Luka 3 - ONUGBÙ NYƐNYÃ VUVƆ

Yohanɛsɛ Enikpɛ Ewũse Kidzo

¹ Nɛ agɔ lɔfɔnɛteti nɛaba nɛ Tibɛrus Kaizaro bukusi ŋɛŋa nɛ mɛ—gɛ Pɔntio Pilato edzi ɛmadi ekusi nɛ Yuɖea, Heroɖesɛ edi ɛma bhlibhli nɛ Galelia abha, yɛadzya Filipo edi ɛma bhlibhli nɛ Iturea nɛ̀ Trakonitis klɛ Lisania edi Abilene abha—

² Kɛlɛbe gɛ kpayazakɔanɔ ɖɛɖama nɛ za Annasɛ anɛ Kayafasɛ ahwɛ, Kpaya bui nɛ ba kɔ Yohanɛsɛ Zakaria ye yi nɛ odzogbe.

³ Anyɔ kana Yɔdan amadi nɛ́ petee mɛ, aɖɔ Kpayɛbui denɔ bunikpɛ́kpɛ́ kitemɛ tsitsina kɔ ebuizizi tsyitsye.

⁴ Anasɛ gɛ baŋlɔmɛ elu nɛ Yezaya ebuiɖɔlu keplukpa nɛ mɛ asɛ: “Anɔ teli olimɛ lɔ klu nɛ ayakpa mɛ, ‘Wũse kidzo nɛ mɛ kɔ Apalete, bu kɛdzo dzyudzyɔ ɔkɔ yɛ.

⁵ Ba be tsu tisi eyuku bukana kanyaka, butu nɛ̀ kitrekpu kanyaka ba vɛesi. Edzo xɛxã be dzi adzyudzyɔ, edzo glidzyaglidzya la ba munɔ.

⁶ Klɛ banɔdzrame petee ba ba mɔ Kpaya tɛyɛyɛkɛ.’ ”

⁷ Yohanɛsɛ etsre banɔɛza nɛ gɛ ba ba sɛ tɛ akpɛ buni kɔ alɛ sɛ, “Wunɔ beblidzya tsɛtsɔmɔ! Ane yɛ tsre nɔ sɛ tɛ no bu tɛtsrɛmɛ nɛ oblo gɛganɛ gɛ lɔ bɔ ba nɛ shu?

⁸ Nɔ bhɛtɛ ebui tɛ ba mɔ sɛ nɔ tsyinaɛ temɛ. Klɛ nɔ tɛ kpɛesi ɔɖɔ tsre wunɔ nahwɛ shu sɛ, ‘Abraham ale bulɔ ahwɛ anasɛ bulɔ aka.’ Alasɛ ɛtsre nɔ sɛ denɔ aklãgbua nɛ mɛ Kpaya aba na beyi kɔ Abraham.

⁹ Kawɔɛ ka tɛ vɛ osi gu nɛesi, klɛ osi kanyaka gɛ lɔ dɛ yu eyuyu dzyɔgo ba be tẽ ɔlɛ ehuesi klɛ ba ba yɛ kɔ ɔlɛ atɛ̃ akpɛ kifui mɛ.”

¹⁰ Banɔɛza nɛ bisi asɛ, “Kɛde lɔ ba bhɛtɛ ɔtsɔnɛ?”

¹¹ Yohanɛsɛ ɛtsre alɛ asɛ, “Anɔ nɛ gɛ bawui tɛabha lɛ yɛ ahwɛ ayɛkɔ terikpo akɔ agɛ akanyaka mɛ yɛ ahwɛ, klɛ anɔ nɛ gɛ kidɔ ŋɛŋa lɛ yɛ ahwɛ abhɛtɛ ana.”

¹² Adɔdzyɔ tsyɛ ba ba sɛ tɛ bakpɛ buni kɔa lɛ. Bebisi asɛ, “Adɔkasɛ kɛde lɔ ba bhɛtɛ?”

¹³ Etsre alɛ sɛ, “Nɔ tɛ yɛkɛ ɔdɛ kana gɛ kibisi sɛ nɔ yɛkɛ.”

¹⁴ Ɔkɛlɛ keyutugbani beteli bisi yɛ asɛ, “Klɛ kɛde lɔ ba bhɛtɛ?” Etsre alɛ sɛ, “Nɔ tɔ yɛkɛ kɔba nɛ tɛgɛganɛ mɛ nɛ banɔ ahwɛ, no ti hu otro obhui banɔ nu, nɔ kɔ wunɔ kɛbhɛ ku nɔ awɔ̃.”

¹⁵ Banɔ nɛ bepo kukuku, klɛ kɛba balɛ tɔkpuimɛ sɛ ebhi Yohanɛsɛ yɛ nu Kristo.

¹⁶ Yohanɛsɛ etsre balɛ petee asɛ, “Ɛkpɛ buni kɔ nɔ nɛ buni. Pɔ kemi anɔ teli aba ba gɛ adɛ mɛ, yɛ ɔtsreklɔ ohui tsyɛ ɛdɛna gɛ ɛba bule. Yɛ aba kpɛ buni kɔ nɔ nɛ̀ Ɔfufɔɛ dzyɔgo nɛ kifu.

