Luka 20 - ONUGBÙ NYƐNYÃ VUVƆ

Yesu Kabhaŋɛŋa Nɛ Odekɔ

¹ Kiwui tirikpo gɛ Yesu àkasɛ dɔ nɛ Kpaya busɔlɛvu ka nɛ mɛ klɛ aɖɔɛ̀ kibui dzyɔgo, Kpaya ɔzakɔ banɔ, ɛshãbadɔkasɛ anɛ banɔ shishe gɛ ba ba yɛ ɔbha.

² Be bisi yasɛ, “Tsre lɔ kabhaŋɛŋa ɖuweɖu ɔyɛ kɔ wa axwɛ nɛ nɔ.” “Ane ya kɔ wɔ bupu nɛ?”

³ Ebushunu sɛ, “Mɛ tsyɛ ɛbabisi nɔ kibui nɛ. Tsre mɛ,

⁴ Yohanɛsɛ Bunikpɛkpɛ—owusise bude pɛnɔ Anɔdzyrame ɔkɔ?”

⁵ Balɛ kpɛkpa baɖɔɛ lɛ nɛ balɛ mɛ klɛ baɖɔ sɛ, “Onugɛ bu ɖɔ sɛ, ‘Bu de Kpaya kɔ,’ ebebisi asɛ, ‘Kideso gɛ nɔ yɛkɛ yɛabha ŋa?’

⁶ Pɔ onugɛ bu ɖɔ sɛ, ‘Bu de Anɔdzyrame ɔkɔ,’ banɔ nɛ petee gɛ balɛ ɔkɛlɛ ba be hu lɔ aklãgbu, alasɛ ba yɛkɛŋa sɛ Yohanɛsɛ edzi atɔnu.”

⁷ Klɛso bebushunu asɛ, “ Bu tɛ nyi ɔkɔnɔ nɛ gɛ bude.”

⁸ Yesu aɖɔsɛ, “Mɛ tsyɛ ɛtɛ ba tsre nɔ ɔkɔnɔ nɛ gɛ edenɔ bupu nɛ gɛ ɛyɛkɔ bhɛtɛ alɛ nɔ.”

Kɛkpalɛ Nɛ Anɔ Gɛ Edi Buyɛabha Shu

⁹ Avɛ lɛabha klɛ akpɛ kɛkpalɛ ne akɔ alɛ sɛ, “Anɔ tɛli adɛ vãyɛ̃ buya, ayikɔ lɛ akɔ bayadɛ teli sɛ tɛ ba zagɔ tɛ aba buya kɛbhɛ nɛ bɔlɛ tɔkpu, klɛ ashɛ̃ kibe dzidze.

¹⁰ Nɛ vãyɛ̃ tɛgugɔɛ be, akpɛ axwɛdɛ nɛ ba gɛ bedi buya nɛabha so sɛ tɛ ba kɔ yɛ vãyɛ̃ eyuyu teli edenɔ buya nɛ mɛ. Pɔ buya abha bedidi be tu yɛ klɛ ba kɔ yɛ ashɛ̃ nɛ ahwɛ kpɛkpa.

¹¹ Akpɛ axwɛdɛ bhlatɔ, pɔ be tu yɛ tsyɛ klɛ bakpɛ yɛ wuɛ̃ klɛ ba kɔ yɛ ashɛ̃ nɛ ɛhwɛ kpɛkpa.

¹² Aza sɛsɛ anɔ tramɛ, klɛ ba kpɛ yɛ apɔ klɛ ba tɛ̃ yɛ ekoeyi.

¹³ “Ɔkɛlɛ ayalete nɛ aɖɔ asɛ, ‘Kide mɛ babhɛtɛ?’ Ɛba sɛsɛ mɛ yi, gɛ yɛ bui mɛ pɛɛ, ebhi kifuba ku alɛ nɛ yɛ.’

¹⁴ “Pɔ gɛ bayadɛ nɛ amɔ yɛ, ba ɖɔ nɛ aglɔ, “Yɛ nu agɛ aba ŋa kede dɔ nɛ na. ‘Nɔ kɔ lɔ yi yɛ, tɛ yɛ ɔŋakɔ nɛ bɔ dzi bulɔɛ yɛ.’

