Luka 8 - ONUGBÙ NYƐNYÃ VUVƆ

Kɛkpalɛ Denɔ Adɔhwɛ Shu

¹ Kɛnɛ nɛede, Yesu agɛdzo anyɔ denɔ ɔma gbɛgbla anɛ ɔma bhliyi torikpoɛ mɛ ɔvɛnɔ ɛbhlatɔɛ, aɖɔ kibui dzyɔgo denɔ Kpaya bukusi shu. Banɔ lɔfɔnɛtɛabha nɛ aza yɛ ɔbha,

² nɛ̀ badzɛ teli tsyɛ gɛ akɔ bunya anɛ ɛfufɔɛ zizi koeyi nɛ̀ balɛ shu mɛ, Maria (gɛ be klu asɛ Magdalena) gɛ yɛ shuimɛ ɛfufɔɛ zizi tigene koeyi.

³ Kuza gɛ edi Heroɖesɛ bupa nɛabha yɛedzini Yohana, Susana, nɛ̀ be gelee bhlatɔ. Badzɛa nɛ ba plɛnɔ atɔ alɛ owunɔ denɔ balɛ nahwɛ dɔ.

⁴ Kibe lɛ nɛ gɛ banɔɛza nɛ bɛ xogo klɛ banɔ ba ba Yesu ɔbha denɔ ɛma ɔvɛnɔ ɛma, etsre alɛ kɛkpalɛ nɛ:

⁵ “Ayadɛ teli avɛ sɛ tɛ ada hwɛ yɛ amɔ. Gɛ ahwɛ amɔ, eyi eteli awɔlɛ dɔ kɛdzo nɛ mɛ, ba nɔ aga aleabha, klɛ kɛlɛɛ mɛ buzhuɔɛ batɔkɛ alɛ amunɔ.

⁶ Eteli wɔlɛ adɔ aklãgbu abha, klɛ gɛ le yi, le tsi alasɛ kesukpa nɛ mɛ adɛ yɔ.

⁷ Eyi bhlatɔ wɔlɛdɔ ɛwi mɛ, gɛ le she nɛ alɛ, klɛ lakpaka amɔ.

⁸ Tsyɛ eyi bhlatɔ wɔlɛ adɔ kesukpa dzyɔgo abha. Le yi klɛ le yu ɛzakɔ kɛfɔɛfɔ dɛ agɛ bahwɛ.” Gɛ aɖɔ kɛnɛ nɛ, akpɛ ogugu gɛganɛ sɛ, “Anɔ nɛ gɛ batɔ lɛ yɛ ahwɛ sɛ tɛ enuu, kɔ ye enu.”

⁹ Yɛ badɔkpasɛ nɛ̀ bisi yɛ asɛ kɛde kɛkpalɛ nɛ kasɛ.

¹⁰ Aɖɔ asɛ, “Kpaya bukusiɔŋakɔ nɛ ebuikpukpu nɛ tɛtiti ba tɛ yɛkɔ kɔ nɔ, pɔ kɔ ba gugɔɛ ɛɖɔ kaɖɔ ganɔ akpalɛ mɛ, sɛ tɛ, “ ‘kɛlɛlɛmɛ sɛ ba mɔ, tɛ ba tɛ mɔ; kɛlɛlɛmɛ sɛ be nu, tɛ beti nu kɛlɛesi.’

¹¹ “Kɛkpalɛ nɛesi kɛlɛ nu sɛ: Eyi alɛ nu Kpaya bui.

¹² Agɛ la lɛ kidzo nɛ mɛ ale nu banɔ bagɛ be nu ebui, klɛ ɔfufɔɛ tsutsɔmɔ nɛ ebe bu kibui nɛ balɛ idzyi nɛ mɛ, sɛ tɛ batɛ yɛkɛaŋa tɛ ba ba mɔ ɛkpã.

¹³ Eyi gɛ adɔ aklagbu nɛabha alɛ nu ba gɛ bayɛkɛ bui nɛ same kɛbelɛlɛ gɛ be nu lɛ, pɔ kɛ dɛkpɛ ɛgu. Ba yɛkɛŋa kɛ be, pɔ tɛfifekedi ba ko, ba wɔlɛ ekoeyi.

¹⁴ Eyi nɛ gɛ la dɔ ewui nɛ mɛ alɛ nu bagɛ be nu bui, pɔ gɛ ba vɛ balɛ dzo abha kanɔɛmɛ butɔ, ehoeyi anɛ̀ same kpãwũkpãwũ mumɔ na kpaka lɛ, klɛ la dɛ ba she.

