Marko 1 - ONUGBÙ NYƐNYÃ VUVƆ

Yohanɛsɛ Enikpɛ Nɛ Kidzo Ŋuŋuse

¹ Yesu Kristo, Kpayayɛeyi nɛ bui nɛ kesi ɔkpɛkɔ.

² Ba ŋlɔmɛ nɛ Yezaya atɔnu nɛ keplukpa nɛ mɛ asɛ, “Ɛba kpɛ mɛ axwɛdɛ nɛ iputɔnɔ kɔ nɔ, yɛ aba be ŋuse wɔnɔɛ dzo ”

³ “anɔ teli ogugu gɛ oklu kɛdɔ denɔ ayakpa mɛ nɔ ɔsɛ, ‘Ŋuse Apalete nɛ dzo, bu kidzo dzyudzyɔ kɔ yɛ.’ ”

⁴ Klɛ so Yohanɛsɛ aba nɛ bunikpɛkpɛ denɔ ayakpa nɛ mɛ be, klɛ aɖɔ kitem tsyitsyina bunikpɛkpɛ bui kɔ buzizi tɛyɛyɛkɔ tsye.

⁵ Banɔ petee gɛ ba kana Yuɖia be ɔyɛkɔ plɛnɔ Yerusalɛm ɔma mɛ banɔ nɛ petee bekoeyi aba tɔnɔ yɛ. Gɛ be bu balɛ buzizi nɛ aɖɔ beke nɛɛ, ba yɛkɛ bunikpɛkpɛ denɔ yɛ ɔkɔ nɛ Yɔɖan Keni nɛ mɛ.

⁶ Yohanɛsɛ akpɛ kipuagatɛka awui, klɛ anya kazaplukpa ɔdzadi, yɛ ŋɛŋa nɛ dzi ahwaye anɛ betsiuni.

⁷ Klɛ yɛ kibui nɛ gɛ evunɔ kɛlɛ dzi sɛ, “Mɛe de nɛɛ anɔ teli abaa ba, gɛ alɛ kemi adɛ mɛ, anyɛa lɛlɛ nɛ afukpaohui tsyɛ ɛtɛ ba naa zhikpla kɔ ɔlɛ tɛbublue.

⁸ Mɛ nɛɛ ɛkpɛ buni kɔɔ nɔ nɛ buni, pɔ yɛ aba kpɛ buni kɔɔ nɔ nɛ Ɔfufɔɛ Dzyɔgo.”

Yesu Bunikpɛkpɛ Anɛ Yɛ Tɛfifekedi

⁹ Kɛbe lɛlɛ nɛ mɛ gɛ, Yesu ede Nazarɛtɛ nɛ Galelia nɛ aba, klɛ aba yɛkɛ bunikpɛkpɛ denɔ Yohanɛsɛ ɔkɔ nɛ Yɔɖan Keni nɛ mɛ.

¹⁰ Nɛ Yesu tɛ kukoeyi denɔ buni nɛ mɛ ko, amɔ owũsise nɛ gɛ ɔdanɛ klɛ Ɔfufɔɛ Dzyɔgo nɛ ozhiba yɛa bha anasɛ gɔgɔwí.

¹¹ Klɛ ogugu oyi denɔ owũsise pɛ lɔɔ ɖɔ sɛ, “Wɔ onu Meyi, gɛ ɛdɛmɛ nɔ; wɔ shu mɛ mɔ awɔ̃kuku.”

¹² Ɔkɛlɛ nɛ ko, Ɔfufɔɛ nɔ yɛkɔ yɛ ɔvɛ nɔ ayakpam,

¹³ klɛ aza ayakpa mɛ ewui afɛtalɛ̃, ɔkɛlɛ Satana ebe feke yɛ edi. Aza bagavuga shi, klɛ kpaya baxwɛdɛ nɛ bee di yɛa bha.

Yesu Badɔkpasɛ Tutɔpu Nɛ Tɛkuklu

¹⁴ Gɛ be vu Yohanɛsɛ akpɛ buvu, Yesu ashɛ̃ avɛ Galelia, adaa ɖɔ Kpaya kibui dzyɔgo.