¹⁵ Kɛlɛso be bu yɛ atɛ̃ nɛ buya nɛ mɛ, klɛ be de yi yɛ. Yesu ebisi asɛ Kide ɔtsyɔ nɛ buya lete aba bhɛtɛ nɛ alɛ?

¹⁶ Aba ba klɛ abe yi bagɛ bedi buya nɛabha klɛ aba yɛkɔ buya nɛ akɔ ba bhlatɔ.” Gɛ banɔ ne nu kibui nɛ ba ɖɔsɛ, “Kɛnɛ kɛtɛ bɛ lɛ mɛ!”

¹⁷ Yesu edi balɛ amɛ klɛ ebisi asɛ, “Kɛlalɛ kide kɛlɛ nu kibui nɛesi gɛ baŋlɔmɛ: “ ‘Kɛklãngbu nɛ gɛ bevudzu nɛ ashɛ̃nahwɛ lu kɛ badzi odrekekpu kɛklãngbu’

¹⁸ Anɔnyanɔ gɛ adɔ oboe nɛ kɛklãgbu lɛlɛ nɛabha ebe dzyini bugunugunu, pɔ agɛ yɛ abha kɛklãgbu nɛ wɔlɛ dɔ aba hɔ.”

¹⁹ Ɛshã dɔkasɛ nɛ kpayaɔzakɔanɔ ekusi ba pɛɛ kidzo sɛ tɛ be vu Yesu tsyiɔ̃, alasɛ be nyi asɛ akpɛ kɛkpalɛ nɛ alɔɛtiti nɛ balɛ shu. Pɔ be sifu nɛ banɔ nɛ gɛ ba za ɔkɛlɛ nɛ shu.

Ɔma Kɔbayɛyɛkɛ Kɔ Kaizaro

²⁰ Awɔ̃hu tɛtrɔ yɛ abha, bakpɛ banɔ sɛ tɛ baxwa yɛ, tɛ ba bhɛtɛ anasɛ banɔ dzyɔgo. Ba yɛkɛŋa sɛ tɛ be vu Yesu nɛ yɛ bui ɖuɖɔ tili shu tɛ ba yikɔ yɛ akɔ kemi nɛ kabhaŋɛŋa Roma Ekusi.

²¹ So ba gɛ baxwua anɔ nɛ bebisi yɛ asɛ: “Adɔkasɛ, bu nyi sɛ ɔɖɔ kibui klɛ ɔkasɛ kɛ gɛ nu gbɛagba, klɛ ɔtɛ tsyina kibui okumu pɔ ɔkasɛ banɔ Kpaya bui nɛ kidzo gbɛagba abha.

²² Kɛ lɛ kidzo abha sɛ bu kɔ ɔmakɔba Kaizaro, pɔnɔ batɛ kɔ?”

²³ Yesu amɔ aganɔ balɛ bushɛwuwa klɛ etsre alɛ sɛ,

²⁴ “Kasɛ mɛ dinario. Ane amɛ nɛ kinyi kɛlɛ tsiri yɛ abha?”

²⁵ Be builɛnu sɛ, “Kaizaro ayɛ.” Aɖɔ etsre alɛ sɛ, “Kɛlalɛ nɔ kɔ Kaizaro kɛgɛ nu Kaizaro yɛ, klɛ kɔ Kpaya kɛgɛ nu Kpaya yɛ.”

²⁶ Ba de na yɛ evu nɛ yɛ ebui nɛ gɛ aɖɔ nɛ banɔ nɛ amɛ. Klɛ kɛbhɛtɛ balɛ bi nɛ yɛ ishunu bubu so, beku omumu.

Tɛnyɛnyɛmɛ Anɛ Adzɛ Gbɛgbanɔ

²⁷ Sadusianɛ teli, gɛ baɖɔ sɛ tɛnyɛnyɛmɛ de bekpuimɛ ma, ba ba Yesu ɔbha nɛ tɛbibisi.

²⁸ Ba ɖɔ sɛ, “Adɔkasɛ, Mose aŋulɔmɛ kɔlɔ sɛ onugɛ anɔ teli yɛ adzya etsi alɔ yɛedzini pɔ beyi ma balɛ ahwɛ, anɔ agbanɔ adzɛ nɛ gɛ etsianyɛ klɛ tɛ amɔ beyi kɔ ya dzya.

²⁹ Ɔtsyɔnɛ badzya tiegɛnɛ baza. Atɛtɔpu agbanɛ adzyɛ klɛ adɛ mɔ beyi flogo gɛ etsi.

