Marko 10 - ONUGBÙ NYƐNYÃ VUVƆ

Anyɛ Anɛ Adzyɛ Aglɔ Shu Shɛshɛ̃nahwɛ

¹ Yesu ashɛ̃ nɛ ɔklɛ aba fla vɛ Yuɖua kɛdɔ nɛ mɛ, klɛ ada tsɔkɛ Yɔɖan keni. Kana ke banɔɛza nɛ zɛ ba yɛ ɔbha, klɛ anasɛ gɛ aabhɛtɛ, akasɛ balɛ kɛdɔ.

² Farisianɛ teli be feke yɛ edi klɛ be bisi yɛa sɛ, “Kɛ lɛ ɔshã mɛ sɛ tɛ anyɛ ashɛ̃nahwɛ yɛedzini shu dza?”

³ Ebisi balɛ asɛ, “Ɔshã ɖueɖu Mose akpɛ kɔ nɔ?”

⁴ Ba ɖɔ asɛ, “Mose akɔ kidzo sɛ anyɛ aŋlɔmɛ adzɛ shu shɛshɛ̃nahwɛ keplukpa tɛ ayɛkɔ akpɛ yɛ dzo nɔ.”

⁵ Yesu ebui lɛ nu asɛ, “Alasɛ wɔnɔ idzyi nɛ mɛ agɛganɛ so pɛ Mose akpɛ ɔshã nɛ akɔ wɔnɔ,”

⁶ “Pɔ denɔ kanɔ nɛ kesi kpɛkpɛ mɛ, Kpaya ‘abhɛtɛ alɛ anyɛ anɛ adzɛ.’

⁷ Nɛ kɛlɛ shu so, anyɛ aba shɛ alɔ yɛaka anɛ yɛeni avɛ ada bhɛtɛ terikpo nɛ yɛedzini,

⁸ klɛ baa tɛa bha nɛ bebe dzi ishuidzya tirikpo. Kɛlɛ so be deke nu banɔ tɛa bha, pɔ be dzi anɔ terikpoo.

⁹ Kana mɛ so, kɛdɔnɔ nɛ gɛ Kpaya atsa abhɛtɛ tirikpo, kɔ anɔnyanɔ eti bule kɛlɛ.”

¹⁰ Gɛ be ke li bupa nɛ mɛ nɛɛ, Badɔkpasɛ nɛ be ze bisi Yesu ebui denɔ kibui nɛ shu.

¹¹ Ebu lɛ nu asɛ, “Anyɛnyanyɛ gɛ ashɛ̃nahwɛ yedzini shu pɛ aza da gbanɔ adzɛ bhlatɔ nɛɛ, abhɛtɛ aglɔbui avɛnɔ adzɛ nɛ ɔkɔ.

¹² Klɛ onu gɛ adzɛ tsyɛ ashnahwɛ yɛenyine shu pɛɛ aza da zanɔ anyɛ bhlatɔ nɛɛ, yɛ tsyɛ abhɛtɛ aglɔbui.”

Banuvɔ Bhli Anɛ Yesu

¹³ Banɔ baa mɛna banuvɔ bhli sɛ tɛ Yesu atrɔ ahwɛ nɛ balɛa bha tɛ ayula alɛ, pɔ yɛ badɔkpasɛ nɛ ba kpaa lɛ.

¹⁴ Gɛ Yesu amɔ kibui nɛ, amɔ obulo. So etsre balɛ asɛ “Nɔ kɔ bunuvɔɛbhli na ba mɛ ɔbha, klɛ nɔ tɔɔ kɛka lɛ, alasɛ banɛ nɛɛ di nɛ ɔzakɔ ɔlɛ nu Kpaya bukusiɔŋakɔ.

¹⁵ Itsre nɔ kɛgbɛagba sɛ, anɔnyanɔ gɛ atɛ ba yɛkɛ Kpaya bukusiɔŋakɔ ansɛ anuvɔ bhli, atɛ ba na bulɛ mɛ etsoku.”