¹⁵ Eyi gɛ la dɔ kesukpa dzyɔgo nɛabha ale nu ba gɛ nu bui gɛ ba yɛkɛ lɛ atrɔ shu nɛ idzyi dzyɔgo, gɛ be nu ebui, ba yɛkɔ alɛ, klɛ nɛ kanyɛtsitsimɛ, lɛ yu eyuyu.

Kanɛgbɛ Gɛ Etsri Kɛdɔabha

¹⁶ Anɔnyanɔ eti deke kanɛgbɛ gɛ ayɛkɔ ekpu nɛ ketsukpue si ɔdɔgɔsɛ, ayɛkɔ akpɛ oputsoe si. Kɛlɛmaza, aba yɛkɔ atrɔ kɛdɔ abha sɛ tɛ ba gɛ ba ba na mɔ kifu.

¹⁷ Alasɛ kɛdɔnyɛdɔ ma gɛ ba yɛkɔ ekpu gɛ batɛ be builɛ eyinɔ ɔtɔ, klɛ kɛdɔnyɛdɔ ma gɛ ba dɛlɛdɔ gɛ be tɛ be ti, ɔdɔgɔsɛ be bui lɛ eyinɔ ɔtɔ.

¹⁸ Kɛlɛso nɔ ta atɔ mɔmɔ nɛ kɛnu gɛ nɔnu ebui. Anɔ nɛ gɛ kɛdɔ lɛ yɛ ahwɛ ba ba kɔ yɛ gelee, agɛ kɛdɔnyɛdɔ ma yɛ ahwɛ, kɛ gɛ ayɛkɔ sɛ kɛlɛ yɛ ahwɛ tsyɛ ba zia yɛkɛ lɛ nɛ yɛ ahwɛ.”

Yesu Yɛeni Anɛ Yɛadzya

¹⁹ Ɔtsɔnɛ Yesu yɛeni anɛ yɛadzyalɛ ba ba sɛ tɛ ba damɔ yɛ, pɔ ba dɛ mɔɛ dzo tsobunɔ yɛ alasɛ banɔɛza kpikpe so.

²⁰ Anɔ teli etsre yɛ asɛ, “weni nɛ wɔadzyalɛ ba lɔɛtiti nɛ kede gɛ ba pɛa sɛ tɛ ba mɔ wɔ.”

²¹ Ebuilɛnu asɛ, “Meni nɛ mɛ adzyalɛ ba lɛ nu bagɛ benu Kpaya bui klɛ ba bhɛtɛ atrɔ kɛlɛabha.”

Yesu Ayɔ Kɛlɛ Gɛganɛ Nu

²² Kiwui tili Yesu etsre yɛ badɔkpasɛ nɛ asɛ, “Nɔ kɔ lɔ vɛ kɛvɔ nɛ kapɛ bhla.” So be tsoku keniabha opupu nɛ mɛ klɛ ba tɔnɔɛ dzo.

²³ Gɛ ba vɛ kɛvɔ nɛabha, Yesu avɛnɔ tra nɛ opupu nɛ mɛ. Kɛlɛ́ gɛganɛ tili tenɛfu nɛ kɛvɔ nɛabha, so buni tenɔ opupu nɛ mɛ ku klɛ ba mɔ sɛ kizizi ba ba balɛabha.

²⁴ Badɔkpasɛ ba vɛ ada nyɛmɛ yɛ, gɛ baɖɔ sɛ, “Apalete, Apalete, bu vɛ tɛ nyunɔ!” Yesu alɔ klɛ alɛɛ atrɔ kɛlɛ nɛ̀ buni dɛdaka nɛabha, kɛlɛ nɛ nu yɔ klɛ kɛni nɛabha dɔ sɛ̃.

²⁵ “Wunɔ tɛyeyɛkɛŋa nɛ hɔ̃?” ebisi yɛ badɔkpasɛ. Nɛ kifusisi nɛ kibuiyinɔanɔ be bisi ɔhaglɔ asɛ, “Ane na nɛ? Akpɛ ɔshã kɔ kɛlɛ nɛ̀ buni kuratsyɛ klɛ ba ta yɛ atɔ.”

Ɔfufɔɛ Zizi Tɛkɛka Nɛ Anɔ Tɛli Mɛ

²⁶ Be gɛ opupu nɛ avɛnɔ Gɛrasɛnisɛ be, gɛ kɛtsɔkɛ kɛvɔ denɔ Galelia.

²⁷ Gɛ Yesu ebu ɔtsrɛ atrɔ kɛgbigbe nɛabha, atsyanɛ anɔ teli gɛ ɔfufɔɛzizi tsri yɛabha denɔ ɔma nɛ mɛ. Kibe dzidze nɛɛ nɛ gɛ anyɛa nɛ ete nyumu kɛpɔtɛ ɔdɔgɔsɛ bupa mɛ yɛ aba za, pɔ bekpu ɔvubɔkɔ ko aza.

