Luka 23 - ONUGBÙ NYƐNYÃ VUVƆ

¹ Ɔkɛlɛ banɔ petee bexogo klɛ ba gbanɔ Yesu ekoeyi avɛnɔ Pilato ɔkɔ.

² Klɛ be tenɔ kibui yɛkɔ nɛ yɛ shu aɖɔ sɛ, “Bu mɔ anyɛ anɛ gɛ alɔɛ titi nɛ bulɔ ɔma nɛ shu. Alɔɛ titi nɛ kadzɔ kukɔ kɔ Kaizaro klɛ abhɛtɛ yɛ shu sɛ yɛ enu Kristo ekusi.”

³ Pilato ebisi Yesu asɛ, “Wɔ nu Yuɖa nɛ ekusi?” Yesu ebushunu sɛ, “Ee, kɛlɛ anasɛ gɛ ɔɖɔ.”

⁴ Ɔkɛlɛ Pilato etsre kpayazakɛanɔ bekusi nɛ̀ banɔɛza asɛ, “Ɛdɛ mɔ kizizi gɛ ɛba yɛkɔ nɛ yɛ shu.”

⁵ Pɔ ba za lɛabha sɛ, “ Akpɛ ebla nɛ banɔ petee gɛ balɛ Yuɖea shi ganɔ yɛ kɛdɔkɛkasɛ mɛ. Akpɛesi nɛ Galelia klɛ atɔnɛ dzo aba ɔkɛ̃ nɛ.”

⁶ Gɛ Pilato enu kibui nɛ, ebisi asɛ, Anyɛ anɛ Galelia eyi enu.

⁷ Gɛ amɔ sɛ, Yesu ede ɔma nɛ gɛ lɔza Heroɖesɛ kabhaŋɛŋa esi, ayɛkɔ yɛ asɛsɛ Heroɖesɛ, gɛ yɛ tsyɛ aza Yerusalɛm nɛ kibe lɛlɛ.

⁸ Gɛ Heroɖesɛ amɔ Yesu, same ku yɛ alasɛ kibe dzidze nɛ gɛ apɛɛ yɛ asɛ tɛ amɔ. Denɔ ebui gɛ enu nɛ yɛ shu, edi kɛdzoenu sɛ tɛ amɔ yɛ abhɛtɛ ebuiyinɔanɔ teli.

⁹ Ebisi yɛ ebui gelee, pɔ Yesu ede bu alɛ nu.

¹⁰ Kpayazakɔanɔ bekusi anɛ ɛshã badɔkasɛ ba za ɔkɛlɛ, gɛ bebhui yɛ nu gɛganɛganɛ.

¹¹ Ɔkɛlɛ Heroɖesɛ nɛ̀ yɛ keyutugbani bakpɛ yɛ tsɔ klɛ ba kpɛ yɛ wɔɛ̃. Ba yɛkɔ kedziŋɛŋa awui dzidze akpɛ kɔ yɛ, klɛ betsidzinɛ yɛ avɛnɔ Pilato ɔkɔ.

¹² Denɔ kiwui lɛlɛ nɛabha Heroɖesɛ nɛ Pilato be dzi ɔbhɛa—flogo kibui lɛ nɛ ba badɛ pɛɛ ɔhaglɔ bui.

¹³ Pilato eklu exogo, kpayaɔzakɔanɔ ekusi, bamani nɛ̀ banɔ,

¹⁴ klɛ aɖɔ tsre alɛ sɛ, “Nɔ mɛna mɛ anyɛ anɛ anasɛ agɛ akpɛ banɔ sɛ tɛ balɔ kititi nɛ ɔma nɛ shu. Ɛnyɔ yɛ shu nɛ wunɔ amɛ klɛ ɛdɛmɔ kɛ gɛ lɛ so gɛ nɔyɛkɔɛbui nɛ yɛ shu.

¹⁵ Heroɖesɛ tsyɛ adɛ mɔ, alasɛ etsodzi yɛ asɛsɛ lɔ; anasɛ gɛ wunɔ nɔ mɔ, adɛ bhɛtɛ kibuinyɛbui gɛ kɛbakɔ sɛ aba mɔ butsi.

¹⁶ Klɛso ɛba tɛta yɛ klɛ kɛlɛede ɛba shɛnahwɛ yɛ shu.”

¹⁷ (Alasɛ tɛ Pilato ashɛnahwɛ anɔ terikpo shu ɔkɔ alɛ nɛ Kiwui ŋɛŋa nɛabha).

¹⁸ Balɛ petee bakpɛ ogugu gɛganɛ kɛtsu asɛ, Nɔ shɛnɔ anyɛanɛ! Shɛnahwɛ Barabasɛ shu kɔ lɔ!”

¹⁹ (Barabas enu anɔ gɛ be vu akpɛ buvu sɛ akpɛ ogugu nɛ ɔma nɛ tɔkpu klɛ eyi anɔ.)