¹⁶ Klɛ Yesu ayɛkɛ bunuvɔɛ na kpɛ etem, klɛ atrɔ ahwɛ nɛ balɛa bha klɛ ayula balɛ.

Anyɛsɔ Ehueielete Teli

¹⁷ Gɛ Yesu agaa vɛ, anyɛ teli aba tɔnɔ yɛ klɛ ezhiakpla nɛ yɛ otugba. Ebisi asɛ, “Adɔkasɛ Dzyɔgo,” “kidee mɛ ɛba bhɛtɛ pɛ ɛba mɔ ɛkpã gɛ tɛ ba beke?”

¹⁸ Yesu ebui lɛ nu asɛ, “Kide so pɛ oklu mɛ ɔsɛ anɔ dzyɔgo?” “Anɔnyanɔ adɛ na, dɛ Kpaya trikpo.

¹⁹ Sɛ no nyi ɛshã, Ti yi anɔ, tɛbhɛtɛ aglɔbui, tɛ zuru, tɛ ɖɔ kibuinɔ nɛ gɛ otinyi, tɛ wɛɛ anɔ ozru, bubɔ shu kɔ wɔaka nɛ weni.”

²⁰ Anyɛ na ɖɔ sɛ, “Adɔkasɛ, ” “anɛ nɛ petee ɛbhɛtɛ alɛ denɔ mɛ anyɛnuvɔɛ dzibe ke.”

²¹ Yesu edi yɛ klɛ yɛ kibui za yɛ buli. Klɛ asɛ, “Kibui tirikpo gɔ kɔ wɔ,” “Vɛ, dɔ dɛ kɛdɔnyɛdɔ gɛ lɛ wɔ ahwɛ tɛ ɔyɛkɔ kɔ betsyutsyuini, klɛ kɛba kɔ sɛ kɛnɔmɛdɔ kɛ ba za wɔ ahwɛ nɛ owũsise. Tɛ otsodzi ɔba tɛ ɔbɔ za mɛe de.”

²² Nɛ kɛnɛ nɛ mɛ anyɛ nɛ ezhinɔ amɛesi. Kibui nɛ dɛ kui same, alasɛ kɛnɔmdɔ lɛ yɛ ahwɛ gelee.

²³ Yesu elu awɔ̃ edi klɛ etsre yɛ badɔkpasɛ nɛ asɛ, “Kɛ ba gɛganɛ kɔ ehoeyielete sɛ tɛ etsoku Kpaya bukusi ɔŋakɔ!”

²⁴ Ebui nɛ gɛ aɖɔ nɛ abhɛtɛ badɔkpasɛ nɛ kibi. Pɔ Yesu aza ɖɔa sɛ, “Beyi mɔ, Kpaya bukusiɔŋakɔ nɛ mɛ vɛvɛ no nu kibui gɛganɛ

²⁵ Kɛ ba za bubɔɛbɔɛ kɔ kipuaga sɛ aga kɛtsa ozi mɛ afla ɔyɛkɔ dɛ sɛ tɛ ehoeyielete etsoku Kpaya bukusiɔŋakɔ nɛ mɛ.”

²⁶ Kibui nɛ zɛ bhɛtɛ badɔkpasɛ nɛ kibi dɛ kana, klɛ baa ɖɔ nɛ aglɔmɛ asɛ, “Kɛlɛ anee di yɛ aba mɔ ɛkpã?”

²⁷ Yesu edi alɛ klɛ aɖɔ asɛ, “Nɛ anɔdzyrame kapɛ mɛ kɛ ma bɔbɔɛbɔɛ, pɔ ganɛ kɔ Kpaya xũ, kibuinyɛbui lɛ bubɔɛbɔɛ kɔ Kpaya.”

²⁸ Petro etsre yɛ asɛ, “Bu tɛ shɛnahwɛ bulɔ kɛdɔnyɛdɔ shu klɛ bu ba lɛ wɔ kede!”

