Luka 18 - ONUGBÙ NYƐNYÃ VUVƆ

Kɛkpalɛ Denɔ Anyɛtsi Shishe Shu

¹ Ɔkɛlɛ Yesu akpɛ kɛkpalɛ akɔ badɔkpasɛ na sɛ tɛ baza kpayakuklu abha kibenyɛbe klɛ tɛ ba tɛ kɔɛ tɔkpu.

² Aɖɔasɛ, “Nɛ ɔma toli mɛ, ebhuiklu teli aza gɛ edi si Kpaya fu klɛ edibu anɔnyanɔ bui.

³ Klɛ anyɛtsi teli aza ɔma nɛ mɛ gɛ aza lɛabha adɛ ebhuiklu nɛ kɔ nɛ kɛtɔkpuesi kukɔ sɛ, ‘Bu mɛ tsya nɛ agɛ ayɛkɔ kibui nɛ mɛ shu.’

⁴ “Nɛ kibe tili mɛ ebhuiklu nɛ adɛ dɛmɛ. Pɔ gɔgɔ aɖɔ nɛ yɛ shu me asɛ, ‘Kɛlɛlɛmɛ sɛ ɛtɛ si Kpaya fu ɔdɔgɔsɛ ɛyɛkɔ nɛ anɔ teli bui mɛ,

⁵ pɔ kiwui lɛlɛ nɛ gɛ adzɛ anɛ etsri lɛabha akpɛ mɛ nuhu, ɛba di lɛ ɔkɔ sɛ ayɛkɛ yɛ butsya, sɛ tɛ ayulɔ mɛ bunuhu kpɛ!”

⁶ Klɛ Apalete nɛ aɖɔ se, “Tatɔ nɛ ebhuiklu tsutɔmɔ anɛ kibui gɛ aɖɔ.

⁷ Klɛ ɔyɛkɛŋa sɛ Kpaya atɛ bamɛna kebhuikuklu dzyɔgo kɔ yɛ banɔ kuklu, gɛ ba kpɛ ogugu kɔ yɛ kelizɛza anɛ elishi? Aba za eze di alɛ ana ko?

⁸ Itsre nɔ sɛ, ebedi sɛ ba yɛkɛ kebhui kuklu dzyɔgo nɛ zia. Pɔ onugɛ Anɔdzyrame Yi aba, aba mɔ tɛyɛyɛkɛŋa nɛ kesukpa nɛabha?”

Kɛkpalɛ Denɔ Farisi Eyi, Anɛ Adɔdzyɔ Shu

⁹ Kɔ ba ga yɛkɛ ishuabhaŋa nɛ balɛ kɛdzyɔgo bhɛbhɛtɛ klɛ be di anɔnyanɔ sɛ ama kibuinyɛbui mɛ, Yesu akpɛ kɛkpalɛ nɛ sɛ:

¹⁰ “Banɔ tiabha wu avɛ busɔlɛvu mɛ sɛ tɛ ba de klukpaya, terikpo enu Farisi eyi klɛ abhla enu adɔdzyɔ.

¹¹ Farisi eyi alɔɛ titi klɛ eklukpaya kɔ ishu sɛ, ‘Kpaya! ɛhu wɔ ahwɛ sɛ, etidzi anasɛ banɔ bhlatɔ—bezi, ebuikpãbhɛtɛ, ɔmamɛadɛdɛ—pɛnɔ anasɛ adɔdzyɔ anɛ di.

¹² Ɛnyaonugbu ɔgɔnɛ torikpo anya tabha, klɛ ɛkɔ tirikpo nɛ kɛfɔ nɛ gɛ lɛ mɛ ahwɛ.’

¹³ Pɔ adɔdzyɔ alɔɛ titi nɛ odzidze kɔ. Edi bu amɛ akpɛ kabha edi owũsise kuratsyɛ, pɔ edzu ahwɛ nɛ te mɛ klɛ aɖɔ sɛ, ‘Kpaya di mɛ eshutukubui, anɔzizi mɛ nu.’