¹⁷ Yɛ kɛtɛ́ nɛ lɛ yɛ ahwɛ gɛ aba pɛ́ agɔnɛ akulɔ elu kesukpa, klɛ aba yɛkɔ agɔnɛ nɛ akpɛ yɛ owule mɛ, pɔ aba yɛkɔ bukulɔɛ nɛ akpɛ kifu manimani mɛ.”

¹⁸ Klɛ Yohanɛsɛ ayɛkɔ ebui bhlatɔ aɖɔ kaɖɔ gelee etsre banɔ klɛ aɖɔ kibui dzyɔgo etsre alɛ.

¹⁹ Pɔ gɛ Yohanɛsɛ aka Hɛrodes ɛma bhlibhli nɛ ekusi nɛ amɛ alasɛ ayɛkɛ Heroɖiasɛ yɛ adzyaedzini agbanɔ, nɛ̀ ebui kpã bhlatɔ petee gɛ abhɛtɛ,

²⁰ Hɛrodes ayɛkɔ kibui nɛ aplɛnɔ alɛ petee: Evu Yohanɛsɛ akpɛ buvu.

Bunikpɛkpɛ Anɛ Yesu Tɛmumɔ

²¹ Kɛbelɛlɛ gɛ ba kpɛ buni kɔ banɔ petee beke, ba kpɛ kɔ Yesu tsyɛ. Klɛ gɛ eklukpaya, owũsise danɛ

²² klɛ Ɔfufɔɛ dzyɔgo nɛ ozhi ɔba yɛabha nɛ gɔgɔwi tɛzɛza mɛ. Klɛ olimɛ toli oyi denɔ owũsise sɛ: “Wɔ nu mɛ Eyianyɛ, gɛ ɛdɛmɛnɔ, nɛ wɔ shu same eku mɛ mɔmɔ.”

²³ Ɔtsɔnɛ Yesu nahwɛ aba yɛkɛ́ anasɛ agɔ afata gɛ akpɛ yɛ kɛxwɛ wɛwaesi. Edzi eyianyɛ, so bɛdi yɛ asɛ Yosɛfu yɛeyi, Yosɛfu, Heli yɛeyi,

²⁴ Heli Mattat yɛeyi, Mattat Lewi yɛeyi, Lewi Melki yɛ eyi, Malki Yannai yɛeyi, Yannai Yosɛfu yɛeyi

²⁵ Yosɛfu Mattatias yɛeyi, Mattatias enu Amos yɛeyi, Amos Nahum yɛeyi, Nahum Esli yɛeyi, Esli Naggai yɛeyi,

²⁶ Naggai Maaft yɛeyi, Maaft Mattatias yɛeyi, Mattatias Sɛmɛin yɛeyi, Sɛmɛin Yosɛk yɛeyi, Yosɛk Yuɖa yɛeyi,

²⁷ Yuɖa Yoanan yɛeyi, Yoanan Resa yɛeyi, Resa Zerubbabɛl yɛeyi, Zerubbabɛl Shɛltiɛl yɛeyi, Shɛltiɛl Neri yɛeyi

²⁸ Neri Mɛlki yɛeyi, Mɛlki Addi yɛeyi, Addi Kosam yɛeyi Kosam Ɛlmadam yɛeyi, Elmadam Ɛr yɛeyi,

²⁹ Ɛr Yosua yɛeyi, Yosua Eliza yɛeyi, Eliza Yorim yɛeyi, Yorim Mattat yɛeyi, Mattat Lewi yɛeyi,

³⁰ Lewi Simeon yɛeyi, Simɛon Yuɖa yɛeyi, Yuɖa Yosɛfu yɛeyi, Yosɛfu Yonam yɛeyi, Yonam Eliakim yɛeyi,

³¹ Eliakim Melea yɛeyi, Melea Menna yɛeyi, Menna Mattata yɛeyi, Mattata Natan yɛeyi, Natan Daviti yɛeyi,

³² Daviti Yesse yɛeyi, Yesse Obeti yɛeyi, Obeti Boaz yɛeyi, Boaz Salmonɛ yɛeyi, Salmonɛ Nasyon yɛeyi,

³³ Nasyon enu Amminadab yɛeyi, Amminadab enu Ram yɛeyi, Ram enu Hezrɔn yɛeyi, Hezrɔn enu Pɛrɛz yɛeyi, Pɛrɛz Yuɖa yɛeyi,

³⁴ Yuɖa Yakobo yɛeyi, Yakobo Isaka yɛeyi, Isaka Abraham yɛeyi, Abraham Tɛra yɛeyi, Tɛra Nahɔ yɛeyi,

³⁵ Nahɔ Sɛrug yɛeyi, Sɛrug Rew yɛeyi, Reu Pɛlɛg yɛeyi, Pɛlɛg Ebɛ yɛeyi, Ebɛ Shila yɛeyi,

³⁶ Shila Kainan yɛeyi, Kainan Afaxaɖɛ yɛeyi, Afaxaɖɛ Shɛm yɛeyi, Shɛm Noa yɛeyi, Noa Lamɛke yɛeyi,

³⁷ Metusala yɛeyi, Metusala Enɔkɛ yɛeyi, Enɔkɛ Yarɛd yɛeyi, Yarɛd Mahalalɛl yɛeyi, Mahalalɛl Kenan yɛeyi,

³⁸ Kenan Enosh yɛeyi, Enosh Seti yɛeyi, Seti Aɖam yɛeyi, Aɖam Kpaya yɛeyi.