²⁸ Gɛ anɔ namɔ Yesu, akpɛ ogugu klɛ awɔlɛ adɔ Yesu otugba nɛ yɛ ɛtsrɛ nɛ shu, klɛ akpɛ ogugu gɛganɛ asɛ, “Kibui ɖuweɖu kɛlɛ lɛ bɔnɛ wɔɛ shi, Yesu, owũsise Ɖɛɖama Kpaya yɛ Yi? Ɛkpɛ kɛtɔkpuesi kɔ yɔ, tɛbhɛtɛ mɛ kizizi nyɛzizi!”

²⁹ Alasɛ Yesu atɛ kpɛ ɔshã kɔ ɔfufɔɛzizi sɛ lɔ koeyi nɛ anyɛ nɛ mɛ. Kibe gelee gɛ ɔfufɔɛzizi nɛ lɔ vu yɛ, klɛ nɛ kɛlɛ mɛ ba kpɛ yɛ buɖɛ nɛ yɛ ɛhwɛ anɛ ɛtsrɛ klɛ bè po yɛ tsyɛ aba pɔ buɖɛ klɛ ɔfufɔɛzizi lɔ bɔ gbanɛ yɛ aza nyɔ afla nɛ ɔkɔ terikpo.

³⁰ Yesu ebisi yɛ asɛ, “Kide kɛlɛ nu wɔɛ nyi?” Ebushunu asɛ “Banɔ gelegele,” alasɛ ɛfufɔɛ kpã gelee tsoku yɛ mɛ.

³¹ Klɛ ɛfufɔɛ nɛ be tsodzi akpɛ kɛtɔkpuesi kɔ Yesu sɛ atɛ kɔalɛ de tsoku Oziglobo mɛ.

³² Bahɛha tili kɛɛ ŋɛdɔ nɛ kɛtukpɛ tili shu. Ɛfufɔɛ nɛ zɛ kpɛ kɛtɔkpuesi kɔ Yesu sɛ akɔ alɛ detsoku bahɛ nɛ mɛ, klɛ adɛmɛ kɔ alɛ.

³³ Gɛ ɛfufɔɛzizi nɛ koeyi nɛ anɔ nɛ mɛ, lɛ da tsoku bahɛ nɛ mɛ, klɛ besi detsoku kɛvɔ nɛmɛ gɛ kivu alɛ.

³⁴ Gɛ ba gɛ ba gbanɔ bahɛ amɔ ebui nɛ gɛ la ba lɛmɛ, ba kpanisi avɛ ada ɖɔ ebui gɛ la ba nɛ ɔma nɛ mɛ nɛ̀ ɛlɛ ɛbha,

³⁵ klɛ banɔ nɛ avɛ sɛ tɛ be dedi kibui nɛ gɛ kɛ ba. Gɛ ba ba Yesu ɔbha, ba mɔ anɔ nɛ gɛ ɛfufɔɛzizi nɛ koeyi nɛ yɛ mɛ, aza kesi nɛ Yesu otugba nɛ yɛ butsrukpɔ nɛ shu, enyumuɛ dɔ klɛ yɛ amɛ ebhui, klɛ kifu ku banɔ.

³⁶ Bagɛ ba mɔ lɛ be tsre banɔ kana gɛ ɔfufɔɛzizi anɔ nɛ ishu bhui.

³⁷ Nɛkɛlɛ banɔ petee gɛ be de Gɛrasɛnisɛ ɛbha nɛ bisi Yesu asɛ ashɛ̃ nɛ balɛ ɔbha, alasɛ kifu ba tenɔ balɛ ku. So etsoku keniabha opupu nɛ mɛ klɛ ashɛ̃.

³⁸ Anyɛ nɛ gɛ ɔfufɔɛzizi nɛ koeyi nɛ yɛ mɛ, akpɛ kɛtɔkpuesi sɛ aba tɔnɛ yɛ avɛ, pɔ Yesu akɔ yɛ ashɛ̃, étsre yɛ asɛ,

³⁹ “Tsodzi ɔvɛ wɔɛ pi klɛ tɛ ɔdɔ ɖɔ kɛdɔ nɛ gɛ Kpaya abhɛtɛ akɔ wɔ.” So anɔ nɛ asɛ avɛ ede tsre banɔ petee kɛdɔ nɛ gɛ Yesu abhɛtɛ kɔ yɛ.

Adzɛnɛvɔɛ Tsitsi Anɛ̀ Adzɛ Nyɛnya

⁴⁰ Ɔtsɔnɛ gɛ Yesu etsodzi ashɛ̃, banɔɛza nɛ ayɛkɛ yɛ, alasɛ bè po yɛ tɛbɛba.