¹⁴ ‘Etsre nɔ se anyanɛ, anɛ Farisi anyɛ, avɛ bupa mɛ ɛku Kpaya awɔ̃. Alasɛ anɔnyanɔ gɛ efeke shu ba bɛ zhinɔ yɛ, agɛ ezhinɔ shu ba be feke yɛ owunɔ.”

Banuvɔ Bhlibhli Anɛ Yesu

¹⁵ Banɔ bà mɛna bunuvɔɛ tsyɛ nɛ Yesu ɔbha sɛ tɛ ehunɔ alɛ. Gɛ yɛ badɔkpasɛ nɛ amɔ anɛ nɛ, ba kpa alɛ.

¹⁶ Pɔ Yesu eklu bunuvɔɛ amɛna yɛ ɔbha klɛ aɖɔ sɛ, “Kɔ bunuvɛɔɛ bhlibhli nɛ ba mɛ ɔbha, klɛ nɔ tɔ tsodzi nɛ alɛ, alasɛ Kpaya bukusiɔŋakɔ lɔ lɛ kɔ ba nɛ anasɛ kɛnɛ.

¹⁷ Itsre nɔ kɛbui gbɛagba, anɔnyanɔ nɛ gɛ atɛ bayɛkɛ Kpaya bukusiɔŋakɔ anasɛ anuvɔ bhliyi, eti be tsoku bulɛ mɛ.”

Kabhaŋɛŋa Ehuelete

¹⁸ Kabhaŋɛŋa anɔ teli ebisi Yesu asɛ, “Adɔkasɛ Dzyɔgo, kide mɛ babhɛtɛ gɛ ɛba mɔ kpã mabeke mabeke?”

¹⁹ “Kideso gɛ oklu mɛ sɛ adzyɔgo?” Yesu ebuilɛnu sɛ, “Anɔnyanɔ edinu adzyɔgo, ɔyɛkɔ dɛ sɛ Kpaya.

²⁰ Onyi ɛshã: ‘Tɛ dɛ ɔmamɛ, tɛ yianɔ, tɛ zuru, tɛ dzi otro ebuimɔɖɔ, ta wɔ aka nɛ wɔ eni atɔ.’

²¹ Anyɛ nɛ aɖɔ sɛ, “Anɛ nɛ petee ɛbhɛtɛ alɛ denɔ kibe lɛlɛ nɛ gɛ ɛnu anyɛnuvɔɛ.”

²² Gɛ Yesu enu kibui nɛ, aɖɔ etsre yɛ asɛ, “Kɛdɔ tirikpo ka gɔ kɔ wɔ. Dɛ kɛdɔnyɛdɔ gɛ kɛ lɛ wɔ ahwɛ tɛ ɔyɛkɔ kɔ betsutsuini, klɛ ehoeyi ba za wɔ ahwɛ nɛ owũsise. Nɛlɛede ba bɔ za mɛede.”

²³ Gɛ enu bui nɛ, amɔ oblo gɛganɛ, alasɛ enu anɔ gɛ ehoeyi alɛ ya hwɛ gelee.

²⁴ Yesu edi yɛ klɛ aɖɔ sɛ, “Kɛlɛ lɛ bagɛganɛ kɔ ehuelete tɛ etsoku Kpaya bukusiɔŋakɔ!

²⁵ Kɛgbɛagba kɛ ba za bubɔɛ kɔ kipuaga tɛ aga kɛtsa ozimɛ okoeyi, dɛ ehuelete te etsoku Kpaya bukusŋakɔ.”

²⁶ Bagɛ nu kibui nɛ be bisi asɛ, “Ane ɔtsɔnɛ ba be bhui ayɛkɛ?”

²⁷ Yesu ebushunu asɛ, “kɛdɔnɔ nɛ gɛ gɛganɛ kɔ banɔ kɛ dɛ gɛganɛ kɔ Kpaya.”