¹⁵ Aɖɔ asɛ, “Kibe nɛ tɛ na,” “Kpaya bukusi nɛ tɛ tso bunɔ lɔ. So no tsyina kitem tɛ nɔ yɛkɛ kibui dzyɔgo nɛa bha ɔŋa!”

¹⁶ Gɛ Yesu agaa fla nɛ Galelia aƒu nɛ shu, amɔ Simɔnɛ anɛ yadzya Andrɛasɛ gɛ ba kpɛ kenim dzikle nɛ kɛvɔ nɛ mɛ, alasɛ be nu banɔ gɛ bee bu kenimɛdzya.

¹⁷ Yesu asɛ, “Nɔ ba, za mɛe de mɔ, ” “Ɛba bhɛtɛ nɔ banɔ gɛ be bu banɔ.”

¹⁸ Ɔkɛlɛ nɛ ko, ba gbla shɛ̃nahwɛ balɛ kenim dzikle nɛ shu klɛ ba lɛ yɛe de.

¹⁹ Gɛ aza vɛ otugba nɛ bɔɛ, amɔ Zebeɖi yɛeyialɛ nɛ gɛ be nu Yakobo anɛ yadzya Yohanɛsɛ nɛ keniabha opupu toli mɛ, gɛ be zee ŋuse balɛ kenim dzikle.

²⁰ Nɛ kibe mazimazi mɛ, Yesu eklu alɛ, klɛ ba gbla lɔ alɛ yɛe de, klɛ ba shɛ alɔ balɛ aka Zebeɖi anɛ yɛ baxwɛwa nɛ opupu nɛ mɛ.

Yesu Akɛka Ɔfufɔɛkpã Ebueyinɔ

²¹ Ba vɛ Kapenaumɛ, klɛ gɛ Yuɖanɛ Kimuenewi nɛ na, Yesu ede tsoku oxogokɔvu nɛ mɛ klɛ akpa kɛdɔ kasɛ.

²² Yɛ kɛdɔ kɛkasɛ nɛ yinɔ banɔ, alɛsɛ akasɛ kɛdɔ anasɛ anɔ gɛ kabhaŋɛŋa lɛ yahwɛ ganɛ anasɛ gɛ ɛshãdɔkasɛ nɛ baa kasɛ dɔ.

²³ Nɛ kibe lɛ nɛ mɛ, nɛ balɛ oxogokɔvu nɛ mɛ, anyɛ teli gɛ ɔfufɔɛkpã otsri yɛa bha nɛ akpɛ ogugu gɛganɛɛ asɛ,

²⁴ “Kidee wɔ Yesu Nazarɛtɛ eyi nɛ ɔpɛɛ denɔ bulɔ ɔkɔ? Ɔba sɛ tɛ obo beke lɔ dza? Inyi anɔ nɛdi gɛ onu, wɔ nu Kpaya Ɔfufɔɛ Dzyɔgo Anɔ!”

²⁵ Yesu asɛ, “Da onugbu!” “Koeyi ɔbɔ fla nɛ anɔ nɛ mɛ!”

²⁶ Ɔfufɔɛkpã nɛ oshuku anyɛ nɛ gɛganɛɛ klɛ lɔ fla koeyi nɛ yɛ mɛ nɛ tɛbubɔ dzyɛɛ.

²⁷ Yesu tɛbhɛbhɛtɛ nɛ bhɛtɛ banɔ nɛ kibi klɛ bee bisi aglɔ asɛ, “Kide lɔɔ mɔa? Kɛdɔ kɛkasɛ vuvɔ, klɛ nɛ kabhaŋɛŋa tysɛ ana! Klɛ ɛfufɔɛkpã tsyɛ ta yɛ atɔ.”

²⁸ Be nu Yesu dɔ zia nɛ Galelia kesukpa nɛa bha petee.

Yesu Ebeke Banɔ Gelee Banya

²⁹ Gɛ ba nya shɛ nɛ oxogokɔvu nɛ mɛ ko, Yesu, Yakobo anɛ Yohanɛsɛ ba shɛ avɛ Simɔnɛ anɛ Andrɛasɛ bupa nɛ mɛ.

³⁰ Nɛ bupa nɛ mɛ be tsre Yesu asɛ Simɔnɛ yɛ andze nɛ eliesi nɛ buwui.