²⁰ Pilato apɛɛ asɛ tɛ ahɛnahwɛ Yesu shu, so eze bisi denɔ balɛ ahwɛmɛ bubhla.

²¹ Pɔ ba ka kpɛ lɛ ogugu asɛ, “Kplayɛɔsɔ! Kplayɛɔsɔ!”

²² Bu tramɛ aɖɔaɖɔ etsre alɛ: “Kideso? Kibuikpã ɖuweɖu anɔa nɛ abhɛtɛ? Ɛdɛ mɔ kɛ gɛ kɛlɛ shu le be bu yɛ butsi pɔ. Kɛlɛso ɛba kɔ la tɛta yɛa tɔ klɛ ɛba shɛnahwɛ yɛ shu.”

²³ Pɔ nɛ balɛ ogugu nɛ za kɛlɛa bha gɛganɛ klɛ lɛ ba ŋa.

²⁴ So Pilato aba dɛmɛ kibui nɛabha akɔ alɛ.

²⁵ Ashɛnahwɛ anɔ nɛ gɛ bevu akpɛ buvu gɛ alɔɛtiti nɛ bekusi nɛ shu pɛ̀ eyianɔ nɛ shu, klɛ ayɛkɔ Yesu akɔ alɛ nɛ balɛ tɛpɛpɛɛ nɛ nu.

Yesu Tɛkpɛkplasɔ

²⁶ Gɛ ba gbanɛ yɛ ashɛ̃nɔ, be vu Simɔn gɛ ede Sirene, gɛ ede kɔxɔemɛ avɛ ɔma nɛ mɛ, klɛ ba yekɔ butsiosi nɛ atrɔ yɛ klɛ ba kɔ yɛ etuku ɔlɛ gɛ aza Yesu kede.

²⁷ Banɔ gelee aza yɛede, gɛ badzɛ aza balɛ mɛ gɛ be biyo nɛ igugu gɛganɛ kɔ yɛ.

²⁸ Yesu etsyina klɛ aɖɔ tsre alɛ sɛ, “Yerusalɛm Badzɛ, nɔ tɔ biyo kɔ mɛ; nɔ biyo kɔ wunɔshu nɛ̀ wunɔ yialɛ shu.

²⁹ Alasɛ kibe ba ba gɛ nɔ bɔ ɖɔ sɛ, ‘Tɛyuyula lɛ kɔ badzɛ gɛ ba dɛmɔ eyi, ɛmumɔhwui gɛ lɛ kamɔ di nɛ amɔ gɛ la kanyɔnɔ beyi edi!’

³⁰ Ɔkɛlɛ “ ‘Ba baɖɔ ɛtsre betu nɛ sɛ, “Kpa trɔ blɔabha!” klɛ kɔ ɛtukpɛ, “Kumu lɔ!” ’

³¹ Kɛlɛ onugɛ banɔ babhɛtɛ ebui anɛ nɛ osi wuwɔ shu, kɛlɛ lɛ ba za kɔ ɔkpɛkpã?”

³² Banɔ tɛabha bhlatɔ be di tabha bɛ nu buzizi abhɛbhɛtɛ, balɛ tsyɛ ba gbanɛ akɛ aplɛnɔ yɛ sɛ tɛ ba de yi.

³³ Gɛ beku ɔzakɔ gɛ beklu asɛ Kɛtɔkpuxwa, ɔkɛlɛ be yi Yesu, nɛ banɔ tɛabha—terikpo alɛ ye kɛŋa nɛ mɛ, abhla na lɛ yɛ kebhɛtɛkpɛ mɛ.

³⁴ Yesu aɖɔ sɛ, “Aka, yɛkɔtsye alɛ, alasɛ be tinyi kɛdɔ nɛgɛ ba bhɛtɛ.” Klɛ ba yɛkɔ yɛ dɔkpɛkpɛ akɔ ɔhaglɔ nɛ kebisi nɛ nu.

³⁵ Banɔ lɔkititi edi yɛ, klɛ ba gɛ baŋa abha ba bu onugbu mɛ nɛ yɛ shu. Ba ɖɔ sɛ, “Ebhui ba bhlatɔ ayɛkɛ, nɔ kɔ yɛ ebhui shu ayɛkɛ onugɛ enu Kristo Kpaya Ekuklu.”

³⁶ Betugbani tsyɛ ba ba klɛ ba ba kpɛ yɛ butsyɔ. Ba bakɔ yɛ bulu gɛganɛ,

³⁷ klɛ ba ɖɔ sɛ, “Onugɛ wɔ nu Yuɖanɛ nɛ ekusi, bu shu.”

³⁸ Ba ŋlɔmɛ dɔ atrɔ yɛ ada nɛ mɛ gɛ kɛ ɖɔ sɛ, Ye Nu Yuɖanɛ Ekusi.