⁴¹ Nɛ ɔkɛlɛ anyɛ teli gɛ beklu asɛ Yerus, gɛ alɛ oxogokɔvu nɛ nu, aba dɔ nɛ Yesu butsrukpɔ nɛ shu gɛ akpɛ kɛtɔkpuesi kɔ yɛ asɛ atɔnɛ yɛ aba yɛ bupɛ mɛ,

⁴² alasɛ yɛ eyi adzɛnɛvɔɛ terikpo, gɛ ayɛkɛ anasɛ agɔ lɔfɔnɛtabha nɛ étsi. Gɛ Yesu atɔnɛ kidzo nɛ avɛ, agɔɛbɔɛ tɛ banɔɛza nɛ tii yɛ ehuesi.

⁴³ Klɛ adzɛ teli aza ɔkɛlɛ gɛ dzyosu aba yɛ shu agɔ lɔfɔnɛtabha na, pɔ anɔnyanɔ adɛ beke bunya nɛ akɔ yɛ.

⁴⁴ Aga ewu aba Yesue de klɛ ehunɔ yɛ awui nɛ butɔ, klɛ ɔkɛlɔlɛ ko yɛ dzyosu yiyi nɛ adzurɔ.

⁴⁵ Yesu ebisi asɛ “Ane yɛ hunɔ mɛ?” Gɛ balɛ petee adɛ dɛmɛ, Petro aɖɔsɛ, “Apalete, banɔ nanya klɛ betiti ishu nɛ́ wɔ shu.”

⁴⁶ Pɔ Yesu aɖɔsɛ, “Anɔ teli ehunɔ mɛ; Ɛnyi sɛ bupu koeyi nɛ mɛ shui mɛ.”

⁴⁷ Kɛlɛ adzɛ, gɛ amɔsɛ atɛ ba shɛ̃ nɛ tɛkpukpu mɛ, ekoeyi klɛ etenɔ shuku gɛ awɔlɛadɔ Yesu otugba nɛ yɛ butsrukpɔ nɛ shu. Nɛ banɔ petee amɛ, aɖɔ kibui nɔ nɛ so gɛ ehunɔ yɛ klɛ kana gɛ yɛ shu bhui nɛ́ ɔkɛlɛ ko.

⁴⁸ Kɛlɛ Yesu etsre adzɛ nɛ asɛ, “Eyiadzɛ, wɔ tɛyɛyɛkɛŋa nɛ kɔ wɔ shu bhui. Vɛ nɛ ishu yuyɔɛ mɛ.”

⁴⁹ Gɛ Yesu aka ɖɔaɖɔ nɛ ko, anɔ teli ede Yeruse bupa nɛ mɛ agɛ edi oxogokɔvu nɛabha. Aba ɖɔ sɛ, “Wɔ eyiadzɛ ne tsi.” “Tɔ kpɛ adɔkasɛ nɛ tɔ.”

⁵⁰ Gɛ enuana nɛ, Yesu aɖɔ etsre Yeruse asɛ, “To sifu; yɛkɛŋa ko, klɛ aba lɔ koeyi nɛ bu nya nɛ mɛ.”

⁵¹ Gɛ eku Yeruse bupa nɛ mɛ, adɛ kɔ anɔnyanɔ etsoku aplɛnɔ yɛ ɔdɛ Petro, Yohanɛsɛa nɛ Yakobo, anɛ̀ anuvɔ yɛaka anɛ yɛeni.

⁵² Kɛbelɛlɛ banɔ nɛ petee bakpɛ ogugu klɛ be biyo kɔ yɛ. Yesu etsre alɛ sɛ “Nɔ tɔ kpɛ ogugu, anuvɔ nɛ edi tsi pɔ tra yɛ adɔ.”

⁵³ Banɔ nɛ ba mɔ yɛ, kɛ lɛ tɛtiti mɛ sɛ etsi

⁵⁴ Pɔ anyɛna yɛ ɔhwɛ klɛ efeke yɛ gɛ aɖɔ sɛ, “Mɛ yi, lɔɛ titi!”

⁵⁵ Yɛ ɔfufɔɛ nɛ tsodzi ɔba, nɛ ɔkɛlɛ ko alɔɛ titi. Ɔkɛlɛ Yesu etsre alɛ sɛ ba pɛɛ kɛdɔ tili akɔ yɛ tɛ aŋa.

⁵⁶ Kɛbhɛtɛ yɛaka anɛ̀ yɛeni bi, pɔ etsre alɛ sɛ ba tɛɖɔ etsre anɔnyanɔ kɛdɔ nɛ gɛ abhɛtɛ.