³¹ So Yesu etsoku atɔnɔ adzɛ, klɛ ada nyɛna yɛ ɔhwɛ klɛ evu alɔ. Buwui nɛ shɛ̃nahwɛ adzɛ nɛ shu klɛ etenɔ balɛa bha di.

³² Nɛ owulago ɔlɛlɛ nɛ kiwidudɔe de ba gbanɔ banyɛnya nɛ petee anɛ bagɛ ɛfufɔɛkpã tsri balɛa bha nɛ amɛna Yesu.

³³ Ɔma nɛ petee bexogo nɛ bupa nɛ kedunu,

³⁴ klɛ Yesu ebeke banya edidedi nɛ ga za be gelee mɛ. Klɛ akɛka ɛfufɔɛkpã gelee ebu nɛ banɔ mɛ, pɔ adɛ kɔ ɛlɛ dzo sɛ tɛ lɛ ɖɔ kaɖɔ, alasɛ lɛ nyi anɔ nɛ gɛ enu.

Yesu Eklukpaya Nɛ Okpukpukɔ

³⁵ Nɛ kɛvlɔ nɛ pinii, gɛ kanɔ mɛ eke bhui, Yesu alɔ nɛ bupa nɛ mɛ avɛ okpukpukɔ toli ɔkɛlɛ ede klukpaya.

³⁶ Klɛ Simɔnɛ anɛ yɛadzyalɛ na daa pɛɛ yɛ,

³⁷ klɛ gɛ ba mɔ yɛ ba kpɛ ogugu aɖɔ asɛ, “Anɔnyanɔ edzi apɛ wɔ!”

³⁸ Yesu etsre alɛ sɛ, “Nɔ kɔ lɔ vɛ ɔkɔ toli tsyɛ, nɛ ɛma bhlibhli nɛ mɛ gɛ tsobunɔ lɔ, sɛ tɛ ɛda ɖɔ Kpayɛbui nɛ ɛkɛlɛ tsyɛ. Kɛlɛ so pɛ ɛba.”

³⁹ So anyɔ Galelia petee, aɖɔ Kpayabui nɛ oxogokɔevu nɛ mɛ klɛ akɛka ɛfufɔɛkpã.

Yesu Ebeke Anyɛ Teli Bunyadzɛdzã

⁴⁰ Anyɛ bunyadzɛdzã elete teli aba za ekuisia bha akɔ Yesu, klɛ akɔ yɛ kɛtɔkpu asɛ, “kɛɛ ba dzi wɔ tɛ pɛpɛɛ tɛ oxule bunya nɛ mɛ shu.”

⁴¹ Nɛ eshutukubui didi mɛ, Yesu ebu yɛ ɔhwɛ nɛ ehunɔ anyɛ. “Klɛ aɖɔ asɛ ɛpɛɛ, ” “Wɔ shu bhui!”

⁴² Ko klɛ anyɛ nɛ bunya dzɛdzã nɛ shɛ kɛshɛ tili.

⁴³ Yesu akɛka anyɛ nɛ asɛsɛ nɛ ɔshã kpɛkpɛ yɛ gɛganɛɛ asɛ,

⁴⁴ “Di lɛ ɔkɔ sɛ odi tsre anɔnyanɔ sɛ kana mɛ ibeke wɔ nya. Pɔ vɛ, yɛ kɔ wɔ shu nɛ ɔdɔ kasɛ kpayaɔzakɔanɔ tɛ ɔdɔ buya kɛdɔnɔ nɛ gɛ lɛ sɛ tɛ ɔbuya anasɛ gɛ Mose ɔshã nɛ ɔɖɔ kɔ wɔ ishu bhuibhui, sɛ tɛ kidzi kibuimɔɖɔ kɔa lɛ.”

⁴⁵ Nɛ kɛlɛ maza lɛ mɛ ekoeyi avɛ ada ɖɔɛ bui nɛ akana wee. Nɛ kɛlɛ mɛ, Yesu ada da na ɔma mɛ tsoku awɔɛ̃, pɔ ekoeyi ada za ɛzakɔ gɛ anɔ ama. Tsyɛ banɔ be de ɔkɔnyɔkɔ atɔnɔ yɛ aba.