Luka 19 - ONUGBÙ NYƐNYÃ VUVƆ

Zaxeo Adɔdzyɔ

¹ Yesu etsoku Yɛriko klɛ àga afla.

² Anyɛ teli aza ɔkɛlɛ gɛ be kplu asɛ Zaxeo, edzi adɔdzyɔ gbɛgbla klɛ edzi ehoelete.

³ Apɛɛ asɛ tɛ amɔ Yesu anɔ nɛ gɛ enu, pɔ gɛ edzi anɔ gɛ adɛ ɖama so adɛ mɔ yɛ alasɛ banɔ nɛ kpe.

⁴ Kɛlɛso akpanisi eputɔ avɛ ede wu sikamɔ-kabhɔ osi tɛ amɔ yɛ, alasɛ kidzo lɛlɛ nɛabha Yesu aba ga.

⁵ Gɛ Yesu eku ɔkɛlɔlɛ, ɛdi kabha klɛ etsre yɛ asɛ, “Zaxeo, zhi ɔba ɔtsɔtsiɔ̃. Ɛbaza wɔ bupaɛmɛ obonɛ.”

⁶ Klɛ ezhi aba klɛ ayɛkɛ yɛ nɛ same.

⁷ Banɔ nɛ petee gɛ bamɔ kibui nɛ klɛ betenɔ onugbu akpɛ kesi kɔ yɛ asɛ “Avɛ sɛ tɛ ada tsɛ nɛ ‘ebuizizi elete’ ɔkɔ.”

⁸ Pɔ Zakio alɔ kititi klɛ aɖɔ etsre Apalete asɛ, “Di, Apalete! Ɔkɛnɛ klɛ ɔtsyɔnɛ Ɛba yɛkɔ mɛ ehoeyi kapɛ zɛzɛ ɔkɔ betsutsuini, klɛ onugɛ ezuru anɔ teli kɔba nɛ kidzo ziziabha, ɛba tsodzi buya kɔba lɛlɛ ɛzakɔ tɛlɛ̃.”

⁹ Yesu etsre yɛ sɛ, “Obo nɛ tɛyɛyɛkɛ ba kɔ bupa nɛ, alasɛ anɔ anɛ, tsyɛ, enu Abraham ye yi.

¹⁰ Alasɛ Anɔdzyrame Yi aba sɛ tɛ aba pɛɛ klɛ tɛ evu kɛgɛ lɛla nɛ edzu.”

Kɛkpalɛ Denɔ Kɔba Lɔfɔ Shu

¹¹ Kɛlɛbe nɛ gɛ ba tatɔ ebui nɛ Yesu avɛ lɛabha etsre alɛ kɛkpalɛ, alasɛ etsobunɔ Yerusalem, klɛ banɔ nɛ ayɛkɔ asɛ Kpaya kusiɔŋakɔ nɛ ba koeyi ba ɔtsɔtsiɔ̃.

¹² Aɖɔse, “Anɔgli teli avɛ odzidzɛkɔ ma toli mɛ sɛ tɛ ada ŋa bukusi tɛ etsodzi aba.

¹³ Kɛlɛso eklu yɛ baxwɛdɛ lɔfɔ klɛ akɔ alɛ kɔba lɔfɔ klɛ asɛ ‘nɔyɛkɔ ɔkpɛ kɛxwɛ wuwɔɛmɛ,’ ‘ɔdɔnanɔ mɛ tɛ bɛ ba.’

¹⁴ “Pɔ nɛ yɛnahwɛ banɔ gɛ ba dɛ pɛɛ yɛ bui nɛada kpɛ banɔ nɛ yɛede sɛ bede tsre ba gɛ bedzu yɛ bukusi nɛ asɛ, ‘butɛ pɛɛ anyɛanɛ sɛ tɛ ebedzi bulɔ ekusi.’

¹⁵ Pɔ be dzu yɛ bukusi nɛ flogo pɛ etsodzi aba kepi. Klɛ ebe klu banɔ nɛ gɛ akɔ kɔba sɛ tɛ be be tsre yɛ kɛwa nɛ gɛ bawa kɔba nɛ shuɛxwɛ.

¹⁶ “Atɛtɔpu aba klɛ aɖɔsɛ, ‘Apalete wɔ kɔba amɔtrɔ yɛabha edi lɔfɔ.’