³⁰ Abhla

³¹ klɛ nɛlɛede atramɛ agbanɛ adzyɛ, klɛ nɛ kidzo lɛlɛ nɛabha egigenemi nɛ etsi adɛ mɔ eyi.

³² Gugɔɛ, adzyɛ nɛ tsyɛ etsi.

³³ Ɔtsɔ̃ nɛ nɛlɛe de, tɛnyɛnyɛmɛ nɛ́ bekpuimɛ ane yɛedzyini adzɛ ebe dzyi, gɛ banɔ tiegene nɛ petee bagbanɛ yɛ?”

³⁴ Yesu ebushunu asɛ, “Kanɔanɛ mɛ banɔ ba gbanɔ adzyɛ klɛ ba yikɔ badzɛ akɔ sɛ tɛ bagbanɔ.

³⁵ Pɔ bagɛ ba mɔ sɛ bupu lɛ balɛ ahwɛ sɛ tɛ babhɛtɛ ebui nɛ kanɔanɛ lɛlɛ mɛ klɛ nɛ tɛnyɛnyɛmɛ denɔ bekpui mɛ ba tɛ ba gbanɔ adzyɛ pɛnɔ ba yɛ kɔ akɔ tɛ gbɛgbanɔ

³⁶ klɛ be tie tsi, alasɛ bedzi anasɛ axwɛdɛ. Be nu Kpaya ye yialɛ, nɛ kibe lɛlɛ gɛ be dzi banɔ nyɛnyɛmɛ denɔ bekpui mɛ.

³⁷ Pɔ nɛ tɛwa wuwɔ tɛ tɛtã nɛ mɛ Mose akasɛ sɛ betsitsi tsyɛ ba nyɛmɛ, alasɛ ɛklu Apalete nɛ asɛ, ‘Abraham Kpaya, nɛ Isaka Kpaya, nɛ Yakobo Kpaya.’

³⁸ Anɛ betsitsi nɛ Kpaya, pɔ belulu nɛ ayɛ, alasɛ nɛyɔkɔ balɛ petee balɛ nɛ kpã.”

³⁹ Ɛshã badɔkasɛ teli baɖɔ sɛ, “Ɔɖɔaɖɔ, adɔkasɛ!”

⁴⁰ Klɛ anɔnyanɔ adɛ na kibuinyɛbui ebisi yɛ.

Ane ye Yi ye nu Kristo?

⁴¹ Ɔkɛlɛ Yesu etsre alɛ asɛ, “Fakɔ lɛde gɛ ba ɖɔ sɛ Kristo Daviti ye Yi?

⁴² Daviti nahwɛ aɖɔ nɛ yɛ Ɛdzyɛ Keklupkpa nɛ mɛ: “ ‘Apalete aɖɔ tsre mɛ Apalete: “Za mɛ kɛŋa hwɛ nɛ mɛ

⁴³ ɔdɔtɔnɔ kibenɔnɛbe gɛ ɛbhɛtɛ ba gɛ bata pɛɛ wɔebui katsrɛkpɔɛ gbu kɔ wɔ butsrukpɔ.”

⁴⁴ Daviti eklu yɛ sɛ ‘Apalete.’ Kɛlɛ ezie dzi ye yi?”

⁴⁵ Kɛbelɛlɛ gɛ banɔ petee ba tatɔ, Yesu etsre yɛ badɔkpasɛ asɛ,

⁴⁶ “No di ishuabha denɔ Ɛshã badɔkasɛ nɛ shu. Ba pɛɛ asɛ tɛ be nyumu kɛdɔ gbɛgbla tɛ ba za ga nyɔ klɛ tɛ banɔ ba za sɛnɔ alɛ nɛ budzi gbɛgbla mɛ klɛ tɛ ba yɛ kɛ ɔzakɔ gbɛgbla nɛ ɛxogokɔvu nɛ mɛ nɛ̀ kɛdɔŋakɔ gbɛgbla.

⁴⁷ Ba yɛkɔ banyɛtsi bupa mɛ ɔbhɛtɛ balɛ ɔzakɔ klɛ ba yɛkɔ kpayakuklu dzidze akasɛ ishu nɔ. Banɔ alɛlɛ nɛdi bá ba tɛta balɛ bátɔ tsutsɔmɔ tsutsɔmɔ.”