pɛ bu zɛ ba pɛɛ bebuimɔɖɔ gelee dɛa na nɛ Yesu shu?”

⁶⁴ “No nu ebusobui. Kide wɔnɔ kɛtɔkpu nɛ mɛ tsre nɔ?” Balɛ petee be bu yɛ kɛpɔ gɛ dzyenɔ butsi.

⁶⁵ Ɔkɛlɛ be teli ba kpa bututu bu ta yɛ; banya yɛ amɛ, be hu yɛ ekpli, klɛ baa ɖɔ asɛ, “Mɔɛbuiɔɖɔ!” Klɛ bepupo na gbanɔ yɛ klɛ be de tu yɛ.

Petro Asɛ Eti Nyi Yesu

⁶⁶ Kibee lɛ nɛ gɛɛ Petro adzrɔ nɛ kesiɔkɔ nɛ kebhui buka nɛ mɛ, kpayaɔzakɔanɔ anɛ yɛ axwɛdɛ adzɛnuvɔɛ teli abaa fla.

⁶⁷ Gɛ amɔ Petro gɛ edzi aŋanɛ kifu, evu awɔ̃hũ nɛ yɛ mɔɔ mɔ. Klɛ aɖɔ asɛ, “Wɔ tsyɛ ɔza Nazarɛtɛ eyi Yesu nɛe de.”

⁶⁸ Pɔ Petro adɛ dɛmɛ lɛ. “Iti nyi, klɛ mɛ tii nu kibui nɔ nɛ gɛ ɔɔɖɔ nɛesi,” klɛ ekoeyi avɛ ede li kedunu.

⁶⁹ Gɛ adzɛnuvɔɛ nɛ aza mɔ yɛ asɛsɛ nɛ ɔkɛlɛ, aza ɖɔ etsre bagɛ li kititi nɛ ɔkɛlɛ, “Anyɛa nɛɛ balɛ ɔmɛayɛ teli enu.”

⁷⁰ Aza dɛ dɛmɛ lɛ. Nɛ kɛlɛede bɔɛ ko, banɔ nɛ gɛ beli titi nɛ ebunɔ Petro ne tsre yɛ asɛ, “Kɛlɛlɛm sɛ balɛɔmayɛ teli onu, alasɛ Galeliaeyi onu.”

⁷¹ Petro etenɔ ebui ɖɔkpɛ shu, klɛ atanɔ kɛdɔ kɔa lɛ asɛ, “Iti nyi anyɛa nɛ gɛ yɛ bui nɔɔ ɖɔ.”

⁷² Ɔklɛ nɛ ko klɛ ɔkukɔ ɔzɔ bɔ bubhla. Ɔkɛlɛ Petro abaka Yesu ebui nɛ gɛ aɖɔ tsre yɛ asɛ, “Flogo tɛ ɔkukɔ ɔbɔ bɔ abɔ tabha nɛɛ obɔ dɛada ada tata sɛ oti nyi mɛ.” Klɛ Petro ezhidɔ nɛ iyuyo.