²⁹ Yesu ebui lɛ nu asɛ, “Itsre nɔ kɛgba,” “anɔnyanɔ ama gɛ ashɛ̃ nɛ kepi, ayɛlɔ yɛadzyalɛ, anɛ yɛadalɛ, anɛ yɛeni, anɛ yɛaka, anɛ yɛeyialɛ, anɛ yɛ kaya akpɛ mɛ Kibui Dzyɔgo nɛ so,

³⁰ pɛ ata yɛkɛ kɛdɔ gelee adɛ nɛ kɛfɔɛfɔ mɛ nɛ ɛkpã nɛ mɛ, (bapa, badzya, bada, beni, beyi nɛ kaya kapɛ mɛ— klɛ ɔyɛkɔ plɛnɔ alɛ kititilulɔ) klɛ nɛ agɔ gɛ aba tɛ ba nɛ mɛ, ɛkpã gɛ tɛba beke ba za.

³¹ Pɔ be gelee gɛ be putɔ nɛ be dzi bagugɔɛ, klɛ bagɔgɔɛ nɛ be dzi batutɔpu.”

Yesu Aza Ɖɔ Kaɖɔ Elu Nɛ Yɛ Butsi Nɛ Shu

³² Baza kidzoa bha ewua aavɛ Yerusalɛm, nɛ kibe lɛ gɛ Yesu eputɔ kɔ balɛ, yɛ ebui nɛ eyinɔ yɛ badɔkpasɛ, klɛ kifu ku bagɛ ba za yɛe de. Aza gbanɔ kɛfɔntɛabha nɛ eyinɔ kide klɛ etsre balɛ kɛgɛ baa ba yɛa bha.

³³ Etsre balɛ asɛ, “Bu vɛ Yerusalɛm,” “klɛ la ba tɛ ga Anɔdzyrame yɛ Eyi nɛesi akɔ kpayaɔzakɔanɔ anɛ ɛshãdɔkasɛ. Bee bu yɛ butsipɔ klɛ la ba yɛkɔ yɛ akpɛ ahwɛ kɔ bagɛ edi nu Yuɖanɛ,

³⁴ gɛ la ba kpɛ yɛ butsɔ klɛ le be bu bututu ata yɛ, klɛ la ba mɛna yɛ kishi klɛ le be yi yɛ. Nɛ ewi tata kede nɛ aba lɔ.”

Yakobo Anɛ Yohanɛsɛ Tɛbibisi

³⁵ Ɔklɛ Yakobo anɛ Yohanɛsɛ gɛ benu Zebeɖi yɛeyialɛ nɛ ba tɔnɔ yɛ aba. Klɛ ba ɖɔ asɛ, “Adɔkasɛ, bu pɛɛ sɛ tɛ ɔbhɛtɛ kɛkanyaka gɛ bu bisi nɛ ɔkɔ lɔ.”

³⁶ Ebisi asɛ “Kide nɔ pɛɛ sɛ ɛbhɛtɛ kɔ nɔ?”

³⁷ Be bui lɛ nu asɛ, “Kɔ bulɔmɛayɛ teli aza wɔ kɛŋa mɛ tɛ abhla nɛ aza wɔ kɛbɛtɛkpɛ mɛ nɛ wɔ same ɔzakɔ.”

³⁸ Yesu etsre alɛ asɛ, “No ti nyi kɛdɔnɔ nɛ gɛ noo bisi.” “Nɔ bɔ na mɛ butɔantse nɛ gɛ ɛba wɛ̃ nɛ ɔwɛ̃ pɛ, ɔdɔgɔsɛ tɛ ba kpɛ buni akɔnɔ nɛ buni nɛ di gɛ bakpɛ kɔ mɛ nɛ dza?”

³⁹ Be bu klɛ nu asɛ, “Bu ba na.” Klɛ Yesu etsre alɛ asɛ, “Nɔ bɔ wɛ̃ mɛ katse nɛ gɛ ɛwɛ̃, klɛ nɔbɔ yɛkɛ bunikpɛkpɛ nɛ gɛ ɛkpɛ nɛ di,

⁴⁰ pɔ tɛ ɔza mɛ kɛŋa mɛ nɛ kɛbɛtɛkpɛ mɛ xũ nɛ, ganɛ mɛ ba kɔ kɛlɛ. Ɛzakɔɛ lɛ nɛ lɛ kɔ bagɛ ba bala ɛlɛ elukɔ.”