²⁸ Petro aɖɔ tsre yɛ asɛ, “Bu shɛnahwɛ bulɔ dɔnyɛdɔ gɛ lɛ bulɛ ahwɛ shu lu gɛ bu lɛ wɔ ede!”

²⁹ Yesu etsre alɛ sɛ, “Itsre nɔ kɛgbɛagba sɛ, anɔnyanɔ ama gɛ ashɛ̃alɔ yɛ bupa, yɛedzini, yɛ adzyalɛ yɛ eni nɛ yɛ aka pɛnɔ ye yialɛ kɔ Kpaya bukusiɔŋakɔ so

³⁰ ba tɛ ba mɔ ayɛkɛ gelee nɛ kibee nɛ mɛ anɛ kibe nɛ gɛ tɛ ba nɛ ɛkpã gɛ tɛ ba beke mɛ.”

Yesu Aza Ɖɔ Yɛ Tɛtsitsi Bui

³¹ Yesu eklu yɛ Balɔfɔnɛtɛabha eyinɔɛde klɛ etsre alɛ sɛ, “Bu wu vɛ Yerusalɛm, klɛ kɛdɔnyɛdɔ gɛ batɔnu nɛ aŋlɔmɛ denɔ Anɔdzyrame Yi nɛ shu, kɛbabɛ lɛ mɛ.

³² Ba ba yɛkɔ yɛ akpɛ ahwɛ kɔ ba gɛ be dinu Yuɖanɛ. Balɛ ba ba kpɛ yɛ tsyɔ, ba kula yɛ, ba be bututu ata yɛ, ba be tu yɛ, klɛ ba be yi yɛ.

³³ Nɛ kiwui tramɛ nɛabha azia nyɛmɛ.”

³⁴ Badɔkpasɛ be dinu kibui kanyakaɛ nɛ esi. Kɛlɛesi nunu dzi kibui kpukpu kɔ alɛ, klɛ be di ti kibui nɔ nɛ shu gɛ àɖɔaɖɔ denɔ.

Awɔ̃hupupu Adɔbisi Ayɛkɛ Yɛ Awɔ̃hudɛdanɛ

³⁵ Gɛ Yesu etsobunɔ Yeriko, awɔ̃hũpuelete teli aza kidzo nɛ shu ebisi dɔ.

³⁶ Gɛ enu banɔɛza gɛ ba ga fla, ebisi asɛ kide klɛ vɛ lɛa bha.

³⁷ Be tsre yɛ asɛ, “ Yesu gɛ ede Nazarɛtɛ yɛ afla.”

³⁸ Akpɛ ogugu gɛganɛ asɛ, “Yesu, Daviti ye Yi, di mɛ eshutukubui!”

³⁹ Bagɛ be putɔ avɛ ba kpa yɛ klɛ be tsre yɛ asɛ ekulenu, pɔ aza kpɛ ogugu gɛganɛ dɛ ana sɛ, “ Daviti yɛ Yi, di mɛ eshutukubui!”

⁴⁰ Yesu adzrɔ klɛ akɔ sɛ ba gbanɔ anɔ nɛ amɛna yɛ. Gɛ etsobunɔ yɛ, Yesu ebisi ya sɛ,

⁴¹ “ Kide wɔ pɛɛ sɛ tɛ ɛbhɛtɛ kɔ wɔ?” Anyɛ nɛ ebu ishu nu asɛ, “Apalete, Ɛpɛɛ sɛ tɛ ɛmɔ̀.”

⁴² Yesu etsre yɛ asɛ, “Kɔ wɔ awɔ̃hu nɛ ladanɛ, wɔ tɛyɛyɛkɛŋa na kɔ wɔ shu bhui.”

⁴³ Kplita yɛ awɔ̃hu nɛ ladanɛ klɛ atɔnɔ Yesu, klɛ akpɛ Kpaya nyi nɛ abha. Gɛ banɔ petee amɔ lɛ, balɛ tsyɛ bakpɛ Kpaya nyi nɛabha.