³⁹ Bezizi nɛ mayɛ teli gɛ banya yɛ asɔ nɛ ɔkɛlɛ, aɖɔ kɛbui akula Yesu asɛ: “Anɛ wɔ nu Kristo? Bu shu klɛ tɛ obu lɔ!”

⁴⁰ Pɔ anɔ akpã abhla akpa yɛ asɛ, “Oto si Kpaya fu, aɖɔ sɛ, nɛɛ lɛ mɛ otinyi sɛ ɔlɛ kɛpɔ bubui lɛlɛ nɛ mɛ?

⁴¹ Ba tɛta lɔ batɔ nɛ kidzo dzyɔgo abha, alasɛ bu yɛkɛ kɛgɛ bulɔ ebui bhɛbhɛtɛ nɛ ebisi. Pɔ anyɛa nɛ adɛ bhɛtɛ kibui zizi.”

⁴² Klɛ aɖɔ sɛ, “Yesu, baka mɛ bui kibenɔ nɛ gɛ odoku wɔ bukusiɔŋakɔ.”

⁴³ Yesu etsre yɛ asɛ, “Itsre wɔ kɛgbɛagba sɛ obonɛ ɔbɔ za mɛ ɔbha nɛ paraɖiso nɛ mɛ.”

Yesu Yɛ Butsii

⁴⁴ Ɔtsɔ̃ nɛ aba za anasɛ ɔɖatɛta ohlomi klɛ otumu ɔdɔ nɛ kesukpa petee abha ɔdɔtɔnɔ ɔɖɔtɛta ozhita nɛ abha,

⁴⁵ alasɛ kiwui nɛ zɛkɔlɔ tã. Klɛ kɛpɔtɛ nɛ gɛ kɛ bhui kpayavu nɛ mɛ kɛ tsyɔɛ̃ kpɛ ɛkɔtɛbha.

⁴⁶ Yesu akpɛ ogugu nɛ olimɛ gɛganɛ sɛ, “Aka, wɔ ahwɛmɛ Ɛyɛkɔ mɛ ɔfufɔɛ nɛ kpɛ.” Gɛ aɖɔ kibuinɛ beke afɔɛ yɛ ɔfufɔɛ gugɔɛ.

⁴⁷ Keyutugbani anɔ gbɛgbla, gɛ amɔ ebui gɛ la ba ba, akpɛ Kpaya kɛtɔkpu nɛabha klɛ aɖɔ sɛ, “Kɛgbɛagba anɔ dzyɔgo yɛ edzi.”

⁴⁸ Gɛ banɔ petee gɛ ba be xogo sɛ tɛ ba bedi ɔzakɔ anɛ ba mɔ kɛ gɛ ba bɛ lɛmɛ, bayɛkɔ ɛhwɛ atrɔ ete mɛ klɛ ba shɛ̃.

⁴⁹ Pɔ banɔ petee gɛ bɛ nyi yɛ, ɔyɛkɔ plɛnɔ badzɛ nɛ gɛ ba za yɛ dɛ denɔ Galelia, baza odzidzekɔ, edi ebui.

Yesu Tɛvuvubɔ

⁵⁰ Ɔtsɔ̃ nɛ anyɛ teli gɛ be klu sɛ Yosɛfu, enu Bamani teli, adzyɔgo klɛ yɛ shu bhui,

⁵¹ agɛ adaa dɛmɛ atrɔ balɛ ebui ɖɛɖɔ anɛ̀ tɛ bhɛbhɛtɛ nɛabha. Ede Yuɖea ɔma toli gɛ be klu asɛ Arimatia klɛ epo Kpaya bukusiɔŋakɔ.

⁵² Avɛ Pilato ɔkɔ klɛ ede bisi asɛ ba yɛkɔ Yesu tsitsi nɛ akɔ yɛ.

⁵³ Ede bu yɛ nɛ butsiosi nɛ shu amɛna kesi, anya yɛ akpɛ kɛpɔtɛ frɛrɛ mɛ klɛ ada vubɔɛ yɛ nɛ odzre gɛ be bu nɛ kɛklãngbu mɛ, ɔlɛmɛ gɛ baka vubɔ anɔ nɛ ɔkɛlɛ di.

⁵⁴ Kɛnu Tɛbɛbala Kiwui, klɛ Kimuenewi nɛ ba kpɛe si.

⁵⁵ Badzɛ nɛ gɛ ba za Yesu ede denɔ Galelia ba tɔnɔ Yosɛfu klɛ ba da mɔ odzre nɛ̀ kɛvubɔ nɛ gɛ ba vubɔɛ yɛ.

⁵⁶ Badzɛ nɛ ba shɛ̃ avɛ bupa mɛ klɛ ba da bhɛtɛ bawa gɛ ba lɔ̃ huhuhu. Pɔ be moene nɛ Kimuenewi nɛabha tɛ ba yɛkɔ ata ɔshã nɛ atɔ.