¹⁷ Apalete nɛ aɖɔ sɛ, “ ‘Wɔ bhɛtɛ bui ma xwɛdɛ dzyɔgo!’ ‘Alasɛ ɔbhɛtɛ tɛyɛyɛkɛŋa bha bui nɛ kibhliyi mɛ, so za ɛma gbɛgbla lɔfɔ lɛ nu.’

¹⁸ Abhla naba klɛ yɛ asɛ ‘Apalete’ wɔ kɔba nɛ gɛ ɔkɔ mɛ nɛ amɔtrɔ ɛzakɔ titi.

¹⁹ “Yapalete yɛ atsre asɛ ‘di ema gbɛgbla titiabha.’

²⁰ “Kɛlɛ axwɛdɛ bhlatɔ aba se, ‘Apalete’ wɔ kɔba nɛ naa, edabala yɛ nɛ keputakpa mɛ.

²¹ Esi wɔ fu, alasɛ onu anɔ gɛganɛ. Ɔyɛ kɔ nɛ ɔklɛ gɛ oduluidɔ klɛ obuidɔ nɛ ɔkɛlɛ gɛ ɔdɛ ɖa kɛdɔ.

²² “Yapaletenɛ aɖɔsɛ, ‘ɛbe kulu kebhui nɛ wɔ nɛ wɔnahwɛ kibui nɛ gɛ ɔɖɔ nɛ shu, axwɛdɛ kɛtɔkpu mɛ gɛganɛ anɔ wɔ nu! Onyi sɛ, anɔ gɛganɛ mɛ nu, ɛyɛkɔ kɛdɔ nɛ ɔkɛlɛ gɛ ɛdɛ lu klɛ ɛbu kɛdɔ nɛ ɔkɛlɛ gɛ ɛdɛ ɖa?

²³ Kɛdeso gɛ ɔdɛyɛkɔ kɔba nɛ odo lu ɔkɛlɛ gɛ aba mɔ trɔ pɛ ɛba ba yɛkɛ?’

²⁴ “Kɛlɛ aɖɔ etsre ba gɛ ba lɔ kititi nɛ ɔklɛ nɛ asɛ, ‘Yɛkɛ kɔba nɛ yɛ ahwɛ tɛ ɔyɛkɔ ɔkɔ anɔ nɛ gɛ yahwɛ kɔba kɛfɔ nɛ alɛ.’

²⁵ Ba nɔ nɛ baɖɔ asɛ, “ ‘Apalete,’ kɔba lɔfɔ lɛ yɛ ahwɛ xɔɔ̃!’

²⁶ “Ɛbushunu asɛ, ‘ɛtsre nɔ sɛ, anɔnyanɔ gɛ kɛdɔ lɛ ya hwɛ, gelee la za ba yɛkɔ kɛdɔ akɔ, pɔ anɔ nɛ gɛ kɛdɔnyɛdɔ ma ya hwɛ, kɛ gɛ lɛ yahwɛ tsyɛ ba ba yɛkɛ lɛ nɛ yahwɛ.

²⁷ Pɔ ba gɛ bata pɛɛ mɛ bui gɛ ba dɛ pɛɛ sɛ tɛ ɛŋa balɛabha—gbanɔ balɛ ɔmɛna ɔkɛ̃ tɛ oyi alɛ nɛ mɛ amɛ.’ ”

Yerusalɛm Vɛvɛ Nɛ Samesame

²⁸ Gɛ Yesu aɖɔ kibui nɛ beke, atɔnɛ kidzo, ashɛ̃ avɛ Yerusalɛm.

²⁹ Gɛ etsobunɔ Betfage anɛ Betani nɛ butuu gɛ beklu asɛ Olivɛ butu, akpɛ yɛ badɔkpasɛ tiabha, gɛ etsre alɛsɛ,

³⁰ Nɔ vɛ ɔma nɛmɛ gɛ lɔ lɛ wɔ otugba, no tsoku ɔlɛmɛ, nɔ bɔ mɔ kipuagaeyi gɛ ba kpaka nɛ ɔkɛlɛ, gɛ anɔnyanɔ aka za yɛ abha edi. Nɔ bule yɛ tɛ nɔ gbanɛ yɛ ɔmɛna ɔkɛnɛ.

³¹ Onugɛ anɔteli ebisi nɔ, ‘Kideso gɛ nɔ bule aga nɛ?’ nɔ tsre yɛ ɔsɛ, ‘Apalete nɛ yɛ apɛɛ yɛ.’ ”

³² Banɔ nɛ gɛ bakpɛ oputɔnɔ bavɛ klɛ bada mɔ aga anasɛ kɛ tsre nɛ gɛ etsre alɛ.