⁴¹ Gɛ badɔkpasɛ lɔfɔ gɔgɔɛ nɛ nu kibui nɛ gɛ baa ɖɔ nɛ, ba mɔ obulo nɛ Yakobo nɛ Yohanɛsɛ.

⁴² Yesu eklu alɛ exogo klɛ etsre balɛ asɛ, “No nyi sɛ, banɔ nɛ gɛ bee di ansɛ balɛ aŋa bagɛ edi nu Yuɖanɛ nɛa bha, naa trɔ balɛa bha, klɛ balɛ banɔgbla nɛ tsyɛ ba wa balɛ kabhaŋɛŋa nɛ shui kɛxwɛ nɛ balɛa bha.

⁴³ Wɔnɔ kɛma kɔnɔ kana. Pɔ wɔnɔ, ɔmɛayɛ nɔɔ nɛ gɛ apɛ asɛ tɛ edzi agbɛgbla nɛ wɔnɔ kishi nɛ, klɛ alasɛ tɛ yɛ edzi axwɛdɛ,

⁴⁴ klɛ anɔɔ nɛ gɛ apɛ asɛ tɛ edzi otugbanɔ nɛɛ, alasɛ tɛ yɛ edzi balɛ petee axwɛwa.

⁴⁵ Alasɛ Anɔdzyrame yɛ Eyi nɛ krua tsyɛ adɛ ba sɛ tɛ anɔ aba dɛ kɛxwɛ akɔ yɛ, pɔ yɛ aba sɛ tɛ aba dɛ kɛxwɛ, tɛ ayɛkɔ yɛ ɛkpã nɛ abuya kɛbhɛ nɛ banɔ gelee tɔkpu.”

Batimeo Anhũpu Amɔ Anhũ Dɛdanɛ

⁴⁶ Ɔkɛlɛ bede ku Yeriko. Gɛ Yesu anɛ yɛ badɔkpasɛ, anɛ banɔɛza, nɛ be koeyi nɛ ɔmagbla nɛ mɛ, awɔ̃hũpuelete, Batimeo (gɛ klɛesi nu sɛ Timeos Yeyianyɛ), ezhiaza kidzo nɛ butɔ klɛ eebisi kɛdɔ.

⁴⁷ Gɛ enu asɛ Yesu Nazarɛtɛ eyi nɛ yaa fla nɛ, etenɔ ogugu kpɛ asɛ, “Yesu Daviti yɛ Eyi, di mɛ eshutukubui!”

⁴⁸ Banɔ gelee ba kpa anyɛ klɛ be tsre yɛ asɛ aza kɛdzyɛɛ, pɔ aza kpɛ ogugu nɛ adɛa na sɛ, “Daviti Yɛeyiee, di mɛ eshutukubui!”

⁴⁹ Yesu adzrɔ klɛ asɛ, “No klu yɛ ɔmɛna.” Kɛlɛso nɛ be tsu ebunɔ awɔ̃hũpuelete, “Mɔ same! Lɔ kititi! Eklu wɔ.”

⁵⁰ Anyɛ nɛ ebu yɛ kabha awidzidze nɛ atɛɛ̃, klɛ alɔ zia ada tɔnɔ Yesu.

⁵¹ Yesu ebisi yɛ asɛ, “Kide wɔ sɛ ɛbhɛtɛ kɔ wɔ?” Anhũ pupuelete na sɛ, “Adɔkasɛ! Ɛpɛɛ sɛ tɛ ɛmɔ.”

⁵² Yesu asɛ, “Gavɛ,” “wɔ tɛyɛyɛkɛŋa nɛ tɛ beke wɔ bunya.” Kɛɖɔ nɛ gɛ ɛɖɔa nɛɛ, awɔ̃hũ nɛ agbla danɛ, klɛ alɔ alɛ Yesu kede nɛ kidzo nɛa bha.