³³ Kibe lɛlɛ nɛ gɛ no bule ɔlɛ nɛ, be bisi balɛ asɛ, “kideso gɛ no bule yɛ?”

³⁴ Bebu shunu sɛ, “Apalete nɛ yɛ pɛ yɛ.”

³⁵ Bagbanɛ aganɛ amɛna Yesu, klɛ ba trɔ kɛdɔ nɛabha kɔ yɛ gɛ aza yɛ abha.

³⁶ Kidzo nɛabha gɛ aga vɛ, banɔ belu apɔtɛ nɛ kidzo nɛ mɛ kɔ yɛ.

³⁷ Klibe gɛ etsobunɔ ɔklɛ gɛ kidzo nɛ zhi vɛ Olivɛ Butu nɛ shu, badɔkpasɛ kɛha petee mɔ same nɛ Kpaya kpɛkpɛ abha nɛ igugu, nɛ ebuiyinɔanɔ nɛ gɛ bamɔ nɛ shu.

³⁸ “Baba ysula kɔ ekusi gɛ aba nɛ Apalete nɛ nyimɛ!” “Ishuyuyɔ ba nɛ Yɛ ɔzakɔ klɛ nɛ otugba vɛvɛ kɔ Kpaya nɛ owũsise.”

³⁹ Farisianɛ teli gɛ balɛ banɔ nɛ shi be tsre Yesu asɛ, “Adɔkasɛ, akɔ banɔ nɛ gɛ ba lɛ yɛ ede bazukɔlɔ igugu gɛ baa kpɛ!”

⁴⁰ Ebushnu aɖɔ sɛ, “Itsre nɔ sɛ,” “onugɛ bazukɔlɔ igugu, aklaŋgbu nɛ bakpɛ igugu.”

⁴¹ Gɛ etsobunɔ Yerusalɛm klɛ amɔ ɔma nɛ mɛ, ebiyo kɔ banɔ nɛ gɛ bakpasɛ ɔlɛmɛ

⁴² klɛ aɖɔ sɛ, “Ɔtɔ sɛ nonyi tsyɛ sɛ, kɛ gɛ ba mɛna nɔ ishuyuyɔ ba mɛna nɔ obowui nɛa bha. Pɔ ɔtsɔnɛ kikpu kɔ nɔ awɔ̃hu.

⁴³ Kiwui tili baa ba gɛ banɔ nɛ gɛ bata pɛɛ wɔnɔɛ bui baa bhɔ okpo kana nɔ klɛ ba ba gbanɛ nɔ akpɛ buka mɛ nɛ kapɛnyɛapɛ mɛ.

⁴⁴ Bebe bu nɔ ehuesi wɔnɔ nɛ wɔnɔ yialɛ nɛ ɛnɔ edri nɛ mɛ. Batɛ ba shɛnahwɛ kɛklãgbu kanyaka ɔtrɔ kɛklãgbu abha, alasɛ nɔ dɛ mɔ Kpaya tɛ bɛ baa.”

Yesu Nɛ Kpaya Buvu Nɛ Mɛ

⁴⁵ Klɛ etsoku busɔlɛvu nɛ kɛma mɛ klɛ etenɔ banɔ nɛ gɛ baa dɛ dɔ nɛ buvu nɛ mɛ akɛka.

⁴⁶ Aɖɔ etsre alɛ sɛ, “Ba ŋlɔmɛ asɛ,” “ ‘Mɛ buvu bunu kpayaoklukɔ pɔ nɔ yɛkɔ ɔklɛ ɔbhɛtɛ ‘bezi ɔkpukpu kɔ.’ ”

⁴⁷ Kibenyɛbe akasɛ kɛdɔ nɛ buvu nɛ mɛ. Pɔ banɔ gbɛgbla, ɛshã badɔkasɛ nɛ banɔ nɛ gɛ balɛ banɔ nɛ nu ba pɛɛ sɛ tɛ be yi yɛ.

⁴⁸ Pɔ ba dɛ mɔ kidzonyɛdzo abha gɛ ba baga abhɛtɛ lɛ, alasɛ banɔ nɛ petee ba ta tɔ nɛ yɛ buɖɔ nɛ gɛ aɖɔ.